المظلات القماشية خسارة بدون فاعلية [الأرشيف]

مشاهدة النسخة كاملة : المظلات القماشية خسارة بدون فاعلية

معماري قطري

22-02-2018, 09:27 AM

في هالجو اللندني لو نزل مطر على هذي المظلات اللي تجمع الغبار بتنزله صلصال على السيارات لأن غالبيتها إن لم تكن كلها لا تمنع نفاذ الماء

الملاحظ إن أي مول جديد أو وزارة ليس لديهم خيار الا هذي المظلات وحتى بعض الاستشاريين يرسمونها في الخرائط .. علماً بأنها مكلفة وأغلى من الحديد أو المعدنية .. الشكل حلو لكن ينفذونها مرتفعة والشمس تدخل على أجزاء كثيرة من السيارة .. وكذلك لا يخلو مكان من كم وحدة اهترئت وتقطعت بسبب الشمس والهواء ولا حد يصينها أو يستبدلها ولا أعتقد ضمانها يطول

من جهة أُخرى هناك تصاميم كثيرة بعضها بوزن خفيف وبعضها هيكل انشائي ثقيل مبالغ فيه .. بعضها بواجهة معمارية تغطي الحديد ومنظره في الخلف مثل الجي ار سي وغيره من مواد .. حتى القماش ممكن استعماله للواجهة والسقف يكون حديد

عندنا الكي سبان والكويك سبان وكلها ماركات وتسميات لنوعية الحديد المضلع واللي ما يتطلب تدعيم كثير ويكون حامل لنفسه أكثر من العادي وشكلها مقبول حتى بدون تجميل وعملية وتدوم لسنوات طويلة وغير منفذة للماء

ملاحظة لاحظتها وحبيت اوضحها للكل حتى ما يغتش وللمسؤولين يحاولون تدارك الأمر ويتركون الحرية للجهات في اختيار النوعية الأفضل

في السابق حاول أحد الوكلاء بالحاح ادخال هذه الخيام المشققة في الجهة اللتي أعمل فيها ورفضت رفضاً قاطعاً وحذرت من مساوئها ولحسن حظي تم تفهم موقفي وتم اعتماد الكي سبان لتجربتنا القديمة معه ولبقاؤه ما يقارب أو يزيد على ال 50 سنة لمخازن وليست مظلات فحسب

حمــد

22-02-2018, 09:50 AM

كلامك عدل 100%
انا صراحه من اول ما استخدمت في الدوحه
وانا مب مقتنع فيها نهائيا واستغرب من يلي يركبها

معماري قطري

23-02-2018, 12:29 AM

كلامك عدل 100%
انا صراحه من اول ما استخدمت في الدوحه
وانا مب مقتنع فيها نهائيا واستغرب من يلي يركبها

البعض يبالغون اخوي حمد في تقوية المظلات بكميات حديد وأساسات وكأنه بيبني عمارة لذلك السعر يرتفع فوق .. لا وتصاميم ما ادري كيف وينسون الغرض المهم منها وهو تظليل وحماية السيارة من الشمس والمطر ونقدر نضيف حتى الغبار لو سويناها مغلقة

سوينا مرة وصراحة واحد غيري خططها ونفذها في مقر عملنا الأسبق بمقاس كبير لعدد كبير من السيارات بالعشرات بحدود 30 سيارة يمكن .. بدال الحفر تم تركيب بليتة حديد صغيرة وتثبيتها ببراغي في الأسفلت .. وكثير من المختصين قالوا بيطيرها الهواء لأنها في ساحة مكشوفة وتثبيتها على مادة لينة اللي هي الأسفلت .. جاء هواء قوي مرات عديدة وكنت مصدق إنها قد تتحرك أو تنتزع من مكانها لكنها ما زالت ثابتة للآن

كشكل الشكل مقبول وممكن يجمل بعدة طرق منها حتى تلبيس الواجهات والأعمدة بتشكيلات اسمنتية وقد صورت مظلة في بيتي عملتها بهذه الطريقة ولها صور في المنتدى سابقاً .. ثبتها بنفس الطريقة ببراغي في البلاط وفي الحائط .. قال لي من اشتغل عليها إنه غير مسؤول وينفذ حسب طلبي قلت له اتحمل المسؤولية

التكلفة كانت 10000 وتكفي لأربع سيارات بشوية ضيق و ثلاث مبحبحة .. اوقف فيها 3 ويعطينا سعر 3333 معدل سعر السيارة أو 185 ريال للمتر المربع على فرض مساحة وقوف السيارة 3 في 6 والسعر شامل التجميل بالإسمنت وبتشكيلات شجرية وحجرية .. وحاب اعرف تجاربكم وتكلفة المتر عندكم ووشي اجراءات الشغل والتأسيس كيف لو حد مر بالتجربة

SouthK

23-02-2018, 10:10 AM

صدقت اخوي معماري .. ما صرت اغسل المواتر بسبب الغبار!

معماري قطري

23-02-2018, 03:50 PM

صدقت اخوي معماري .. ما صرت اغسل المواتر بسبب الغبار!

مركب قماشية إنت؟

بوخالد911

26-02-2018, 01:37 PM

ناس تحب الرخص !!!

أنا ركبت كويك سبان وضمان 10 سنوات.

معماري قطري

27-02-2018, 09:49 AM

ناس تحب الرخص !!!

أنا ركبت كويك سبان وضمان 10 سنوات.

القماشية غالية ويمكن أغلى من الكويك سبان بس عيوبها كثيرة والناس مغتشة فيها وما ادري ليش الجهات الحكومية المختصة تفرضها فرض في بعض المناطق خصوصاً للمجمعات التجارية

معماري قطري

27-02-2018, 09:52 AM

بالمقابل مشوهة المنظر كثير بعد ما تتقطع وتنترك بدون صيانة وتبديل ومثل ما ذكرت قبل وقت المطر ينزل الغبار مثل الصلصال على السيارات

شموخ دائم

28-02-2018, 02:19 PM

,

,

مرحبا

شكرا على الموضوع

بلاشك ان الكويك سبان هو الأفضل وتعيش اكثر ومافيها تسريب

اخوي معماري انا زمان ركبت القماش ولكن من حسن حظي ان القماش ( ضد الماي )
ما ينزل منها غبار مع المطر وتوسخ السياره

واتفق معاك الكويك سبان هي الأفضل لجو قطر

http://www.dohakwikspan.com/wp-content/gallery/products/36.jpg

,

,

بعيد النظر

01-03-2018, 09:17 AM

معماري قطري

01-03-2018, 02:28 PM

مرحبتين بالقاطع شموخ دائم وين هالغيبة يا اخوي

البيت اللي حطيت صورته مظلته حلوة بس لو مسويها أعرض شوي تنشبك مع زاوية البيت ومنزلها شوي بتظلل أكثر .. ولو محرك باب البيت يسار بيستوي وقوف السيارات بزاوية ويمكن تكفي لثلاث سيارات جنب بعض .. وقت الخروج ترجع ريوس وتكسر يسار وتطلع السيارة من المقدمة

اليوم في مستشفى حمد أشوف المظلات وصورت وحدة متقطعة وغالبيتهم أما مرتخيين ومغبرين أو متفككين من الأطراف أو ممزوعين .. وباحط الصورة لاحقاً إن شاء الله

معماري قطري

01-03-2018, 02:34 PM

قواك الله يالمعماري ..

الله يسلمك انا مركب قماش وكويك سبان ..
القماش صراحة تلعوز وتبهدل .. بس ركبتها من 8 سنين يمكن ! او اكثر ..
المهم مرة صنفت وكلمت اللي ركبلي .. وجاني نفس الشخص ..
وشرحتله اني مب مستفيد منها .. المهم انه فصلي نوعية قماش ثاني ..
للأمانة ما يخر من المطر .. بس المشكلة الغبار !

اما الكويك سبان فهو افضل من القماش بمراحل ..
ما تحاتي أي شي تحته .. وانا افضل ان المضلة تكون نازلة ..
لانهم يرفعونها بشكل مبالغ ما تستفيد منها ..

ويعطيك العافية

الله يعافيك ويبارك فيك اخوي بعيد النظر

عندي مظلة يا اخوي سويتها حديد عادي وطلعت وايد أرخص من الكويك سبان ولبستها اسمنت مشكل واستوت تخدع تبين حجرية ولا تحتاج صبغ لأن حديدها استوى مغطى بطبقة بلاستر كبيرة وبتشكيلة شجر وحجر .. سويتها نازلة وايد قبل لين جيت ادخل سيارة مرتفعة كنت اخاف تحك من فوق ولين طلعت من الجنب مسويها أنزل بعد حتى تظلل يضرب عقالي في الواجهة المشكلة .. باصورها بعد إن شاء الله

Riku3

21-03-2018, 02:17 PM

البعض يبالغون اخوي حمد في تقوية المظلات بكميات حديد وأساسات وكأنه بيبني عمارة لذلك السعر يرتفع فوق .. لا وتصاميم ما ادري كيف وينسون الغرض المهم منها وهو تظليل وحماية السيارة من الشمس والمطر ونقدر نضيف حتى الغبار لو سويناها مغلقة

سوينا مرة وصراحة واحد غيري خططها ونفذها في مقر عملنا الأسبق بمقاس كبير لعدد كبير من السيارات بالعشرات بحدود 30 سيارة يمكن .. بدال الحفر تم تركيب بليتة حديد صغيرة وتثبيتها ببراغي في الأسفلت .. وكثير من المختصين قالوا بيطيرها الهواء لأنها في ساحة مكشوفة وتثبيتها على مادة لينة اللي هي الأسفلت .. جاء هواء قوي مرات عديدة وكنت مصدق إنها قد تتحرك أو تنتزع من مكانها لكنها ما زالت ثابتة للآن

كشكل الشكل مقبول وممكن يجمل بعدة طرق منها حتى تلبيس الواجهات والأعمدة بتشكيلات اسمنتية وقد صورت مظلة في بيتي عملتها بهذه الطريقة ولها صور في المنتدى سابقاً .. ثبتها بنفس الطريقة ببراغي في البلاط وفي الحائط .. قال لي من اشتغل عليها إنه غير مسؤول وينفذ حسب طلبي قلت له اتحمل المسؤولية

التكلفة كانت 10000 وتكفي لأربع سيارات بشوية ضيق و ثلاث مبحبحة .. اوقف فيها 3 ويعطينا سعر 3333 معدل سعر السيارة أو 185 ريال للمتر المربع على فرض مساحة وقوف السيارة 3 في 6 والسعر شامل التجميل بالإسمنت وبتشكيلات شجرية وحجرية .. وحاب اعرف تجاربكم وتكلفة المتر عندكم ووشي اجراءات الشغل والتأسيس كيف لو حد مر بالتجربة
راسلتك في 2015 وما قصرت معاي في الشرح بخصوص هالموضوع الله يجزاك خير ! ..

وقتها وصلت بالكويك سبان لسعر 160 للمتر مع سمك 80 .. بس مب الشركة الي انت قلتلي عنها لان عطوني دبل السعر @___@ ..

الرقم 160 للمتر جبته من الرسالة الخاصة الي ارسلتها لك .. بس ما اذكر كم وقعت العقد اخر شي بعد المفاوضات خخخخ .. دورت العقد بس ما حصلته :/ .

معماري قطري

21-03-2018, 02:59 PM

راسلتك في 2015 وما قصرت معاي في الشرح بخصوص هالموضوع الله يجزاك خير ! ..

وقتها وصلت بالكويك سبان لسعر 160 للمتر مع سمك 80 .. بس مب الشركة الي انت قلتلي عنها لان عطوني دبل السعر @___@ ..

الرقم 160 للمتر جبته من الرسالة الخاصة الي ارسلتها لك .. بس ما اذكر كم وقعت العقد اخر شي بعد المفاوضات خخخخ .. دورت العقد بس ما حصلته :/ .

زين اللي توفقت والأزين إنك سئلت وسمعت النصيحة

البعض يا اخوي يغتشون وينخدعون بكلام المسوقين .. ليش ما شفنا مثل هالمظلات في دول فيها عقول هندسية مثل ألمانيا ومثل أمريكا وغيرهم من الدول المتقدمة ؟

في ألمانيا شفت مبنى دورين وتعجبت من خفته مركبين حديد مموج وفوقه صبية خرسانة بسيطة توقف فوق سيارات وتحت أعمدة حديد .. صدقني وانا تحته أخاف يطيح من خفته .. الجاذبية نفس الجاذبية في كل العالم والأرض قوتها ما تدخل في اللي فوقها تدخل بس في الأساسات

انا طبيلة الكي سبان 12.5 في 8 متر وكانت بتكلفني 12000 لكن خفضت التكلفة بإلغاء الأعمدة والتأسيس .. ركبتها على سور البيت من طرف والطرف الثاني ببراغي على حائط الفيلا وحاولت اثبت البراغي قد ما اقدر في خرسانات الأعمدة والجسور .. تكلفتها بدون أعمدة طلعت لي بحدود 8500 على ما اذكر وطلعت زينة بس ارتفاعها عالي .. من الأطراف حول 2.8 متر ومن الوسط 4 متر .. لو باركبها ألحين باخليه يقلل التقوس وباجهز جسر خرسانة في الطوفة على ارتفاع 2 متر بدال فوقها على 2.8 متر .. وباحاول اكسب نزول في الوسط حول 1.2 متر بحيث يكون ارتفاع القوس 2.8

إن شاء الله باصور فيديو مع الشرح حتى الكل يستفيد

وهذي المباني الخفيفة تنفع كثير لكراجات ومخازن وحتى مباني حديثة لمكاتب وغيره ومعارض .. زرت مصنع الكترونيات في ألمانيا كان كله أعمدة دائرية حديد وجاي بدال سقف واحد بسلوبين من الجوانب جاي مسنن يعني الماء يجري في مجاري وسطية .. ومسوين فيه أجزاء فيها بلاستيك يدخل نور الشمس والأعمدة مجوفة لتنزيل مياه المطر .. المبنى صراحة تحفة ومعطينه شوية ارتفاع مسوين ساحة العمل موزعة توزيع جيد أُفقي مع شوية استغلال للمساحات الرأسية

جنبه مسوين مبنى راقي إداري وحوله بحيرة ينزل عليها شلال صناعي من جوانب قوس يمثل مدخل الشركة وعليه شعار واسم الشركة .. البحيرة فيها أسماك بنوعيات مختلفة وجلسة خارجية حولها للمدخنين مع جلسة زجاجية محمية شبه داخلية بعد للمدخنين لوقت الجو البارد والبحيرة تمر على الجلستين

المبنى الاداري من ثلاث أدوار الدور الثالث للمالك والمدير وتحته للادارات وتحت للبقية .. والحلو مخازن الشركة مقابلة تقطع شارع ضيق وتوصلها

معماري قطري

06-04-2018, 05:39 AM

هذي صورة للي في مواقف مستشفى حمد .. مثال وهذي مرتخية وغيرها مقطعة

أمس في مواقف فيلاجيو ثنتين حديد خالي بدون طربال ويا مكثرهم

https://i.imgur.com/uCeIf45.jpg

معماري قطري

06-04-2018, 06:05 AM

مثل ما وعدت نزلت فيديو بتعليقي والله يعينكم على تعليقي وايد اقطع

هذا لنوعين من المظلات وممكن نسوي خشبية بس كل نوع يحتاج تفاصيل وشغل .. كذلك الخرسانية والطابوقية ممكنة لكن يستحسن نسوي سقفها حديد تطلع أوفر والمهم الواجهات .. نقدر نسويها بباب بكهرباء يفتح ويسكر لأعلى ونقدر نخليها مطلة على صالة أو مجلس بزجاج للسيارات الفارهة

https://youtu.be/hGyI9W5622w

SouthK

06-04-2018, 03:50 PM

معماري قطري

06-04-2018, 07:04 PM

شي مرتب بصراحة!

الأرضية شوي قدمت وافكر في استبدالها أو صبغها بايبوكسي بس مهما يكون الصبغ واللون بيسود مع دوس التواير .. عاجبني اللون الأحمر اللي استعملوه حق الدوار شرق فيلاجيو وأكيد تكلفته بتطلع خيالية .. لو حد يعرف من يسويه يقول لي بتواصل معاهم وبشوف عرض سعرهم

للزراعة أفكر اركب على الطابوق بلاط مزخرف ومنه اركب نعلات على حائط البيت

اللي حطيته مثال وأهم شيء نقلل الأعمدة قد ما نقدر لأنها تعرقل دخول السيارات ويمكن تندعم .. اللي محتد يركب عمود نصيحة ليركب حديد يسويه طابوق حتى يقدر يحط طابوقتين جنب بعض ويخالفهم مع اللي فوقهم ويصب داخل فتحاتهم مونة اسمنت ورمل وكنكري لو حب .. اسمنت ورمل كفاية بمقدار 1 اسمنت و 2 رمل أو حتى 3 .. ولو حط صيخ حديد أي قطر مب غلط .. يقدر يسوي عليه بلاستر بفرزات ونقشات حسب رغبته أو يركب عليه حجر ويسوي هيكل حديد فوق وحتى ممكن يغطي مسافة 12 متر بدون عمود وسطي .. و 12 متر لكل سيارة 3 متر بتكفي 4 سيارات جنب بعض .. ولازم يسوي حديد مشبك Truss للواجهة ( جملون بالعربي ) هذا الحديد يغطيه بعد باللي يبي حتى بالحجر ممكن لو ركبنا عليه شبك وحطينا بلاستر وثبتنا عليه الحجر

القماش ممكن نستعمله للواجهات والتغطية الجانبية لكن للسقف ما يسوى

Riku3

07-04-2018, 06:50 PM

هذي صورة للي في مواقف مستشفى حمد .. مثال وهذي مرتخية وغيرها مقطعة

أمس في مواقف فيلاجيو ثنتين حديد خالي بدون طربال ويا مكثرهم

https://i.imgur.com/uCeIf45.jpg

من اسبوع شفت في المواقف الخارجية القليلة في وزارة الاقتصاد في لوسيل .. ما اعتقد كملت سنتين ومشقوقه ! .

معماري قطري

08-04-2018, 02:29 PM

من اسبوع شفت في المواقف الخارجية القليلة في وزارة الاقتصاد في لوسيل .. ما اعتقد كملت سنتين ومشقوقه ! .

غش وتشويه للمنظر وما تسوى والمفروض تمنع للأماكن العامة

شفت في مستشفى رميلة نوعية ثقيلة جداً أعمدتها آي بيم من النوع الكبير ولا فيه تناسب مبالغة كبيرة والمفروض المظلات تكون مدروسة صح ومناسبة وغير مكلفة وكذلك عملية وجميلة بدون مبالغة

فرفوش

26-04-2018, 03:38 AM

ولد العرب

26-04-2018, 07:54 AM

اي والله كان عندي مظله تجمع غبار لين شلتها وارتحت

والكويك وايد اريح

سؤال ياشباب ساتر الخشب البلاستيكي زين ولا

بركبه للواجهه الاماميه ماشاءالله عليهم الجيران حسبالهم ع الكورنيش قاعدين خخخ

لا مهب زين الساتر الخشبي ضمان عشر سنوات وتبن في وجيههم :anger2:
الوووو ياشركه طاح تكسر تغيرر لونه تعال بدله
يرد عليك ليش متضايق عندك الضمان بركبه لك
يجيك عقب شهر شهرين يالله رحمتك
شلته كله كله
وجبت ولد من الصم والبكم فلسطيني ذكي قطع لي شرايح حديد خفيفه وركبها مكان الخشب المتعوس عطاني منظر وقوه وصار لي تقريبا مركبه من 4 شهور اعتقد او 3 شهور
ومرت علينا هالايام هواء قووي والحمد الله اموره طيبه
جررررب هالشي حديد لا يتاثر بالشمس ولا رطوبه وبعد كم سنه ممكن يتغير لونه وانت عليك صبغه
اما الخشب تجربه فااااااااااااااااااااااااااااااااااااااااااااااااا اااااااااشله

معماري قطري

17-05-2018, 01:24 AM

ولد العرب في دارنا يا مرحبا يا مرحبا

الخشب الله يسلمك لو حد حاب يركبه يركب دنجل أو خشب قاسي يقاوم العوامل الجوية .. وأفضل يخليه على طبيعته أي صبغ أكيد بيخترب .. الدنجل نحميه من تحت من الرطوبة أو الدفان بنايلون انا لاف الخشب بأكياس نايلون ودافنهم في طين الزراعة للتثبيت وله سنين طويلة عايش

مسوي حاجز للزراعة حطيت صور له كم مرة دنجل ومربط عليه بحبال بنية خوص مسويه مثل المشربية انا والدريول بروحنا ما كلفني شيء

شفت في ألمانيا بنيان حديث حاطين خشب مثبت على حديد مغلفن وطالع شكله حلو .. الحديد يرفع الخشب عن الأرض والرطوبة ويثبته كذلك

هذي صورة واللي فوق خرسانة مكشوفة بدون صبغ

https://i.imgur.com/wIuGt0T.jpg

sweet qatar

17-05-2018, 10:20 AM

انا احب المظلات القماش شكلها أحلى

لكنها فعلا مب عملية

اشوف مظلات البولي كربونايت أحسن شي

بومحمد المطاوعه

17-05-2018, 11:21 AM

ماتسوى ريااااااااال هالمضله

معماري قطري

17-05-2018, 12:08 PM

انا احب المظلات القماش شكلها أحلى

لكنها فعلا مب عملية

اشوف مظلات البولي كربونايت أحسن شي

صحيح فاتتني البولي كاربونيت جديدة بعد طالعين بها وتعطي ظلال مع نور خفيف

ميزة البولي كاربونيت إنه عازل للحرارة لفوق 10 أضعاف عزل الزجاج وفيه منه ألوان

البولي كاربونيت مادة خفيفة وألحين يصنعونها قوية وتعيش لفترة طويلة لكن المشكلة في فريم التثبيت وايد يبالغون فيه وفي حجمه .. لو يسوونه تيوبات خفيفة بيطلع أجمل وأوفر في التكلفة وتثبيته ما يحتاج أساسات قوية ويقدرون يعتمدون البراغي لسهولة التثبيت بلا تكسير

معماري قطري

17-05-2018, 12:14 PM

ماتسوى ريااااااااال هالمضله

صادق

من زمان زارني أحد المسوقين وهو مالك حق وحدة من أُولى الشركات وحاول يقنعني باستخدام منتج شركته .. كانت فيه قناعة عند البعض لكن انا مركز على ديموموتها وخدميتها وبعدين هي مب رخيصة .. وإحنا كجهة عمل نسوي آلاف المظلات .. زعل يوم شافني معارض وطلعت له عيوب مظلاته لكن يهمني شغلي يكون صح

الظاهر مثل هذا الشخص كثيرين سوقوا لهذا المنتج وشبيهه في البلاد بالعرض والطول ومشت السالفة على بعض المسؤولين وبدينا نشوف مساوئها ألحين بعد ما انتشرت في كل موقف حكومي أو خاص

معماري قطري

17-05-2018, 12:17 PM

بالنسبة للبولي كاربونيت انا مسوي سقف حوض السباحة منها نوع جانبي محبب وبلون عادي ونوع طبقتين أزرق شبه شفاف فوق مخلوط مع أجزاء معدنية اللي نسميها الشينكو بالعامي وطلع وايد زين وله سنوات

بومحمد المطاوعه

17-05-2018, 12:31 PM

صادق

من زمان زارني أحد المسوقين وهو مالك حق وحدة من أُولى الشركات وحاول يقنعني باستخدام منتج شركته .. كانت فيه قناعة عند البعض لكن انا مركز على ديموموتها وخدميتها وبعدين هي مب رخيصة .. وإحنا كجهة عمل نسوي آلاف المظلات .. زعل يوم شافني معارض وطلعت له عيوب مظلاته لكن يهمني شغلي يكون صح

الظاهر مثل هذا الشخص كثيرين سوقوا لهذا المنتج وشبيهه في البلاد بالعرض والطول ومشت السالفة على بعض المسؤولين وبدينا نشوف مساوئها ألحين بعد ما انتشرت في كل موقف حكومي أو خاص

والله الطبيله القماش ماتسوى

الله المستعان ياخوي
لو طق مطر خذ وصاخه ع الموتر