منتجات دول الحصار في قطر! [الأرشيف] - منتديات شبكة الأسهم القطرية

shadad

01-03-2018, 01:54 PM

السلام عليكم ورحمة الله وبركاته
كيف الحال ؟
احين مو من المفترض ان دول الحصار ومنتجاتهم دامهم هم قاطعينها علينا ومضيقين علينا انها ما تدخل البلد؟ طيب عندي منتج لقيته ينباع في كارفور السيتي تاريخ انتاجه 12/2017 ( يعني بعد الحصار ) اشلون دخل هني؟ انا حتى صادني فضول افر الممنتج من ورا لاني اتذكر ان "نستله" الشرق الاوسط موقعها الامارات! افره الا القاه فعلا الامارات. يعني مصنع في شهر 12 ( عشان محد يقول مخزنينه من قبل ) وانباع هني. المنتج هو Nescafe classic الكوفي اللي يجي باكياس.

احد يقدر يدلني وين ابلغ عليهم؟

دينالي

01-03-2018, 02:19 PM

الشكوى لله شكله ماوقفو الا المراعي

شموخ دائم

01-03-2018, 02:21 PM

,

,

شكرا على الموضوع

تم مقاطعه المنتجات على شكل ( تدريجي ) حتى ما تسبب ازمه في قطر
وكان تعامل الدوله جدا ذكي بهذا الموضوع لهم الشكر

ما تقدر بين يوم وليله تمنع كل شي ( وما عندك البديل ) توفر البديل احتاج الى شهور من التعاملات والاتفاقيات
ولازم تعطي التجار فرصه يبرم الاتفاقيات
ويبرم طريقه الشحن وإيجاد خطوط شحن بديله

منتجات كثيره متواجده وسهل إدخالها

مثل التمور الزينه من وين بيجيبها التاجر ؟؟؟

السكري والصقعي والشيشي والخلاص

من السعوديه يغير اسم المنتج ويبيعها لاخوانا التجار في الكويت او عمان
ومن هناك تدخل بشكل ( قانوني ) الى البلد وهو منتج سعودي
كلنا نعرف الكويت مافيها تمور سكري ولا خلاص بكميات كبيره

طيب شنو الحل !! لايوجد حل لهذه المسئله اذا تبي الصدق

طيب الشركات العالميه

نستله

توكس

كتكات

حليب أطفال الشركات العالميه

هذي لها مصانع في السعوديه والامارات فروع

ولكن صاحب العلامه التجاريه نستله هي شركه عالميه
لها مصانع بالشرق الأوسط

وشرق اسيا

وفي أمريكا

اعتقد ان الرقابه بقطر تغض الطرف عن الماركات العالميه مثل نستله

هناك طريقه

نجيبها من مصانعهم في ( ماليزيا ) وتشحن الى قطر

بيكون سعرها مرتفع اكثر لطول المسافه من ماليزيا الى قطر

الصناعات الي بدول الحصار

مثل المراعي
والعين
وهي منتجات محليه الصنع مقاطعتها سهله
اما الشركات العالميه مثل نستله مقاطعتها جدا صعبه لانها منتج عالمي وفي قوانين تنظم الاستيراد العالمي
تصدر الى دول لجوار وتدخل قطر

,

,

naklan

01-03-2018, 06:07 PM

طيب يا اخوان فيه تجار سعوديين وإماراتيين وبحرينيين
ليس لهم ذنب في ما قامت به حكوماتهم وضد الحصار ولهم أقارب في قطر
وتضررو شخصيا من حكوماتهم وضلمو فهل نقاطعهم*ارى
ان تبادل المصالح ليس له دخل في السياسة
وهم أبناء عمومة شئنا ام ابينا

Dana’1

01-03-2018, 06:21 PM

مو بس أغذيه حتى شعارات تخص الدول موجوده مثلا ( كبك )بشعار أحد الدول شبه الجزيره العربيه

إنت كمواطن لك الخيار تشتري او تتركه بالتالي اذا ماعليه اقبال ماعاد بيجيبون منه

الدوحه1

01-03-2018, 06:30 PM

بما ان مجلس التعاون الخليجي لازال قائما فهل يجوز قانونيا لاي دوله خليجيه منع استيراد البضائع الخليجية المنشأ ؟؟؟؟

بوNasser

01-03-2018, 06:37 PM

,

,

شكرا على الموضوع

تم مقاطعه المنتجات على شكل ( تدريجي ) حتى ما تسبب ازمه في قطر
وكان تعامل الدوله جدا ذكي بهذا الموضوع لهم الشكر
.
.
.
.
,

,

السلام عليكم ورحمة الله

اشكر لك ردودك الراقية، وأتفق معاك في كثير مما ذكرت
لكن اخوي

هناك بضائع أخرى غير التمور و البضائع العالمية ما زالت تصلنا من دول حلف الفجار بطريقة او بأخرى

مثلا امس في هايبرماركت كواليتي شفت عصاير طازجة تحت مسمى (( اوال )) ،وهذا الاسم بحريني بحت يرجع لحضارة قديمة سكنت جزيرتهم حسب زعمهم، والمنتج صناعة البحرين.

ايضا كان في جريدة الشرق القطرية عدد الأربعاء 27 فبراير اعلان بعنوان " الخزائن العالمية تفتتح اولى معارضها في العاصمة القطرية " وفي التفاصيل وفي السطر الأول: منذ انطلاقتها في عام 2007، تمكنت شركة الخزائن العالمية البحرينية ....." الى اخر الموضوع وكله مدح في المنتج البحريني والعلامة التجارية البحرينية.

اذا الموضوع ليس صدفه ولكنه اما تقاعس من جهات معينة،

او وهذا الأرجح عندي، الطمع و الجشع وحب المال لدى البعض ولوعلى حساب المبادئ وحب الوطن للأسف شديد.

تجارهم قاطعونا وتحملوا الخسائر ( طيب او غصب ) تنفيذا لرغبات حكوماتهم في حصار وخنق الحكومة والشعب القطري.

وبعض تجارنا للأسف، اكلوا ومازالوا ياكلون الأخضر واليابس من خيرات قطر، لكنهم ما زالوا خائفين من فقدان بعض العلامات التجارية، او خسارة بعض من ارباحهم العالية في حال عدم استيرادهم بعض السلع من حلف الفجار.

اكتفي بهذا

مواقف النجادة

01-03-2018, 06:54 PM

أولاً :
المنتجات العالمية مثل نيستله و مارس و تايد و كلينكس .. وارد أوروبا افضل من وارد دول الحصار .. و الان مع الضريبة المُضافة أتوقع أرخص أيضاً

ثانياً:
ما نقدر نشتكي عند منظمة التجارة ضد الحصار و في نفس الوقت نمنع منتجاتهم .. اتوقع هذه الخطوة قادمة بعد ما نثبت حقنا على دول الحصار و ممكن نقاطعهم في حال لم يتجاوبوا مع المنظمة .. في الوقت الراهن نستطيع الاعتماد على وعي المواطن و مقاطعته بشكل شخصي

مضارب دوسري

02-03-2018, 12:11 AM

منتجات كثيره موجوده فالسوق

سواء شبس ليز
وغيره الكثير من المنتجات
بصراحه شي يضيق الخاطر على الرغم ان كان هناك الكثير من البدائل

غرفة تجارة قطر قالوا خلاص ممنوع وللاسف كلامهم ما كان مضبوووط !!!!!

وللاسف هذا يضيع مجهود الكثير من التجار المبتدئين بعد الحصار
اللي راحوا ووقعوا عقود مع شركات في بلدان اخرى لتوفير بدائل واذا تم هالوضع بيكون كانك يا بو زيد ما غزيت !

مضارب دوسري

02-03-2018, 12:16 AM

للاسف ايضا وزارة الاقتصاد

تبنوا فكرة منع منتجات دول الحصار
وبعد ذلك اتخذوا وضعية الصامت !

بوجاسـم

02-03-2018, 12:35 AM

عليكم السلام ورحمة الله وبركاته

هناك بعض المنتجات للأسف تصل عن طريق عمان والكويت من دول الحصار .. وهناك تعميم من وزارة الاقتصاد على جميع المتاجر بعدم وضع اي منتج من منتجات دول الحصار فالرفوف من بعد تاريخ 31/3/2018

السيف5

02-03-2018, 01:46 AM

موجودة المنتجات وبكثرة وخصوصا من السعودية
منتجات الصابون تارسه المجمعات

Rider

02-03-2018, 01:03 PM

جات على المواد الغذائية معارض السيارات متروسه سيارات اخر موديل وارد دول الحصار

technical

02-03-2018, 09:22 PM

بسم الله الرحمن الرحيم ، استغرب من الي يشوف الحصاه في الطريق ويهد طوفه شكبره مبنيه في نص الشارع،
كان الواحد بيتكلم خل يتكلم عن كارفور عن جرير ، والسلام.

سليمان احمد

02-03-2018, 09:50 PM

ياجماعه فيه فرق بين محلات دول الحصار ووكلائها في المنطقه مثل جرير وكارفور وارامكس
واللي قطر لم تعاملهم بالمثل لانها منذ بداية الازمه وهي تقول القضيه سياسيه والشعب والتجار
والمواطنين ومن دول الحصار مازالوا في وظائفهم ويتعالجون حتى في المستشفيات ويتلقون كل حقوقهم
لان المشكله من حكوماتهم لذلك آلت دولتنا ان تتعامل بكل المبادئ في الاسلام وحتى اعراف القوانين الدوليه
وان لاتقحم اي احد في هذه الازمه في الوقت اللي دول الحصار حتى الحيوانات والتي تعود ملكيتها للقطريين
مارحموها لذلك اعتقد اذا كان القطع تاتي من دول الحصار بعد الحصار مباشره فهذا خطأ واما ان كانت مثلا
في المخازن وعرضت الان او من محلات لدول الحصار في قطر فهذا اعتقد انه عادي لكن اتمنى من حكومتنا حتى
بعد انتهاء الخلاف والحصار ان لاتستقبل كل من نبت ببنت شفه على قطر من اعلاميين مرتزقه وفنانيين وحتى الشعراء ومن تطاول على. بلدنا ورموزنا ان لايدخل بلدنا ولا نشوفه بكره في حفله ولا في قناة الكاس او في مهرجان واما باقي مواطنين الخليج بلا استثناء فبلدنا بلدهم الثاني وحكوماتهم هي من منعتهم من الدخول لقطر ولم تمنع قطر احد منهم كيف بعد انتهاء الخلاف
هذا رايئ المتواضع وتحياتي للجميع

qatar911

02-03-2018, 10:01 PM

لازم تكون عندكم وطنية و ماتشترون من اغراضهم الحيوانات السعودية و الامارات و جزيرة الخر

shadad

04-03-2018, 07:47 AM

,

,

شكرا على الموضوع

,

احييك على الرد اللي صراحه اثرى الموضوع. انا اذكر ان المواد كلها انقطعت بشكل شبه تام والظاهر بعد ما تضرروا واجد قاموا يدخلونها بطرق غير مباشرة. ( يعني وكيل في عمان او الكويت ) كما تطرق الى هذه الكلام بعض الاعضاء في المنتدى.

انا من جهتي منع تام في البيت من ادخال هذه المنتجات.

shadad

04-03-2018, 08:13 AM

طيب يا اخوان فيه تجار سعوديين وإماراتيين وبحرينيين
ليس لهم ذنب في ما قامت به حكوماتهم وضد الحصار ولهم أقارب في قطر
وتضررو شخصيا من حكوماتهم وضلمو فهل نقاطعهم*ارى
ان تبادل المصالح ليس له دخل في السياسة
وهم أبناء عمومة شئنا ام ابينا

ما جبنا موضوع الاقارب يا Naklan بالعكس, قطر ما اتبعت اسلوب دول الحصار الهمجي. احنا موضوعنا عن التجاره. دامهم ضيقوا علينا وهم بنفسهم مشوا ورا قرارات حكوماتهم ليش احنا ما نتبع قارارات الحكومة هني؟ والا بننسا موضوع المواد الطبيه والاستهلاكيه اول ايام الحصار حقهم ؟ حتى الطياره ما تمشي فوق اجوائهم. وعلى فكره التجار هذول ما يهمهم من انت او انا وما يهمهم فقط الا تجارتهم وصلحني لو انا غلطان في هذه الناحيه يا خوي.

ولنأخذ شركة ألبان المراعي، على سبيل المثال لا الحصر، فقد قامت بتنفيذ قرار الحكومة السعودية بعد دقائق من صدور قرار الحصار، مع علمها بأنها ستخسر سوقاً يدر عليها مبلغاً لا يقل عن 12 مليون ريال يومياً. وفي نفس الوقت قام وكلاء منتجات "بفك قطر" في دول الحصار بمنع استقبال أي شحنة من هذا المنتج، ولم يقل تجارهم بأنهم ملزمون بأي عقد! ( وين الاخوة والجيره ! لا تجاره ولا اخوه ). وزارة الاقتصاد والتجارة، قد أنشأت رقماً خاصاً للإبلاغ عن أي بضاعة من بضائع دول الحصار يراها المستهلكون في السوق القطري. وفي جزأ كبير منها لا يصنع عندهم اصلا. هم بس موزعين لا اكثر ولا اقل. ليش نلتزم معاهم دامهم ما وردوا دايركت لقطر؟ الافضل التعامل مع الشركة الام نفس شركة نستله مثلا كما اشار لها احد الاعضاء.

انا اشوف ان الاستغناء عن تجارتهم افضل لقطر. فتح اجواء وفرص اكثر افضل من الاعتماد على مصدر من دول الحصار . وهذا اول اساس من دعم المنتج المحلي.

انا لقيت تلفون الشكاوي بالامس وجاري رفع شكوى عليهم. شاكر لك تعقيبك naklan وردك بالموضوع .

فريج النجادة

04-03-2018, 08:23 AM

السلام عليكم ورحمة الله وبركاتة

اخواني واخواتي الكرام

الموضوع ( مقاطعت منتجات دول الحصار )

1- التمور

لا يخفى على الجميع ان كثير من اهل قطر لهم مزارع في السعودية
الحسا والقصيم وغيرها
وهم الان يصدرون تمورهم عن طريق الكويت او عمان

2- الوكيل الحصري او الوكيل في الشرق الاوسط

يلزم كل وكيل على اي منتج من التصدير الى جميع الدول

لو افترضنا وكيل سعودي وكيل في الشرق الاوسط

ملزم هذا الوكيل بالتصدير الى كافة الدول في الشرق الاوسط

او تسحب منة الوكالة

وكذالك الوكيل القطري في الشرق الاوسط ملزم ان يرسل الى دول الحصار

ف الموضوع فية شق قانوني لا احد يقدر يتجاوزة

يعني كل منتجب وراة قصة والله المستعان

قطريه ماركه

04-03-2018, 10:39 AM

اللي يقول التجار مالهم ذنب
بعد احنا مالنا ذنب احرموننا من مكة .. خصوصاً اللي متعود كل عام يروح
حسبي الله عليهم .. في ذمتهم ان شاء الله

و الله مالهم ذنب الا لهم انه دولهم ظالمة و مستبدة بعد و لازم يتحملوون تبعات قرار دولهم بالمقاطعة !!!

حمــد

04-03-2018, 11:14 AM

اللي يقول التجار مالهم ذنب
بعد احنا مالنا ذنب احرموننا من مكة .. خصوصاً اللي متعود كل عام يروح
حسبي الله عليهم .. في ذمتهم ان شاء الله

و الله مالهم ذنب الا لهم انه دولهم ظالمة و مستبدة بعد و لازم يتحملوون تبعات قرار دولهم بالمقاطعة !!!

جزاج الله خير اختي .. اختصرتي ما اردت قوله

يمامـة

07-03-2018, 02:22 PM

كنت قبل اصرخ و اعصب و اتنرفز لوجود منتج من دول الحصار..
لكن بعد مناقشة ولدي معاي.. اقتنعت ان سوقنا اهم منهم..

بمعنى المقاطعة مع عدم وجود البديل امر مضر لسوقنا..
فمن جذيه خلهم يهربون اغراضهم لنا و احنا نستهبل عليهم
دام ان الدولة ساكتة . و متى ما وجد البديل تمنع الدولة ..

و هذا دور التجار انهم يبحثون عن البديل..

فالموضوع اكبر مما نتصوره ان نقاطع و خلاص..

فما دام البديل الموجود المفروض المقاطعة تفعل..
لكن لو ما عندنا شي خلهم يوردون لنا غصب عنهم بكل الطرق
لأن السوق القطري مربح لهم و في الوقت نفسه السوق محتاج..

و اذا مب عاجبهم خل يمنعون اغراضهم عننا ..

bohilal191

10-03-2018, 01:02 AM

انا معاكم في كل شي بس في منتج من دول الحصار مافي له بديل شنسوي ووين نحصل مثله؟؟؟؟؟

معماري قطري

10-03-2018, 03:40 PM

انا معاكم في كل شي بس في منتج من دول الحصار مافي له بديل شنسوي ووين نحصل مثله؟؟؟؟؟

كل منتج له بديل ليكونون يبيعونا نووي وانا ما ادري

البدائل أثبتت جودة عالية وبعضها حتى سعر أرخص

ما قصرت الحكومة وما قصروا بعض التجار وبعضهم أكيد قلص ومدمنين يستوردون من هذي الدول .. شبيصير لو صار صلح بعدين؟ بنخلي الشرفاء من تجارنا ومن مسؤولينا ضحية لإغراق الأسواق بمنتجات رخيصة ورديئة وحتى ضارة في كثير من الأحيان

انا مع تكثيف الاستغناء عنهم وعن منتجاتهم وايجاد البدائل وحتى تصنيع بعض المواد عندنا والقيام بنهضة صناعية تجارية تليق بنا والحكومة ما قصرت وكثيرين ما قصروا من المستثمرين والتجار .. صدقوني لو منتج جيد من عندنا بيحاربون دخوله بلادهم ومن زمان

معماري قطري

10-03-2018, 03:42 PM

بعض الوكالات هم موزعين اقليميين لها ومنعوها علينا .. من حقنا نطلب من المصنع ومن الدول اللي تصدرها فتح وكالة جديدة في قطر حق السوق القطري

shadad

11-03-2018, 07:18 AM

بعض الوكالات هم موزعين اقليميين لها ومنعوها علينا .. من حقنا نطلب من المصنع ومن الدول اللي تصدرها فتح وكالة جديدة في قطر حق السوق القطري

بالضبط . احييك على تعقيبك. المفترض دامه يوزع بكيفه وعلى كيفه اجل يتم افتتاح مكتب اقيليمي للمنتج هنا او يتم منعه كليا. المنع بيخلي الشركة تفتح هني غصب لانها بتخسر سوق. واذا عاجبها خسارة سوق خلاص ليش نركض وراها وفي بدائل؟

ضوى

11-03-2018, 07:34 AM

كنت قبل اصرخ و اعصب و اتنرفز لوجود منتج من دول الحصار..
لكن بعد مناقشة ولدي معاي.. اقتنعت ان سوقنا اهم منهم..

بمعنى المقاطعة مع عدم وجود البديل امر مضر لسوقنا..
فمن جذيه خلهم يهربون اغراضهم لنا و احنا نستهبل عليهم
دام ان الدولة ساكتة . و متى ما وجد البديل تمنع الدولة ..

و هذا دور التجار انهم يبحثون عن البديل..

فالموضوع اكبر مما نتصوره ان نقاطع و خلاص..

فما دام البديل الموجود المفروض المقاطعة تفعل..
لكن لو ما عندنا شي خلهم يوردون لنا غصب عنهم بكل الطرق
لأن السوق القطري مربح لهم و في الوقت نفسه السوق محتاج..

و اذا مب عاجبهم خل يمنعون اغراضهم عننا ..

من قال انه بضاعتهم تدخل تهريب لنا ؟ اصلا بضاعتهم تدخل عادي ولا هم يبون يمنعونها عنا الفلوس حلوة محد يعافها ، اذكر قالوا لانه قوانين منظمة التجارة العالمية ماينفع يمنعون دخول منتجات دول الحصار ، عموما شخصيا كل شي حصلت له بدائل الا فانيش فقاعدة اخذه لين الله يفرجها يوتوفر بديل مناسب قاعدة اجرب البيوض مال الدوحة وباشوف بعد كم غسله يضبط والا لا وعقب باقطع خلاص

المحاميه

11-03-2018, 08:19 AM

عليكم السلام

صحيح
أمس في الجمعيه شفت جبن مستود من البحرين .. والتاريخ كان بعد الحصار
وتفسيري الوحيد كان انه دخل لنا عن طريق الكويت .. هذا والله اعلم ..

الله يكافينا شر دول الحصار
ويديم نعمة الامن والامان والاستقرار على دولتنا الحبيبه قطر ..

وشكراً اخوي شموخ على ردك الوافي ..

الحياة الخالدة

11-03-2018, 10:30 AM

السلام عليكم ورحمة الله وبركاته

ياليت حد يتبرع ينزل لنا موضوع بالمنتجات البديلة اللي نقدر ناخذها ( ما أذكر إذا كان نزل موضوع مشابه )
لأني وايد احتار بخصوص بعض المنتجات اللي ما ألقى لها بديل وعلى الأخص بعض أنواع المنظفات

دينالي

11-03-2018, 11:49 AM

اتوقع ان السالفة طالعه عليهم بخسارة لان اذا بتاخذ منتج لبلد ثاني وبعدين بتخليهم يشحنونه على قطر بتكون قيمه الشحن اكبر واتوقع هدف التجار عندهم مش المكسب بس يبون يكونون موجودين بالسوق عشان مايخسرونه على امل ان الامور تتعدل لان المستهلك بعد فتره اذا تعود على منتج ماراح يرجع للمنتج الاول مثل حليب المراعي ما اتوقع بعد ماينتهي الحصار في حد بيشتريه

الحياة الخالدة

11-03-2018, 12:20 PM

اتوقع ان السالفة طالعه عليهم بخسارة لان اذا بتاخذ منتج لبلد ثاني وبعدين بتخليهم يشحنونه على قطر بتكون قيمه الشحن اكبر واتوقع هدف التجار عندهم مش المكسب بس يبون يكونون موجودين بالسوق عشان مايخسرونه على امل ان الامور تتعدل لان المستهلك بعد فتره اذا تعود على منتج ماراح يرجع للمنتج الاول مثل حليب المراعي ما اتوقع بعد ماينتهي الحصار في حد بيشتريه
هني الغمندة .. الأغبياء اتخذوا قرار وتسرعوا فيه وانقلبت السالفة خسارة عليهم
عشان جذي قاموا يدورون طرق ملتوية عشان يدخلون بضايعهم بلادنا

وحيد-الشوق

11-03-2018, 01:02 PM

وعليكم السلام ورحمة الله وبركاته الي لاحظته وصعب تلقى بدائل له صابون الغسيل كلمة حق صابون بيرل القطري سيء صراحه ومايغسل عدل

طيب الحين اغلب المنتجات هم المورد الرئيسي في المنطقة وفي الأخير هو ملك للشركة الأم

الســـهم

11-03-2018, 01:27 PM

وعليكم السلام ورحمة الله وبركاته الي لاحظته وصعب تلقى بدائل له صابون الغسيل كلمة حق صابون بيرل القطري سيء صراحه ومايغسل عدل

طيب الحين اغلب المنتجات هم المورد الرئيسي في المنطقة وفي الأخير هو ملك للشركة الأم

السلام عليكم ورحمة الله وبركاته ..

الصابون السائل فقط عليه ملاحظات لأنه خفيف جدا ورغوته بسيطة، أما باقي المنتجات كصابون غسيل الثياب ومنعم الملابس (كومفورت) ماعليهم كلام ..

عندك صابون سائل عماني ماركة (بحر) ماعليه كلام وصابون تركي ماركة (فيكينغ) ماعليه كلام كذلك ..

البدائل موجودة وتحتاج فقط انك تجربها، حتى المنعم المركز (كومفورت) تحصل ماركة تركية وسائل غسيل ملابس فيه منه تركي وعماني ..

جربت كل الانواع ولله الحمد افتكيت من بضاعة دول الحصار ..

Rider

11-03-2018, 03:01 PM

يوم الخميس في الميره ماء الصفا السعودي موجود لا وتاريخه جديد ههههههههه

وحيد-الشوق

11-03-2018, 04:37 PM

السلام عليكم ورحمة الله وبركاته ..

الصابون السائل فقط عليه ملاحظات لأنه خفيف جدا ورغوته بسيطة، أما باقي المنتجات كصابون غسيل الثياب ومنعم الملابس (كومفورت) ماعليهم كلام ..

عندك صابون سائل عماني ماركة (بحر) ماعليه كلام وصابون تركي ماركة (فيكينغ) ماعليه كلام كذلك ..

البدائل موجودة وتحتاج فقط انك تجربها، حتى المنعم المركز (كومفورت) تحصل ماركة تركية وسائل غسيل ملابس فيه منه تركي وعماني ..

جربت كل الانواع ولله الحمد افتكيت من بضاعة دول الحصار ..

وعليكم السلام ورحمة الله وبركاته

خبري من سنين حول 15 سنة ما نشتري صابون بيرل بنشوف بنعطيه فرصه مره ثانية

شكراً عالافادة

يوم الخميس في الميره ماء الصفا السعودي موجود لا وتاريخه جديد ههههههههه

عاد هاي صج قويه ههههههه الحمدلله الماي المحلي موجود وبكثره

يمامـة

13-03-2018, 11:12 AM

من قال انه بضاعتهم تدخل تهريب لنا ؟ اصلا بضاعتهم تدخل عادي ولا هم يبون يمنعونها عنا الفلوس حلوة محد يعافها ، اذكر قالوا لانه قوانين منظمة التجارة العالمية ماينفع يمنعون دخول منتجات دول الحصار ، عموما شخصيا كل شي حصلت له بدائل الا فانيش فقاعدة اخذه لين الله يفرجها يوتوفر بديل مناسب قاعدة اجرب البيوض مال الدوحة وباشوف بعد كم غسله يضبط والا لا وعقب باقطع خلاص

البضايع تدخل تهريب من طريق عمان او الكويت.. مثال على ذلك معرض التمور اللي في قطر..
من متى يا ضوى الكويت تصدر تمور بالكميات هذه؟

حسب قرارات الدولة ممنوع الاستيراد من هذه الدول من بعد شهر 11 من عام 2017
على أساسه اشلون يدخلون المحلات بضايع من دول الحصار؟

naklan

14-03-2018, 09:24 AM

لا مشكلة في استخدام الأشياء الغير متوفرة ورايي
حتى ولو انتهت الأزمة ان لا يتجاوز نسبة الاستيراد من
هذه الدول مجتمعة 20% بالكثير ادخال الحصار
في الأزمة هو مسمار في نعش التبادل التجاري
ومن يضمن انهم لا يعيدون الكرة في المستقبل
لذالك نامن كل شي لبلدنا بدونهم ونجعلهم
ماضي اصبح خلف ضهورنا

shadad

14-03-2018, 12:40 PM

لا مشكلة في استخدام الأشياء الغير متوفرة ورايي
حتى ولو انتهت الأزمة ان لا يتجاوز نسبة الاستيراد من
هذه الدول مجتمعة 20% بالكثير ادخال الحصار
في الأزمة هو مسمار في نعش التبادل التجاري
ومن يضمن انهم لا يعيدون الكرة في المستقبل
لذالك نامن كل شي لبلدنا بدونهم ونجعلهم
ماضي اصبح خلف ضهورنا

بالضبط.

بالنسبة للاخوة اللي يعيبون المنتج المحلي بشكل كبير, 6 او 7 شهور لا يمكن ان تكفي لمواجهة منتج كان الاعتماد عليه سنين كثيره. المنتج المحلي توه بادي واعتقد محتاج تطوير. ومع ذلك يمكن الاستعانه بالمنتجات الثانيه الاوربية او العربية الاخرى. ومثل ما قال Nakaln ما في ضمان انهم ما يعيدونها . بنص رمضان ! فكروا فيها.

معماري قطري

14-03-2018, 02:46 PM

انا اشوف انتاج قطر من الألبان مطلوب أكثر من باقي المنتجات اللي نستوردها ودوم ادور هالمنتج .. وإن شاء الله بنتخلص من الاستيراد قريب .. شفت منتجات تنظيف توصلنا مباشرة من لندن صناعة بريطانية .. بس ادور الصابون الأحمر صناعة لندن للحين ما حصلته

أمس شفت بيض إيرلندي في كارفور بس صراحة غالي لأنه عضوي .. البيضة تطلع فوق ريالين .. وفيه نوعيات وايد أرخص .. يعني استوى سوقنا متنوع وفيه من كل بلاد العالم

الله يجزي حكومتنا خير .. من سمو الأمير لأصغر موظف ما قصروا اتجاههم كان موفق والبدائل ما خذت وقت وخلاص تأقلمنا مع الوضع اللي احنا فيه

naklan

14-03-2018, 07:10 PM

بالضبط.

بالنسبة للاخوة اللي يعيبون المنتج المحلي بشكل كبير, 6 او 7 شهور لا يمكن ان تكفي لمواجهة منتج كان الاعتماد عليه سنين كثيره. المنتج المحلي توه بادي واعتقد محتاج تطوير. ومع ذلك يمكن الاستعانه بالمنتجات الثانيه الاوربية او العربية الاخرى. ومثل ما قال Nakaln ما في ضمان انهم ما يعيدونها . بنص رمضان ! فكروا فيها.

صدقت اخوي shaded
المنتج المحلي يتطور عندي حليب بلدنا احسن بألف
مرة من المراعي وحتى لو فتح الاستيراد ما ابدله يجب تشجيع
المنتج المحلي بالدعم والشراء ليتطور ويستمر وهذا المطلوب
من الجميع يجب ان يكون المنتج المحلي له الأولية
حين حاصرنا الجيران ما نفعنا الا طيران القطرية
نقل الناس والأغذية والدواء وكل شي وحنا
كل يوم ننزل موضوع نقد في
شركتنا الوطنية

naklan

14-03-2018, 07:15 PM

انا اشوف انتاج قطر من الألبان مطلوب أكثر من باقي المنتجات اللي نستوردها ودوم ادور هالمنتج .. وإن شاء الله بنتخلص من الاستيراد قريب .. شفت منتجات تنظيف توصلنا مباشرة من لندن صناعة بريطانية .. بس ادور الصابون الأحمر صناعة لندن للحين ما حصلته

أمس شفت بيض إيرلندي في كارفور بس صراحة غالي لأنه عضوي .. البيضة تطلع فوق ريالين .. وفيه نوعيات وايد أرخص .. يعني استوى سوقنا متنوع وفيه من كل بلاد العالم

الله يجزي حكومتنا خير .. من سمو الأمير لأصغر موظف ما قصروا اتجاههم كان موفق والبدائل ما خذت وقت وخلاص تأقلمنا مع الوضع اللي احنا فيه

انت راهي وولد عز تاكل بيضة بريالين هههههههههه
انا بنص ريال بس ساعات ما اقدر اعبر وأقول شمنه طلع
من البيض من اليوم انت رفيجي نأكل عيش وبيض
مع بعض ههههههههه

طاش

15-03-2018, 10:11 AM

المفروض تكون ثقافة من الناس سواء مواطن او مقيم انه هو الي مايشترب يقاطع انا عن نفسي في الجمعيةاي شى مكتوب عليه اسم اي دوله من دول الحصار مستحيل اخذه ادور البديل على طول خاصة ادوات التنظيف اكثرها من دبي والبديل العماني للعلم

بوخميس

15-03-2018, 11:52 AM

المفروض تكون ثقافة من الناس سواء مواطن او مقيم انه هو الي مايشترب يقاطع انا عن نفسي في الجمعيةاي شى مكتوب عليه اسم اي دوله من دول الحصار مستحيل اخذه ادور البديل على طول خاصة ادوات التنظيف اكثرها من دبي والبديل العماني للعلم

ادوات التنظيف

الصابون او الشامبو او غيره

كلها منتجات بماركات عالمية، لكن كانت تصنّع في دول الحصار

بكل سهولة نقدر نجيب نفس المنتج (العلامة التجارية) لكن بتصنيع من دول ثانية، مثلاً (الهند) وممكن يكون ارخص بوايد

حسب علمي في 3 رحلات شحن يومياً من الهند، خضروات وفواكه ولحوم ومعلبات وغيرها

السالفة الحين (شطارة) تجار اكثر من مجرد دعم حكومي

استغربت يوم شفت (داناو) و(سن توب) وهي كانت تجينا من السعودية، الحين تجينا من ايران بنفس الأسماء التجارية.

وفي انواع من الأجبان كانت تجينا من السعودية الحين تجينا من الدنمارك مباشرة

حتى النسكافيه شفت منه تصنيع كوريا الجنوبية

عن نفسي مافي امل اشتري شي من منتجات دول الحصار

إعلامي قطر

15-03-2018, 12:34 PM

..

قبل صابون لايف بوي وارد الهند يازينه زيناه..

الحين لايف بوي السعوديه التجاري ابتلشنا فيه..

..

دينالي

15-03-2018, 12:45 PM

لازم تكونون واقعيين ياجماعه البلد ماتقدر تروح من تسعين بالمية عتماد على دول الحصار لصفر بالمية وباقل من سنه
الموضوع يحتاج وقت والسوق العالمي مليان بضايع تدور عن مشتري وهم اللي بيخسرون سوق قطر بالنهاية بس السالفه محتاجه شويه وقت

معماري قطري

15-03-2018, 02:04 PM

انت راهي وولد عز تاكل بيضة بريالين هههههههههه
انا بنص ريال بس ساعات ما اقدر اعبر وأقول شمنه طلع
من البيض من اليوم انت رفيجي نأكل عيش وبيض
مع بعض ههههههههه

ههههههه نكلان قلت شفت ما قلت شريت

مع إني احن حق ايرلندا وخاطري في أي شيء منها .. بغيت اجرب اشتري بيضة وحدة واخليها تذكار

معماري قطري

15-03-2018, 02:05 PM

لازم تكونون واقعيين ياجماعه البلد ماتقدر تروح من تسعين بالمية عتماد على دول الحصار لصفر بالمية وباقل من سنه
الموضوع يحتاج وقت والسوق العالمي مليان بضايع تدور عن مشتري وهم اللي بيخسرون سوق قطر بالنهاية بس السالفه محتاجه شويه وقت

وصلنا 0% خلال 48 ساعة والحمد لله

وقلعنا منتجات بو حصرة وهم مطرشينها الحدود

معماري قطري

15-03-2018, 02:06 PM

..

قبل صابون لايف بوي وارد الهند يازينه زيناه..

الحين لايف بوي السعوديه التجاري ابتلشنا فيه..

..

حتى الهندي يفرق عن الانجليزي والظاهر الانجليزي وقفوه دورته مرة هناك ولا حصلته كنت ابي كرتون

معماري قطري

15-03-2018, 02:08 PM

ادوات التنظيف

الصابون او الشامبو او غيره

كلها منتجات بماركات عالمية، لكن كانت تصنّع في دول الحصار

بكل سهولة نقدر نجيب نفس المنتج (العلامة التجارية) لكن بتصنيع من دول ثانية، مثلاً (الهند) وممكن يكون ارخص بوايد

حسب علمي في 3 رحلات شحن يومياً من الهند، خضروات وفواكه ولحوم ومعلبات وغيرها

السالفة الحين (شطارة) تجار اكثر من مجرد دعم حكومي

استغربت يوم شفت (داناو) و(سن توب) وهي كانت تجينا من السعودية، الحين تجينا من ايران بنفس الأسماء التجارية.

وفي انواع من الأجبان كانت تجينا من السعودية الحين تجينا من الدنمارك مباشرة

حتى النسكافيه شفت منه تصنيع كوريا الجنوبية

عن نفسي مافي امل اشتري شي من منتجات دول الحصار

بو خميس عاد النسكافيه والكبتشينو اختراع خماراتي ألحين بيشتكون علينا

bohilal191

15-03-2018, 11:10 PM

المهم نبغي بديل حق فض فاض مال الثياب عشان الكهرب ،،اللي كان موجود صناعة امارتية وانقطع من السوق

إعلامي قطر

16-03-2018, 09:09 AM

المهم نبغي بديل حق فض فاض مال الثياب عشان الكهرب ،،اللي كان موجود صناعة امارتية وانقطع من السوق

أنصحك خل يقللون كمية صابون البودره المستخدم
في غسيل ثيابك لين النص وغالباً بينحل هالموضوع !

..

Abdulraman

18-03-2018, 07:36 AM

من يومين شريت كافي كتكات من الميره وفي البيت تفاجأة صنع في الامارات ( دبي)

shadad

18-03-2018, 08:21 AM

من يومين شريت كافي كتكات من الميره وفي البيت تفاجأة صنع في الامارات ( دبي)

بلغ عليهم على طول. هذا اللي اسويه حاليا.

المخفي

18-03-2018, 09:48 AM

سكر التموين انتاج الامارات !!

مضارب دوسري

26-05-2018, 07:29 PM

منتجات كثيره موجوده فالسوق

سواء شبس ليز
وغيره الكثير من المنتجات
بصراحه شي يضيق الخاطر على الرغم ان كان هناك الكثير من البدائل

غرفة تجارة قطر قالوا خلاص ممنوع وللاسف كلامهم ما كان مضبوووط !!!!!

وللاسف هذا يضيع مجهود الكثير من التجار المبتدئين بعد الحصار
اللي راحوا ووقعوا عقود مع شركات في بلدان اخرى لتوفير بدائل واذا تم هالوضع بيكون كانك يا بو زيد ما غزيت !

للاسف ايضا وزارة الاقتصاد

تبنوا فكرة منع منتجات دول الحصار
وبعد ذلك اتخذوا وضعية الصامت !

واخيراااا

الحمدلله

بوجبر

26-05-2018, 09:37 PM

الى مزبلة التاريخ يادول الفجار هم ومن ايدهم

aloosh

26-05-2018, 09:54 PM

يجب على الجميع ابلاغ عن اي منتج
نرا ما ياخذ من وقتك 5 دقايق
ومن يتعامل معا هذي المنتجات تعتبر خيانه
المواطن نفسه هو من يقدر يقطع هذي المنتجات من السوق فهو المستهلك

بومحمد المطاوعه

26-05-2018, 10:01 PM

والله ابرك الساعات شلوها من الجمعيات

والحمدلله كل شي بديل متوفر تقريبآ

عاد لو افتحو الحدود لحد يروح القيصريه ويشتري فاين الريم وصابون بس

بوخميس

27-05-2018, 12:57 AM

لا زال الموضوع فيه تلاعب

مثلا منتجات شركة (مارس للحلويات) واللي منها جالكسي ومارس وباونتي وسنيكرز وتويكس

كاتبين على الأغلفة (بلد المنشأ) روسيا أو بولندا وكذا

ومكتوب ان المصدّر شركة مارس في دبي

اصلا شركة مارس عندها مصنع في دبي وشركة اوريو عندها مصنع في البحرين، اذا بلد المنشأ روسيا، عيل المصنع اللي في دبي شيسوي؟؟

مضارب دوسري

27-05-2018, 01:10 AM

لا زال الموضوع فيه تلاعب

مثلا منتجات شركة (مارس للحلويات) واللي منها جالكسي ومارس وباونتي وسنيكرز وتويكس

كاتبين على الأغلفة (بلد المنشأ) روسيا أو بولندا وكذا

ومكتوب ان المصدّر شركة مارس في دبي

اصلا شركة مارس عندها مصنع في دبي وشركة اوريو عندها مصنع في البحرين، اذا بلد المنشأ روسيا، عيل المصنع اللي في دبي شيسوي؟؟

يزودونهم بالخلطات والكميات عشان يجهزونها في مصانع البحرين والامارات

الحياة الخالدة

27-05-2018, 02:05 AM

الحمد لله اللي فكنا من بضاعة حلف الفجار لا بارك الله فيهم
المراعي من وقفوها على قطر .. صاروا يصدرونها حق اسرائيل
الله يحشرهم معاهم في نار جهنم

naklan

27-05-2018, 02:30 AM

خطوة صحيحة فليشربو من ما يسقوننا
والخاسر اقتصادهم نحن مستوردون منهم ولن
نتضرر من مقاطعة بضائعهم اما هُم فصعب تصريف
بضائعهم الرديئة على بعض او على الآخرين
الموضوع تحدي كبير اما انفتاح كامل او
مقاطعة فان كانت مقاطعة فلتطبق
على كل شي

واقترح عمل تكامل مع عمان والكويت دول الحمار
ما ينشد بهم الضهر كل ما شربو كاس طلعو بفكرة غبية
فليكن حصاركم الى الأبد نحن بألف خير بدونكم

naklan

27-05-2018, 02:36 AM

https://mobile.twitter.com/AlthaniSuhaim/status/1000462655230914561/video/1

بوخميس

27-05-2018, 02:39 AM

سكر التموين انتاج الامارات !!

من مزارع قصب السكر في هور العنز؟؟

الامارات ترانزيت، معتمدة على اعادة التصدير، تجيب السكر بكميات كبيرة من الدول المنتجة وتغلفه وتعيد بيعه

عازف

27-05-2018, 02:49 AM

جات على المواد الغذائية معارض السيارات متروسه سيارات اخر موديل وارد دول الحصار

اهني دور على الوكيل المفروض يسوي عروض مع المعارض والمستهلك داخل وبرع البلد شوف اشلون بضرب ضربتة وبجيب زباين من كل دول الخليج بشترون وارد قطر،،،،

عازف

27-05-2018, 02:56 AM

الحمد لله اللي فكنا من بضاعة حلف الفجار لا بارك الله فيهم
المراعي من وقفوها على قطر .. صاروا يصدرونها حق اسرائيل
الله يحشرهم معاهم في نار جهنم

آمين يارب

عازف

27-05-2018, 03:14 AM

جات على المواد الغذائية معارض السيارات متروسه سيارات اخر موديل وارد دول الحصار

المفروض من اصحاب المعارض بعدم استيراد من دول الحصار على ما أظن في بديل الوكالات عندنا تبيع بالجملة لهم أسعار خاصة،،،

R 7 A L

27-05-2018, 10:14 AM

قرار طيب كنا ننتظرة من بداية الحصار
اشكر حكومتنا الرشيدة
وياليت الحكومة يساعدون اي مواطن حاب يكون وكيل اي منتج عالمي يحتاج له المجتمع

nooora

27-05-2018, 12:03 PM

قرار طيب كنا ننتظرة من بداية الحصار
اشكر حكومتنا الرشيدة
وياليت الحكومة يساعدون اي مواطن حاب يكون وكيل اي منتج عالمي يحتاج له المجتمع

اي والله نتمنى ذلك ،، كل تاجر يشوف له منتج ويترزق والكل يستفيد

ya3coub

27-05-2018, 12:04 PM

قرار طيب كنا ننتظرة من بداية الحصار
اشكر حكومتنا الرشيدة
وياليت الحكومة يساعدون اي مواطن حاب يكون وكيل اي منتج عالمي يحتاج له المجتمع

مستعد أكون وكيل تواير و للأسف طموحي انتهىى لما فكرت اقدم قبل

المهم عقبال وكالات السيارات الي مستغلين الأزمة صح و من قبلها قبل كان صعفين السعر الحين لا بزيادة ادفع كاش و ما نعطيك وقت ممكن توصل القطع خلال 6 اشهر.

تروح تطلب من النت و اسرع شحن و اأمنها و يطلع عليك بنص السعر أو اقل

شي مستفز بصراحة

naklan

28-05-2018, 05:00 AM

المفروض حصر كميات البضائع الموجودة و يتم وضعها في زاوية للتصريف
او تدفع الحكومة قيمتها حتى لا يخسر احد وبعدها منع الى الأبد حتى لو رجعت العلاقات
افتكينا من بضائعهم الي تصنع على اقل جودة ومراقبة وأغلبها مسرطن وخاصة حليب
المراعي فكنا الله منه وعوضنا بحليب بلدنا حليب بقر وحليب غنم وحليب شياه
طب وتخير عمار يا قطر رفوف المجمعات مليانه من عز لندن*وباريس

معماري قطري

28-05-2018, 06:15 AM

الحمد لله اللي فكنا من بضاعة حلف الفجار لا بارك الله فيهم
المراعي من وقفوها على قطر .. صاروا يصدرونها حق اسرائيل
الله يحشرهم معاهم في نار جهنم

لحد يخفف الدعاء على الظالمين في ثاني رمضان القطري ممنوع من واجباته الدينية للعمرة والحج

كذلك كثير من القطريين مطلوبين بسبب الرأي الحر وقول كلمة الحق والرد على الإساءة اللي وجهت لهم من هذي الحكومات الظالمة لشعبها ولنا كذلك أكثر

مستـريــح البـــال

28-05-2018, 12:07 PM

الحـــمد لله ،،
بالنســـبة لـــي لا أرى عنــدهم شــي مميـــز بالعكــــس ، لــعل تخــف الكثيـــر من الأمــراض بعــد وقـــف دخـــول منتجـــاتهم ،،
كـــان ذابحــنـــا الإلتــــزام بقيمنــا تجـــاه الجـــار ،، والوقـــوف معـــه لــو علــى انفسنــــا ،،
ولكــن نعمـــة منه وكـــرم ،،

ولا استطيـــع أن أقـــول إلا كمـــا قال شيخنـــا وقمـــة مجدنـــا : رب ضـــارة نافعـــة ،، نحـــن بألــــف خيـــر من دونهـــم . .

الحياة الخالدة

28-05-2018, 01:56 PM

لحد يخفف الدعاء على الظالمين في ثاني رمضان القطري ممنوع من واجباته الدينية للعمرة والحج

كذلك كثير من القطريين مطلوبين بسبب الرأي الحر وقول كلمة الحق والرد على الإساءة اللي وجهت لهم من هذي الحكومات الظالمة لشعبها ولنا كذلك أكثر

لا توصي حريص
ندعي عليهم ليل ونهار
الله ياخذ الحق منهم .. وحسبنا الله ونعم الوكيل

واللي مب عاجبه

لا يدعي عليهم .. كيفه هههههههههه

عازف

03-06-2018, 03:36 PM

نعم للمنتج الوطني
‏نعم لمنتج الدول الصديقه
‏قطر قويه بدونهم
شكراً سيدي الشيخ تميم بن حمد آل ثاني

طلعة الروح

03-06-2018, 05:22 PM

اليوم مريت جمعيه في مجمع شايلين كل متتجات الديتول وكاتبين عليهم مش للبيع حلو انزين خل يعطوني الديتول ابلاش اذا الجمعيات مستغنيين عنه حرام يروح المنتج هدر والناس في حاجه له وماله بديل

طلعة الروح

03-06-2018, 05:38 PM

بالضبط . احييك على تعقيبك. المفترض دامه يوزع بكيفه وعلى كيفه اجل يتم افتتاح مكتب اقيليمي للمنتج هنا او يتم منعه كليا. المنع بيخلي الشركة تفتح هني غصب لانها بتخسر سوق. واذا عاجبها خسارة سوق خلاص ليش نركض وراها وفي بدائل؟

انا اتفق ان دولة قطر يجب ان تفتح مصنع إقليمي قبل المقاطعه لاي منتج افضل لنا او توفير البديل والاستيراد من دول أخرى لنفس المنتج

معماري قطري

03-06-2018, 09:38 PM

اليوم مريت جمعيه في مجمع شايلين كل متتجات الديتول وكاتبين عليهم مش للبيع حلو انزين خل يعطوني الديتول ابلاش اذا الجمعيات مستغنيين عنه حرام يروح المنتج هدر والناس في حاجه له وماله بديل

له بديل اخوي كل المنظفات لها بدائل بعضها من دول المصدر

جربت صابون دوف ألماني شيء عجيب طاح من عيني اللي كنت اخذه قبل كله كيماويات بدون حساب وخلطات يسوونه ناس مب مختصين ولا مراقبة جودة ولا شيء .. حتى عيوني ما استوت حمرا

بوخميس

03-06-2018, 11:46 PM

له بديل اخوي كل المنظفات لها بدائل بعضها من دول المصدر

جربت صابون دوف ألماني شيء عجيب طاح من عيني اللي كنت اخذه قبل كله كيماويات بدون حساب وخلطات يسوونه ناس مب مختصين ولا مراقبة جودة ولا شيء .. حتى عيوني ما استوت حمرا

في فرق في الاسعار؟

انا خذت صابون بالموليف تركي بدال السعودي وبنفس السعر

حتى الكت كات بريطاني بنفس سعر الاماراتي

دااانة قطر

04-06-2018, 08:36 AM

تسلمين اخت شهد عالطرح
ولو اني استغربت حتى من القرار الاخير اللي جا متأخر بالتخلص من منتجات دول الحصار من السوق

اللي يقول التجار مالهم ذنب
بعد احنا مالنا ذنب احرموننا من مكة .. خصوصاً اللي متعود كل عام يروح
حسبي الله عليهم .. في ذمتهم ان شاء الله

و الله مالهم ذنب الا لهم انه دولهم ظالمة و مستبدة بعد و لازم يتحملوون تبعات قرار دولهم بالمقاطعة !!!

هذا اللي ارد فيه على كل اللي يقول احنا شعلينا
شلون شعلينا ننحرم من بيت الله ومانقدر نحرم نفسنا من بعض الشغلات اللي وجد لها بديل
الحمدلله جهود سمو الامير واضحه وماله داعي نجيب شي من برا
ولاعاد سالفة تهريب الفيمتو من الكويت وعمان
الا فيمتو

بومحمد المطاوعه

04-06-2018, 09:44 AM

تسلمين اخت شهد عالطرح
ولو اني استغربت حتى من القرار الاخير اللي جا متأخر بالتخلص من منتجات دول الحصار من السوق

هذا اللي ارد فيه على كل اللي يقول احنا شعلينا
شلون شعلينا ننحرم من بيت الله ومانقدر نحرم نفسنا من بعض الشغلات اللي وجد لها بديل
الحمدلله جهود سمو الامير واضحه وماله داعي نجيب شي من برا
ولاعاد سالفة تهريب الفيمتو من الكويت وعمان
الا فيمتو

ابشرج الجمارك شغالين عليهم ويصدرونهم

اخر مره في ام عيال جايبه كرتونين
و في كم شخص حاط له كم غرشه ف الشنطه
كلها صدرتهم الجمارك

معماري قطري

04-06-2018, 10:55 AM

ابشرج الجمارك شغالين عليهم ويصدرونهم

اخر مره في ام عيال جايبه كرتونين
و في كم شخص حاط له كم غرشه ف الشنطه
كلها صدرتهم الجمارك

زين ما صادوا الحليب اللي يايبه من ألمانيا كنت خايف من الاحراج بس

البعض يتناقلون أخبار عن مزاد بيع كجرة دول بو حصرة يا علهم الحسرة .. أرد عليهم خلوا كجرتهم وارتقوا اخذوا حاجتكم وبس وبجودة تسوى سعرها

معماري قطري

04-06-2018, 10:57 AM

لا توصي حريص
ندعي عليهم ليل ونهار
الله ياخذ الحق منهم .. وحسبنا الله ونعم الوكيل

واللي مب عاجبه

لا يدعي عليهم .. كيفه هههههههههه

انتي وأعضاء كثيرين ما يحتاجون توصية قصدي البعض اللي يتحسسون وما زالت الكنغدم الغربية عندهم مثال للشرف والعفة والأخلاق العالية

معماري قطري

04-06-2018, 10:58 AM

المفروض حصر كميات البضائع الموجودة و يتم وضعها في زاوية للتصريف
او تدفع الحكومة قيمتها حتى لا يخسر احد وبعدها منع الى الأبد حتى لو رجعت العلاقات
افتكينا من بضائعهم الي تصنع على اقل جودة ومراقبة وأغلبها مسرطن وخاصة حليب
المراعي فكنا الله منه وعوضنا بحليب بلدنا حليب بقر وحليب غنم وحليب شياه
طب وتخير عمار يا قطر رفوف المجمعات مليانه من عز لندن*وباريس

وايد تأخروا في القرار وكان المفروض يعممون قبل حتى التجار يخلصون الكميات اللي عندهم

معماري قطري

04-06-2018, 11:08 AM

في فرق في الاسعار؟

انا خذت صابون بالموليف تركي بدال السعودي وبنفس السعر

حتى الكت كات بريطاني بنفس سعر الاماراتي

والله ما ادري بالسعر بس شيفرق لو زيادة أو أقل المهم المنتج جودته عالية جداً

الصابون الأحمر الانجليزي قبل يوم كنا يهال حتى شعرنا نغسله به وللحين ما طاح .. انتاج بو سعدة والهند كله خلطات ما عليها تحكم جودة وعادي يزيدون مادة تضر البشرة .. كذلك انتاج الهند .. شفنا مقاطع كثيرة عن مداهمات في الكنغدم حق ورش تصنيع غش حتى ماي زمزم غشوه .. والظاهر النشر عن ماي زمزم حتى الناس يشترون من الماي المعلب بواسطة شركة الأمير السعودي حتى ينفعونه .. حكومتهم طرارة وكذابة بامتياز

لو فيهم خير حق شعبهم كان سووا شركة ماي زمزم شركة مساهمة للجميع ما عطوها ما ادري شسمه بندر بن طخمان وسووا لها دعاية فوق الخيال وفي النهاية المستفيد واحد أو عدد بسيط

معماري قطري

04-06-2018, 11:11 AM

ما تلاحظون بعض المقاطع تنتشر ونتوقع تضر سمعة البلد؟

هم ما يهمهم الا محاربة الإنتاج الرخيص عندهم وابراز الشركات المملوكة لأشخاص فوق القانون .. باختصار دولة ياكل غنيها فقيرها

بومحمد المطاوعه

04-06-2018, 12:15 PM

زين ما صادوا الحليب اللي يايبه من ألمانيا كنت خايف من الاحراج بس

لا ماعتقد بس مشددين على الاشياء من دول الحصار
وحاطين خط قوي على الفيمتو

والله حسسوني الناس
فيمتو وفيمتو

يعني لو مافي خلاص بيموتون

البعض يتناقلون أخبار عن مزاد بيع كجرة دول بو حصرة يا علهم الحسرة .. أرد عليهم خلوا كجرتهم وارتقوا اخذوا حاجتكم وبس وبجودة تسوى سعرها

ياريال ماعنده سالفه الي بيروح وبيشتري

وين النخوه والعزوه والتبربر والسب من البعض
وصاير عنتر

وعقب تروح تشتري منهم !!!

صج اقول حق هالناس مب قد كلمتك ولا كفو تقطع منتجاتهم

طبعآ اعني الي يسندورنا فالمجالس وفي اي مكان وطايحين سب وعقب يروح يشتري

ههههههههههه شوووضع مخك يالحبيب

غايه الطواش

04-06-2018, 12:57 PM

انا ماعرف شنو يحسوون فيه هذول الي يسافرون كويت يشترون منتجات دول الغدر

عنبو دارك هذول كانو في يوم بيعتدون على بلادك وينتهكون حرمتكم و بيغتصبون ارضكم وبينهبون خيركم , بيتمون عيالكم ويستبيحون حرمتكم
اخ بس جان زين لو اشتغل فالمجمارك بقعد حق الناس بسوط الي يشتري منتجات دول الحصار
عاد عقب يفنشوني يسجنوني عادي بس اشفي غليلي منهم

ولد العرب

04-06-2018, 01:06 PM

انا ماعرف شنو يحسوون فيه هذول الي يسافرون كويت يشترون منتجات دول الغدر

عنبو دارك هذول كانو في يوم بيعتدون على بلادك وينتهكون حرمتكم و بيغتصبون ارضكم وبينهبون خيركم , بيتمون عيالكم ويستبيحون حرمتكم
اخ بس جان زين لو اشتغل فالمجمارك بقعد حق الناس بسوط الي يشتري منتجات دول الحصار
عاد عقب يفنشوني يسجنوني عادي بس اشفي غليلي منهم
:eek5::eek5:

بومحمد المطاوعه

04-06-2018, 01:06 PM

انا ماعرف شنو يحسوون فيه هذول الي يسافرون كويت يشترون منتجات دول الغدر

عنبو دارك هذول كانو في يوم بيعتدون على بلادك وينتهكون حرمتكم و بيغتصبون ارضكم وبينهبون خيركم , بيتمون عيالكم ويستبيحون حرمتكم
اخ بس جان زين لو اشتغل فالمجمارك بقعد حق الناس بسوط الي يشتري منتجات دول الحصار
عاد عقب يفنشوني يسجنوني عادي بس اشفي غليلي منهم

اي والله يا اختي

الربع الله يجزاهم خير شغالين عدل

لو نص غرشه فيمتو
يشيلونها

عاد الي طاف طاف
لكن لو شافو وصادو مافي امل تطوف

وقلت من قبل الواحد لو مافيه من نفسه ان يترفع عن دول الحصار ومنتجاتهم
مافي امل يغير مبدأه

انطري بس خل يفتحون المركز والحدود
لو فتح

بتشوفينهم ف القيصريه يشترون فاين وماجله البيت للأسف

تقولين طالعين من قحط

ولد العرب

04-06-2018, 01:08 PM

انا ماعرف شنو يحسوون فيه هذول الي يسافرون كويت يشترون منتجات دول الغدر

عنبو دارك هذول كانو في يوم بيعتدون على بلادك وينتهكون حرمتكم و بيغتصبون ارضكم وبينهبون خيركم , بيتمون عيالكم ويستبيحون حرمتكم
اخ بس جان زين لو اشتغل فالمجمارك بقعد حق الناس بسوط الي يشتري منتجات دول الحصار
عاد عقب يفنشوني يسجنوني عادي بس اشفي غليلي منهم

قبل رمضان ياغايه ام العيال تقول رح اشتري مقاضي رمضان تعبت انها تقلب وادور غير منتجات الحصار
ان حصلت منتج حصار رجعته

تعبت ياولد العرب

رح انت وشيك عدل مابيه يدخل بيتي
قلت ابشري
وفعلا 3 ساعات مقاضي crazy

حمد 2002

04-06-2018, 01:33 PM

الحل سهل بس الناس مصعبه اغراض رمضان بالمشاري الي مامنها فايده وطبعا بيتنا من ضمنهم لاني لا ابرىء نفسي من ذلك ..

الحل سهل جدا بس احنا مصعبينه

الفطور تمر ولبن ولا ماي وتمر ،،

وعقب التراويح على الساحه 9 ونص عيش وطبعا عيش الحكومه متوفر والحمد لله ولحم استرالي والذبيحه كامله من مواضي ب 200 ريال تكفيك كذا يوم لو قلت له قطعها ثلاجه ،، والدجاج متوفر بعد ال 900 غرام ب 90 ريال من الصناعيه ،، المهم عيش ولحم ولا عيش ودجاج ويتخلله سلطه لانها تساعد على الهضم ،،

وتالي وقتك الباقي يتخلله تمر وقهوه وقليلا من الشاي الحمر ولا الكرك ،، ومع عدم نسيان الماي او العصير الفرش ،،

وبالليل موز وحليب ولا ماي على حسب المتوفر ،،

الدنيا سهله بس احنا مصعبينها ،،

دااانة قطر

04-06-2018, 01:40 PM

زين ما صادوا الحليب اللي يايبه من ألمانيا كنت خايف من الاحراج بس

البعض يتناقلون أخبار عن مزاد بيع كجرة دول بو حصرة يا علهم الحسرة .. أرد عليهم خلوا كجرتهم وارتقوا اخذوا حاجتكم وبس وبجودة تسوى سعرها

الحمدلله يومها أرسلت لمجموعة استفسر عن طريق السناب والانستقرام وتوتير اول رد جاني من الاخ محمد العنزي نزل المكان بنفسه وصور وأكد خلو من منتجات دول الحصار
أتوقع الفيديو مفبرك

دااانة قطر

04-06-2018, 01:44 PM

انا ماعرف شنو يحسوون فيه هذول الي يسافرون كويت يشترون منتجات دول الغدر

عنبو دارك هذول كانو في يوم بيعتدون على بلادك وينتهكون حرمتكم و بيغتصبون ارضكم وبينهبون خيركم , بيتمون عيالكم ويستبيحون حرمتكم
اخ بس جان زين لو اشتغل فالمجمارك بقعد حق الناس بسوط الي يشتري منتجات دول الحصار
عاد عقب يفنشوني يسجنوني عادي بس اشفي غليلي منهم
اختي القهر عارفين بس حججهم واهيه
كفايه انحرفنا بيت الله
غير اللي تبهدلوا
وغير اللي عشان يشوف هله يتغربل
بس في ناس ماعندها احساس

دااانة قطر

04-06-2018, 01:47 PM

اي والله يا اختي

الربع الله يجزاهم خير شغالين عدل

لو نص غرشه فيمتو
يشيلونها

عاد الي طاف طاف
لكن لو شافو وصادو مافي امل تطوف

وقلت من قبل الواحد لو مافيه من نفسه ان يترفع عن دول الحصار ومنتجاتهم
مافي امل يغير مبدأه

انطري بس خل يفتحون المركز والحدود
لو فتح

بتشوفينهم ف القيصريه يشترون فاين وماجله البيت للأسف

تقولين طالعين من قحط

ماتشوفونهم لين الحين يعايرون أهل قطر برواتبكم عاليه ويروحون يشترون من عندهم
والغريب من قبل الحصار في ناس تجي من هناك ويشترون من قطر

طلعة الروح

04-06-2018, 10:47 PM

الحل سهل بس الناس مصعبه اغراض رمضان بالمشاري الي مامنها فايده وطبعا بيتنا من ضمنهم لاني لا ابرىء نفسي من ذلك ..

الحل سهل جدا بس احنا مصعبينه

الفطور تمر ولبن ولا ماي وتمر ،،

وعقب التراويح على الساحه 9 ونص عيش وطبعا عيش الحكومه متوفر والحمد لله ولحم استرالي والذبيحه كامله من مواضي ب 200 ريال تكفيك كذا يوم لو قلت له قطعها ثلاجه ،، والدجاج متوفر بعد ال 900 غرام ب 90 ريال من الصناعيه ،، المهم عيش ولحم ولا عيش ودجاج ويتخلله سلطه لانها تساعد على الهضم ،،

وتالي وقتك الباقي يتخلله تمر وقهوه وقليلا من الشاي الحمر ولا الكرك ،، ومع عدم نسيان الماي او العصير الفرش ،،

وبالليل موز وحليب ولا ماي على حسب المتوفر ،،

الدنيا سهله بس احنا مصعبينها ،،

خلاصة ردك يجب التركيز على الاساسيات
واتفق معاك في اغلب اللي ذكرته بس بالنسبة للطبخ بدون دهن او قليل يكون افضل والافضل مانكثر من العيوش

العساف

04-06-2018, 11:04 PM

:stop: مانريد اغراضهم

بومحمد المطاوعه

07-06-2018, 10:01 AM

ماتشوفونهم لين الحين يعايرون أهل قطر برواتبكم عاليه ويروحون يشترون من عندهم
والغريب من قبل الحصار في ناس تجي من هناك ويشترون من قطر

المشكله مب كل العالم على يد وحده

ويكونون كفو للمقاطعه

في ناس ولا مفتكره في اقل موضوع
ماقلنا روحو ذبحوهم
بس على الاقل قاطعو المنتجات

ولا قلنا اسحبو على اهلكم هناك ولا تتواصلون معاهم

بالعكس خلكم متواصلين مع الطيبين الي مايسبون ولا يغلطون ولا يتدخلون في السياسه

لكن في نفس الوقت خلك صامل مع بلادك واسمع كلام ولي امرك

اهم حاصرونا واقطعو عنا كل شي بغرض يبون يموتونك من الجوع وهذي فكرتهم لكن
سبحان الله رب العالمين فتح علينا اكثر من باب ولله الحمد

لكن بعض البشر الله يهديهم ويستر عليهم

shadad

07-06-2018, 10:33 AM

خلاص . الموضوع الحين صار على مستوى الدولة نفسها. اعتقد بالبدايه كانوا يتغاضون لكن الحين لا. عندكم الفيمتو الجديد اعتقد اللي من الكويت - علب صغيره - صراحه روعه وتركيزه صح ومضبوط. الحليب والالبان والحين الادوية.
خلوها تخيس عندهم. والبدائل موجوده.
ونفس كلام اخوي محمد المطاوعه, حاصرونا في نص رمضان لا عبروا للاخوة ولا الدين ولا الجيره ولا حتى العشر الاواخر.

naklan

07-06-2018, 12:43 PM

نزل قرار على منع الدواء الي من صناعة دول الفجار
الان بداء الشغل الصحيح توقف بضائعي أوقف بضائعك
تضر تجارتي أضر تجارتك وهم المتضررون الاكبر
فالاستيراد من قطر قليل وما حصل ضربة
قوية لاقتصادهم ومصانعهم

معماري قطري

07-06-2018, 01:22 PM

قبل رمضان ياغايه ام العيال تقول رح اشتري مقاضي رمضان تعبت انها تقلب وادور غير منتجات الحصار
ان حصلت منتج حصار رجعته

تعبت ياولد العرب

رح انت وشيك عدل مابيه يدخل بيتي
قلت ابشري
وفعلا 3 ساعات مقاضي crazy

عاد انا اللي يبي لي دربيل قراءة ما ينفع معاي أوقات اسئل حد ماشي شمكتوب

معماري قطري

07-06-2018, 01:26 PM

الحمدلله يومها أرسلت لمجموعة استفسر عن طريق السناب والانستقرام وتوتير اول رد جاني من الاخ محمد العنزي نزل المكان بنفسه وصور وأكد خلو من منتجات دول الحصار
أتوقع الفيديو مفبرك

صحيح طلع مفبرك وكانت بضاعة من دول عديدة شريفة وفيها خير مب جيران الفَلَس

naklan

07-06-2018, 01:46 PM

https://mobile.twitter.com/WatanALMJD/status/1004597848053202946

احد المنتجات ما زال معروض سكر تعبئة الامارات

naklan

07-06-2018, 02:23 PM

https://mobile.twitter.com/lusailnews/status/1004566116037988352/photo/1

خسائرهم بالملايين من مقاطعة الدواء
واحنا ولا ريال تغيير وجهة استيراد فقط

عازف

10-06-2018, 03:24 AM

السلام عليكم ورحمة الله وبركاته

ياليت حد يتبرع ينزل لنا موضوع بالمنتجات البديلة اللي نقدر ناخذها ( ما أذكر إذا كان نزل موضوع مشابه )
لأني وايد احتار بخصوص بعض المنتجات اللي ما ألقى لها بديل وعلى الأخص بعض أنواع المنظفات

هاي منتجات بديلة صناعة قطرية مثل المنظفات واشياء خاصة بالمطبخ الخ،،وهاي رقمهم55777877 والتوصيل لين البيت وعندهم فرع بكتارا بميرة رمضان الجهة الجنوبية،101462101463101464101465

shadad

10-06-2018, 09:08 AM

https://mobile.twitter.com/WatanALMJD/status/1004597848053202946

احد المنتجات ما زال معروض سكر تعبئة الامارات

بلغ عليهم على طول.
حاليا الرابط عندي بلوك والا الحين كنت بلغت عليهم.

معماري قطري

10-06-2018, 10:32 AM

بارك الله فيكم

هذا دليل كبير على وطنية كل قطري غيور والتفافنا حول حكومتنا الرشيدة ورموزنا الطيبين اللي الكلاب الضالة نهشت في سمعتهم وأخلاقهم الطيبة

وعود يابس مغبر في عين كل حقود وحسود