محتاج استشاري لخرائط تعديل وتصديق لدفعات البنك

[asulaiti]

السلام عليكم ..

الصراحة محتاج مكتب استشاري لاعتماد إدخال خرائط التعديل، والتصديق لدفعات بنك التنمية ..

مو محتاج اشراف على البناء، لكن للتصديق على المراحل واستلام دفعات البنك .. فقط ..

اذا ممكن تسعفوني بأسماء مكاتب وأرقام الاتصال هنا في الموضوع أو على الخاص ..

وشكراً مقدماً ..

[سعود.]

مساء الخير

الدفعات تنزل الكتروني يعني اي مكتب استشارة يقدر يسويها .
مجرد 5 صور للمرحله المنتهيه تنفيذها ترسلها للمكتب وتساب وثاني يوم تنزل الدفعه في حسابك .

[معماري قطري]

عليكم السلام ورحمة الله وبركاته

وجود الاستشاري المتابع مهم جداً إخوي عبدالله وكل مهندس يفترض له اختصاصه .. استشاري الرجل الواحد هذا ابتعد عنه وشوف استشاري مختص يتابع بمهندسين مختصين

في البداية تحتاج انشائي يتابع تركيب الفورمات الخشبية .. وأكيد تحتاج شركة مساحة تحدد الأرض والمستويات ومواقع الأعمدة

الانشائي يشرف على الصب وياخذ عينات الفحص ويسوي فحص القمع ويستلم الحديد ويشوف الغطاء الخرساني والبسكوتات .. يقيس حجم العناصر الخرسانية ونوعية الحديد وسمكه وطريقة حنيه وتثبيت عنصر في عنصر .. يعني اشتباك القواعد مع الأعمدة له شروط

كذلك بتحتاج متابع فاهم في التمديدات الأساسية .. بيب الكهرباء للمنزل لازم يوصل قبل الدفان لموقع لوحة الكهرباء الرئيسية .. وبيب كيوتل وغيره لو تحتاج كاميرات وتمدد لها تحت الارض لخارج البيت من البداية

كل ما يستمر البناء تحتاج مهندسين خدمات ميكانيكل وكهربائيين يشيكون التمديدات ونوعيتها أو قنوات التمديد لأن غالبيتها تكون ضمن البناء

أنصح أي حد يصمم حديث يطلب خطوط الخدمات هذي كلها مجتمعة على رسمة خاصة تحدد مواقعها في البناء ونوعية القنوات وسمكها ومواصفاتها حتى يقدر يتابع ولا ينسى شيء

[معماري قطري]

يمكن نصائحي تزعل البعض لكن اللي يختار هذي الطريقة الغير قانونية كأنه يضر نفسه وسامحوني

الاستشارات جزء قانوني مهم وهذي إجراءاتها المعروفة وضمان لإستثمار بناؤك

كان بيتي قريب من سكني وقريب من شغلي .. وكنت اطلع وايد من مقر شغلي لمناقشات ومقابلات خارجية وكذلك لمواقع .. يعني ما عندي مشكلة امر البيت واشرف على كل شيء .. كنت لائق ومؤهل ومجرب سنين خبرتي توصل ل 11 سنة ولا اغتريت في نفسي ولا قلت باستوي سوبر مان .. مع اني حتى فوق سقف البنتهاوس ركبت وقت الصب

كان عندي جاكيت كله توصخ اسمنت وقت البرد وحظي إن لبسي بنطلون وقميص وتكرمون حذاء كانوا يومياً يحتاجون تنظيف وتبديل

رغم كل هذا حطيت استشاري وتابعته أول بأول وكان كل شغلي قانوني بمراسلات عن طريق الاستشاري

[asulaiti]

مرحبا شيخنا معماري قطر ..

عارف وجهة نظرك وأويدها .. إلا أن موضوعي أنا يختلف عن الاستعانة بالاستشاري .. كوني أنا المقاول .. والمشروع هو فلتي ..
لم ألجأ لهذا الأمر إلا بعد دراسة متأنية للوضع الحالي ولتجارب الأهل والربع .. فلدي أكثر من شخص قام بنفس الطريقة ومشى الحال معاه ..
وهو الآن يشطب ..

أرجع وأقول .. أن الطريقة المثالية هي توكيل أمر البناء لشركة مقاولات معروفة في السوق ولها وزنها .. إلا أن الأسعار كبيرة ..
والبناء يحتاج لمبالغ كبيرة .. فتوصلت إلى أن أقوم بنفسي بذلك .. وأعرف أنها مغامرة .. لكن وضعت خطط لكيفية البدء والمتابعة ..

ومثل ما وضحت سابقاً .. أي شخص لديه الإمكانيات المادية بأن يستطيع أن يزيد على قرض التنمية ويوكل شركة (( لها وزنها وسمعتها في السوق )) فليتوكل على الله ..
ويريح نفسه من غثاء البنيان .. لكن إن كانت الميزانية لا تسمح بتوكيل الشركات الموثوقة .. فأقول له .. إبعد عن عروض الأسعار الرخيصة .. فلن تكسب سوى التعب والغثيان معهم ..

هناك مقاوليين .. أسعارهم نوعاً ما معقولة .. لكن بعد البحث عنهم وعن مكاتبهم .. وجدت المكتب عبارة غرفة وحمام أعزكم الله ..
وهذه لا تستطيع أن ترتاح لهم وتوقع معهم أمر البناء ..

وفي النهاية .. من تجارب الناس اللي أعرفهم .. معظهم قالوا نفس الكلمة ..
لو سوف نبني مرة أخرى .. سأختار شركة لها وزنها وسمعتها في السوق ..

وفي النهاية الكل يعرف مشاكل المقاوليين الصغار .. وأنا في الوضع الراهن إما أبني بنفسي الآن ..
أو أصبر لي كم سنة أسدد بعض الأقساط .. ثم أبدأ في توكيل مقاول أتطمن في توقيع العقد معاه ..

هذه وجهة نظري .. قد أكون مصيب فيها .. وقد أكون مخطئ ..

لكن في النهاية أرجع وأقول .. إنها مغامرة لا يجب الخوض فيها إلا بعد أن تتأكد من مقدرتك على القيام بها ..

والله المستعان في كل الحالات ..

[معماري قطري]

الله يعينك ويوفقك

عارف وضعك ومتابع معاك من البداية وانت ما شاء الله عليك من الشباب الفاهمين واللي يسئلون ويتابعون زين

الله يوفقك ويعينك مع إن الوقت للصبيات خلاص قرب ينتهي وأفضل وقت والحرارة تحت ال 30 قد ما نقدر .. وعلى المواصفات القطرية أظن زادوها لل 35 وهذا وقت البلاستر والصبغ والجبس وباقي التشطيبات

دوم نصايحي عامة وتحملني لو اختلفت معاك .. قد تكون فيه حلول للصبيات في الأجواء الحارة لكن الثلج مب حل .. قصدي حلول كيميائية واضافات معينة تمنع تكسر الخرسانة وتشلخها وضعفها .. الثلج يذوب بسرعة ويتحول ماء ويرتفع المحتوى المائي وتستوي الخرسانة ضعيفة وحطيت اختبار القمع في يوتيوبيات البناء معه شرح مفيد للي يبي يطلع