غَيَّـــرت جَو ؟؟ تغيرت نفسيتك ؟؟ شلــون

[الحياة الخالدة]

السلام عليكم ورحمة الله

صبحكم ومساكم الله بالخير

وايد نسمع هالجملة : نبي نغير جو .. نفسيتنا تعبانة .. زهقنا وملينا

كل واحد منا عنده طريقته في تغيير الجو أو الترفيه عن نفسه

السؤال : شنهي طريقتكم ؟؟
وهل فعلاً تغيرت نفسيتكم عقبها ؟؟ والا كان بس شي لحظي ورجعتوا نفس ما كنتوا
هل تغيير الجو مكلف بالنسبة لكم ؟؟ والا ممكن يصير بأبسط الأشياء ؟؟

وتسلمون مقدماً على المشاركة وحتى المتابعة

[ولد العرب]

المووضوع حلوو وشي جديد ماشاء الله

شوفي عني مافيه شي روتيني ابدا والسبب اندمج مع عيالك واسرتك وهم اللي بيغيرون عليك الدنيا كلها

من نفسهم يطرحون افكار وانا انفذها لهم

مثال الشوي في الحديقه نغير مره دجاج مره لحم مره ذره مره شاي وحليب على الفحم اشياء واجد مثل همبرجر ونقانق وروبيان وووووووو مارح يحسون بروتين الشوي
تغير اماكن الاثاث البيت كل 6شهور وهنا مراح يحسون بروتين المنزل لانه تغير عليهم
طبخ بالمنزل عن طريق الكتب متخصص او مواقع الانترنت هنا تنووع الاكل هندي صيني عربي هنا ماراح يحسون بروتين الاكل عليهم
افكار في تطوير الحديقه
طبعا غير مكلفه دامها في نطاق المنزل
والمنزل اجعلها جنتك ودنياك
ولنا جدول مرتب كل ويكند
اندمج مع اسرتك بتنسى الدنيا كلها شررررررررررررررررررررررررررررررط امتنع عن النقد والسلبيات وخلك ايجابي وشجع
وهنا من نفسهم بيحبون الجو معك كأب خفيف وحبيب وهادي غير سلبي وغير منتقد
صدقون ماتحس الا سنه طافت تبارك الله

[ابو عبدالله.]

موضوع مفيد جدا

تغيير الجو هو تغيير للروتين و تخفيف للضغط النفسي من عمل او اي مسؤوليه

ممكن بطلعه تمشايه و تجربه مكان جديد او حد موصي عليه
او تسوق لشراء غرض انتي تحبينه و بيضيف لك في يومك او يسهل لك امور مثل جوال جديد بدل القديم او كمبيوتر او حتى كوفي مشين

وفي الافضل وهو اكتشاف شي جديد يغير النمط العادي لديك
مثل تصفح او اكتشاف امور بالنت عن هوايه عندك تحبين تطورينها او طريقه عمل امور لديك بطرق جديده و افضل و اسهل

البعض يبحث عن طرق للديكور و الالوان و البعض عن تعديلات منزليه خلاقه و الاستخدام الافضل للمساحات و حتى عمل هوايات كانوا يحبونها وهم صغار

الي افضل منه هو التصفح عن امور جديده تضاف لما هو موجود

مثلا انا عندي شغلات كثيره امشيها يوميا و اسبوعيا. و دائما احب اشور اخر المستجدات وفعلا كل فتره القى امور افضل و اوفر و اسهل

امور ممكن اطورها كفرصه تجاريه كالبحث عن منتج او رفع كفاءه و عدد شي موجود عندي ممكن اطوره اكثر او الاستغلال الامثل للمصدر المتوفر

تقدرين تقولين ان نوع من تغيير الجو عندي هو البحث بالانترنت لما احب اكسر الروتين ودائما هناك جديد يغير نمطي اليومي بالتفكير
وايضا استفيد منه كمعلومات عامه او دقيقه لبعض الامور

ايضا من كم سنه بدأت تغيير الجو بسفره سريعه كل كم شهر مش مخاسير لكن تكلفه محسوبه مقارنه مع المجهود اليومي و الضغط الكبير من المسؤوليه لانها كبيره فعلا واشوف ان السفر كذا مره بدون الاسره مفيد جدا للعوده من جديد بطاقه كامله ويكون وقت مستقطع لي و لنفسي فقط. كمكافئه وانا اشجع على مكافئه النفس دام الانسان يجتهد و يشيل مسؤوليات خصوصا في حياتنا السريعه و المضغوطه

دام احنا بموضوع تغيير الجو. فشجعتيني اقدم اجازه اسبوع لان مدارس العيال اجازه الاسبوع الجاي

شكرا ع فتح الموضوع. افادني جدا اليوم

[معماري قطري]

اليوم رحت فيلاجيو لقضاء شغلة وفي هذي الطلعات أكيد تغيير والمشي بروحه متعة وصحة

[معماري قطري]

من الأشياء اللي تريحني وتمتعني كذلك مشاهدة الطيور والزراعة

[Dana’1]

تغير الجو يكون حسب الظروف والارتباطات فيه الي بالمدارس بعمل ووو إلخ
السفرات القصيره اكيد تغير الجو ولها شعورها الجميل .. لكن مو لازم إن تغير الجو يكون بالسفر بس أو بحجز فندق بالبلد أو بالطلعه ممكن تصير بأبسط الأشياء
تقريبا أي روتين يومي ممكن يملل صاحبه يكسره بشي يحبه الشخص او العايله يعتبر تغير جو
مثلا الجلسه برا بالحوش بقهوه العصر يعد تغير جو .

[naklan]

موضوع جميل يعطيج العافية اختي الحياة الخالدة
قرأة الردود بروحها تغيير جو هههه بالنسبة لي تغيير الجو عندي
يومي واسبوعي وشهري وسنوي
يومي كل يوم له برمجة ومشاوير وفرجة يعني اخلص مصالحي باستمتاع
ويعتبر يوم جديد وبفرجة وانبساط اسبوعي اخرج خارج الدوحة الشمال أو الجنوب
أو دخان وأغير جو وأسبح في البحر أو حداق أو الفلف بالسيارة واشوف هالمناطق الجميلة
واخرها شهري أو كل شهرين سفرة بسيطة لمكان جميل وتتغير الاحوال الجوية والنفسية عندي
وآخرها سنوي سفرة جايدة لآخر بقاع الارض ونشوف عجائب خلق الخالق من الطبيعة الى
الأنهار والجبال ونتسوق ونرجع جداد بقراطيسنا ههههه تغيير الجو عندي دائما
والحمد لله ما اسافر وأرجع الا تذكرة السفرة الي بعدها في الدرج حذا راسي
يسلم راسي وراسج ورأس السامعين الخسارة خسارة الروح
وقط فلوسك في الشمس واجلس في الضلال
الحمد لله والله يديم علينا الأمن والامان
تحياتي

[حمد 2002]

موضوع حلو .. لي عوده له بسرد مفصل وصادق

[sara jsm]

والله الردود غيرت نفسيتي :eek2::eek2:
بالنسبه لي اي طلعه بدون عيالي احس اني اغير جو ..
حتى لو نروح مطعم :no:
وقمة الوناسه والترفيه اذا طلعت مع اقرب صديقاتي :looking: وهذا نادر جدا ..
والحمدالله طلعاتي مب مكلفه :p

[لبيبة]

وعليكم السلام ورحمة الله وبركاته،

موضوع حلو جدًا ويشرح النفس مع الردود الجميلة،

فشكرًا عليه أختي الحياة الخالدة،

أحب أغير جوي ونفسيتي بتغيير روتيني اليومي بأي شي لو بسيط،

حتى لو كان ترتيب أغراض قديمة،

طلعة خفيفة لأي مكان مع ناس أحبهم،

ممارسة هواية جديدة أو أسترجع هواية قديمة،

تعلم مهارة جديدة،

الرسم ممتع جدًا خصوصا لو كان هناك موضوع محدد وعليه منافسة للابداع،

قراءة كتاب،

وبالتأكيد استخدام تطبيقاتي المفضلة في جوالي تسعدني.

[Chanel]

تتغير نفسيتي بالمشي اليومي
ازور امي واسولف معاها بروحي واخذ اللي بخاطرها واطلع منها راضيه عني تدعي لي هذا كله سعادة مايعادلها شيء
العطوروالبخور والشموع جداااااا لها تأثير قوي
قراة كتب متنوعه
التسوق اون لاين
اخذ كوفي مع أبو العيال وفي السياره نتمشى
سفره بو يومين ثلاثه تكسر الروتين وتعدل النفسيه
المساج وخصوصا عن تجربه مساج القدم خياااال
طلعه مع الصديقات ....أشياء بسيطه ولكن تأثيرها في النفس كبير

[رجل تعليم]

إذا سافرت لطنجة لا أغير الجو فحسب ...بل ألونه بأبهى الألوان ..
اعشق دروب تلك المدينة في اقصى الشمال...وهي لا تبعد عن بلدتنا سوى مسافة 360 كيلو ...
السفر لطنجة يكلفني 300ريال قطري .
...
القنص .. حمل البندقية والتجول في الغابات لمسافة 20 كيلو صعودا ونزولا بين القمم والوديان والسفوح يمنحني راحة نفسية هائلة سبحان الله ...
أما حين أذهب لعملي القديم في المدرسة فإنني لا انجح في تغيير الجو ههه ..بل أفشل في فعل ذلك ليكون الجو هنالك هو "ذاك الذي يغيرني "
أعود مغبرا بالطباشير والضجيج

[qatarman8008]

تغيير النفسية حاجة ملحة وباستمرار..
في الدوام وفي البيت وايضا في الويك اند..
في الدوام انا اطلع برى اشوف لي مكان مفتوح اتمشى فيه خصوصا مع هالجو الزين هاليومين..
امر عالمدخنين في الشلتر اسولف وياهم ويازينن سوالفهم اذا دخنوا هههههههه..
برى الدوام احاول اني اطلع مكان جديد ..
اخر مرة رحت لطوار مول للتغيير فقط ولو اني ما احب ادور في المولات..
طبعا المشي هذا له فوائد كثيرة ويفتح الشهية لوجبة العشاء..
..
قس الاجازات احاول اسافر مكان فيه فعاليات ومشي وحركة ومتعه..
ما احب اروح مكان راقي ورسمي واتم حاكر عمري..

[معماري قطري]

خطتي التغييرية قبل رمضان إن شاء الله بس استلم الفيزا بسافر سفرة خفيفة صوب باغيس وبعدها دوسلدورف بالقطار ومنها بالسيارة فرانكفورت وميونخ وبارجع قبل رمضان

بتكون معي أُم العيال وباحاول اهجر الكمبيوتر هجران كامل وهدفي وزني ينزل لين 84 بس كيلوين راضي وقنوع

[بوخالد911]

مشاهدة البحر
والحداق

والمشي بشارع ( نانا )

قمة تغيير الجو.

[sweet qatar]

يعطيج العافيه على الموضوع الحلو


اذا ابي أغير جو اروح الوكرة

السوق او الفرضة بروحي


وإذا ابي أغير نفسيتي اسوي شوبنج
او اهتم بنفسي و بتعرفين قوة مشاعري من الي أسويه
اذا تضايقت من كلمة أحط ماسك
وإذا موقف اروح الصالون و هكذا ..!


اما اذا مانفع شي انام لين الله يفرجها
مشكلتي اذا تأزمت نفسيآ أمرض فعليآ



ذكرتيني يوم اسافر دبي أغير نفسيتي حسبي الله على مبز و مبر :(

[تغلبية]

^ منورة سويت قطر:)

:

تغيير الجو "الحقيقي" عندي هو اسكتشاف قطر ... سواء مكان (بر-بحر << أحب الطبيعة) .. أو منطقة ..

أو أي محل أول مرة أجيه والأغلب محد يعرفه .. والأحلى إذا كان بعييييد ... أحس فعلاً بتغيير الهوا والمكان

والنتيجة المعتادة اللي أطلع فيها كل مرة إن قطر وايد حلوة .. وأكيد فيه أماكن أحلى تنتظرني اكتشفها... فيصير عندي شغف شنو بكتشف المرة الجاية!


أما التغيير السطحي ... زيارة .. أو طلعة مع الصديقات .. بعد نحاول يكون فيه شي مختلف عن كل مرة.

وشوي شوي أرجع لممارسة هواية القديمة واهتماماتي .. ألقى فيها المتعة والراحة...

وبس والله ،،

.

[الحياة الخالدة]

السلام عليكم ورحمة الله

أشكركم جميعاً من أعماق قلبي على مشاركاتكم الجميلة .. واللي بالفعل غيرت جوي ونفسيتي
فرحت بمشاركة الاعضاء المتواجدين باستمرار .. وكذلك الأعضاء اللي صار لهم فترة غايبين أو قليلي المشاركة
فلكم جزيل شكري وامتناني

https://shahean.files.wordpress.com/2010/09/4245.jpg

[الحياة الخالدة]

شخصياً .. مقتنعة بأن أبسط الأمور ممكن تغير نفسيتي
ويقولون القعدة مع طفل صغير .. أو شخص كبير في السن .. تصنع الكثير من الفرق
أحب أقعد مع العيال بمختلف أعمارهم وأشاركهم سوالفهم واهتماماتهم وألعابهم .. وطبعاً السن له حكم .. لكن حتى الطفل ذو الثلاث سنوات مثلاً أحاول ألعب معاه الألعاب الحركية والطفولية اللي ممكن تبدو سخيفة بالنسبة لي ومضحكة للغير .. لكنها تغير وايد من الحالة النفسية .. جربوها وبتعرفون قصدي

طبعاً التسوق وشراء الأشياء اللي أحبها وبالأخص العطور هي غاية متعتي
السفر .. من غير ما تكون مرتبط بناس تحاتيهم وتشيل همهم .. يحد من درجة الاستفادة وتغيير الجو
لكن الطلعات المحلية بعد فيها خير وبركة .. حتى لو كانت تمشية على البحر ( بس يكون الجو حلو )

مجالسة الناس المريحين بالنسبة لي .. تصنع الفرق كذلك
الوالد الله يحفظه .. خواتي واخواني .. معارفي وصديقاتي .. من غير ما تتخلل الجلسة شكاوي وشكاوي وشكاوي ( لكن بعض الجلساء مستثنين أكيد والمجال لهم مفتوح يطلعون كل اللي يقلبهم )
وأحياناً تحتاج تقعد وتتكلم مع الناس اللي عندهم مشاكل حقيقية .. ببساطة عشان تعرف وتحس بالنعمة اللي انت فيها .. وإن اللي مضايقك ومكدرك يعتبر ولاشي بالنسبة لظروف ووضع غيرك

هاذي بعض الأمور
وطبعاً الكلام ما تعرضت فيه للجانب الديني .. فتلك مسألة خالصين منها .. وما نحتاج التأكيد عليها .. ولا ينكرها عاقل

لي عودة بإذن الله
وشكراً مرة أخرى

[sweet qatar]

^ منورة سويت قطر:)

.


النور نورج حبيبتي .. كلج ذوق :shy:



حاضرين لج يالحياة :)

[بنت شرق]

تتغير نفسيتي للأحسن إذا ما رحت الدوام فماسكة كل العارضات والاجازات المرضية
صراحة خلهم يغيرون الدوام من 9 الى 3 أو 8 -12 لكن قومة الصبح صارت مزعجة لي
وتتغير نفسيتي إذا سافرت تركيا خوش بلاد