محتار مادري ايش هو الحل ...

[الامير]

سلام عليكم بعد اذن المشرف ع هذا القسم والله ماحطيته الى عشان يشوفه اكبر عدد من الاخوان يمكن احد منهم يدلنا ع الخير ان شاءلله ...
الموضوع
للاسف رحت مكتب والله مادري هو مكتب استشاري. ولا تصميم
كنت ابي توسعه ف البيت وتصميم.
هل اكمل او دلوني ع مكتب امين وثقه وصادق يمكن العمل لان لاتوجد ثقه ف مكتب سابق

[بوخميس]

ما في الا بو عبدالله (معماري قطري) يفيدك

[الامير]

جزاك الله خير ممكن رقمه

[بوخميس]

جزاك الله خير ممكن رقمه

تواصل معاه
موجود في المنتدى كل يوم

[معماري قطري]

ما في الا بو عبدالله (معماري قطري) يفيدك

صباح الخير اخوي الطيب

المكاتب صراحة القوية أسعارها مبالغ فيها

واللي في الساحة وشغالة وتستقطب شغل ورخيصة شغلها توقيع وبس ونسخ .. انا مب ضد النسخ بالعكس لو التصميم ناجح ويفي بالمتطلبات ممكن يكون نموذج يحتذى به وكثير نماذج انتشرت مب بس في قطر في كل العالم .. يبقى التغيير بسيط وطفيف حسب اختيار المالك وذوقه الشخصي

نصيحتي للي بيصمم ليبالغ ويحاول يشوف نموذج أفضل له وممكن يطور عليه ويعدل النواقص .. يركز على المواصفات كالعزل الحراري الجيد والمناور السقفية لأنها تساهم في تنفس البيت تنفس صحي برفع الهواء الساخن فوق وتحريك البارد تحت .. وحسب ميزانية الشخص ومساحة أرضه يرتب البنيان بدون مبالغة ويرتب الحوش بطريقة تفتح النفس والزراعة ضرورية وشرحت كيفية عمل الأحواض الزراعية من التأسيس والمفروض ندخلها ضمن التصميم

دوم توجد بدائل لكل شيء .. نوعيات الخشب بعض الخشب النادر جميل لكن ليس عملي .. عندنا في كل آسيا التيك أقوى خشب ومطلوب في أمريكا وهناك غالي لكن نسعى وراء الماهغوني الأمريكي أو غيره من ذات المنشأ حتى لو كانت ضعيفة مثل الآش وود

هناك مثل يقول لا تبتكر العجلة .. Don't reinvent the wheel لأنها تعتبر من أقدم الإبتكارات وغير معروف من إبتكرها بالضبط حيث كانت تستخدم قطعة خشب دائرية بدحرجتها وعليها قطعة خشب ثانية تحمل أحمال ثقيلة ومنها تم التحديث والتطوير للعجلات أو التواير اللي نشوفها في وقتنا الحالي .. كذلك التصميم سهلوا على أنفسكم بما يناسب احتياجاتكم

نصيحة لكاتب الموضوع يشوف مواضيع منتدى البناء والديكور تقريباً مغطي كل شيء .. موضوع العقود مثبت هو أهم موضوع ومواضيع كثيرة تعطي الواحد اطلاع وبعضها بالصور والفيديوهات

البعض من خلال احتكاكي معهم يجون منظمين بملف متكامل وشغلهم واضح ومرتب والبعض الله يهداهم نناقش عدة نقاط ونسوي مخططات فيها كل هذي النقاط وفي الأخير يرسل لي رسمة مبدئية مشيول منها كل شيء ومركز على نقطة وحدة .. التصميم هو علاقة تربط كل شيء .. الحركة وسهولتها ووين نوقف السيارة وسعة الموقف وخطتنا لمواقف بديلة أو مستقبلية .. هناك الأشياء الثابتة والغير متغيرة لفترات طويلة جداً وهناك الأشياء اللي قد تتغير وهناك القطع التكميلية والتجميلية .. كل هذي تعني مدخلات التصميم

لاحظت البعض يعملون ممر وسطي واسع وينثرون فيه كراسي ويخططون غرف ومساحات جانبية قد تكون اقل عرضاً من هذا الممر وهي أهم وتكون في العادة مجلس وصالة ومطبخ ويترك الحوش ضيق .. ما لاحظت حد يعامل الممر كممر ويقلل عرضه لمترين مثلاً بل تكون المبالغة لست أو سبع أمتار وهو في حاجة للمساحات الجانبية أكثر

بعضهم الدرج يعمله مفتوح وعريض وهذا يكلف درابزين كامل ومن كم جهة + رخام غالي وتركيبه مكلف .. والبعض يتعامل مع مساحة الدرج بادخال عنصر الاضاءة الطبيعية وعمله مريح ويكون بدون درابزين لتقليل التكلفة وارضيته بورسلان أو سجاد

بعضهم يعمل المصعد بيت خرساني بسمك 20 سم وحاجته قد تكون لخرسانة جزئية والباقي طابوق وممكن يقلل السمك ل 10 سم في بعض الأماكن وبعض الأماكن يعمل فيها فجوات بإضاءة مخفية أو لصورة معلقة

كل ما ركزنا في توزيع الأثاث وخليناه شبه ثابت كل ما عرفنا شلون نرتب الإضاءة والتكييف ونشتغل على شيء ثابت

أماكن التخزين هذي تعتبر غرف صغيرة ذات تشطيب بسيط ويستحسن نعملها بجدار مؤقت جبسي أو خشبي تفصل جزء كبير من بعض الغرف الكبيرة للملابس ولكل الاشياء الشخصية وهذي توفر حجم التكييف وما تحتاج ابواب داخلية فقط الباب الموصل لها .. أحد الإخوان عامل قسم للسلاح وأحدهم عامل الباب بالبصمة وقوي لا يكسر بسهولة

مهم الحيز الترفيهي مثل حوض السباحة والصالة الرياضية وصالة السينما وبعضهم يضطر يسوي بيسمنت لهذي الأشياء وعجبني شخص مسوي الحوض نص تحت البيسمنت ونص طالع في الحوش وبينهم حاجز زجاجي

أحد الإخوان عامل حوض السباحة في فجوة وسطية وغالب البيت يطل عليها ومغطيه بسقف زجاجي ومستوي الحوض والماء هو روح جلسات البيت حتى لو لم يستخدم في وقت ما للسباحة

المسطحات المائية مب شرط تكون حوض بمعنى الكلمة ممكن يكون بعرض مترين في ارتداد البيت ونسويه بحيث تكون له اطلالة زجاجية على صالة جلوس يومية .. والعمق اللي نحتاجه للسباحة 90 سم والمناسب جداً 120 سم والتسعين ممكن للصغار .. هناك الجدول المائي وهو غير مكلف ويحتاج لمضخة وهناك النافورة والشلال وهذي كلها عناصر تجميلية تشرح النفس لأي مبنى سواء عام أو خاص

وسامحوني على الإطالة

[معماري قطري]

جزاك الله خير ممكن رقمه

عن الرقم الله يرحم والديك سامحني انا آوت اوف سيرفس مثل ما يقولون وما اشتغل شبه متقاعد .. تبي رأيي في مكتب لو أعرفه باعطيك الرأي على الخاص

[sara jsm]

ماشاءالله عليك اخوي معماري قطر ..
الصراحة استفدت وايد من النقاط اللي ذكرتها ..
ربي يجزيك الجنه .. وعسى صاحب الموضوع يستفيد منها ..

[الامير]

اخ معماري ارجو منك تشيك ع خاصه بعث لك برساله
كل لي ذكرته ان شاءلله اني مهتم به بس كان موضوع شارح لك ف رسالتي

[aloosh]

انا سويت ملاحق نظام شقق عند مكتب عند المحلات اللي مقابله سبير صراحه شخص محترم جدا وصادق

متكتبه فوق ماك دونلد

[مالي عذر منك]

اخوي من رائي اذا كان الموضوع مجرد توسعة
فما تحتاج وجع راس لانه في الغالب بيكون نفس تصميم البيت الاساسي
اهم شي لاتاخذ المقاول عن طريق الاستشاري
وبترتاح

[SouthK]

انا سويت ملاحق نظام شقق عند مكتب عند المحلات اللي مقابله سبير صراحه شخص محترم جدا وصادق

متكتبه فوق ماك دونلد

اي ماك دونلد؟؟

[معماري قطري]

اخ معماري ارجو منك تشيك ع خاصه بعث لك برساله
كل لي ذكرته ان شاءلله اني مهتم به بس كان موضوع شارح لك ف رسالتي

ما وصلني شيء الله يسلمك يومياً اشوف الرسائل

بعدين انا مسافر بإذن الله بعد بكرة بارجع بعد 20 يوم

اليوم زارني أحد الإخوان من المنتدى وناقشت معاه تصميمه نقاش مطول حول 3 ساعات .. مرت سريعة لأن أُمور كثيرة كانت يبي لها حلول .. فكرة بيته حلوة بس تحتاج ترتيب خصوصاً مسوي بيسمنت ومسوي الحوش نازل من ثلاث جهات بس جهة مغطى بسقف خرساني

الله يوفقه والاستشاري أخره كثير وتعبه ولا عنده حلول منطقية لمسائل بسيطة

أوقات التأخير مضطرين له ومجبورين عليه والمفروض ندرس الاستشاري الجيد ونختار المناسب واللي بيخلصنا

[معماري قطري]

ماشاءالله عليك اخوي معماري قطر ..
الصراحة استفدت وايد من النقاط اللي ذكرتها ..
ربي يجزيك الجنه .. وعسى صاحب الموضوع يستفيد منها ..

الله يزيدج فايدة ويطلع أي مشروع في مستوى تمنيج

كثير أشياء نفكر فيها ونغير لبديل آخر قد يكون بسبب عدم وجود ناس تنفذ صح أو للمبالغة في الأسعار أو لضيق الوقت واستعجالنا ودراسة البدائل شيء مهم ولازم نحطه في الاعتبار ولا نصر على الحل الواحد .. حتى تفكيرنا في استخدام البيت وتغيير اسلوب المعيشة أوقات ما نستفيد منه ولا نلتزم .. مثلاً نسوي جلسة فوق السطح ولا نجلس فيها أو كماليات كثيرة ممكن نستخدمها مرة ومرتين

شيء مهم كثير منا يغفله وهو تكلفة تشغيل وصيانة المبنى أو المنزل .. التشغيل يتضمن صرفية الكهرباء والماء وهي غير محسوبة عندنا حالياً الله لا يغير علينا بفضل حكومتنا الواعية والمعينة للمواطنين على معيشتهم .. لكن هذي التجهيزات تحتاج صيانة كل ما اشتغلت أكثر وتحتاج اختيار جيد حتى تعمر عندنا بدون مشاكل

كذلك التشغيل يعني بيت كبير يحتاج جهد أكبر لزراعته ولتنظيفه ويحتاج عمال أكثر

هناك شيء مهم وهو بعض البيوت فيها مناطق وزوايا موحشة للصغار وللكبار لدرجة يحسون إنها مسكونة .. يقص علي أحد الأصدقاء قصة شخص بنى منزل كبير وعائلته صغيرة وغالبهم أطفال .. يقول كلهم يتجمعون في غرفة واكتشف خوف أطفاله من المرور في ممر موحش وطلع هو كذلك يحس بوحشة ويسمع أصوات غريبة .. وهذي مؤكد تهيؤات لكن لها أسباب