مبالغة خيالية في أسعار بعض السلع في المولات اوقفو الاستغلال

[naklan]

السلام عليكم اخواني الأعضاء الكرام

تلاحضون الي الاحضة ومع افتتاح الكثير من المولات التجارية طلعت لنا محلات
المبالغة والنهب باسم التجارة مثال تدش محل من هالمحلات تقوله بكم النعال وانتم كرامة
2500 زين والي هناك يمكن سعر معقول يقولك 3000 ياخي نعال تلبس في القدم لعقال
الي فوق الرأس ما يوصل هالقيمة تطلع وانت تفكر شهالاستغلال تدش عند راعي
الشنط بتسافر تبغي تشتري شنطة صغيرونة هاند كيري بكم هالشنطة قال
3000 يه وشهلاسعار زين والجلد الي عند الباب قال لي 5000 ههههه
تطلع وانت تفكر شنطة إغلا من تذكرة سياحية يالله يصير زين
دخلت محل اثاث مكتوب 8000 قلت والله زين كم كرسي
في الطقم قال هذا سعر كرسي واحد ههههه عيل
بكم يطلع الطقم 300 الف هذا اغلا من
البناء الي بيدش فيه


خواطر وملاحظات شفتها قلت أشارككم
ارائكم يا سادة ويا سيدات

[بوخميس]

ما ادري يا اخوي انت عن اي ماركات تتكلم

مثل ما في سيارات على 70-80 الف في سيارات على 700-800 ألف

ما يصير تروح وكالة المرسيدس وتدور سيارة على 50 ألف

ونفس الشي الاشياء اللي ذكرتها فوق

بتحصل نعل على 150 ريال في جنتلمان وتحصل نعل على 600 في تميمة وفي جلد ثعبان وجلد تمساح وديناصور اسعار اعلى

ونفس الشي بالنسبة للأثاث، روح هوم سنتر ولا ايكيا بتحصل اسعار مناسبة

السوق مفتوح وفيه اللي يناسب كل الاذواق والميزانيات

[naklan]

ما ادري يا اخوي انت عن اي ماركات تتكلم

مثل ما في سيارات على 70-80 الف في سيارات على 700-800 ألف

ما يصير تروح وكالة المرسيدس وتدور سيارة على 50 ألف

ونفس الشي الاشياء اللي ذكرتها فوق

بتحصل نعل على 150 ريال في جنتلمان وتحصل نعل على 600 في تميمة وفي جلد ثعبان وجلد تمساح وديناصور اسعار اعلى

ونفس الشي بالنسبة للأثاث، روح هوم سنتر ولا ايكيا بتحصل اسعار مناسبة

السوق مفتوح وفيه اللي يناسب كل الاذواق والميزانيات


حياك الله اخوي بوخميس
انا اعرف ان فيه بأسعار رخيصة في محلات اخرى
لكن أتكلم في هذا الموضوع فهو ضار وسلبي تطبيع الاعتياد
على الأسعار الفلكية المبالغ فيها وبعدها تجر السوق للغلاء ومافيه
مقارنة بالمرسيدس لسيارة اخرى مانقارن بشي مثل سلع صغيرة
مثل نعال وأنتم كرامة او شنطة اغلا نعال جلد نعام تفصيل
70 دولار انا كل ما امر تايلند اترس شنطة واشحنها
ونفس المحلات الي تبيع في الدوحة يصنعون
في تايلند وتايون ويكتبون صنع ايطاليا

تحياتي

[يمامـة]

صدقت يا اخوي نكلان..

المبالغة في رفع أسعار المنتجات خطة من بعض المحلات لجذب الناس
بحيث ان الشي الغالي يدل على رفاهية الناس و قدرتهم العالية في الدفع..

و اعتقد ان التصرف العام للمجتمع الا من رحم ربي هو سبب بروز مثل هذا الارتفاع..

فاليوم الواحد يكلم الثاني بدل ما يناظر ملامح ويهه علشان يقرأ لغة جسده
تلقاه يسوي سكان على اللي لابسه علشان يقيمه و يثمن كلامه و شخصيته..

ما عندنا ثقافة " انا اللي احلي الشي مب الشي اللي يحليني"
فمن جذيه طبيعي جدا نشوف انتشار المحلات اللي تبالغ في أسعار منتجاتها
رغم انها مب ماركات عالمية ..

[وليف الشوق]

انا جدا مستاء في المبالغه في الاسعار وصار لي كم يوم منبهر من الاسعار الخياليه اللي يتعرض لها المواطن والمقيم واتمنى اتمنى اتمنى من التجار مراعاة ظروف المستهلك خاصه ان الوضع الحالي مايستحمل ان التجار يستغلون الحصار ويرفعون الاسعار بهذه الطريقة التعسفيه والخطيرة

[@north_star@]

المبالغة صارت بكل مكان مب بس بالمولات والمشكلة تدفع قيمة كبيرة وما تاخذ شي يستاهل القيمة الي تدفعها وهذا غير التفاوت بالاسعار بين بعض المولات أو المحلات لنفس السلعة

[khalid Qtr]

مبالغة غير مبررة في الأسعار مقابل جودة مشابهة لمنتجات أخرى بأسعار أقل بكثير.

[Rider]

البديل موجود سوق العلي وسوق واقف اسعار حلوه اصلا هالمجمعات التجارية للحريم معظم الاشياء نسائية

[هداف]

لو مافيه بدايل بأسعار معقوله ... بنقول ان المبالغه والضرر طال الجميع

لكن عقلك في راسك وتعرف خلاصك

[sweet qatar]

انا ملاحظة العكس اخوي

من يومين اقول لرفيجتي سوق الدوحة صاير يجنن كل شي فيه

قبل ما اشوف الا بلايز و بدل هيلقية وبالآلاف و كنّا نشتري من برا كل شي

الحين ملابس اتينن القطعة ب150 او 300

[ابو عبدالله.]

وضع اسعار مبالغ فيها اصبح موضه لها زبائنها
وللاسف هذه حريه التجاره

المهم ان يكون المستهلك ذكي وعنده ثقافه استهلاكيه

اما الراكضون خلف الموضه بعضهم يستطيع تحملها وهذا حر وفلوسه الله مكثرها. اما البعض بوضع مادي عادي و يبالغ بالموضه و شراء الغالي فهذا الله يعينه

[طلعة الروح]

ركزوا على الجودة قبل التركيز على الاسعار.

[AFE]

السلام عليكم اخواني الأعضاء الكرام

تلاحضون الي الاحضة ومع افتتاح الكثير من المولات التجارية طلعت لنا محلات
المبالغة والنهب باسم التجارة مثال تدش محل من هالمحلات تقوله بكم النعال وانتم كرامة
2500 زين والي هناك يمكن سعر معقول يقولك 3000 ياخي نعال تلبس في القدم لعقال
الي فوق الرأس ما يوصل هالقيمة تطلع وانت تفكر شهالاستغلال تدش عند راعي
الشنط بتسافر تبغي تشتري شنطة صغيرونة هاند كيري بكم هالشنطة قال
3000 يه وشهلاسعار زين والجلد الي عند الباب قال لي 5000 ههههه
تطلع وانت تفكر شنطة إغلا من تذكرة سياحية يالله يصير زين
دخلت محل اثاث مكتوب 8000 قلت والله زين كم كرسي
في الطقم قال هذا سعر كرسي واحد ههههه عيل
بكم يطلع الطقم 300 الف هذا اغلا من
البناء الي بيدش فيه


خواطر وملاحظات شفتها قلت أشارككم
ارائكم يا سادة ويا سيدات

رأيي ان الحل بسيط وفي يد المواطنين مش الحكومة الحل الله يسلمك هو تأديب التجار شلون؟ نترك السلعه هذي او المحل هذا ومانشتري منه خير شر ماراح نموت ولا راح يصير فينا شي...بالتالي يخسر التاجر يا ينزل اسعاره او انه يسكر المحل نهائيا...

والحمدلله انك طرحت هذا الموضوع لان عندنا في قطر طلعت مشكله خطيره الا وهي لهياط لمفوشر وسمه الي تسميه فلان مب احسن مني وفلانه مب احسن مني وبيت فلان شاريين بذيك القيمه التجار ناس منا بشر عاديين ويعرفون حق هالسوالف ويعرفون ان هني في قطر لو حطو 10000 او 8000 الناس بتشتري لانها مش محتاجه لكن لمفوشر ذابحهم وعندهم ان الشي لكوالتي هو الاغلى.

روح هناك برى اوربا امريكا وحتى البلدان الاسيويه عندهم اشياء صناعه محليه وكوالتي وخشب اصلي وماوصلت حق هالاسعار

انا عندي نصيحة مثل ما باقي البلدان عندها صناعه محليه قطر مش ناقصه شي شجعوا الصناعه المحليه سوا اثاث او قطع ملابس او اكل خلو البلد تكتفي بذاتها ليش احنا نشتري كل شي صيني؟؟ كل شي مستورد؟؟؟ قطر ماشاء الله عندها الامكانيات انها تكتفي بذاتها حتى بالاجهزه الالكترونيه نصيحه للتجار القطريين كون مصنعك انت لا تستورد بتتعب في البدايه لكن ف الاخير بتنجح ويمكن تصدر حتى لبرى.

[حمد 2002]

محد طقك عل يدك وقالك اشتر بالسلعه الفلانيه ..

ومب ميت اذا ماشريت ..

انا اجوف انه كل تاجر حر بسلعته وهالشيء بالشرع حلال ومب حرام ..
مدامه ماحتكر سلعه معينه وخزنها وباعها في وقت عدم وجودها ..
انا اجوف انت غلطان ياراعي الموضوع :anger2:

[بنت شرق]

أنا اعتقد أن ثقافة القطرين في الشراء اهي الي مخربة الموضوع ولايمكن أن يسون مقاطعة لسلعة

[naklan]

شكرًا لكم جميعا لمشاركاتكم القيمة
والردود المفيدة انا أتكلم عن هالموضوع استنكار
لمثل هذه المحلات ولكن للامانة رايت ناس تشتري
وتشجع مثل هالمحلات وماعرفت السبب هل
هو هياط او حب لكل ماهو غالي وللامانة
مافيهم فرق عن الي في السوق الا
السعر غالي وبس

تحياتي للجميع

[وحيد-الشوق]

وعليكم السلام ورحمة الله وبركاته

اعتقد تقصد محل النعل الي في الحزم صراحه نعله ماتسوى وكلها خايسه كشكل وديزاين

انا مب ضد شراء نعاله غالية اذا حلوة وعاجبتني بس الواحد لازم يبحث ويتأكد ويجرب الشيء أكثر من مره وياخذه باقتناع

[Riku3]

حتى سوق واقف الي اجاراتهم رمزية يبيعون باسعار فلكية ..

كنت في امريكا وعجبني فستان بنات صغير ماركة موجودة في مجمعاتنا .. الفستان الواحد خذته بـ 7 دولارات وخذت 6 او 7 فساتين وزعتها على البنات ..... نفس الفستان من نفس الماركة حصلته عندنا بـ 175 ريال في التنزيلات .

من سنة كنت بفصل جلسة يقولون متر القطعة بـ 70 .. اخرتها وصلت حق واحد في الصناعية جابلي بـ 3 ونص للمتر ..... 3 ونص !!! .

[غيم الجنوب]

عندي نعال تميمه وانت بكرامه شريتها ب1800 صارلها فوق السنه عندي للحين جديده تقول شاريها من أسبوع
في شغلات تستأهل
بس تعال لمحلات الكوفي والبرغر في محل كوفي اسمه رقم طلبت اثنين كوفي الحساب فوق ال60!!
مطاعم البرغر الجديدة برغر صغيييييير مايشبع ب40 ريال
شوف عاد اذا طلبت 2 برغر وبيبسي وكم عددكم؟ رايح تاكل عالسريع برغر يطلع حسابك 400 ريال !
بخصوص الملابس في محلات كثيره اسعارها ممتازه خذ لفه واسال وبتحصل الي تبيه

[Dana’1]

مو شي جديد من زمان والاسعار مبالغ فيها بأغلب اذا مو كل شي
حتى بسوق واقف الي لهم دعم واسعار الاجار معقول !

اذكر وحده من صديقاتي قبل كم سنه زارت قطر قالت حشى ليش كذا الزحمه و اسعار المطاعم أنا اروح الكويت وغيرها هذا ومطاعمهم حتى اكثر تنوع والذ والاسعار معقوله ومناسبه وبعضها لنفس المطاعم بس الافرع الي برا قطر ارخص

عاد شلون وليش الله أعلم

[حبر وقرطاس]

ضد المبالغات في الاسعار .ارجو من الجهات المعنيه خلال هذه الفتره التدقيق على اسعار السلع فالمولات كما يقومون بالتدقيق في سلع الاغذيه لرمضان

[بوخالد911]

وليين قربنا من العيد بتنقززززززززز الأسعار فوووق.

[ameeer3]

لا حياة لمن تنادي ‏,‏ وكل ماله يتمادون في رفع الاسعار ولا حد يقولهم شي ‏

[حمد بن سعد]

في النهايه انت تحدد الي تبي تشتريه ويناسبك

تقدر تتعشى 10 ريال وتقدر تتعشى 300 ريال الانسب لك موجود ومتوفر في السوق

[naklan]

عندي نعال تميمه وانت بكرامه شريتها ب1800 صارلها فوق السنه عندي للحين جديده تقول شاريها من أسبوع
في شغلات تستأهل
بس تعال لمحلات الكوفي والبرغر في محل كوفي اسمه رقم طلبت اثنين كوفي الحساب فوق ال60!!
مطاعم البرغر الجديدة برغر صغيييييير مايشبع ب40 ريال
شوف عاد اذا طلبت 2 برغر وبيبسي وكم عددكم؟ رايح تاكل عالسريع برغر يطلع حسابك 400 ريال !
بخصوص الملابس في محلات كثيره اسعارها ممتازه خذ لفه واسال وبتحصل الي تبيه

طيب اخوي غيم الجنوب ب 1800 تشتري
5 حبات وتعيش معاك 7 سنين فرق بسيط عن سعر السوق
بنقول معقول لأكن 10 أضعاف الموضوع بيكون دخل في الغش
والاستغلال والله اعلم في تايلند تشتري الجلد ويصنعونه
لك اذكر مره شريت جلد نعام وفصلته كشخة ويعيش
لسنوات وماتكلف ال 300 ريال