قدامك شي .. ووراك شي ثاني

[الحياة الخالدة]

السلام عليكم ورحمة الله بركاته

صبحكم الله بالخير
ياكثر اللي في حياتنا من هالنوعية
في ويهك يضحك ويهلي ويرحب .. ومن وراك يتكلم عنك ويتقول عليك ولو ما تمنى لك الشر .. فهو يمتنع حتى عن تمني الخير

قلب المؤمن دليله .. في حالات كثيرة نقدر نميز هالنوعية .. وفي حالات أخرى يغيب عنا هالشي

شنو المطلوب منا في مثل هالحالات :
نقابلهم بوجه مبتسم ونعاملهم بما يظهرونه لنا ؟؟
والا نعاملهم بالمثل .. ونصير مثلهم ؟؟

تحياتي للجميع

[بومحمد المطاوعه]

وعليكم السلام ورحمة الله وبركاتة ,,

الله يصبحج بالنووور

موضوع طيب وبتختصره لج


انتي تعاملي معاهم بتربيتج واخلاقج
لاتعاملينهم بالمثل

لأن صدقيني لو كنتي صاحبه اسلوب طيب وقلب ابيض واخلاق عاليه

غـــصـــب عنهم يحترمونج

وشكرآ

[بوخالد911]

بعد التأكد والتحقق لهذا الموضوع.
سأكون حذرا منهم.

وتعاملاتي معهم ستكون سطحية وسأتجنبهم قدر المستطاع.

[مختلف جداََ]

ممممممم
بجمع بين أول مشاركتين
بعاملهم بأخلاقي مع الحذر منهم

[ولد العرب]

يالله ياكثرهم حوووولي اعوذ بالله منهم نفااق درجه امتياز

[Charisma]

من زاوية بعيدة شوي .. ممكن ننحط في مثل هالموقف، جابوا طاري فلان والكل يبدي راية وتكون الغيبة.. وممكن يوصلة الكلام .. وممكن يتكون عنده أنطباع عنك، أستفدت شي؟ رايك وكلامك من وراة غير شي ؟ لا ، وأساسا اي لمة ينذكر فيها أحد ( من المعارف او الأصحاب ) بسوء ، فاعرف ان الموضوع ماله علاقه بالثقة "فيك" ، شخصيا اوتماتك يتكون عندي انطباع عن "المفضفض" ان لو صار سوء تفاهم ممكن يتكلم عني ! فاقطع الموضوع وعط الكاش : ستوب ، واحذر منه .

لذلك الأفضل لاتغتاب أحد ولاتتكلم عنه ولاتبدي رايك ( قدر الأمكان ) حتى ولو كان اللي قدامك "ثقة" ، وان جابوا طارية امسك جوالك وسو نفسك مشغول ، سلم واسلم .


الزاوية الثانية انك تتعرض لهالموقف ، فعلى حسب اللي انقال واللي اوصلك ، في "أغلب" الحالات طنش وتجنب وسطح ، وفي "بعض" الحالات لابد من المواجهه بعقل.

[اللوز]

يا كثرهم
حب على الخشوم وطعن في الظهور !!

[يمامـة]

من زاوية بعيدة شوي .. ممكن ننحط في مثل هالموقف، جابوا طاري فلان والكل يبدي راية وتكون الغيبة.. وممكن يوصلة الكلام .. وممكن يتكون عنده أنطباع عنك، أستفدت شي؟ رايك وكلامك من وراة غير شي ؟ لا ، وأساسا اي لمة ينذكر فيها أحد ( من المعارف او الأصحاب ) بسوء ، فاعرف ان الموضوع ماله علاقه بالثقة "فيك" ، شخصيا اوتماتك يتكون عندي انطباع عن "المفضفض" ان لو صار سوء تفاهم ممكن يتكلم عني ! فاقطع الموضوع وعط الكاش : ستوب ، واحذر منه .

لذلك الأفضل لاتغتاب أحد ولاتتكلم عنه ولاتبدي رايك ( قدر الأمكان ) حتى ولو كان اللي قدامك "ثقة" ، وان جابوا طارية امسك جوالك وسو نفسك مشغول ، سلم واسلم .


الزاوية الثانية انك تتعرض لهالموقف ، فعلى حسب اللي انقال واللي اوصلك ، في "أغلب" الحالات طنش وتجنب وسطح ، وفي "بعض" الحالات لابد من المواجهه بعقل.

سهلت علي توصيل وجهة نظري.. فشكرا لك

و بضيف اني شخصيا ما عدت يهمني شينقال من وراي.. اللي يهمني اللي اشوفه جدامي
لأن ما في شي يمنع ان اللي يكرهني انه يبدي كرهه لي بما انهم سهل عليهم يبدونه لغيري..

فموضوع انهم يقولون شي من وراي " فهم المسؤولين عن الكلام هذا مب انا "
اما ردة فعلي بتكون فقط عن وجههم اللي يقابلوني فيه......> و الله يعينا على حسن التصرف..

[sara jsm]

وعليكم السلام ..

موضوعج وترني :/ مروا علي ناس فيهم هالطبع القذر ..
لكني مااقدر اتعامل باخلاقي ولا انزل لمستواهم ..
فقط اتجنبهم والعلاقه تصير سطحيه بما اني صعب اقطعها ..
لكني اجامل او اتعامل كان شيئا لم يكن وايد صعبه وباطيح في النفاق ..
:
الله يبعد هالاشكال عنا ويطيحهم في بعض :(

[Dana’1]

أعاملهم بالي يعاملوني به قدامي ... إلي من وراي يبقى وراي ويوترهم ويضرسون عليه مع نفسهم أكثر من إنه يوترني ويضرني
هذا بالنسبه للي ما يقولون او يتصرفون بأي حركات بايخه قدامي


تدرين أكثر شي يقهرهم ويكسر عينهم هو إلي يعاملهم بالاحسان وقتها بين ينقهرون ويستحون و يدرون انهم سفهاء يستشعرونها عدل هنا ااقصد الي ترتبط معهم بالارحام والاهل
للأمانه مابعد اتعامل معهم بإحسان هذي درجه مو أي شخص يقدر يوصلها ماشاءالله

بس شفت هالشي مع أحدالأقرباء بتعامله مع أبناء عمه المسيئن الظن والكلام عنه سبحان الله

[aloosh]

اعمل بما يريح ضميرك ويكسبك رضا رب العالمين
لو الكل يعامل بالمثل ما بقى اهل خير

[بنت شرق]

نعاملهم كأن لم نسمع ولم ينقل لنا مع الحذر منهم وما اطيح الميانة معاهم السلام عليكم وعليكم السلام

[طلعة الروح]

نفس العلل اللي عندي في الدوام بالضبط طريقة التعامل اني اضربه بالسلاح اللي يخاف منه عشان يصطلب معاك

[بومحمد المطاوعه]

اعمل بما يريح ضميرك ويكسبك رضا رب العالمين
لو الكل يعامل بالمثل ما بقى اهل خير

بالضبط :nice: