رمضان وهل بيكون شهر عباده ولا مسلسلات وكبر الكرشه ؟؟؟؟

[احمد1]

السلام عليكم ورحمة الله وبركاته .... اخواني وخواتي اهنيكم مقدما بقرب حلول شهر رمضان علينا اجمعين واللهم بلغنا رمضان وارزقنا فيه الرحمة والمغفرة والعتق من النار .... اللهم امين

حبيت اسال ولحد يتحسس من كلامي وان شاء الله يكون خفيف عليكم ... هل تجهزنا لرمضان عبينا العربات من الجمعية من ما لذ وطاب وتفنن في الطبخ والحلا ودبها على الفطور لين الله يشوف لك ؟؟؟ طبعا كل مالذ وطاب بالمعقول
هل حطينا جدول للمسلسلات الي انه دايم اقول انهم شياطين الانس يبدعون في التفصخ وتقديم كل ما يخدش الحياء في رمضان بالذات ... يقول لك مساكين صايمين خل نسليهم ... صايم ياخي تعبد الله اقرا قران روح التراويح وشد المأزر في العشر الاواخر
وياليت مالقا الاشكال الي مخيسه النفس في الدوامات تقول ضارب كزمه في الشمس وماله نفس يكلم الناس ؟؟؟ ليش انه صايم
ياليت شهر رمضان يكون للعباده والتقرب لله والبعد عن المعاصي وعمل فلتره على الاقل للسنه الي احنا دايم مقصرين فيها .
شكرا

[الخيالة]

بالنسبة لي عبادة و رياضة كالعاده

[يمامـة]

للحين ما عبيت شي..
بس ناوية ان شاء الله اتقضى للبيت
مثل كل رمضان بالمقاضي المرتبطة بالشهر الفضيل..

ما في شي يمنع ان الواحد يتعبد و يهتم
في البيت و اكل اهل بيته..
المشكلة في المبالغة في اعداد الانواع المختلفة
من الاكل و اللي ممكن يسرق وقت الواحد من غير ما يستفيد
من هالشهر الفضيل..
من اكثر عيوب الصايم للاسف الشديد
انه يمن على الناس صيامه و يدفعهم ثمن هالصيام
اتفق معاك في وجود ناس من يصومون ما يستحملون
كلمة مع انهم ما يعانون من امراض تسبب نزول في السكر
او هبوط في الضغط.. كل الموضوع انهم ماخذين فكرة غلط
عن الصيام و ان الواحد ما يقدر يطيق حد..

اما المسلسلات و التلفزيون بشكل عام الله يهدي
مدمنيها و يهدينا للي يحبه و يرضاه.. اللهم اميين

[aloosh]

تلفزيون مقاطعه من سنين بالذات في رمضان
اذا فيه برنامج مفيد اشوفه او اخبار او مباراه اما مسلسلات فا ما احبها او احب مشاهدتها بالذات العربيه اللي رقص وخمر وتحرش وتلزق وكلام بذئي
الحمدلله اللي فكني منها وهي مساله تعود

[جبر ال جبر]

عباده ورياضه ومتابعه مسلسلات وكبر الكرشه كلها شهر خير ورحمه ومتعه ونتظره في السنه مره كل لحظه فيه متعه ووناسه وذكريات من صلاه التروايح والريحه الطيبه والزكيه في المسجد لين ريحه الدخون في المجالس لين متابعه المسسلسلات والاكلات والسمره والسهره والصوم والدوام تحس انك انشط ايام السنه الله يعوده بالخير

[ضوى]

الحمد لله ، ان شاء الله يكون عبادة وتقرب لله سبحانه ، وبالنسبة للاكل مايتغير علينا شي وجباتنا هي هي يمكن الكميات تزيد عشان النقصة للجيران ، مع زيادة الحيلوات اللقيمات وسمبوسة وخلافه بس بعد مب بشكل يومي ، بالنسبة للتلفزيون نفتحه وقت فطورنا بس عشان المدفع والاذان وبعد الفطور ان كان في شي عدل نشوفه نتسلى ايا كان وغالبا يكون شي كوميدي ، وغيره ماندري عنه التلفزيون لا كبار ولا صغار ، والرياضة ان حصلنا وقت مشينا بعد التراويح وان ماحصلنا طلعنا نزور ارحامنا والله يبلغنا واياكم رمضان واحنا وانتوا باحسن حال

[ورد الدوحه]

اللهم بلغنا رمضان لافاقدين ولامفقودين
رحنا الجمعية وشرينا الفيمتو الانجليزي والشربت والحلويات وكل شي :yes:
طبعاً في رمضان ايزيد الطعام بس بدون إسراف أي شي ايزيد بيتوزع على المحتاجين ومايتم شي ولانقط شي.. الحمدلله
والمسلسلات حاطين عليها اكس من زماااان
و رمضان شهر عبادة وقراءة قرآن وأحلى شي صلاة التراويح في مسيد آل سعد:thumbup1:

[احمد1]

الله يجزاكم خير الجميع ويبلغكم رمضان لا فاقدين ولا مفقودين ويعينا على صيامه وقيامة على الوجه الي يحبه ويرضاه ...عن نفسي الغالين ولله الحمد مثل ماقالو كثير من الاخوان تزيد على الخفيف والتفنن في الحلا مع انه اني راعي سكر وما يصلح لي وحزة الفطور مع العيال نشوف التلفزيون حق مظفع الافطار وممكن برنامج كومدي بريء من التفصخ وغير ذلك لو ... صادتني حالة اني ابي اتابع شيء حدي ممكن بي ان سبورت على الاقل مالها خص بتشليخ الصيام .
شكرا

[راجي الْعفو]

وَعَلَيْكُم السّلام وَرَحْمَة اللهِ وَبَرَكَاتُه

امين


احنا طول السنة مبققيين عيونا في هالتلفونات و التلفزيونات

ليش ما تجاهد نفسك في شهر واحد بس في السنة و تبتعد عن كل هذا وتنشغل بأنواع العبادات؟

جرب و شوف نفسيتك شلون بتصير شرحة

صدقوني بتكتسبون راحة كلنا مفتقدينها بسبب هالاجهزة المدمرة

[بوخميس]

هالسنة رمضان شهر دراسة

الله المستعان

[بنت شرق]

بالنسبة لي شهر عبادة وثريد وهريس والحلويات عادي
اول كنا نشتهي نفتح التلفزيون ونسمع الأذان ومدفع الافطار الحين تلفزيون قطر مخربين الأذان حاطين لنا ما ادري منهو يتمشى
الا في الملعب إلا في الشغل لا يبه ردوه كتابة وصور سماء ومساجد ابرك

[ضوى]

بالنسبة لي شهر عبادة وثريد وهريس والحلويات عادي
اول كنا نشتهي نفتح التلفزيون ونسمع الأذان ومدفع الافطار الحين تلفزيون قطر مخربين الأذان حاطين لنا ما ادري منهو يتمشى
الا في الملعب إلا في الشغل لا يبه ردوه كتابة وصور سماء ومساجد ابرك

بالعكس اشوفه وايد حلو ، بنتي الصغيرة فهمت من هالمشاهد انه نترك كل شي ونتجه للصلاة عند سماع الاذان ، احسه زرع قيمة في الصغار

[يمامـة]

بالعكس اشوفه وايد حلو ، بنتي الصغيرة فهمت من هالمشاهد انه نترك كل شي ونتجه للصلاة عند سماع الاذان ، احسه زرع قيمة في الصغار

اتفق معاج..

الاذان فيه رسالة جميلة بأن مع الاذان الواحد يستعد للصلاة مب عقب ما يخلص الاذان
و الامام يكبر للركعة الأولى..

احييهم على الفكرة و في ميزان حسناتهم..

[بنت شرق]

مع احترامي لآرائكم أحنا تعودنا من صغرنا على طريقة ثانية مش محتاجين لوضع الشخوص في الأذان
أنا اعتبر الفكرة مش موفقة لأنه الأذان نداء آلهي له روحانيته

[ضوى]

احنا تعودنا على شي وهالجيل بيتعود على شي واللي عقبه على شي ثاني ، التجديد والابتكار في تحبيب كل جيل في الصلاة وزرع قيمة الصلاة بعقول وقلوب الاطفال تختلف من جيل لجيل ، انتي تشوفين مب مححتاجة شخوص في الاذان غيرج يقول يحتاج وبقوة وغيرنا يقول ممكن جذي وجذي واختلاف الرأي لا يفسد للود قضية

[الدوحه1]

بالاضافه الى السهررررر و المسابقات الرياضيه !!!!!

[يمامـة]

مع احترامي لآرائكم أحنا تعودنا من صغرنا على طريقة ثانية مش محتاجين لوضع الشخوص في الأذان
أنا اعتبر الفكرة مش موفقة لأنه الأذان نداء آلهي له روحانيته

احترامج مقبول ولج منا اضعاف مضاعفة..
ما في شي يلزم ظهور الاذان بخلفيات مساجد
او سما زرقة..
لا يعني ان احنا تعودنا على شي فهو لازم يستمر..
هذا هو المجتمع انقلب رأس على عقب
تعودنا المرأة ما تشتغل .. تعودنا ما في اختلاط
تعودنا ما في سينما .. تعودنا البنت ما تطلع مع صديقاتها
كل شي تغيير و مرحب من كثيريين..
فليش الاذان لما يطلع بخلفية جديدة تبين
للاطفال و المتابعين غير المسلمين ان عند الاذان
المفروض المسلم يترك كل شي و يتهيأ لها..

اما المسلم البالغ العاقل ما اعتقد وضع الخلفيات
بتضره في شي.. لانه في الاساس بيكون مشغول مع
الترديد مع الاذان..

[احمد1]

اللهم بلغنا رمضان سالمين صحيحين واعنا يارب على صيامه وقيامة على الوجه الذي تحبه وترضاه ... امييييين اجمعييين