منتجات ايران و تجارة

[الخيالة]

بِسْم الله
سلام عليكم
عندي استفسار
بغيت اسوي تجارة في ناس في ايران ثقه و راح نتعامل معاهم نجيب مثلا زعفران مكسرات و اي شي تفكرون ان نستفيد منه في قطر شلون نبتدي بما ان ماعندنا محل هل في ناس بيشترون مننا و اهمه يبيعونه عقب بالسعر اللي يحطونه بعدين لما شَرَوْا منا او احنا من البيت نبيع او شلون ؟
اذا حد عنده فكره و يقدر يساعدنا ؟!

[blackjacket]

بِسْم الله
سلام عليكم
عندي استفسار
بغيت اسوي تجارة في ناس في ايران ثقه و راح نتعامل معاهم نجيب مثلا زعفران مكسرات و اي شي تفكرون ان نستفيد منه في قطر شلون نبتدي بما ان ماعندنا محل هل في ناس بيشترون مننا و اهمه يبيعونه عقب بالسعر اللي يحطونه بعدين لما شَرَوْا منا او احنا من البيت نبيع او شلون ؟
اذا حد عنده فكره و يقدر يساعدنا ؟!
الله يوفقك ياختي

التجارة بالكلام سهله بس من تدخلين العالم هاي بتحصلينه كله ذيابة و يبون يفترسونك
وانتي اذا ماعندك محل بيكون صعب عليك، يبلك مخزن اقل شي لانه اذا التاجر عرف انك ماعندك مخزن او محل بيخلي البضاعة تخيس عندك و مايشتري منك لوهو محتاج عشان تحرمين تجيبين بضاعة،في منهم يشتري اول مرة وممكن يسوي طلب بس من تجيبين له عادي يسحب عليك و يقول حصلت سعر ارخص وتطيح البضاعة في كبدك و الجمعيات مشاكلهم وايد وشغلهم كله شيكات و يطلعون روحك لي ماياخذون بضاعة من عندك ، هاي من واقع تجربة مرت فيها في الحصار وحاولت اسوي بزنس.
انتي اول شي شوفيلك شراي من السوق و خلصي معاه السعر واذا تقدرين خذي عربون او اكتبي اتفاقية بينكم عشان تضمنين مايسحب عليك.
اهم شي عشان تسوين كل هاي لازم يكون عندك سجل تجاري عشان تفدرين تجيبين بضاعة

[الدوحه1]

بِسْم الله
سلام عليكم
عندي استفسار
بغيت اسوي تجارة في ناس في ايران ثقه و راح نتعامل معاهم نجيب مثلا زعفران مكسرات و اي شي تفكرون ان نستفيد منه في قطر شلون نبتدي بما ان ماعندنا محل هل في ناس بيشترون مننا و اهمه يبيعونه عقب بالسعر اللي يحطونه بعدين لما شَرَوْا منا او احنا من البيت نبيع او شلون ؟
اذا حد عنده فكره و يقدر يساعدنا ؟!



بس للعلم للاستيراد من الخارج لازم "رخصه تجاريه".. ومن متطلبات الرخصه التجاريه من البلديه لازم يكون عندكم محل او على الأقل مكتب !!

[بنت شرق]

بس للعلم للاستيراد من الخارج لازم "رخصه تجاريه".. ومن متطلبات الرخصه التجاريه من البلديه لازم يكون عندكم محل او على الأقل مكتب !!



ممكن اطلع رخصة إذا حد من اهلك عنده محل ويأجر لك اليافطة وأنت مش حالك بمخزن

[ابو عبدالله.]

ممكن عن طريق تاجر ايراني يوصل البضاعه للدوحه و تشترين منه جمله
و ممكن تاخذين رخصه العمل من المنزل بدون محل. و تحت مسمى اغذيه منزليه
الرخصه اعتقد 500 ريال سنويا فقط
و تقدرين تبيعين من المنزل و بالانستغرام و غيره

الافضل تعرفين سعر المنتجات بالدوحه و تشوفين سعرها بايران عشان تعرفين اذا في هامش ربح معقول

سوق الشمال فيه تجار ايرانيين ممكن يفيدونك بالبضاعه و الاستيراد
المكسرات لها محلات تشتري منك اذا مع البضاعه خطاب المنشأ
ومثلها الامور الاخرى وهذه سهله يعطيك اياها التاجر الايراني

[بوخميس]

اذا تبغين تدخلين التجارة لا تدخلينها بقروض وسلف

اللنجات كل يوم تجي من ايران والتجار مب عيزانين يجيبون الاشياء اللي قلتي عنها

اذا تبين تجيبين جيبي شي مب موجود في السوق وعليه طلب، وابتدي بكمية بسيطة وشوفي الاقبال ونسبة الربح

لا تجيبين شيء سريع التلف لان ممكن يطيح في جبدج

[QtrGate]

السلام عليكم
ممكن تأخذين ترخيص منزلي
وتبيعين من البيت
وهو افضل حل بدل دفع ايجار شهري قريب 20 الف
اعتمدي على الدعاية عند بعض المشاهير
لكن اهم شي طريقة التقديم والتغليف

[الخيالة]

شكرا للجميع ع الرد و ان شاءالله خير

[sara jsm]

وعليكم السلام ..
الله يوفقج ان شاءالله ...
اذا تقدرين هاتي فقع بشكل اسبوعي خاصه ان هذا وقته والموضوع موسمي ..
لكن ربحة ممتاز .. خاصه ان الفقع الايراني وايد قريب من القطري والذ من المغربي والجزائري اللي كان متوفر في السوق .. مجرد فكرة :thumbup:

[qatarman8008]

اول شي تواصل مع اكثر من تاجر كبير في ايران..
خذ من كل واحد مواصفات البضايع مع الاسعار..
اعرضها على انستجرام ومواقع التواصل الاجتماعي ..
ابدا نوع وشكل وغير الصور والثيمز لين فعلا يكون عندك زباين دايمين وبضاعتك ماشية..
لما تشوف انك وصلت مرحلة ان الوضع يستاهل فتح محل افتح محل..

[نجم سهيل]

السلام عليكم

على ماسمعت انه تم سحب كمية من المواد الغذائية من سوق الرويس بس عدم موافاتها لشروط البلدية وهي :

عدم وجود تاريخ انتاج وانتهاء

عدم وجود تفاصيل لمكونات المنتج


هالشي ضروري بالنسبة للي يبي يستورد مواد غذائية


وبالتوفيق