مطلوب تصميم عمارة اقتصادي

[تأملات]

السلام عليكم
أتمنى المساعدة في الحصول على تصميم عمارة مساحة الارض 600
لعدد ثلاث طوابق
بحيث يكون التصميم سهل التنفيذ واقتصادي
أو ترشيح مكتب استشاري

[معماري قطري]

عليكم السلام ورحمة الله وبركاته

صعب تحصل تصميم جاهز لكن سهل لو حصلت يتعدل عليه .. اشتغلت انا في تصميمين لعمارات صغار وحدة بحدود 360 وسبع شقق سكنية ووحدة بحدود 300 متر و4 شقق مكتبية + دورين محلات

600 ممكن تسوي لك ست شقق لكل دور ويعتمد على الاستشاري وفنه في التصميم ومناقشة التخطيط وأكيد أهم شيء التصميم المعماري

بالنسبة للي اشتغلت في تصميمهم كانت الأُولى في 1998 تقريباً واكتمل بناؤها 1999 وتيسرت الأُمور بسهولة .. الإستشاري جيد لكن كان شغله غير وكان بيخرب البناية علينا وزين كنت متفرغ وعندي نشاط وقتها واشتغل في الوقت اللي هو يشتغل فيه وطلع تصميمي أفضل .. هو الله يهداه حاط الخدمات والدرج في زاوية مهمة على الشارع وهذي المفروض تكون واجهة محلات

الثانية كانت ورطة وصراحة ما قدرت احل مشاكل تصميمها وكان اخوي الله يرحمه يتابع مع مكتب مالكه دكتور مهندس قطري .. لكن تصميمهم المبدئي ورطة ومخربط كل شيء .. غيرنا المكتب بعد ما دفعنا مبلغ كبير واحنا في مكانك سير .. والمكتب الثاني توفقنا بمعماري جيد حل كل المشاكل اللي انا بعد ما قدرت افكر فيها .. الأرض صغيرة وعلى زاوية وفيها صعوبات كثيرة وانا تدخلت بعد مقترح المكتب الأول لكن الثاني فكر بطريقة مختلفة وتوفقنا معاه .. معماري كان زين لكن ادارته للمشروع غش في غش وكان بيضرب علينا 500 الف لنظام الاطفاء .. عدلت النظام ووفرنا المبلغ ووقعت العقد مع مقاول ثاني .. لكن الاستشاري وانا ما ارتحت له بس كان اخوي متفق معاه يدير بنيان بيته وبيت الوالد الله يرحمهم جميع وحاب يواصل معاه .. لعب وقت التوقيع لعبة بحيث غير المخططات الانشائية لمخططات ثقيلة ومكلفة والمقاول كان دارس مخططات غير ووقع الجديدة بدون دراسة وتعرضت انا للاحراج بسبب الاستشاري وعرفت نيته الانتقام لكن انتبهنا له وعزلناه وعوضنا المقاول بمبلغ اضافي لتغطية خسائر كميات الخرسانة والحديد الاضافية .. يعني وفرنا 500 الف ودفعنا حول 50 الف بسبب لعبة الاستشاري

تبي استشاري زين شوف مكتب ابراهيم الجيدة العربي للشؤون الهندسية .. بس غالي وهو اللي مصمم برج برزان

غير عندك اتحاد قطر للتخطيط

غير بوكشيشة بعد زين .. غير مكتب السد وعندك جماعة العمارة العربية وغيرهم كثير

بس مهم لو اتفقت مع استشاري تتفق تصميم + مناقصة + اشراف وشوف موضوع العقود بيفيدك كثير

[تأملات]

600 متَر
تقدر تسوي ست شقق ؟

[معماري قطري]

ممكن بس صغيرة .. انا عندي ال 300 سوت 3 شقق غرفتين صغار وصالة وحمام ومطبخ وكلهم تأجروا سرعة

لو بتاخذ مساحة ممر وبيت درج ومصعد اتوقع 5 بالراحة بس شقق من غرفتين .. خل نفترض بتسوي الدرج في زاوية خلفية وهو الأفضل بمقاس 3 في 6 وتحته بتستغل المساحة حق تانكي .. جنبه غرفة كهرباء 1.5 في 2 أو حولها ممكن أصغر .. جنبها غرفة رمي القمامة وتنزل لتحت ما ادري يمكن منعوها ألحين الدفاع المدني .. وهذي ممكن 1 في نص متر .. جنبه مكان المصعد حق 4 أشخاص 1.4 في 1.6 أو حولها .. كل هالخدمات ما تاخذ 50 متر مع ممر لو استشاري جيد رتبها صح .. تبقى عندك 550 بتشيل منها نسبة للحوائط قول 500 كل شقة 100 متر مناسبة .. انا كنت ساكن في بيت 110 أمتار غرفتين وصالة ومجلس ومنافعهم

الغرف لشقق الأجانب حتى 3 في 4 كفاية وبعضهم يحبون المكان الصغير

لتشغل نفسك بالتوزيع والمساحات اشغل نفسك بالاستشاري الجيد وتبي متابعة حاضر من خلال المنتدى وتبي مراجعة للتصميم موضوع مراجعة المخططات ما فيه حد غير تصميم بيتي حالياً

[الخور]

ماستر للاستشارات الهندسيه

[تأملات]

معماري
اذ سمحت ممكن
ترسل لي رقمك للتواصل

[معماري قطري]

ما ادري شالمشكلة ما يطلع لي خيار ارسال رسالة خاصة

أرسل لي انت وبعدين انا ما عندي مكتب استشاري ولا اقدر افيدك اللي اعرفهم غاليين وما يفضون