فيلا مقسمة

[ALJokar]

بغيت مشورتكم واراءكم عندي ارض مساحتها تقريبا 1000 عرضها 25 طول 35
بغيت اسوي فيلتين متلاصقتين كل وحده لها باب خارجي والتوزيع الصالات والغرف في كل فيلا نفس الشي.
فيه مهندسين قالوا لي مايصير ماعندك مساحه وفيه مهندسين ارسمو لي اسكتش الخريطة المبدئيه وصارت.
هل يصير قانوني ان اقسم الفيلا الى فيلتين واذا لا كيف الطريقة لان ابوي وامي واخواني الصغار بيسكنون معاي وابيهم في قسم خاص فيهم وانا في قسم خاص فيني معي عيالي.

ياليت تفيدوني او اذا احد عندة خريطة مقسمة اقدر استفيد منها واخذ افكار.
بنزل لكم صور هل يصير اسوي نفسها ف الفليتين لو حبيت اطبقها على ارضي؟

101493

[معماري قطري]

عندنا تعقيد من التخطيط لو شكوا في التقسيم فما بالك يكون التقسيم مبدأ

انا مع التقسيم من البداية والتسهيل على الناس حتى لو الواحد يبي يأجر لكن أكيد وراء قوانين التخطيط توجيهات وترتيبات ممكن احنا ما نعرفها

نصيحتي شوف التخطيط شيعطونك من شروط وحاول تطبقها ولو تبغي تفصل تقدر تسوي بحد أقصى 4 أدوار واحد بيسمنت واثنين عاديين وبنتهاوس والبنتهاوس كبروه

إحتياجك للغرف تعرفه وتقدر تخلي الأدوار معزولة وبنفس الوقت متصلة ببعض ببيت سلم واحد في وسطه المصعد حتى تستغل المساحة صح

البيسمنت حاول تتفاداه بس لو ما باليد حيلة سوه باحتياطات وبمناور نازلة في الحوش بيستوي عندك كأنه دور كامل مكشوف للنور والتهوئة .. وأهم شيء سو عزل جيد وحط تصريف احتياطي لأي مياه جوفية أو أي ماي مطر ينزل قرب الجدران

المخطط اللي حاطه يبين لي مخالف بأن الملحق قريب من البيت بحدود متر وعندك الغرفة ورا السرير دريشة كبيرة تطل على الممر الضيق هذي لو ضرورية تقدر تقسمها لثنتين حول السرير صغار

ارتفاع الفيلا 90 سم من عدد الدرجات .. البعض يحب الارتفاع بس مزعج ومب عملي للحركة بسهولة على مدار اليوم .. كذلك للخروج للملحق تمر في ممر والمفروض الممر مدمج مع مطبخ البيت وهو الأسهل والأوسع والأكثر اتصال بين المطبخين

مساحة المطبخ الخارجي كبيرة وايد وتقارب مساحة المجلس والقطع اللي فيها بسيطة

من كم يوم اشوف فيديو للفلل المقسمة حسب قوانين دولة جارة شريرة ما احبها 12 متر للواجهة كفاية والعمق لازم يكفي لمساحة 200 متر أقل شيء .. يعني 12 في 16.66 مساحة أرض تعتبر كافية .. عندنا التخطيط الله يهداهم مب واضحين والوضع عندهم ضبابي على طول

انا رايي اشوف إن مساحة 1000 متر جيدة لفيلا وحدة مثل ما ذكرت ويبقى عندك الحوش فيه شوية سعة بدون تقسيم أفضل والله يوفقك توصل للحل اللي يرضيك ويكون منطقي أو تتعدل القوانين ويسمحون بعمل فيلتين متلاصقتين في مساحة 875 اللي هي حاصل 25 في 35 اللي ذكرتها انت

[ALJokar]

والله ياخوي معماري اني انا ف حالتي مضطر مالي خيار ثاني لازم اسوي فيلتين مفصوله
لكن انا عندي شك بسيط وخايف منه اصير ابني البيت مربع وافصلها بالضبط من النص والدرج من النص بعد اتمام البناء. لكن الخوف بيطلع المنظر والتوزيع جدا بايخ وبتصير مش ولابد حلوه.
فالحين قاعد ادور مخطط يكون معقول نوعا ما بحيث اني ماعندي مشكلة لو اخذ الحوش كله اقصد ماتهمني كثر مايهمني مساحته الغرف والصالات والمتطلبات عندي مش كبيره ف الغرف.

[ALJokar]

101494

101495

[ALJokar]

نفس المخطط هذا الي فوق مثال لكن ماهو عاجبني تقريبا ف التقسيم اشوفه المداخل كثيره وراء الثاني نفس الدواعيس.

[معماري قطري]

مضطر الله يسلمك لو هذي احتياجاتك .. تقدر ترتب أكثر شوي .. مثل الغرفة اللي فيها جلسة كبيرة تصغرها شوي وتكبر الصالة

كذلك اشوف بانيو الزاوية أقل من متر لطول الضلع وهذا مستحيل الغالبية متر و30 الى متر ونص

الجلسة في الغرفة كرسين فقط ما تحتاج هالعدد الكبير الغرفة للنوم والصالة للجلوس العائلي .. لو تبي توسع بعض الممرات اللي تعتبر دواعيس وهي كافية للمرور تقدر تصغر الغرف شوي وبتكون كافية بعد .. مقاس السرير يبين واضح وهو حقيقي وواقعي يعني مثل ما يقولون to scale

تقدر تخلي الغرف اللي جنب الدرج بابها داخل شوي وتسوي كبت حائط ثابت .. التصميم زين ويحتاج لشوية ترتيب ولو ما فيه بنتهاوس فوق تقدر تسوي منور سقفي على الصالة أو انك تسوي الدرايش كبيرة وراء الدرج

[ALJokar]

مضطر الله يسلمك لو هذي احتياجاتك .. تقدر ترتب أكثر شوي .. مثل الغرفة اللي فيها جلسة كبيرة تصغرها شوي وتكبر الصالة

كذلك اشوف بانيو الزاوية أقل من متر لطول الضلع وهذا مستحيل الغالبية متر و30 الى متر ونص

الجلسة في الغرفة كرسين فقط ما تحتاج هالعدد الكبير الغرفة للنوم والصالة للجلوس العائلي .. لو تبي توسع بعض الممرات اللي تعتبر دواعيس وهي كافية للمرور تقدر تصغر الغرف شوي وبتكون كافية بعد .. مقاس السرير يبين واضح وهو حقيقي وواقعي يعني مثل ما يقولون to scale

تقدر تخلي الغرف اللي جنب الدرج بابها داخل شوي وتسوي كبت حائط ثابت .. التصميم زين ويحتاج لشوية ترتيب ولو ما فيه بنتهاوس فوق تقدر تسوي منور سقفي على الصالة أو انك تسوي الدرايش كبيرة وراء الدرج


ماقصرت يا اخوي على الرد ولانستغني عن معلوماتك صراحه

[ALJokar]

حاليا صفيت على شركتين تبني لي لكن ما ادري اذا فيه احد يفيدني اكثر اكون شاكر له

شركة الصباح وشركة المانع وكلهم نفس السعر تقريبا المتر 1750 ع المفتاح. هل فيه شركة افضل بالسعر هذا او تشوفون ان سعر مبالغ ف الشركتين هذي.
سمعت عن شركة الجنوب لكن ماشفت شغلها او ما اعرف احد بنى عندها وسمعت عن شركة عفيف لكن يقولون انها غاليه شوي بس شغلهم لاباس فيه. ياليت تفيدوني جزاكم الله خير

[معماري قطري]

المانع شركة معروفة اعتقد المتحدة اسمها

وفيه شركات وايد للمانع وحدة كان يديرها واحد سوري نسيت اسمها بالضبط حتى اسمه .. أقنع ربعنا باستلام مشروع حكومي وصراحة كان وايد دون المستوى

الثانية اعتقد اسمها ردكو تأكد من سجل الشركة واسمها واختصاصاتها وتسجيلها اولى أو ثانية .. لين رابعة تنفع حسب علمي بس كل ما كبر تصنيفها كلما قوت واصبحت مسؤولياتها أكبر

الله يوفقك اختيار الشركة شيء صعب ونصيحة لتختار الشركة على أساس سعر المتر اختار على أساس المواصفات وتسعير مفصل أكثر حتى لو اختلفت تعدل

كل مقاول يسوي حسابات وجدول كميات خصوصاً لو يشتغل تسليم مفتاح .. أكثر اللي يلعبون مقاولي العظم

شوف موضوع العقود بيفيدك في هذي الناحية كله الا حول 100 صفحة

[معماري قطري]

شوف هذا نموذج لفيلات مطورة للبيع ومصفوفة جنب بعض ملاصقة مع جهتين بواجهات زجاجية ومع مصعد لكل وحدة .. لو يعطونك مفصولة وكل وحدة في قسم من الارض زين بس يبي لك مكتب يناقشهم ويبرز التصميم

https://i.imgur.com/5nUQ0Pj.jpg

[معماري قطري]

عندنا منور للدرج ويوصل للدور الأرضي ونقدر نعدل عليه بحيث نفتح درايش صوب الدرج وممكن نخلي المدخل على الصالة والمطبخ وراء .. مساحات مدروسة وصغيرة واحتمال ما يوافق عليها التخطيط تعتبر 3 أدوار بس مهم المبدأ كيف .. نقدر نسوي اللي تحت أكبر والأخير بنتهاوس بحدود ال 70% اللي للحين التخطيط راضيين ومب راضيين

[ALJokar]

شركة المانع اسمها موسسة المانع للتجاره والمقاولات

101525
101524

[ALJokar]

ما ادري انت تقصد هذي او غيرها ؟
اذا تقصد غيرها هل سمعت بهذي؟

[معماري قطري]

ما ادري ذيك المتحدة للانشاءات واحتمال ذي قوية وضحت لك كيف تعرف من خلال السجل والتصنيف

كذلك تشوف مقرهم وادارتهم وبعد تاخذ جولة في مشاريعهم القائمة حالياً

اذا تسليم مفتاح خله يحدد كل شيء بأدق التفاصيل .. حتى يسمي مقاولين الباطن ويعطيك عينات من المواد .. مثلاً يسجل لك في العقد إنه بياخذ نوافذ يو بي في سي من شركة كذا وبقطاع موضح رسمه وبمواصفات واضحة من حيث السمك وكم طبقة زجاج وباقي الأُمور .. وهذا ينطبق على كل بند مهما صغر

شوف استشاري يحدد الشروط أفضل

بس مستغرب منك انت للحين ما رسيت على التصميم ولا بديت فيه ورحت مباشرة للمقاول وخذت سعر المتر .. بعد انصحك تقرأ موضوع العقود والله يوفقك

[معماري قطري]

إخوي كتبت لك رسالة طويلة عريضة رد على رسالتك لكن بريدك مليان

[ALJokar]

السموحه توني ملاحظ ع رسائل الموجوده ف البريد مسحتها تقدر اطرشها مرة ثانيه

[Bo Turky]

الصراحه شركة الجنوب اللي صاحبها ولد فخرو من افضل الشركات وخاصه
في منطقة الوكره والوكير
ما شاء الله شغلهم روعه وسريع نفس شركة المفتاح
واتوقع اسعارهم غاليه على سمعتهم وشغلهم
بس انت مب خسران
مر عليهم وشوف السعر هل بيناسبك او لا
وشوف شركة المفتاح وشركة العمودي
شركة العمودي عن تجربه واجد ممتازه وشغلهم نفس شغل المفتاح والجنوب من حيث السرعه والدقه
وافضل مواد البناء
هذول حاليا افضل شركات بالنسبه لي ولناس كثير عن تجارب وعن شوفة شغلهم

[مواقف النجادة]

الصراحه شركة الجنوب اللي صاحبها ولد فخرو من افضل الشركات وخاصه
في منطقة الوكره والوكير
ما شاء الله شغلهم روعه وسريع نفس شركة المفتاح
واتوقع اسعارهم غاليه على سمعتهم وشغلهم
بس انت مب خسران
مر عليهم وشوف السعر هل بيناسبك او لا
وشوف شركة المفتاح وشركة العمودي
شركة العمودي عن تجربه واجد ممتازه وشغلهم نفس شغل المفتاح والجنوب من حيث السرعه والدقه
وافضل مواد البناء
هذول حاليا افضل شركات بالنسبه لي ولناس كثير عن تجارب وعن شوفة شغلهم

ما انصح بالجنوب .. يبالغون بالأسعار بشكل مضحك

[ALJokar]

ماقصرت يا اخوي بس ما ادري كم الاسعار عندهم تبدأ؟
ياليت تذكرها اذا تعرف احد بنى عندهم

[ALJokar]

اذا ماتنصح بالجنوب شنو تنصح طيب؟
ممكن توضح اكثر ليش سعرهم مبالغ فيه؟
وهل انت مقارن مثلا سعرهم بسعر شركات ثانية؟

[معماري قطري]

فيه شركة حاطة اعلان في الوسيط حسسوني انهم يبيعون قماش .. يقولون سعر المتر يبدأ من 1000 ريال عندهم للعظم .. بس لجذب العملاء ووقت الصج بيقولون احنا قلنا يبدأ من لكن لازم ندرس المخططات

هذيلا غالبيتهم يحاولون يبالغون حتى يضمنون ربحهم وبدون دراسة واقعية

أي حد يتجه لشركة تعطيه حساب مفصل للمراحل بكمياتها ومواصفاتها وسعرها وتكون جيدة ولها مقر وسمعة وفيها ادارة وموظفين يتوكل على الله ويوقع معاها .. ونصيحة يخلي المقاول يوزع المراحل وسعر كل مرحلة ما يعتمد على سعر واحد لكل المراحل حتى ما يظلم المقاول ولا يظلم نفسه .. كذلك يحتجز 5 أو 10% من كل دفعة للصيانة بعد الاستلام ب 400 يوم حسب القانون القطري ويخلي هذا بند واضح في الاتفاق .. المقاول لو عرف إن له فلوس محتجزة للصيانة بيشتغل زين وبيجي للصيانة خلال فترة الصيانة مع كل اتصال والا بتروح عليه الدفعة المحتجزة

[مواقف النجادة]

اذا ماتنصح بالجنوب شنو تنصح طيب؟
ممكن توضح اكثر ليش سعرهم مبالغ فيه؟
وهل انت مقارن مثلا سعرهم بسعر شركات ثانية؟

يوم بنيت بيتي ... خذت عروض أسعار من حوالي 6 شركات كلها معروفة و سمعتها طيبة و اغلبها كان من ترشيحات ناس في المنتدى مثل شركات: كونسيرف, الرائد, المناعي, رويال ابجر, شركة محمد عبدالله الخ ..

تراوحت العروض لـ 900 مترمربع عضم : من 1 مليون الى مليون و 300 الف

ما عدا الجنوب طلبوا مليون و 500 الف غير قابل .. بأسعار ذيك الأيام هذا كان سعر تشطيب

هذه تجربتي الشخصية و العروض مازلت محتفظ فيها كذكرى مع خرايط البيت..

وللامانة الشركة كانت سمعتها طيبة مثلها مثل جميع الشركات اللي طلبت منها كوتيشن في ذلك الوقت و مشكلتي معاها كانت في السعر بس

[معماري قطري]

للبناء عندنا في قطر طريقتين .. أما تسوي مخططات ناقصة وتعتبر مبدئية وتروح تدور مقاول وفي هالحالة المهنية ضعيفة والكل يحاول يغريك بالكلام ووقت التنفيذ تواجهك المشاكل والاختلافات اللي المقاول يدري بها .. ولو بغيت تضيف شيء يطلع عليك غالي ومضطر توافق في غالب الأحيان لأنك تحت رحمة هذا المقاول

الطريقة الثانية هي تسوي عقد متكامل بالمخططات الشاملة على كل تفصيل والمواصفات الواضحة اللي ما يقدر يلف ويدور معاها المقاول وشروط تعاقد واضحة تخلي كل مقاول يسعر على الموجود وبعضهم يرتبون سعرهم حتى يفوزون بالمناقصة وبعضهم ما يبون ويعطون سعر مبالغ فيه وبعضهم يعتذرون لعدم قدرتهم أو لخوفهم من الشروط اللي هم مب قدها .. خصوصاً لو فيه غرامات وتأمينات

الطريقة الثالثة عالمية وبدوا يطبقونها بعض المؤسسات الرائدة مثل بروة والديار حسب ما سمعت وهي الكميات المعاد حسابها re-measured quantities وهذي تقدر تشتغل كل عقودك بعقد واحد وهو ما يسمى حساب الوحدة .. حتى لو بتتفق على مشروع تصميم وبناء سعر ووقت التصميم يتم تحديده أوقات بالساعة للمهندس .. في هذي الطريقة أكيد تحتاج اشراف هندسي متطور وحاسبين كميات ومكتب في الموقع .. المفروض الدولة تسويها للمشاريع الصغيرة والمفروض المقاييس تحدد بدقة لعدة نوعيات من التشطيبات ومواصفاتها ويكون سهل المقاول يحدد سعر الوحدة ثم تحسب كم وحدة تم بناؤها أو تركيبها ويحسب اجمالي سعر هذا البند

ما ادري ان وفقت في شرحي للطريقة الثالثة أو لا لكن هذي الطريقة الأسهل والأدق .. في دول معينة وصلوا لتطبيق مواصفات قياسية محددة وواضحة مثلاً نافذة قياس a أو غيره من الرموز رقم وحرف معروف ما هو توصيفها بالضبط .. وفي الغالب محفوظ عند كل من هم في الشغلة أو حتى بعض الملاك العاديين كثقافة عامة .. وما فيه شركة تسويها بمواصفات أقل أو بمقاس يختلف .. أي قياس غير موجود في لستة المواصفات وأي مواصفات خاصة غير تحدد وتسمى طلبية خاصة

[ALJokar]

احد سمع عن مكتب البراحة للاستشارات الهندسية للخرايط والتصمايم الداخليه؟
مصنف من الدولة مكتب اول لكن سمعت انه سابقا كان اسمه القوس فما ادري احد سوى الخرايط عنده؟
كتبت ف المنتدى والاغلبية ماتمدحه ما ادري هل هو تحسن بعد ماغير اسمه او نفس ماكان؟

[معماري قطري]

احد سمع عن مكتب البراحة للاستشارات الهندسية للخرايط والتصمايم الداخليه؟
مصنف من الدولة مكتب اول لكن سمعت انه سابقا كان اسمه القوس فما ادري احد سوى الخرايط عنده؟
كتبت ف المنتدى والاغلبية ماتمدحه ما ادري هل هو تحسن بعد ماغير اسمه او نفس ماكان؟

غالبية المكاتب في ركود ألحين ويتصيدون للعميل

أرسلت أحد الاخوان لمكتب قالوا له انت قول لنا كم بتدفع

أنصحك أي مكتب تروح له تقابل الموظف المسؤول وتسئله عن مشاريعهم السابقة والحالية وتشوف نبذة من شغلهم

شفت خرايط كثير من الربع غالبيتهم تحس إن المهنية متدنية لكن واحد حتى مستوى الخطوط ووضوحها كان عالي والمكتب كان مكتب بو كشيشة .. بس يقول المهندس اللي يتعامل معاه تركهم

لازم تشوف المكتب وتقابل المعماري تناقشه .. من المكاتب القوية في قطر مكتب اتحاد قطر للتخطيط وهذا نتعامل معاه دوم حكومي وخاص وارتاح له لو رست عليه مناقصة حكومية لأن تعاملهم وايد زين ويعطونا شيء مميز .. حتى لو غالي يوفر عليك مبلغ التصميم من قيمة الخرسانات اللي بتدفعها بعدين

المكتب له فوق 40 سنة شغال في قطر .. كان في الجسرة ونقل لراس بو عبود وتم سنين في المقرين والحين خذ عمارة الجبر من ورا مكان ديوان المحاسبة السابق

فرصتك ألحين تنتقي مكتب زين بس اتوقع المكاتب القوية مشغولين في مشاريع الدولة حتى لو اشراف أو ادارة مشروع

وكلامي هذا للعموم اعتبروه نصيحة عامة

[بوجاسم_قطر]

السلام عليكم جميعا..

اخوي حسب علمي اذا الارض من ضمن المناطق النموذجية او منحة من الدولة البلدية ترفض التقسيم, بالذات فلتين متلاصقتين..

واحد من الربع نفس وضعك ودخلت بيته الصراحه توزيعه ممتاز. الله يسلمك سوى قسم خاص حق امه داخل البيت يشمل غرف تحت وفوق وبلفت خاص فيهم ايضا.. ولهم مدخل خاص من على الجنب من داخل الفيلا,, لكن واجهة الفيلا تكون وحدة.

بس لازم تكون عندك الخريطة واضحة ومحترمة والتوزيع يكون عملي وممتاز.. خذ راحتك بالخرايط لانه عقب التغير مكلف
انا الصراحة قاعد اسوي خرايطي مع مكتب اسمه ميليت في بن عمران .. والحمدالله مرتاح معاهم واسعارهم معقولة.

[ALJokar]

طيب ممكن ابني البيت واحول المجلس الي عندي الى فلة؟
تكون بالعرض والمدخل داخل البيت هل بيعطوني الموافقه ابني المجلس طابقين؟
بيكون البيت ع شكل حرف الال بالانجليزي بس منفصل طبعا. L
منها اقدر اخذ المساحه الكافيه عندي ف البيت واقدر ابني فلة صغيرة مع الغرف والصالات