العمل في قطر فاونديشن و اسباير ؟! [الأرشيف] - منتديات شبكة الأسهم القطرية

مشاهدة النسخة كاملة : العمل في قطر فاونديشن و اسباير ؟!

Proxy

22-09-2018, 08:19 PM

السلام عليكم ورحمة الله وبركاتة ,

اخواني الكرام عندي سؤال بخصوص العمل في قطر فاونديشن وايضا اسباير

ياليت الي عنده تفاصيل مايبخل علي لان الموضوع مهم جدا بالنسبة لي.

كم رواتب السنير؟

اوقات العمل ؟

وجزاكم الله خير الجزاء

معماري قطري

23-09-2018, 01:04 AM

قطر فاونديشن في مقابلة قالوا لي في البداية بتشتغل 24 ساعة .. لو سوبرمان كان شرد لا ووافقت ولا حصلت الشغلة

الله يوفقك يبي لك تجتهد وتقدم وتشوف عرضهم لأن لكل وظيفة عندهم عرض

Rider

23-09-2018, 11:23 AM

بإختصار هالجهتين تحارب القطريين الا اذا عندك واو كبير

kitmat

24-09-2018, 03:56 AM

لاحول ولاقوة الا بالله ليش تحارب القطريين اكيد فيها اجانب وايد

ورد الدوحه

24-09-2018, 09:32 AM

عزيزي هل تعلم :
أن عبارة ( أنا من طرف فلان)
تعادل خبرة 10 سنوات
و 8 شهادات و 17 دورة تدريبية

^
^
^
من اصدق ماقرأت

Flowers

24-09-2018, 09:42 AM

سدره نسبه الاجانب عشر اضعاف القطريين وشروط التوطيف جدا تعجيزيه
وقطر فاونديشن الموضوع غامض عندهم ماينعرف فاتحين اصلا وظايف او لا

SouthK

24-09-2018, 10:56 AM

سدره نسبه الاجانب عشر اضعاف القطريين وشروط التوطيف جدا تعجيزيه
وقطر فاونديشن الموضوع غامض عندهم ماينعرف فاتحين اصلا وظايف او لا

فاتحين التوظيف للوافدين .. القطري مكانه مب عندهم!

SouthK

24-09-2018, 10:58 AM

لاحول ولاقوة الا بالله ليش تحارب القطريين اكيد فيها اجانب وايد

مسؤول وافد + سلطة مطلقة + موظف ساكت + تعتيم اعلامي + مصالح خاصة + مال سايب = محاربة مواطن + تهميش كفاءات محلية

رادار

24-09-2018, 11:28 AM

انا اشهد
الله المستعان

qatari911

24-09-2018, 11:45 AM

الاجانب من الي يوظفهم ؟؟!
القطري هو الي يوظفهم وهو الي يحارب القطري فيه خوف على الكراسي الي هم عليها

SouthK

24-09-2018, 11:56 AM

الاجانب من الي يوظفهم ؟؟!
القطري هو الي يوظفهم وهو الي يحارب القطري فيه خوف على الكراسي الي هم عليها

القطري يوقع بس .. قول من يختار الموظف و يفرضه على القطري الخواف اللي خايف على كرسيه و مصالحه الشخصية؟؟

راعي الكورفت

25-09-2018, 09:58 PM

اعرف شباب شغالين في الجهتين.

- من ناحية الرواتب.

قطر فونديشن رواتبهم اقوى.
اسباير رواتبهم تعبانه.

- من ناحية روتين العمل.

قطر فونديشن كررف اكثر.
اسباير مرتاحين أكثر.
--------

مدام انت قطري .
لاتخاف من الأجانب.
معاك امااان وظيفي.
لان معاك العنابي :deal:

Proxy

25-09-2018, 10:54 PM

جزاكم الله خير اخواني على الردود بارك الله فيكم

اعرف شباب شغالين في الجهتين.

- من ناحية الرواتب.

قطر فونديشن رواتبهم اقوى.
اسباير رواتبهم تعبانه.

- من ناحية روتين العمل.

قطر فونديشن كررف اكثر.
اسباير مرتاحين أكثر.
--------

مدام انت قطري .
لاتخاف من الأجانب.
معاك امااان وظيفي.
لان معاك العنابي :deal:

جزاك الله خير

لكن الي سمعته رواتب الاثنين قوي جدا

وبالنسبه للدوام الرسمي يقولون قطر فاونديشن من 7:30 الى 3:30 هل هذا فعلا دوامهم الرسمي ؟

سمعت ان دوامهم اقل من 8 ساعات ياليت اتفيديوني يا اخوان

اما بالنسبه لاسباير نفس الكلام ينطبق عليهم من 7:30 الى 3:30

شكرا لكم

كاشف الغطاء

26-09-2018, 02:28 AM

^^^^^^
اي صح اخوي .. في امان وظيفي بس ماتعرف اساليبهم في التطفيش شلون
ابتعدوا عن الجهات شبه الحكومية اللي متروسة اجانب نصيحة

ابو عبدالله.

26-09-2018, 07:59 AM

يا جماعه الخير. انا ملاحظ سلبيه كبيره في النظره ع التوظيف و تهميش القطري

مضطر اختلف معاكم شوي

دوم نتهم جهات العمل و قليل الي يذكر سلبيات الموظفين

ناس ما تداوم عدل ولا تبي تمسك شغل ومسؤوليه

البعض ما يبي حتى يطلع في مناسبات جهه العمل. لا بتكريم ولا بأي فعاليه ومنهم الي يطلع من مكتبه بعد دخول الدوام ويروح المولات و القهاوي

والله ان بعضهم يدخل 9 الصبح و يطلع 12 يروح يتغدى و يرجع وحده ونص. ويخلص دوامه 3

هذا بقطاع النفط و الغاز. و يشتكي ليش ما يترقى

احمد ربك ما فنشوك وخسرت راتبك فوق 60 الف

هذه استغلاليه للعنابي ولا يشرفنا هذا النموذج

ما ننكر ان في تهميش و اجانب و مشاكل. لكن القوي يفرض نفسه حط راسك بالشغل وصير احسن منهم وبعدها شوف. يرقونك ولا لا

احيانا اعذر الي ما يجتهد بحكم ان التهميش موجود لكن ارجع واقول اذا انت ابو عيال ما حققت النجاح و الترقي بعصاميه. عيالك ايش بيسوون
لانك اذا ضليت مكانك ما بترتقي وظيفيا و ماديا. وبينعكس ع ابنائك و بيبتدون من نفس الصفر الي انت بديته

لكن طور نفسك و ادعم ابنائك نفسيا و ماديا. بيبدون من مكان ما انت اوصلت له

عموما. السر الي انا اكتشفته من سنين . ان كل ما جمعت خبرات و طورت العمل بيجي يوم محد يغطي عليك مهما حاولوا. بس لا تغلط وتعطي غيرك فرصه يضرب مصداقيتك

عن قطر فونديشن او اسباير. الي اعرفه ان اسباير رواتب ضمن الخدمه المدنيه و فونديشن لها سلم خاص فمؤكد رواتبها اعلى

وهذه الجهات ليست الافضل هناك قطاعات و وظائف افضل بخبره اعمق

النفط و الغاز امتيازاتهم افضل. العسكريه تقارب ايضا

الوظائف الحكوميه بعقود خاصه تأتي ثالثا

الشركات المساهمه بعضها رواتبهم افضل من الحكومي بحسب الاختصاص

الانضمام لاي من هذه الجهات ليس صعبا. (العسكريه مستثناه). مهما كان اختصاصك او خبرتك

لو موظف حجز تذاكر ممكن تتوظف في البترول حتى. وممكن نضحك ع هذا التعليق لكن الفاهم يعرف ان كل شركه لها قسم مختص بالتذاكر و تنظيم السفرات سواء للدورات او المشاركات خارج الدوله

حتى مسؤول مخزن او موظف صاله الرياضه هناك وظائف بالبترول يشغرونها موظفين و برواتب بتروليه تعادل درجتها وامتيازاتها اي موظف ثاني باقسام تقنيه

سوق العمل فيه كثير من الامور الي نجهلها و لا نعرف الا الوظيفه الي نشتغل فيها لكن ابحث وشوف كيف سوق الوظائف كبير و متنوع و اسراره غريبه

الي كثير ما تعرفون عنه. ان في وظائف في شركات اجنبيه تطلب قطريين. وقله الي يفكرون فيها

لكن هناك فئات في المجتمع. منهم من حصل ع الجنسيه من اصول اسيويه او بحكم الزواج ولا يتكلمون قطري 100%
ولا يجدون وظيفه و جهات كثيره لا ترد ع طلباتهم لكن يلقون في الشركات الاجنبيه و وظائف برواتب فوق 50 الف بس لان عندهم العنابي و يدخلون في احصاءات التقطير لجهه العمل
الجهات الاخرى الي حتى ما ترد ع طلبات توظيفهم رواتبها بسيطه و الاجنبيه رواتبها عاليه وسبحان الله. الي يرمي اوراقهم راتبه اقل من رواتبهم الان.

واحنا للحين نتكلم عن ناس ما تداوم. ونقول امان وظيفي لان عنده العنابي.

والله اتمنى نتغير للافضل وهذا انسب وقت للتغيير و كل مكان يبي يغتمد ع القطري بس يبون المجتهد

JN000N

26-09-2018, 10:19 AM

الي يتوظف ف قطر فاونديشن اول سنتين تمر عليه عسل على حسب حظه
بعدها تروح عليه ويكره الساعه الي عرف فيها هالوظيفه ويكره حتى الجمل الرنانه بخصوص عجلة التنميه والعمل من اجل قطر لان يحرمونك من هالشي

كاشف الغطاء

27-09-2018, 01:49 AM

واحنا للحين نتكلم عن ناس ما تداوم. ونقول امان وظيفي لان عنده العنابي.

والله اتمنى نتغير للافضل وهذا انسب وقت للتغيير و كل مكان يبي يغتمد ع القطري بس يبون المجتهد

انا واحد اشتغلت في جهة شبه حكومية وشفت بعيني اشلون نظرتهم للقطري لو تطلع عيونك
كان القسم كله اجانب وانا عطوني اقل درجة فيهم مع العلم اني كنت اعلم بعضهم على الشغل
الحمدلله اني قدمت استقالتي وتوقعت ان يناديني حد من المسؤولين الكبار ويناقشني بس بسهولة وقعوا عليها
ماحسيت ان في اي رقابة عليهم أو ان في أي خطة للتقطير
كل ساعة اشتغلتها بجهد عندهم تحسفت عليها

ابو عبدالله.

27-09-2018, 08:07 AM

انا واحد اشتغلت في جهة شبه حكومية وشفت بعيني اشلون نظرتهم للقطري لو تطلع عيونك
كان القسم كله اجانب وانا عطوني اقل درجة فيهم مع العلم اني كنت اعلم بعضهم على الشغل
الحمدلله اني قدمت استقالتي وتوقعت ان يناديني حد من المسؤولين الكبار ويناقشني بس بسهولة وقعوا عليها
ماحسيت ان في اي رقابة عليهم أو ان في أي خطة للتقطير
كل ساعة اشتغلتها بجهد عندهم تحسفت عليها

يسلم راسك. اذا بيئه العمل غير صالحه لك ابحث عن غيرها. لكن لا تستقيل قبل لا تلقى مكان ثاني

قبل قلت مثلك. شغلي الاولي ما يستحقون اجتهادي. لكن بعدها قلت الحمد لله اني مريت بالتجربه وعرفت اطور تعاملي مع الاداره واستفدت خبره من عملي السابق

ياخوي من كثر ما يحاربونك الاجانب ومنهم مسؤولي صاروا يبون فرقاي لين صرت اطلب دورات عشان يوافق عليها و يفتك مني. الاخ يبي فرقاي وانا اخذت منه 15 دوره منها اعلى مستوى لغه في القطاع كله و دورات تقنيه نادره. هي سبب توظيفي في جهه اخرى. تقدر هالامور. المقصد كل وضع وفيه خير تقدر تستفيد منه

في امور كل ما طورناها كثرنا فرص التطور و الترقي. ومنها طلب التوظيف و السي في. حتى طريقه كتابته تفرق معاك كثير

ورد الدوحه

27-09-2018, 09:02 AM

معماري قطري

27-09-2018, 09:06 AM

بو عبدالله شكراً لك رايك يمثلني وكلامك طيب وفي صلب المشكلة

معماري قطري

27-09-2018, 09:11 AM

انا من القلائل اللي اشتغلوا من سن 14 سنة واستمريت في عملي للآن والحمد لله .. صحيح على أبواب التقاعد لكن كنت في بيئة عمل طيبة ولي علاقات مستمرة مع من عملت معهم قطريين وعرب وحتى جنسيات أُخرى

ابو عبدالله.

27-09-2018, 01:28 PM

بو عبدالله شكراً لك رايك يمثلني وكلامك طيب وفي صلب المشكلة

الله يحييك اخوي. نقول الي نعرفه بس

Proxy

07-10-2018, 02:47 AM

شاكر لكم جميعا على المشاركة لكن يا اخوان مافي احد فادني بخصوص اوقات العمل ياليت الي عدنه اي معلومات يضيفها وشكرا

غايه الطواش

09-10-2018, 11:06 AM

شاكر لكم جميعا على المشاركة لكن يا اخوان مافي احد فادني بخصوص اوقات العمل ياليت الي عدنه اي معلومات يضيفها وشكرا

كيو اف ساعات العمل flexile
37:30 ساعه عمل فالاسبوع
مثلا دوامت سبع ونص تطلع ثلاث ونص
داومت ثمان تطلع اربع
دوامت ست ونص تطلع ثنتين ونص
اهم شي مابين التسع والثنتين انت في مكتبك

Proxy

10-10-2018, 12:17 AM

كيو اف ساعات العمل flexile
37:30 ساعه عمل فالاسبوع
مثلا دوامت سبع ونص تطلع ثلاث ونص
داومت ثمان تطلع اربع
دوامت ست ونص تطلع ثنتين ونص
اهم شي مابين التسع والثنتين انت في مكتبك

شاكر لج على المعلومات دوامهم ممتاز مع ال Flexible