نظام حماية الأجور وبعض الإشكاليات المتعلقة به

[fmmja]

السلام عليكم

بخصوص حماية الاجور و حظر الشركات
عندي محلين محظورة بسبب حماية الاجور
كل ماجبت عمال وسويت لهم إقامة وقدمنا لهم علشان يفتحون لهم حسابات بنكية علشان نحول الرواتب فا اللي يصير ان ارقام حساباتهم تتأخر لفترة طويلة ونكون وصلنا لآخر الشهر ونسلم الرواتب للعمال كاش بعدها يجي حظر للشركة
طيب ايش ذنبنا اذا التأخير مش منا ؟

وإذا قلت للمندوب يروح يتابع الموضوع يقولي يقول ما يرضون يقابلونه لازم يجي مالك الشركة مع ان المندوب انا متعاقد معه على مبلغ شهري و مب مستفيد منه مع انه يروح وياخذ معه كل المستندات المطلوبه مع بطاقتي الشخصية

وإذا رحت لهم انا بنفسي يقولي الموظف السيستم مانقدر نعدل عليه لان اخر موعد لإيداع الرواتب تاريخ سبعه من الشهر أقوله ان للحين ما عطوني ارقام حسابات العمال يقولي مب مسؤليتهم

مب عارفين الخلل من وين من نظام حماية الاجور ولا من وزارة العمل لان نتعطل

المفروض يكون فيه تدقيق بين الوزارة وبين الجهه المسؤلة عن حماية الاجور ان لو العمال طالعه لهم ارقام حسابات و ما نزلت رواتبهم هنا يتم حظر الشركة لاكن لو ما طلع له رقم حساب لا تحظر الشركة .

[بوخميس]

سو لهم بطايق في اوريدو أو Qpay احسن من الحسابات البنكية

[fmmja]

سو لهم بطايق في اوريدو أو Qpay احسن من الحسابات البنكية

مرحبا اخوي بوخميس ياليت تقولي ايش هي بطايق اوريدو او qpay لاني ما عرفهم وهل اجراءاتها سهلة و شلون اسويهم لآني تعبت بصراحة
والله يجزاك خير ويرحم والديك

[eXpert*]

بنك قطر الوطني ما يفتح حسابات للعمال اصحاب الرواتب اقل من 5000 ريال . فهو متعاون مع اوريدو لفتح حسابات .

بصراحة انا تجربتي معاهم دخت السبع دوخات لحد ما طلعت البطايق .

وفعلاً كلامك منطقي بخصوص الحظر .. هذا انا مقدم على طلب ازالة الحظر وما زلت بالانتظار .

[معماري قطري]

من هشكل خايف الا مرعوب من افتتاح أي بزنس في قطر

البورصة وبعد ادارات الشركات ناهبين حقنا

[fmmja]

اليوم ثلاث مرات اتصل فيهم يقولون لي بنحولك للموظف المختص ويسكرون الخط في وجهي

حسبي الله عليهم

[شموخ دائم]

,

,


مرحبا

شكرا على الموضوع


بالفعل المشكله الان في التااخير من البنوك لتسجيل في نظام الرواتب


أتوقع مافي شركه بقطر الا وصار فيها ( بلوك ) بخصوص تحويل الرواتب
الله يهديهم طبقوا على كل شركات قطر في فتره وحده
والبنوك مو جاهزه لهذي الاعداد الكبيره ولا نظام وزاره العمل جاهز لهذا الكم الضخم من الشركات بوقت واحد

كان المفروض يطبقونه على الشركات الكبيره الي فيها عماله فوق ال 1000 عامل
وبعد 6 شهور يطبقونه على الشركات الي فيها فوق ال 500 عامل
وبعد سنه يطبقونه على الشركات الصغيره أبو 5 و 10 و20 عامل

على الأقل تكون البنوك استعدت وخلصوا من الشركات الكبيره
وصار في متسع من الوقت للشركات تضبط امورها

المصرف الإسلامي وقف استقبال العمال وخصص فرع الصناعيه لكل عمال قطر

والبنوك الثانيه تلخبطت امام هذا الكم الكبير

وبعدها صارت البنوك ترفض العمال وبعدها رجعوا ياخذون العمال على شكل دفعات
كل يوم 4 طلبات فقط لكل شركه

اوريدوا حلت جزء من المشكله من خلال نظامهم

الان الله يسلمك بعد ما صارت اكثر الشركات بلوك وصار ضغط على وزاره العمل

خصصت الطابق 14 في وزاره الطاقه لرفع الحظر عن الشركات
وخصصت موقع ( اون لاين ) لحل هذي الاشكاليه الي عطلت مصالح الشركات ومصالح الناس

www.adlsa.gov.qa

اضغط على الخدمات الالكترونيه
بعدها خدمات التفتيش
بعدها
رفع الحظر

طبعا بيطلب المستندات مثل دفع الراوتب الكشف ارفعها اون لاين

وانتظر 24 ساعه بيرفع دون ما تراجع



كل شركات قطر صادها ( صداع ) من هذا الموضوع

احنا مع التنظيم ولكن يحتاج ( تدرج ) في التطبيق

الان صاحب أي شركه في قطر لازم يكون صدره أوسع من ( البحر )
عشان ما شغلته الا يحل هذي المصاعب اليوميه


وزاره الداخليه جزاهم الله خير من خلال مطراش 2 حلت اكثر مشاكل الشركات والافراد

اما وزاره العمل تحتاج مثل هذي التطبيقات وتحتاج ( تسهل ) على الشركات

للأسف ما زالوا يحتاجون تطوير في خدماتهم

وانا متاكد ان التطوير بيكون قريب ان شاء الله لان الوضع ما يسر احد الان




والله المستعان


,

,

[Qatar191]

انا سوو لي بلوك مرتين وللحين ماعرفت احول الرواتب بالضبط طريقتهم معقده جداً وصعبه ياليت يخلون التحويل اون لاين ويفكونا

[راعي الكورفت]

نظام معقد والتباطئ من البنك.

انا معاي اربع شركات وصار لي حظر على رقمي الشخصي بسبب رواتب العمال.

الحمد لله بعت جميع المشاريع طبعا بخساره ومنهم من بس اغلقتهم.

وقلت خلني على الراتب بلا عوار راس بلا مشاريع.

السؤال للبنوك .
ليش لازم صاحب العمل هو يفتح للعمال حساب ؟
وهو يستلم بطايقهم؟

ليش العامل ما يصير مثل اي موظف.
يروح البنك مع خطاب من الشركه ويفتح حساب جاري لنفسه وانت تنزل له الراتب.


مافي تعاون أبد من البنوك.
واحس انهم مغصوبين على هالنظام.

حتى لو تعطيه راتب بيده.
لو راح واشتكى عليك انك ماعطيته راتب.
بتضطر تعطيه رواتبه من اول يوم دخل الدوحه.
والدليل انك مانزلت له رواتبه في البنك.

صار هالموضوع مع واحد من الشباب.


وموضوع حمايه الأجور من قريب انحط عشان العمال مايشتكون للجرايد الاجنبيه عشان موضوع كأس العالم وحقوق العمال.

كان قبلها تعطيه راتب ويوقع على ورقه انه استلم راتبه والامور طيبه.

والحمدلله اشوف ان العمال عندنا ماخذين حقهم وزياده والحمدلله على كل حال .