دخلنا الويكند وتمللت من المولات والبحر بعيد

[حمد 2002]

السلام عليكم ورحمه الله وبركاته

دخلنا الويكند وابي اودي عايلتي مكان للترفيه عن النفس !!!

وتمللنا من المولات

والبحر بعيد عن بيتنا بحكم اني من سكان الدوحه وضواحيها !! وحتى لو رحت البحر زحمه ونصه مسكر من الشاليهات والكباين !! ..

والشاليهات جربت الغاريه مب نظيف وسميسمه حليو بس جربته والزين فيه البركه بس لليهال ،،

والاكوبارك المائيه محد مدحها لي

وحديقه الحيوان محد فتحها للحين //

وحديقه دحل الحمام فيها كمن لعبه والكل يتهاوش عليها //

والعاب المولات مممم جربناهم واليهال تمللوا منهم كلهم من قطر مول الى آخره ..

والبر للحين مب وقت الكشتات البريه ،،

والكورنيش بالويكند زحمه وكله عمال ..

ملاحظه اليهال قاموا يتهاوشون بالبيت من الملل وانا قمت اطقطق من تويتر الى الفيس بوك الى السناب الى الانستغرام //

ملاحظه ثانيه بالفتره الاخيره قمت من الملل اصور وجهي سيلفي بالجوال كل دقيقتين !! ،،


وين هيئه السياحه !! ،،

[الوسيط العقاري]

ودهم ألعاب سناء �� خخخ

[SouthK]

رين أو قلينة ناطوع في الحوش .. و اذا ملل شرطة حرامي في الفريج أو خشيشة!!
و للمحترفين التيل تحل مشكلة الملل لين هيئة السياحة تقعد من الرقاد!

[sara jsm]

ودهم ألعاب سناء �� خخخ

ردك فيه سخرية للمكان صح :unsure:
بس لعلمك المكان مجدد ونظيف وكل الالعاب شغاله ...
وتناسب من عمر السنتين لين بو 14 سنه .... سواء الالكترونيه او الكهربائية ...
وكفايه لعبه التنين تحس انك راكب قطار الموت :app2:
انا انصحكم فيه وبقووووه لانه مب زحمة نفس باقي المولات ..
:
واذا الجو فتح اكثر ممكن تجيب عيالك منتزة الخور .. العاب وحيوانات وترفيه على اعلى مستوى ...
او روحوا كشته صوب الشمال دام هاليومين الجو بيكون ماطر باذن الله ... تعرفوا على مناطق قطر البعيدة ...

وبس

[يوسف0]

الهيئة العامة للسياحة : 44069921

www.visitqatar.qa

كلمهم واستفسر وبالتوفيق

[qatari911]

سؤال ليش ما يسون نفس المدينه المائية اتلانتس او ملاهي ديزني لاند بفلوريدا
اصحاب الفلوس الي يستثمرون ليش مايستثمر في شركات ديزني تسوي ملاهي او مدينه مائية بيربحون
واهم شي يبنونها في مكان مسكر علشان صيفنا حار

[khalid Qtr]

أنت من تصنع سعادتك...

[مرتبش]

اكوابارك حلوة جرب وشوف
اسباير حلوة روح تمشى والعاب اليهال فيها بكثرة وبحيرة تشوف فيها البط.. روح الكورنيش.. حديقة متحف الفن الاسلامي
حديقة الخور .. روح العديد .. سوق واقف.. سوق الوكرة
وقبل كل هذا قول الحمدلله لان القناعة يقولون كنز لايفنى

[راعي الكورفت]

اشتري لهم بلايستيشن 4 و بينسون الطلعه.

[راجي الْعفو]

وَعَلَيْكُم السّلام وَرَحْمَة اللهِ وَبَرَكَاتُه

جذي بتم طول عمرك متملل لانك ما بتقتنع بشي

كل ما رحت مكان بتتملل منه عقب فتره

خل لك هدف في الحياة و رتب جدولك الاسبوعي وخل لكل يوم حياة تعيشها

[nooora]

سؤال ليش ما يسون نفس المدينه المائية اتلانتس او ملاهي ديزني لاند بفلوريدا
اصحاب الفلوس الي يستثمرون ليش مايستثمر في شركات ديزني تسوي ملاهي او مدينه مائية بيربحون
واهم شي يبنونها في مكان مسكر علشان صيفنا حار


الله المستعان لا هم مستعدين يسوون لنا مثل مدينة ديزني ولا يسمحون للاجانب يستثمرون ،،
زين سوو مول جبير كلها العاب للكبار والصغار ،،،، هذا بعد ما يبط جبدك ويبنون تعال شوف الرسوم اغلى من ديزني فلوريدا وكاليفورنيا ،،،
صاحب الموضوع هالمره من الفراغ طرح موضوع لا بأس به

[Dana’1]

محد فالها غير الأجانب أشوفهم بعيالهم وسياكلهم حتى بالولوه غير الحديقه الصغيييره الي فيها يلعبون عيالهم ،،
عندك أسباير و حديقة الخور و مزرعة بلدنا عاد هذي ماشفتها كلش بس اظن مجددين او فاتحين العاب فيها شي زي كذا
كدزانيا اذا مافتحت بتفتح
عندك أسياف قطر و برانها ،،، التراب بروحه الأطفال يكيفون بالعب عليه و فيه ،،، فلاعبهم هناك حسب كلن وعمره

مو ضروري تدورون شي مو موجود حاليا وتزعلون عليه إلا دزني لاند والا سكسفلاغز او بنمطها،، أوك لها الرياده في هذا النوع من الترفيه بس مو معناته .. الترفيه مايصير إلا بوجودهم.. والبزران و أهلهم صايرين يتمللون من اغلب الأمور إذا مو كلها.




و السلام ختام