عاااجل

[Qatar191]

السلام عليكم ورحمة الله وبركاته
كيف حالكم جميعاً

ياجماعة الخير ابي كهربائي خبير جداً في شغله لنا شهرين وحالتنا حاله مع الماء كل يومين موقف مره عوامه ومره دينمو ومره سويك ، ومره الوايرات والسويكات والدينمو شغاله بس الكهرب مايوصل من المجمع للدينمو ومافيه عامل ماجبته يشتغل ويومين بالكثير وعقب يفصل وتطلع لنا مشكله ثانيه غير عن الي قمنا باصلاحها ياجماعه والله اني متبهدل حدي مع هالمشكله االي للحين ماعرفنا سببها الي يعرف كهربائي امين وخبير يفزع لي

والله يوفقنا وياكم

[معماري قطري]

الله يعينك

شوف لو سيستم مركب كلم تدمر عندهم صيانة متخصصة أما لو نظام عادي كثير بيلعبون عليك ولا بيشتغل صح

واحد من شوي يبغي مهندس كهربة يتابع شغلة شفت مشاكل واضحة في بيته الله يعينه مب مهتم في الاشراف ولاعبين به العمال .. من الكوارث الواضحة ممددين بايبات بلاستك البيضاء الضعيفة فوق السطح من مكيف لمكيف .. جاء مال العازل كشف له السالفة قال انا باركب عازل تحت وبتبقى البيبات فوق وبيمددون فيها كهرب وبيدخلها ماي المطر .. اللي اعرفه تطلع في بيب صغير أسود أو رمادي وتكون في الحائط مب تارسة السقف .. بعدين فتحتها تنسد برغوة أو قار

[بوخالد911]

هلا بك

شوف الخاص.

[Qatar191]

يامرحبا ياخوي معماري
لا والله تدمر مشتغلين فوق في السخان المركزي اما التانكي تحت دينمو عادي مركبه المقاول والمشكله كلها تحت مايرفع الماء لفوق مع العلم ان عمر البيت 4 سنوات توه جديد بس طلعت لنا لعض المشاكل في الكهرب

[Qatar191]

بو خالد الله يرحم والديك ماقصرت وبتواصل مع الرجال ان شاء الله

[معماري قطري]

يامرحبا ياخوي معماري
لا والله تدمر مشتغلين فوق في السخان المركزي اما التانكي تحت دينمو عادي مركبه المقاول والمشكله كلها تحت مايرفع الماء لفوق مع العلم ان عمر البيت 4 سنوات توه جديد بس طلعت لنا لعض المشاكل في الكهرب

المفروض النظام كله مرتبط مع بعض تحت وفوق

صارت لي جبت شخص علة قال لي هذا سيستم واجد خربطة خلني اشيله أغيره بالكامل .. لأن فيه عوامة فوق وعوامة تحت .. اللي تحت لو نزل الماي عن حد معين ما تشتغل حتى لو اشتغلت اللي فوق وكان الماي فوق ناقص .. بعدين يفترض فيه مضختين تحت كل وحدة تشتغل بالتناوب وفيه موزع لتشغيلهم

اللي تخترب في العادة العوامة وفي الغالب الكترونية وقول للفني يخلي اللي تحت تشتغل حتى لو ارتفاع الماي 20 أو 30 سم .. بعضهم يخلونها تطفى لو وصل للنص .. وبعضهم يا اخوي يجون يشيكون الكهربة والكهربة تكون مقطوعة بسبب إن العوامة اللي فوق ما ترسل كهربة لأن التانكي الفوقي فيه ماي ولا توصل كهربة ويسوي لك فلم بغباءه وهو في الغالب يعرف العلة .. البنغالية مشكلة وهم اللي يسوون الأفلام .. مرة احتديت وكلمت تدمر أرسلوا لي هندي طقطق شوي خمس دقايق وشغل النظام وبنغالي خذ ساعات وقال لي هذا لازم تبدله بالكامل وتجيب سيستم بسيط .. إتصل بتدمر الصيانة وشوف شالقصة حتى لو تضطر تبدل العوامات أو المضخات لو فيها مشكلة .. دورت لك رقمهم ما حصلته بس اسأل عن الصيانة هم عارفين شالقصة

بالنسبة للفوقي خل العوامة تشتغل من يقل الماي عن النص أفضل حتى تضمن التانكي يكون في الغالب مليان

[Qatar191]

بيض الله وجهك يامعماري عز الله ماقصرت

[معماري قطري]

بيض الله وجهك يامعماري عز الله ماقصرت

ووجهك أبيض وأتمنى تكون إنحلت مشكلتك .. أوقات الحل بسيط ما يكلف 100 - 200 ريال بس لازم شخص فاهم يسويه .. تصدق الهندي اللي جاني من تدمر شغل السيستم استحى ياخذ فلوس واللي قعد يحوس ساعتين خذ مبلغ ما يستحقه .. بعدها عرفت السالفة وان الخلل من العوامة الالكترونية وسيدة اطلب استبدالها .. ألحين لي فترة النظام شغال زين الظاهر وزارة الاقتصاد قضت على الردي من القطع الكهربية

[Qatar191]

حياك الله يا معماري وشاكرك مره ثانيه على اهتمامك المشكله على قولتهم يغيرون السستم كامل لان على كلامهم ان الوايرات الارضيه الي تروح من المفتاح الى الدينمو محروقه والشكوى لله قلنا لهم غيرو السستم وان شاء الله تضبط الامور

والله يعطيك العافيه على اهتمامك في موضوعي ومواضيع الاخوان