Made in china

[بومحمد55]

السلام عليكم ورجمة الله وبركاته

ياجماعة الخير أنا شريت نظارتين في نفس الوقت من محل نظارات في قطر مول

وأستعملتها بعدها بأسبوع وجاي واحد من الشباب يبي ياخذ مثها وقام يقلبها يمين ويسار

وقالي صناعتها صينيه مو أصلية .

المهم أتصلت في حماية المستهلك وقلت لهم اللي صار في البداية أفتحوا لي شكوى ولما تواصلوا معي

ثاني يوم كلمني موظف قطري قالي شنو شكوتك عن النظارة قلت له أنها صينيه يعني ماركة مقلدة

قالي شدراك أنها تقليد يمكن الماركة اللي أنت ماخذها عندها مصنع في الصين . ورديت عليه قلت له وأنت شدراك أنت هالماركة عندها مصنع في الصين

قالي روح للوكيل وعطهم النظارة خلهم يفحصونها وجيب لي تقرير الفحص تثبت أنها تقليد .

للعلم الماركة هي emporio armani وأذا الوكيل مو موجود في قطر شسوي .

[monatee]

الي اعرفه ان البرندات العالميه تكتب بلد الصنع بلدها حتى لو عندها مصانع في الصين

ممكن تودي النظارة لصديقهم جورجو ارماني في اللؤلؤه وشوفهم شيقولون

[QATAR-2006]

من يومين مريت على محلات السلام وشفت ماركات عالمية صناعة الصين، ياريت حد يفيدنا شلون نتأكد إذا البضاعة اصلية ��

[معماري قطري]

انا كنت ادور جاكيت في محل كبير في ألمانيا وكله ماركات وجاكيتات كشخة وغاليين بس دورت وين مصنوع ولا حصلت .. شفت مسؤولة سئلتها عن مكان الصناعة قالت كله في الصين .. صدمتني كله بلا استثناء .. يعني لو أقول 1000 قصة ونوع شوي

محل ثاني شريت منه قطع كانت ماركة ألمانية وتصنع في ألمانيا .. حتى اللي يبيع سولف لي عن تراث الصناعة واهتمامهم بالمواد

ما ننسى الآيفون مصنع في الصين

[CH Engineer]

موظف حماية المستهلك ماعنده سالفه ومثال عالموظف الفاشل
المفروض يتصل للمحل ويتأكد ويطلب منهم الي يأكد ان هالبضاعه من الوكيل
والس سواه معاك يدل على انه مب قد المسؤوليه

انا شريت نظاره من اللاغونا وبعد شهر اكتشفت ان مكتوب علينا made in China
نفس الماركه شريتها قبلها بسنه ونفس المحل مكتوب عليها Italy
اهم شي سالتهم قالي الموظف انها أصليه بس تصنع بالصين عشان التكلفة اقل،، وطاحت العدسه بعد شهرين

الزبدة انا شلون اضمن ان المحل يستورد بضاعه أصليه مب دور وزارة التجاره تفحص البضايع اذا جاتهم شكوى

[khaldoon]

في اعمال البناء كثير من الماركات العالمية لا تصنع الا بالصين و نطلب من المقاول احضار شهادة إقرار من الشركة الام ان المنتج المطلوب منها لا يصنع الا في الصين فقط و ليس باي فرع اخر و يعطونا الشهادة و نقبل و نسوي خصم على هذا البند

[تاجر كشخة]

هذي الجملة كريهه "صنع في الصين" ناقص نشوف سيارات صينية في الشوارع وتكمل الحفلة

[khaldoon]

هذي الجملة كريهه "صنع في الصين" ناقص نشوف سيارات صينية في الشوارع وتكمل الحفلة

الحفلة مكتملة من زمان.... عندك سيارات jac

[نجم سهيل]

نعم Emporio Armani. حتى ساعاتهم صناعة صينية
كانت عندي وحدة من اكثر من عشر سنين وكانت صناعتها صينية

[آخر حبه]

الآيفون Made in China

[!.!]

مشاعرنا وأصبحت Made in China
فلا تستغرب
كل شيء صنع صيني أعلام بلدانا وصنع صيني ! ياخوي الصلاية صنع صيني
خايف يوم ما ..، أرزق بولد ألقا خلف ظهره تيكي Made in China
أكره سلعة عندي هيا الصينية حتي ولو كانت أورجينال
السلعة التركية أفضل منها بعدة مراحل من ناحية النظافة ومن ناحية المصداقية

[مرتبش]

صنع في الصين نفس سالفة صنع في اليابان.. الدنيا تتغير والصين عندها مبادرة" 2025 صنع في الصين" شغالين عليها وبتنقل الصناعة الصينية الى مراتب الدول المتقدمة

[ابو جمال]

السلام عليكم

موضوع صنع في الصين !!

عن نفسي ماعندي مانع اشتري اي بضاعة صينية الصنع سواء كانت ماركة متعارف عليها او لا ما يهمني اولاَ واخيراً الجودة في نفس الوقت ياتي من يقول كيف جوده وهي من مصانع الصين ؟

بكل بساطه لو ان وزارة التجارة والاقتصاد أو الجهة المخولة تجبر الموردين والتجار من اصحاب العلامات التجارية او الجملة باتباع مواصفات معينه مثل الاتحاد الاوربي CE أو الولايات المتحدة الامريكية

عن نفسي كثير اشتري عن طريق الانترنت (online) من مواقع الكل يعرفها اكيد وتكون في الغالب صناعة صينيه واشتريها وانا مرتاح لفرق الجوده بين الخليج وهناك

[khaldoon]

الصين تصنع أي منتج بجودة يتحكم بها الزبون اللي يدفع سعر المنتج لان الصين باختصار هي مصنع العالم ...يعني تصنع منتجات بجودة عاليه جدا جدا مثل تجميع الايفون و غيره و بجودة متدنية جدا...السبب انه اغلب الزباين يحددون جودة متدنية علشان يبيعون منتجاتهم بأسعار رخصيه و لهالسبب تشوهت سمعة الصناعة الصينيه

[Jspec]

للاسف انه التجار وايضا الناس هم من يشجع على Made in China

عندي تجاره صغيره في قطع غيار السيارات واجيب منتجات من الصين (براند امريكي بس صنع الصين) وايضا من اليابان اصلي .... لاحظ وركز معي انه كل اللي يجيني من الصين عليه اقبال رهيب من الناس هنا والياباني الاصلي للحين حتى ماصرفت اول دفعه مع انه واضح بالنظر بس انه جودة الخامه اليابانيه افضل من الصيني بس الناس ترغب بالصيني اكثر لانه ارخص ولا تبحث عن الجوده (اغلب الناس صارت تدور شغل مش حالك)


مثال اخر حصل معي بداية الصيف .... كنت ادور مكيفات للبيت عندي وكنت ابي امريكي اصلي او ياباني اصلي لانه اللي عندي هيتاشي صار له 28 سنه للحين شغالين بس بغيرهم لانه بجدد البيت
درت قطر كلها وكل الوكالات قالوا لي للاسف اللحين مانجيب من البلد الام لانه غالي ومحد يشتريه وصرنا نجيب من الصين لانه ارخص والناس تشتريه (طبعا ارخص يعني ربح اكثر للتاجر لانه يدبل اضعاف اضعاف سعر الاصلي لانه هامش الربح في الاصلي شي بسيط علشان يمشي بضاعته غير انه غالي بالسعر بعد) وواحد قالي لو تبي الاصلي لازم تجيبه انت بنفسك من المصدر (البلد الام) بس عادي يوقف في الجمارك على اساس انه غير مطابق للمواصفات الخليجيه؟؟!!