الزواج ؟ ووين وصلنا له ؟ [الأرشيف] - منتديات شبكة الأسهم القطرية

مشاهدة النسخة كاملة : الزواج ؟ ووين وصلنا له ؟

احمد1

11-03-2019, 02:48 PM

السلام عليكم ... والله جالس افكر في موضوع الزواج الي صار مثل الهم على القلب بالنسبه لكثير من الشباب من الجنسين .....
لاحظت انه كل وماله تتعقد الامور بالنسبه للزواج ترى وجهة نظر شخصيه :

الزوج او الزوجه ... يطبق على الاثنين :-

شاب او شابه يا يكون طالع من الابتدائيه اشتغل في العسكريه لظروف ما عليه سلفيه لموتر او اي شيء لاعبه به الديون الراتب ضعيف
شاب او شابه مخلصين ثنويه وشوية دورات منصب معقول بسيط راتبه معقول
شاب او شابه جامعي ظروفه احسن شوي منصبه جيد جدا وراتبه طبعا قوي

كل واحد من الي ذكرتهم له تصور بالنسبه للزواج وامكانيات معينه من بنته بياخذ الشروط المعقوله الي في شريكة حياته الخ....

مانزوج واحد ماله اصل ؟؟؟ طبعا يبيلها تفسير ؟؟؟ مانزوج واحد فقير؟؟؟ ماديات ؟؟؟

هل يوم اول كانت الامور طيبه ... قبل لا تنال المرأه استقلاليتها ... او تسوق... او تتوظف ... هل سبب لها ذلك تأخير الزواج ... هل اذ خذت دكتوراه مثلا تحس لو تقدم لها واحد اقل منها في المستوى التحصيلي بترفض .... لان يمكن يكون في تفاوت في وجهات النظر والتوجهات فيمكن ماتنجح الحياه الزوجيه
هل غلاء اسعار المصاريف مثل المهر الشبكه الصاله الي هو سبب عزوف الشباب عن الزواج وتأخير سن الزواج.... كلمة عنوسه احنا ابتدعناها وكنا احنا السبب فيها ... حديث الرسول صله الله عليه وسلم إذا جاءكم من ترضون دينه وخلقه فزوجوه، إلا تفعلوه تكن فتنة في الأرض وفساد كبير".

هل انتي يالزوجه تدورين الفلوس او النسب او اي شيء اخر في الزوج وعقب الزواج تتهمينه لعاب او بطالي ... تراج انتي الي اخترتي المقاييس اختاري راعي الدين

هل يالزوج تبي موظفه تتكل عليها وعلى راتبها ووظيفه مرموقه وذات نسب واذا ماعجبتك تراك اخترت كل شيء الا الاخلاق البعض وليس الكل

انه متأكد 100% لو تركنا الخيار لشبابنا وشاباتنا بتجرد بعينون بعض على الزواج والحياه وامورهم طيبه ... بعيد عن القبليه او الماديات والطلبات التقليديه
ونفتك من اتهام الطرفين لبعض الشباب كله سفر او يتزوجوون اجنبيات والبنات متحررات او شايفين نفسهم او اي سبب اخر ..
لة نرجع للدين كان تولفنا وياليت نخلي المفوشر في الاعراس تراها ليله وبتعدي ..... كل المعازيم بيغادرون العرس وبتم انت وزوجتك لا تخلي الي بيروح في يوم اهم من الحياه كلها الي تنتظركم ترى المعازيم رضو ولا انرضو مب مهم المهم انت وهي .. طولت عليكم الي خاطري اقوله الي يبي يتزوج ينظر للمضوع بعقلانيه ولا يخلى اكبر همه العرس تراه يوم واحد ويروح فكر للي بعد العرس ....

سهم فضة

11-03-2019, 04:11 PM

للاسف تتراكم الشروط و الطلبات و النتيجة شباب بعمر يطوف ال 30 و 40 لم يتزوج و العكس صحيح ،،، الكثير وليس العدد ببسيط مممن يتجة للزواج من الدول العربية و البعض اتجة لتايلاند و الفلبين

بسبب بشاعة مايراه من عراقيب و رفض مستمر بسبب شروط تعجيزية في بعض من مجتمعانا وقلة النصيب

مما اضطر بهم للزواج بالخارج

اكتب هذا الرد و انا على معرفة ب 4 اشخاص تزوجو من الخارج بسبب الشروط و الطلبات و التعجيزات التي رؤها فالزواج من الداخل

وصدقني لو لم يكن هناك لجنة للزواج من الخارج كان بدون مبالغة تضاعف العدد من المتزوجيين من الخارج .

sara jsm

11-03-2019, 04:31 PM

معماري قطري

11-03-2019, 07:25 PM

عايشت الوضع العام مع ولدي واعايشه هالأيام مع بنتي والله يوفقها

ما ودي بالمبالغات في المرتين بس ما باليد حيلة .. عرسي قبل 25 سنة كان بسيط وسهل وسريع وما كلفني كثير تزوجت وبعد ثلاث أيام سافرت اكمل دراستي .. ولا كنت مقرر اتزوج الا في الصيف بعد ما اخلص بس تزوجت في الشتاء ورحنا ميامي الحب وخذنا ذاك التكسي الأصفر أعتقد كابرس .. وصلنا الشقة اللي ما كنت عامل حسابي ارتبها ومن خلصت الامتحان شردت منها ومن ميامي صوب الدوحة الحب الأول .. عاد فضايح الشقة كل شيء في صوب وأكواب الشاي شكثر متكيسل اغسلهم اللبتون يابس فيهم

سالم الزهران

11-03-2019, 10:06 PM

رحنا نخطب زمان لاثنين من عيال عمي.. قال لنا الرجل أنا ما عندي الا بنتين والكبيرة ما نقدر نخرجها من البيت لازم تزوج داخل الاسرة.. لكن الصغيرة نعطيكم اياها.. ونجيبكم لكم الثانية من عند جارنا عنده بنت في سن بنتنا الصغيرة ورفيجة لها..

الحين من درى من الحريم انها بتنخطب؟
وليش ما قال ولد العم (ابغي الكبيرة)؟ لانه ما شافها ولا امه شافتها. فكانت الامور ماشية بمجالس الرجال وبأقوالهم..

اليوم (رغم اللي طرحته) الزواجات بتصير صعب سهل باذخ عادي بتصير.. وبتلقى اللي من ثوبك.. واجبك تحكم حريمك ما يبالغون والله يعين الجميع.

دينالي

12-03-2019, 07:41 AM

معليه يااخوي على هالمداخله ... الاصل والفصل ضروري ..
لان الموضوع نسب عائلتين مب شخصين فقط .. والعرق دساس على مايقولون ..
:
اكيد راعي الدين هو الافضل بس فيه شروط ..
اصغر مثال يااخوي ترضى أختك تتزوج شخص مثلا فلبيني او هندي وهو راعي دين وصلاة ومقتدر ومن الاثرياء !!؟
طبعا لو البنت رضت او انت رضيت في عشرين شخص من البيت او العائلة يرفض هالنسب ..
فالواحد ياخذ من ثوبه افضل ..
ومسأله العرس والمهر كلها قناعه من البنت .. وممكن تكتفي بحفل عشاء وتلبس فستانها الابيض وتسافر ..
الله يصلح المجتمع .. ويوفق كل من خاطرة الزواج وييسر اموره ..

المقصود هنا بعض الشباب القطري اللي اخلاقهم زينه ومستواهم التعليمي والوظيفي جيد ويتم رفضهم عشان عوايلهم ونسبهم والامثلة كثيرة بقطر
اعرف اكثر من حالة لبنات وصلو فوق الثلاثين والاربعين عشان النسب والاصل والفصل وبالنهاية اضطروا يتزوجون اشخاص من جاليه عربية عشان يتلاحقون الحياه الزوجية والامومه ......
الاصل والفصل مهم بس اذا نتيجة هالعادات العنوسه او البنت تضطر مستقبلا تتزوج العربي او الفلبيني المسلم فهذا شي غلط فاذا توفر صاحب النسب فاهلا وسهلا واذا ماتوفر نشزف مصلحة البنت
بالنهاية احنا بقطر كلنا خمس انفار محتاجين نتكاثر

بوجبر

12-03-2019, 08:01 AM

حلات الثوب رقعتة منة وفية

الحسب والنسب مهم

احمد1

12-03-2019, 08:51 AM

معليه يااخوي على هالمداخله ... الاصل والفصل ضروري ..
لان الموضوع نسب عائلتين مب شخصين فقط .. والعرق دساس على مايقولون ..
:
اكيد راعي الدين هو الافضل بس فيه شروط ..
اصغر مثال يااخوي ترضى أختك تتزوج شخص مثلا فلبيني او هندي وهو راعي دين وصلاة ومقتدر ومن الاثرياء !!؟
طبعا لو البنت رضت او انت رضيت في عشرين شخص من البيت او العائلة يرفض هالنسب ..
فالواحد ياخذ من ثوبه افضل ..
ومسأله العرس والمهر كلها قناعه من البنت .. وممكن تكتفي بحفل عشاء وتلبس فستانها الابيض وتسافر ..
الله يصلح المجتمع .. ويوفق كل من خاطرة الزواج وييسر اموره ..
انا يا جماع ماقصدت الحسب والنسب مش مهمين العكس حتى الحديث عن الرسول صلى الله عليه وسلم قال مالها وجمالها ونسبها ودينها .... فظفر بذات الدين تربت يداك وينطبق على الزوج بعد انا ما قصدت الاسيوى والي ذكرتيهم .... انا اقصد المواطن العادي الي نسبه مقبول بس لانه مب من مواخيذنا لا مانزوجه عذا الكلام .. والله اعرف وكلكم تشوفون امثله لشباب ماتزوج وبنات ماتزوجو وعدو الاربعين والعنوسه زادت مسكينه تطق طق بتكملة الدراسه وتشغل نفسها في اي شيء ثاني كان الزواج فاقده الامل منه .. يا جماعه يازين زمان الطيبين كانت الامور اسهل وابسط العكس شوف والنسب والاخلاق والدين كلهم مهمين بس سهل ولا تقول بنت عم وولد عم ترى رب العالمين قال بالقران سبحانه ( وجعلناكم شعوبا وقبائل لتعارفو ان اكرمكم عن الله اتقاكم ) القصد سهل الامور ولا تعقدها وخلو دهنا في مكبتنا والله يستر على الجميع.. والعذر منكم على الاطاله

غايه الطواش

12-03-2019, 09:12 AM

معاي زميله عمل فالدوام

من سنين نشتغل مع بعض
كل ماتقدم لها واحد
يا امها ترفض يا ابوها يا حد من خوانها
الحين تجاوزت ال 45 وتزوجت واحد اوروبي ولابعد اخوها رافض
ماردي شستفادو الحين

اما من ناحيه المصاريف اعتقد هي مساله قناعات , لو يتم الاتفاق على كل شي قبل الملجه الامور تتيسر

معماري قطري

12-03-2019, 10:47 AM

المقصود هنا بعض الشباب القطري اللي اخلاقهم زينه ومستواهم التعليمي والوظيفي جيد ويتم رفضهم عشان عوايلهم ونسبهم والامثلة كثيرة بقطر
اعرف اكثر من حالة لبنات وصلو فوق الثلاثين والاربعين عشان النسب والاصل والفصل وبالنهاية اضطروا يتزوجون اشخاص من جاليه عربية عشان يتلاحقون الحياه الزوجية والامومه ......
الاصل والفصل مهم بس اذا نتيجة هالعادات العنوسه او البنت تضطر مستقبلا تتزوج العربي او الفلبيني المسلم فهذا شي غلط فاذا توفر صاحب النسب فاهلا وسهلا واذا ماتوفر نشزف مصلحة البنت
بالنهاية احنا بقطر كلنا خمس انفار محتاجين نتكاثر

الحمد لله فوق 320000 رجال وإمرأة فيهم الخير والبركة وقفوا فوق 30 مليون وراهم عدد كبير من الكلاب ( يكرم القاريء ) العاوية والنفوس الحاقدة ولو ضفنا عليهم سكان النيل طلعوا 120 مليون

معماري قطري

12-03-2019, 10:55 AM

انا يا جماع ماقصدت الحسب والنسب مش مهمين العكس حتى الحديث عن الرسول صلى الله عليه وسلم قال مالها وجمالها ونسبها ودينها .... فظفر بذات الدين تربت يداك وينطبق على الزوج بعد انا ما قصدت الاسيوى والي ذكرتيهم .... انا اقصد المواطن العادي الي نسبه مقبول بس لانه مب من مواخيذنا لا مانزوجه عذا الكلام .. والله اعرف وكلكم تشوفون امثله لشباب ماتزوج وبنات ماتزوجو وعدو الاربعين والعنوسه زادت مسكينه تطق طق بتكملة الدراسه وتشغل نفسها في اي شيء ثاني كان الزواج فاقده الامل منه .. يا جماعه يازين زمان الطيبين كانت الامور اسهل وابسط العكس شوف والنسب والاخلاق والدين كلهم مهمين بس سهل ولا تقول بنت عم وولد عم ترى رب العالمين قال بالقران سبحانه ( وجعلناكم شعوبا وقبائل لتعارفو ان اكرمكم عن الله اتقاكم ) القصد سهل الامور ولا تعقدها وخلو دهنا في مكبتنا والله يستر على الجميع.. والعذر منكم على الاطاله

لو قاربت البنت الثلاثين ولا حد جاها واجب ولي أمرها ينتبه لها ولو حصل رجال فيه خير يقربه بأي طريقة .. أذكر كانت عادة عند شيابنا غفر الله لهم لين جات واحد بنت قال هذي حق فلان وفلان يكون عمره سنتين أو سنة .. تنتشر المقولة وتستوي وعد ممكن يتنفذ وممكن يتغير

أحدهم كان يقول زوجتك عندي تزوج واستر نفسك وحصلت لي السالفة في سن ال 18 تلميح قوي وليس تصريح .. مثل لو جيتني زوجتك وتكفلت بزواجك

حمد 2002

12-03-2019, 10:58 AM

sara jsm

12-03-2019, 11:05 AM

الحسب والنسب مهم بس احياننا الحب :oops: يغلب على كل هالامور
الحب بلوى وهما من هموم الزمان :nop:
ملاحظه متوقع انه تنحذف هالرساله او احصل باند ، لاني ذكرت كلمه الحب والحب حرام وجريمة عند بعض البشر :cry2:

ههههههههههههه عاد الحب ممكن يلغي لك فكرة العرس ..
لان البنت ممكن تتنازل عشان شريك حياتها وظروفه ..

بس يبقى الاصل والفصل مهم ..
عشان باجر مايعايرون اليهال طالعين على خوالهم او عمامهم في اي خطا ممكن يقعون فيه .. :waiting:

دينالي

12-03-2019, 11:24 AM

الحمد لله فوق 320000 رجال وإمرأة فيهم الخير والبركة وقفوا فوق 30 مليون وراهم عدد كبير من الكلاب ( يكرم القاريء ) العاوية والنفوس الحاقدة ولو ضفنا عليهم سكان النيل طلعوا 120 مليون

الشعب القطري فيه البركة وله الفضل الاول بعد الله سبحانه في صمود قطر ضد الحصار الغاشم بقيادة بوزار
بس مايمنع ان قطر عدد سكانها قليل وان القطريين يشكلون اقليه في قطر والهنود بس منفردين عددهم اكثر من القطريين في قطر وهالظاهره غير صحية وطبيعي يكون زيادة عدد السكان مطلب حتى ولو العدد الحالي فيهم الخير وصامدين والنعم فيهم بس زيادة السكان مطلب وحاجة للدولة
وعشان السكان يزيد عددهم لازم يتزوجون وعشان يتزوجون لازم نخفف تعقيدات الزواج ويكون الزواج ايسر واسهل مع العلم ان اغلب عوائق الزواج احنا صانعينها والحمدلله البلد فيها خير وامان ورؤية حكيمة

Qtr37

12-03-2019, 05:33 PM

صار موضوع الزواج مزعج
المشكلة مب بس في الامور المادية المشكلة في العقول الصغيرة
واحد عمره ثلاثين وعقله عقل ياهل
والبنات ما عادوا محتاجين للزوج شايلين نفسهم

ولا تنسون الفساد:)
البوي فريند والقيرل فريند يعني

والله يستر على الجميع

يمامـة

27-03-2019, 11:52 AM

وايد تعقيد في النسب و الحسب ..
"من جاءكم ترضون دينه و خلقه فزوجوه"
طبعا ما اقصد يزوجونه غير القطري بشكل عام
لكن دامه انه قطري و ريال فيه الخير ليش التدقيق على اصله و فصله؟
بما انهم من هل البلاد و لهم سنين فيها؟
ترى محد يدفع ضريبة الموضوع ذيه غير البنات يكبرون و يبقون في بيوت ابهاتهم..

ya3coub

27-03-2019, 02:32 PM

ههههههههههههه عاد الحب ممكن يلغي لك فكرة العرس ..
لان البنت ممكن تتنازل عشان شريك حياتها وظروفه ..

بس يبقى الاصل والفصل مهم ..
عشان باجر مايعايرون اليهال طالعين على خوالهم او عمامهم في اي خطا ممكن يقعون فيه .. :waiting:

اللي يعاير اطفال بالخوال او العمام يراجع نفسه.

احنا مو شعب الله المختار بكل امتيازاتنا و عيوبنا في من احسن منا ولا انقول كنسب ولا دول ولا ثقافه قد يكونون خوال هالأطفال ذو نسب اشرف و ذوي رقي و مناصب فبلادهم و خير و نعمه.

العيب و صغر التفكير و الإذلال مو للأطفال انما من تفوه او يفكر بهالطريقة, اللي ما يصدق يلقى غلطة علشان يعايرهم و قد يكونون احسن في امور اخرى.

لو عيالنا اغلطو ما نقدر انقول ولد القطرية بس للأمانه الأجانب و خصوصا العرب يقول قطرية "بلهجة بلاد الشام" واحد غير محترم او رفع صوته او بدر منه تصرف ما يعكس تصرفات اهل قطر يقولون بكل بساطه "قطرية" يعني ما عليه شرهة قطري مو متربي و هاي النمطية الغلط سوائا منا او من غيرنا

ياما شفنا خصوصا في عالنا الحالي عيال الفصل و النسب و فضايحهم على كل لسان سوائا بنات او شباب ياما ناس عندهم اسم بس فالواقع عايش بخيال و امجاد اجداده: ليس التفى من قال كان ابي ولكن الفتى من قال ها انا ذا.

محد كامل ولا احد مافيه خطأ التسامح مهم و الأهم الصلاح, لو كان كلشي بيسر نفس ما تفظل اخونا معماري و نفس ما اهو موجودة فبعض المناطق و القرى الى الأن جان الأمور وايد استر.

شاللي بيخلي الشباب او البنات ينحرفون سهولة الإنحراف او "التجربة" عن الزواج اللي مربوط للأسف بالتقييد و العقل و التخلف عن الأمور الممتعه و اشلون انت او انتي متزوجين و تسون هالشي و الخ..

معماري قطري

28-03-2019, 01:18 AM

الشعب القطري فيه البركة وله الفضل الاول بعد الله سبحانه في صمود قطر ضد الحصار الغاشم بقيادة بوزار
بس مايمنع ان قطر عدد سكانها قليل وان القطريين يشكلون اقليه في قطر والهنود بس منفردين عددهم اكثر من القطريين في قطر وهالظاهره غير صحية وطبيعي يكون زيادة عدد السكان مطلب حتى ولو العدد الحالي فيهم الخير وصامدين والنعم فيهم بس زيادة السكان مطلب وحاجة للدولة
وعشان السكان يزيد عددهم لازم يتزوجون وعشان يتزوجون لازم نخفف تعقيدات الزواج ويكون الزواج ايسر واسهل مع العلم ان اغلب عوائق الزواج احنا صانعينها والحمدلله البلد فيها خير وامان ورؤية حكيمة

والله يا اخوي التيسير والتصعيب في يد اللي بيتزوجون وأهلهم .. والحكومة ما قصرت في شيء من مساعدة مادية الى عينية بمقرات العرس للجنسين .. أما إننا نعيب نفسنا بقلتنا فهذا ظلم لنا .. حكامنا على صغر بلادنا جاهم ملك زبن عندهم هو وهله

سالم الزهران

28-03-2019, 11:18 AM

مخاوفنا من الزواج زايدة.. مدري نحن معنا حق أو مجرد مخاوف. بغض النظر عن التكاليف، ما بعدها حياة ومسؤليات.. والمجتمع في عهد الآباء والأجداد مش موجود اليوم. (مجتمع تسوده ثقافة واحدة) انقرض؟.. هل الشيء ذا صحيح أو هي مجرد مبالغة مني؟؟ الله أعلم.

لهذا السبب خلونا نتجاوز المخاسير و اكيد بننساها لو نجح الزواج.. لكن بنت ثقافتها مختلفة و ولد ثقافته مختلفة ولا تدري شلون ممكن يتفقون على اساسيات فضلاََ عن التفاصيل!

SouthK

28-03-2019, 01:03 PM

مجتمعنا مجتمع مريض و علاجه الفقر .. لما يفقتر المجتمع بتختفي نسبة كبيرة من السلبيات و أولها البحث عن الاصل و الفصل و نسب عالي!

يا مكثرهم اصحاب اصول و ابناء عائلات لها سمعة و سطوة و اخلاقهم صفر .. يا مكثرهم بيوتهم قصور و اصحاب مليارات (ركزوا على مليارات) و قاط امه في مستشفى العجزة أو حاذف ابوه في بلاد ثانية (و الله العظيم ان هذا واقع) و ما يدري عنه!

وش فايدة النسب و الاخلاق مب موجودة؟ مؤكد ان النسب له اهمية لكن ما يصير نهمل كل خواص و نواحي الشخصية و نركز على شيء ما كان للشخص فيه أي اختيار و نقدر نقول هو سبب فساد الكثير من العلاقات!!