تجاربكم من الشراء مواد تشطيب من الصين

[koketa]

ممكن اللي عنده تجربه شراء أنواع الرخام والسيراميك من الصين لتشطيب فيلا

[سالم الزهران]

اللي اعرفه اخوي ان اللي بيتعنى للصين بيجيب القش كله.. وما اخفيك شغل الرخام.. قد مر علي فسح حاويات تجي من ايطاليا واسبانيا (يجوز الصين صارت وجهة لهذي الصناعة؟ معندي علم).

فاللي بيشتري مواد التشطيب كاملة مع التركيبات مثل الأبواب هو اللي فعلاََ بيستفيد.

عندك المكيف الاسبلت يطلع بثمانمية ريال.. وقايس عليه في بقية الامور مثل المطابخ والتواليت.

وفقكم الله واعانكم..

[ابو عبدالله.]

اعرف ناس راحت و رجعت بدون ما تشتري

الكوالتي غالي و الرخيص مب كوالتي

البلاط ما تضمنه اذا جيد او نوعيه رديئه كلهم بيقولون عندهم الزين لكن من يقدر يفرق
لما شريت من كافود بلاط اسباني. لقيت بلاط صيني لكن هذا له سمعه وما يجيب شي ردي فأثق فيه. لكن اجيبه بنفسي من الصين ما اضمن الجوده او المحل الي باعني

اذا احتجت كميه اضافيه بسيطه من نفس البلاط الي من الصين ما تلقاه بالدوحه. وهذه وهقه

اذا البلاط طلع فيه تكسر كم حبه بتتوهق
اذا مقصوصه البلاطه غلط بتتوهق

الدرايش و الابواب اذا المقاسات شوي مختلفه بتتوهق هذا غير الجوده ما تعرف عنها

قالوا لي اذا بتاخذ من الصين اجلس لين تشوف الكونتينر ينقفل جدامك. اضمن لك عشان ما يتغير شي من الي شريته وانت ما تدري

ايضا اي شي بتاخذه وما له وكيل عندنا. ما له قطع غيار. واي قطعه مفقوده من الشي. راحت عليك قيمته ووبتشتري واحد ثاني
مثل اجزاء الغرف و الكراسي و الثريات الخ

واحد فقط مدح انه شرى كل شي للبيت من الصين لكن ما علمنا اذا توهق بشي او المقاسات طلعت غلط و الربع احيانا اذا خسر بشي ما يعلم عشان ما ينتقدونه الشباب

الاهم من هذا ان. المكيفات او شريتها. فوق 20 مكيف. لا ضمان خمس سنوات ولا قطع غيار. يعني الي يتعطل حذفه

ما اصدكم عن فكره الشراء من الصين لكن انا اشوف ان في بدائل مقبوله

العاصمه عنده تصفيه ع نوعين من بلاط الباركيه. و سعر المتر 40 ريال وحلوين جدا

وكل شركه تعمل تخفيضات مرتين و ثلاث سنويا
جروهي خلاطات طقم ب 750 ريال. و الاعلان بالجريده لين اخر الشهر

كافود خصوماته زينه و اقطم الحمامات اعزكم الله اسعارها مقبوله جدا و ستاندر عالي
غير التصفيه ع بعض الانواع الكوالتي و الجكوزي و البلاط الخ

مب اسعار الصين لكن سعر مقبول و توصيل مجاني و ضمان ما شي يوصلك متكسر و غيار متوفر

وايد يغفلون ان الشحن من الصين فيه تكلفه و جمرك و توصيل من الميناء للموقع و تكلفه تركيب و مفاجئات العيوب و الكوالتي و نقص العدد عند الحاجه لكميه اضافيه