عطونا** كلمات قديمة** ومعناها

[سالم الزهران]

السلام عليكم ورحمه الله وبركاته
طيب الله أوقاتكم بذكره..
نحب تراثنا باختلافاته وتنوعه.. لذلك آمل أن يكون هذا الموضوع متحفاََ للمفردات القديمة أو التي يندر استعمالها مع ذكر المعنى ومثال أو اثنين... وشكراََ

[R 7 A L]

اشكرك اخوي سالم على هذا الموضوع الطيب
الي راح نستفيد منه
وراح يفيد الاجيال القادمة

[R 7 A L]

اهم شي مستفيد من اخوانا وخواتنا الكبار
الله يعطيهم الصحة والعافيه
نتمنى مايبخلوا علينا

[sara jsm]

اشكرك اخوي سالم على هذا الموضوع الطيب
الي راح نستفيد منه
وراح يفيد الاجيال القادمة

اي اجيال يااخوي :happy: اخر جيل موجود بينا يعقوب ..
بس حلو ان نتذكر بعض الكلمات القديمة اللي ماقمنا نستخدمها ..

مشكور اخوي بوزيد

:

ابتدي بكلمة ..

فلج : معناها ثلج باللغة الحديثة ..

[سالم الزهران]

اشكرك اخوي سالم على هذا الموضوع الطيب
الي راح نستفيد منه
وراح يفيد الاجيال القادمة

جزاك الله خير اخوي الغالي رحال ونا يخطر على بالي كلمات يمكن تكون غريبة لكن الاهم هو نعرف شلون تكونت وكيف العرب تغيرت لهجاتها... اللي تعجبت منه ان فيه تشابه بين مسميات عندكم وعندنا في اقصى الغرب.. والمهم نتسلى.. ونبادر بتسجيل بعض الكلمات قبل ما تختفي..

[سالم الزهران]

اي اجيال يااخوي :happy: اخر جيل موجود بينا يعقوب ..
بس حلو ان نتذكر بعض الكلمات القديمة اللي ماقمنا نستخدمها ..

مشكور اخوي بوزيد

:

ابتدي بكلمة ..

فلج : معناها ثلج باللغة الحديثة ..



جزاك الله خير أختنا أم جاسم.. ومشكورة على التدشين :strong

فلْج.. بعضنا ينطقها لليوم جذي
ولو غيرنا الحركات و نطقناها بالفتحات كلها (فَلَج).. تعني عندنا وعند المزارعين (ساقية الماء أو مجراه).

[سالم الزهران]

تلَهْوى... من كلماتنا الجنوبية. . نطقها مثل (تقهوى) ومعناها أبطى أو تأخر
فلان تلهْوى علينا.

[سالم الزهران]

يقولون أصل وفصل... أصل معروفة لكن فصل شيقصدون بها؟.. الله أعلم

[Dana’1]

وعليكم السلام ورحمة الله وبركاته

كلمة ... ميد
تقريبا تجي بمعنى قصد أو لي يعنيني


أقول ميد سالم مو ميدك يا فلان
تقول ميدي وإلا ميد فلان

[سالم الزهران]

ارحبي يا دانه.. نورتي المكان.. وكلامج صحيح.. من الاستفسارات في اللهجة الجنوبية.. ماذا انت ميد؟
معناها (شنو تقصد؟)
مشكووورة ع الاضافة... ماتوقعت حد يعرف هالكلمة.. سبحان الله

[Dana’1]

البقى يا سالم
ذكرتي بالمدرسه بمثل هالموضوع
تعرف عاد الي بالهيئه الملكيه بمدينتي الجبيل و ينبع
تلاقي كلامهم من كل منطقه ماخذين
كانت أصعب لهجتيين بالنسبه لي الفيفيه والجيزانيه حتى إني أقولهم بالله عليكم هذا عربي؟!
يضحكن ويقولون عربي قح بعد.
وفعلا أظن إنها العربيه القديمه والله أعلم

ميد أتوقع الكلمة منتشره بمنطقة نجد القسم الجنوبي منها وجميع المناطق الجنوبيه بالمملكه

[Dana’1]

مير
نقولها على حسب صياغ الجمله والدارجه أكثر بمعنى لكن
مثال:
كنت بسافر مير الله ما كتب

[qatarman8008]

كلمة خنية..
وتعني عطر..

[R 7 A L]

بزبوز = صنبور

[R 7 A L]

اخوي سالم
لو احد يحط كلمة قديمة بدون لايوضح شنهي والاعضاء يقولون معناها يكون افضل

[الحياة الخالدة]

صبحكم الله بالخير
موضوع جميل أخوي سالم
وبقية الاعضاء والعضوات ، عساكم عالقوة

[الحياة الخالدة]

كلمة خنية..
وتعني عطر..


قصدك خنة يالغرفاوي
وكلمة خنينة يعني ريحتها حلوة

[سالم الزهران]

اخوي سالم
لو احد يحط كلمة قديمة بدون لايوضح شنهي والاعضاء يقولون معناها يكون افضل

حياكم الله جميعاََ.. واقتراحك خوي رحال بعد زين.. لا هنت ولا هانوا الربع

[سالم الزهران]

دوشق.. تطلق على نوع من المراتب اللي يجي عريض.

أصل الكلمة تركي.. (دوشَك) بالتركي معناها فراش.. وهذي ملاحظة شخصية...سمعت الاتراك يرطنون بها.

[سالم الزهران]

النِقصة.. أو نَقصة.. كمية صغيرة من شيء.

[سالم الزهران]

البقى يا سالم
ذكرتي بالمدرسه بمثل هالموضوع
تعرف عاد الي بالهيئه الملكيه بمدينتي الجبيل و ينبع
تلاقي كلامهم من كل منطقه ماخذين
كانت أصعب لهجتيين بالنسبه لي الفيفيه والجيزانيه حتى إني أقولهم بالله عليكم هذا عربي؟!
يضحكن ويقولون عربي قح بعد.
وفعلا أظن إنها العربيه القديمه والله أعلم

ميد أتوقع الكلمة منتشره بمنطقة نجد القسم الجنوبي منها وجميع المناطق الجنوبيه بالمملكه

تبقين ولا تشقين دانه.. انتي مخضرمة ماشاءالله عليك

صبحكم الله بالخير
موضوع جميل أخوي سالم
وبقية الاعضاء والعضوات ، عساكم عالقوة

صبحك الله بالرضى مشرفتنا القديرة.. نورتي المكان واكيد جعبتج ما تخلى... كل ما طرا لج شيء سجليه بالنوته وانقليه على هنيه لا هنتي.

[سالم الزهران]

الغب .. الغبة ... وسط الشيء و أقصاه

غبة البحر مثلاًً.

[R 7 A L]

كرفايه

.

[معماري قطري]

متسودن

متضعضع

متعضرط

وانا ابي معانيهم حلاتها تكون واحد يقط كلمة والباقي يحاولون يعرفون المعنى وحلاتها من كل دول الخليج

[qatarman8008]

قصدك خنة يالغرفاوي
وكلمة خنينة يعني ريحتها حلوة

هالكلمه "خنية" ماسمعتها في قطر..
لكن سمعتها عند ربعنا الشيبان اللي في الحسا..

[qatarman8008]

كلمه دركسون..
اللي هو مقود السيارة..

[سالم الزهران]

البشكير... من الزينة النسائية لكن اختلف مدلوله من مكان لمكان.. واللي صدره للخليج اظنهم المصريين :)

[معماري قطري]

متسودن

متضعضع

متعضرط

وانا ابي معانيهم حلاتها تكون واحد يقط كلمة والباقي يحاولون يعرفون المعنى وحلاتها من كل دول الخليج

ما دام محد جاوبني متسودن يعني متملل أو قريبة منها

متضعضع مثل ما يقولون المصريين مش على بعضك

متعضرط كلمة شمالية تعني شايف نفسه ومتكبر بشكل كبير

[سالم الزهران]

صباح الخير بو عبدالله
صدّق ما جفت مشاركتك الاوله اللي سألت فيها.. وممكن اضيف على كلمة متسودن حسب اللي سمعته من العراقيين.. متسودن زعلان.. مسودَن يعني نحيس.. حسب ماشفتها في المعنى العام للكلام.

[R 7 A L]

بولْصي= اللون الوردي الفاقع

[سالم الزهران]

الكرْويته شنهي يالربع؟

[الحياة الخالدة]

الكرْويته شنهي يالربع؟

أنا سمعت چكويته أما كرويته ما سمعت عنها

[الحياة الخالدة]

بولْصي= اللون الوردي الفاقع

غريبة الكلمة ،، هاذي عند من ؟؟
الكلمة القديمة للون الوردي عندنا هي اللون الصابوني

[الحياة الخالدة]

والكلمة اللي بشارك فيها هي : زتات
لما نقول تعالي أو تعال زتات يعني : بسرعة
ونفس الشي زَتّـك أو زَتّــچ

[سالم الزهران]

أنا سمعت چكويته أما كرويته ما سمعت عنها
^^
هذي بعد نبيها... بالنسبة للكرويته هي طاولة خشبية.. مدري ليش انقرضت هذي الكلمة

[sara jsm]

بانكه / مروحة السقف

[R 7 A L]

غريبة الكلمة ،، هاذي عند من ؟؟
الكلمة القديمة للون الوردي عندنا هي اللون الصابوني

قديمة اعتقد عند هل شمال قطر والبحرين
وفيه بعد اللون القرمزي

[@north_star@]

كيك بو نص :taunt:
https://www13.0zz0.com/2019/04/07/18/861831648.jpg (https://www.0zz0.com)

معناته كب كيك
https://www13.0zz0.com/2019/04/07/18/816648448.jpg (https://www.0zz0.com)

شدخل ما ادري ههههههههههههههههههه :omen2::tease::tease::app:

[سالم الزهران]

من يعرف شنو ( قازه) أو القازه؟
هي شغلة تستخدم للإضاءة مثل قنديل الزيت القديم.. بس هذي ع القاز/ الكيروسين.

[@north_star@]

من يعرف شنو ( قازه) أو القازه؟
هي شغلة تستخدم للإضاءة مثل قنديل الزيت القديم.. بس هذي ع القاز/ الكيروسين.

ممكن الفنر

[سالم الزهران]

ممكن الفنر

الفنر هذا نسميه فانوس وهو مطور عن القازه..
القازة طال عمرك.. تاخذ لك علبة مال آيل بريك (القديمة الحديد بو غطا) وتسوي فتحة في الغطا تدخل منها حبل وتعبي العلبة قاز.. وجذي تولع معك مثل الفنر. بس مب مثل قوته وجودته

[@north_star@]

الفنر هذا نسميه فانوس وهو مطور عن القازه..
القازة طال عمرك.. تاخذ لك علبة مال آيل بريك (القديمة الحديد بو غطا) وتسوي فتحة في الغطا تدخل منها حبل وتعبي العلبة قاز.. وجذي تولع معك مثل الفنر. بس مب مثل قوته وجودته

حركات والله ...... سبحان الله الحاجة ام الاختراع ويا زين كل شي قديم

[qatarman8008]

كانت فكرتها ان الكاز اللي في الحبل فقط هو اللي يولع ولا تصل النار الى داخل العلبه ..
لان احتراق الوقود يحتاج اكسجين ولايوجد اكسجين داخل العلبه ..

[سالم الزهران]

كانت فكرتها ان الكاز اللي في الحبل فقط هو اللي يولع ولا تصل النار الى داخل العلبه ..
لان احتراق الوقود يحتاج اكسجين ولايوجد اكسجين داخل العلبه ..

خطير يبو علي.. صدقني ما قد فكرت فيها :omen2:

[سالم الزهران]

المسك والمعضد من الزينة النسائية وكلاهما من الفضة! من يعرف شكلهم أو وين تلبس؟

[R 7 A L]

بتيرس وعلولم

[bohilal191]

^^
هذي بعد نبيها... بالنسبة للكرويته هي طاولة خشبية.. مدري ليش انقرضت هذي الكلمة

چكويته يعني تقليد مب اصلي أو اي كلام

[qatarman8008]

الكشمه..
يعني النظارة..

[naklan]

موضوع جميل اخوي سالم بنحاول
نظيف عليه

كرفاية : تطلق على السرير الخشبي
زنجفرة ; تطلق على الفانيلة

وعلى علبة زيت البريك يطلق مسرج
مشتقة من السراج الي هو الفنر

تحياتي يا زعيم

[naklan]

كلمة بيز

تطلق على قطعة قماش مبطنة للوقاية من
حرارة دلة القهوة وقت الإعداد

[naklan]

غوري او ابريق تطلق على إبريق الشاي

وسمي على ما اضن على قانصوه الغوري
وهو اول من استخدمه

[naklan]

ميزب

من يعرف الميزب وفي ايش يستخدم
ممنوع مشاركة رحال في الحل

الرشا

حبل البئر كما قال الشاعر
تلعب بنا لعب المحالة بالرشاء

[سالم الزهران]

ارحب يالطيب الحبوب نكلان.. تو الاستراحة نورت.. وبعد طلعت انت مثل رحال خطير في الشعبيات.
من ناحية الميزب هذا بنخليه سؤال اليوم ؛)

[سالم الزهران]

چكويته يعني تقليد مب اصلي أو اي كلام
لا هنت يبو هلال.. افدتنا


بتيرس وعلولم
اول مره اسمع فيها يالشيخ.. :swoon:

[النهار]

لا هنت يبو هلال.. افدتنا


اول مره اسمع فيها يالشيخ.. :swoon:

هههههههههه

مايصير يابوزيد علوولم ههههه زاته الألو المفرد ألو

[سالم الزهران]

چكويته يعني تقليد مب اصلي أو اي كلام


هههههههههه

مايصير يابوزيد علوولم ههههه زاته الألو المفرد ألو

لا تشره علي يبو سالم.. القرى اللي ورانها وصلها التلفون قبل ثلاثين سنة.. ونحن تو الكهرب ما وصل لنا.. هات اللي في جعبتك وكمل لنا الافراح ادامك موقود يا عم نهار.

[سالم الزهران]

ميزب

من يعرف الميزب وفي ايش يستخدم

الميزب هو مهاد للطفل كانوا يحطونه فيه.

[الحياة الخالدة]

الميزب هو مهاد للطفل كانوا يحطونه فيه.

وعندنا اللي اسمه المنز : وهو السرير الخشبي اللي يوضع فيه الطفل

[سالم الزهران]

طيب كلمة قريبه من المنز.. هي أنزه.. معناها قعد من النوم.. واذا بتسأل عن الطفل هو راقد او صاحي تقول ( انزه ولا بعده راقد).
الولد منزه
شيء غريب هالتشابه رغم اني ما سمعت بالمنز الا الحين.. اشكرك اخت حياة.

[مستـريــح البـــال]

الزبو ،، ويقال : فلان زبّاي..
تعني يحب يفوشر..

[naklan]

ارحب يالطيب الحبوب نكلان.. تو الاستراحة نورت.. وبعد طلعت انت مثل رحال خطير في الشعبيات.
من ناحية الميزب هذا بنخليه سؤال اليوم ؛)

الله يرحب بك على طاعته يا بوريد

[naklan]

صباح الخير للجميع
اختي الحياة الميزب يختلف عن المنز
مثل التلفون الثابت والجوال الميزب جوال محمول
يحمل الطفل مثل الشنطة ويعلق في ضهر امه
وممكن تشتغل وهو نايم ومعلق خلفها

صور توضيحية

اكتبي صور الميزب في قوقل وبيطلع لج

[سالم الزهران]

صدقت يا اخ نكلان.. الميزب محمول و يعلق حتى في البيوت.. كانت المرة تعلق طفلها وتروح تخلص شغلها.. وطبعاََ الاستخدامات يجوز فيها اختلاف وكلن يقول اللي يعرفه من واقعه.

[سالم الزهران]

معالجة اللوز اللي كانوا يسوونها العجايز شتسمونها؟ :cry:

[الحياة الخالدة]

معالجة اللوز اللي كانوا يسوونها العجايز شتسمونها؟ :cry:

اللي تسقّط

[الحياة الخالدة]

صباح الخير للجميع
اختي الحياة الميزب يختلف عن المنز
مثل التلفون الثابت والجوال الميزب جوال محمول
يحمل الطفل مثل الشنطة ويعلق في ضهر امه
وممكن تشتغل وهو نايم ومعلق خلفها

صور توضيحية

اكتبي صور الميزب في قوقل وبيطلع لج

هههههههه لا طبعاً انا ماقصدت ان المنز نفس المعنى
اصلاً أول مرة أسمع كلمة ميزب

[سالم الزهران]

اللي تسقّط

يعني عملية تسقيط..
عندنا يسمونها ترفيع؟ والله مثلما اقول لكم. شوفوا شلون تختلف المصطلحات.

شفت بعيني مسادة عندنا الله يرحمها ترفع اخوي محمد.. والظاهر تستخدم دهن مع العملية... الله يجزاهم خير.

[naklan]

يعني عملية تسقيط..
عندنا يسمونها ترفيع؟ والله مثلما اقول لكم. شوفوا شلون تختلف المصطلحات.

شفت بعيني مسادة عندنا الله يرحمها ترفع اخوي محمد.. والظاهر تستخدم دهن مع العملية... الله يجزاهم خير.

ابو زيد الولد مسقط يعالجونه بالترفيع
والمعنى واحد عندنا وعندكم التسقيط هو تشخيص الحالة
والترفيع علاجها

[سالم الزهران]

شفت اشلون يا نكلان... لا ولو تجلس بورقة وقلم تطلع لك كلمات كثير متشابهة.. جزاك الله خير ع الفايدة.. بس عساك سالم من الترفيع هههه

[naklan]

صباح الخير للجميع
وبإشارك ببعظ الكلمات القديمة

قلة التمر - جالوق التمر
وهو يعمل من خوص النخيل لحفظ التمر

الهاون او النجر ويستخدم لطحن القهوة
وغيرها

نوظ البرق
قال الشاعر نوظ برقه يبشر بالحيا من بعيد


جغمة او قرطوع

وهو رشفة من الحليب او الماء


تحياتي

[naklan]

شفت اشلون يا نكلان... لا ولو تجلس بورقة وقلم تطلع لك كلمات كثير متشابهة.. جزاك الله خير ع الفايدة.. بس عساك سالم من الترفيع هههه


هههههه عدينا هالمرحلة بسلام

[naklan]

يقول الشاعر الفارس راكان بن حثلين

لا جيت بدله حدني عنه ساموح &&& عرضة عجوز جعل تجفي قدحها
حطت على قلب المهاوين ذابوح &&& لي سمعت الخرفاش قامت توحا

عين اشقر ماهو يداني هل اللوح &&& بيض الدواغر بالفلا قد طرحها
ان عرضت له بالسماء لاحها لوح&&& اما ضربها عرض ولا نطحها

قصيدة مليانه تراث وكلمات تراثية

[سالم الزهران]

الله الله يا نكلان... تحس فيه ابيات مذبوحة ف النص.. لكن الكلمات تخليك تعتز بالعرب الطيبين شرواكم والحاضرين من وراء الشاشات.. تحياتي لك :)

[سالم الزهران]

الذَرْع هو القياس بالذراع عند الأولين.. واللي يقيس يسمونه مذرّع.

فيه مصطلحات تقال مثل (عيد الذرع) وتعني عيد حساباتك.
وشكراََ

[سالم الزهران]

الهاون اللي يدقون فيه الحبوب والهيل والبن..
البدو يسمونه نجِر

وعندنا له اسمين. (المهراس)
و ايضاََ ( الودي) و (المهوى)

الهاون ما سمعنا به الا قريب،،

[سالم الزهران]

كلمة خنين في الخليج تقابلها كلمة ابنين في المغرب وتونس ولا ادري هل فيه رابط بين الكلمتين أو لا

[رشدان]

اللي تعالج اللوز القمازه والمساده

[رشدان]

من الكلمات القديمه الروشنه

[سالم الزهران]

جزاك الله خير يا رشدان.. عز الله تراثنا جميل و الخليج بالأخص من اطيب البلاد.

[سالم الزهران]

كلمة (مِهره) تعني مهنة.. شمهرتك.. مثال شفته اليوم في موضوع الاخت سارة.

كل يوم اكتشف اشياء جديدة كنت اتوقع انها لهجة محلية و اذا هي خليجية.

[معماري قطري]

يَهَدْ - اللي يعرف شتعني؟

[سالم الزهران]

انا ما في معلوم بابا :)

[الحياة الخالدة]

يهد يعني مرض
ميهود يعني مريض
نوع من الدعاء على حد : يهد ان شاء الله

[سالم الزهران]

احسب السكون اللي ع حرف الدال نقطه!
(يهذ) :omen2:

[سالم الزهران]

ع طاري السكون... عندنا معنى (سكون) هي نفس معنى (السَكَن).. اللي بوصل له... ان السكون جمع.. مفردها عندنا (سِكْني).. معناه.. جني عفريت من هالأمور.. وما ادري المفرد هذا تستعملونه بعد!

[naklan]

ع طاري السكون... عندنا معنى (سكون) هي نفس معنى (السَكَن).. اللي بوصل له... ان السكون جمع.. مفردها عندنا (سِكْني).. معناه.. جني عفريت من هالأمور.. وما ادري المفرد هذا تستعملونه بعد!

نفس المعاني عندنا وعندكم وعندنا يقولون سكون
اوسكني يعني جني

[naklan]

انزين باروح كلمة انزين تعرفونها وتعني
الموافقة

الفرجة
وتعني الفتحة في مكان مغلق
هجت الهجن مع الفرجة

العد
وتعني البئر
ا
القراح
الماء الصافي

العد القراح الزلالي

المدي
تطلق على حوض الماء الي بجانب البئر
ويستخدم لسقي الماشية

ولكم التحية

[سالم الزهران]

^
لا هنت يا نكلان ع الإضافة.

من أسماء الشوارع (الضيقة) التي يستخدمها المشاة..
في الخليج.. يسمى داعوس
في الحجاز.. يسمى زُقاق... جمعه أزِقّه
في العراق.. اظن يسمى.. دربونه
في المغرب كامل.. يسمى زنقه
مع أن الزنقه ف المغرب تمشي فيها السيارات

نسيت اضيف شيء من اللهجة الجنوبية..
الممر الضيق بين البيوت يسمونه الأولين (مِسراب) وجمعه (مساريب)

[معماري قطري]

^
لا هنت يا نكلان ع الإضافة.

من أسماء الشوارع (الضيقة) التي يستخدمها المشاة..
في الخليج.. يسمى داعوس
في الحجاز.. يسمى زُقاق... جمعه أزِقّه
في العراق.. اظن يسمى.. دربونه
في المغرب كامل.. يسمى زنقه
مع أن الزنقه ف المغرب تمشي فيها السيارات

نسيت اضيف شيء من اللهجة الجنوبية..
الممر الضيق بين البيوت يسمونه الأولين (مِسراب) وجمعه (مساريب)

هندسياً سيم سيم يستعمل وايد المسرب هو أول مدخل أو مخرج الشارع السريع

[سالم الزهران]

الحبوة عندنا مرادفة للمهر حق العروس.

ماخوذة من الحباء..

[سالم الزهران]

المكحلة... هي العلبة النحاسية اللي ينحط فيها الكحل

[سالم الزهران]

الدبلة... المحبس... عندنا يسمونها الفتخه (تسمية مندثرة اليوم)

[Dana’1]

توحي
توحي لي ؟
أنت توحي أو توحين ؟!
يعني أنت تسمعني،،تفهم علي

[Dana’1]

ميقعه
إناء من خشب والغطاء مصنوع من جريد النخل ،،، بالعاده يستخدم بأن يضرب أو يمرد به خبز التنور مع مرق اللحم وهالأكلة تسمى بإسم هالإناء ( ميقعه)
صور من النت
https://3.top4top.net/p_12705tj2g0.jpeg (https://up.top4top.net/)

https://5.top4top.net/p_1270v7cic2.jpeg (https://up.top4top.net/)

https://6.top4top.net/p_1270i7zxa1.jpeg (https://up.top4top.net/)

[qatarman8008]

انزين جعنا الحين..!!

[Dana’1]

انزين جعنا الحين..!!

يمدحون الكيما و الشكشوكه بهالصبح^_^

[سالم الزهران]

يمدحون الكيما و الشكشوكه بهالصبح^_^

صح يا دانه .. وفقك الله ،، انت ونا من عيال الجبيل حقون شكشوكة .. قطرمان وسارة مناك مال كيمه .. رجل التعليم وزاده خويا بشير من عيال الحومة وماكلة الشفنج ههههه

زين جذي خليتوني اطلق عليكم مع صباحية الجمعة
:ok:

[معماري قطري]

صباح الخيرررررر

[بوخميس]

لفت نظري شركة دواجن قطرية اسمها (الويبة)

يقصدون (الوجبة) بس ما ادري بلهجة من هذي

ما ادري يا هل قطر. في حد يقلب الجيم ياء في كلمة مثل (الوجبة)؟!

[معماري قطري]

يوز تمشي بالانجليزي وبالعربي يوز عنه تعني دعه عنك يا أخ العرب

[معماري قطري]

لفت نظري شركة دواجن قطرية اسمها (الويبة)

يقصدون (الوجبة) بس ما ادري بلهجة من هذي

ما ادري يا هل قطر. في حد يقلب الجيم ياء في كلمة مثل (الوجبة)؟!

نعم فيه أهل قطر بني تميم يشكلون منهم نسبة كبيرة وانا منهم وأوقات كبارنا كانوا يقولونها .. إحنا اللي اخترعنا مجبوس الدياي

[sara jsm]

شكلكم بعد اخترعتوا يوم اليمعه :p
:
شريت من هالشركة من يومين وماعرفت اقرا الكلمة

المفروض يكتبون / دياي الويبه :p

[بوخميس]

نعم فيه أهل قطر بني تميم يشكلون منهم نسبة كبيرة وانا منهم وأوقات كبارنا كانوا يقولونها .. إحنا اللي اخترعنا مجبوس الدياي

عيل ليش ما تقولون ( ميبوس الدياي ) :waiting:

[معماري قطري]

عيل ليش ما تقولون ( ميبوس الدياي ) :waiting:

هههه كيفنا جيم تنقلب ياء وجيم ما تنقلب

[معماري قطري]

شكلكم بعد اخترعتوا يوم اليمعه :p
:
شريت من هالشركة من يومين وماعرفت اقرا الكلمة

المفروض يكتبون / دياي الويبه :p

صج والله دواجن ما تنفع غف مي سآم دياي

[سالم الزهران]

كلمة (يدحّق) عند العراقيين يعني يبطل عيونه بقوه.. اظن (والظن اكذب الحديث) ان اصلها ( حقق النظر).

عندنا كلمه دارجة في الريف بنفس معنى الكلمة اللي عند العراقيين، حيث انا نقول (حندر؛ يحندر؛ حندرت) معناها بطلت عيوني و نحن نستخدمها للنهي أو للتنبيه.. احندر لك عشان تفهم مثلاََ :looking:

[شموخ دائم]

,

,


مرحبا


شكرا على الموضوع والكلمات العتيقه الجميله


( جوكم )


عند الشيبان القدماء الي اشتغلوا بالبترول
تعني ( خطر ) او ( ممنوع ) او ( مخالفه )


الغريب ان اصل الكلمه

( جو ) هو اسم الفورمن الإنجليزي او المشرف عليهم

( كم )

يعني جاء باللغه الانجليزيه

وتعني ان المشرف جاء في خطر عليكم
اشتغلوا لاحد ينشغل بشي يخالفكم او يخصم عليكم

:)


,

,

[شموخ دائم]

,



,



الضرح


:)



,

,

[sara jsm]

لين عصبنا وسبينا قلنا يالضرح :happy:
بس شنو معناها !!؟ :strong

[سالم الزهران]

,

,


مرحبا


شكرا على الموضوع والكلمات العتيقه الجميله


( جوكم )


عند الشيبان القدماء الي اشتغلوا بالبترول
تعني ( خطر ) او ( ممنوع ) او ( مخالفه )


الغريب ان اصل الكلمه

( جو ) هو اسم الفورمن الإنجليزي او المشرف عليهم

( كم )

يعني جاء باللغه الانجليزيه

وتعني ان المشرف جاء في خطر عليكم
اشتغلوا لاحد ينشغل بشي يخالفكم او يخصم عليكم

:)


,

,

عجيب يا مستر شموخ
الله الله.. رحم الله شيباننا اجمعين
والله يرفع قدرك ع مشاركتك الطيبة

[سالم الزهران]

اسمحوا لي اقول معنى ( الضرح) عندنا.. وطبعاََ كلمة قديمة يعرفها الشيبان فقط.

الضرح حجر يكون طويل.. مترونص مترين.. أو يبنون بناء بالحجارة يكون طوله في ذي الحدود.. لكن وين يبنونه وليش؟

يبنونه قرب المزارع في مكان بارز يراه الرائي من بعيد.. ويبنونه احياناََ على اسقف الحصون.. في احد الأركان!

اما استعماله عندنا.. فللتخويف.. لأن اللي يراقب المزرعة من بعيد يتخيل له انسان واقف.. طبعاََ عند المزارع تخاف منه الحيوانات مثل القرود.. خصوصاََ انهم كانوا يلبسونه قماش ابيض يمثل جنه ثوب.

وعلى البيوت.. ايضاََ لو نضرت لبعض الضروح تجد فيها آثار رصاص.. فالمتربص يحسب ان اللي علي راس البيت هو غريمه.. فمبجرد يثور الطلقة الاولي ينكشف امره.. وينتبه اهل البيت.. وطبعاََ من اول لا كان معهم درابيل ولا عندهم وقت يتمون يراقبون البيت..

هذا في ثقافة الاولين.. والله يديم على كل مسلم الامن والعافية.

[سالم الزهران]

لين عصبنا وسبينا قلنا يالضرح :happy:
بس شنو معناها !!؟ :strong

اكيد اي واحد من جماعتنا يسمعها... يفهمها مثل لو حد قاله يا صنم يا جماد .. الخ

[سالم الزهران]

كلمة (معليش) تعني.. ما علي أي شيء

يقول الدكتور عبدالله الغذامي
أهم كلمة في معجم العلاقات العامة هي كلمة (معليش) ولا بد أنها نحت لغوي لعبارة : (على أي شيء)، وترد في صيغة النفي: (ما على أي شيء)، أي أنها تنفي شيئية الأمر وتحاول إلغاءه ونقله إلى منطقة الانتفاء، وهي لا تنفي المسببات لكنها تعفي من النتائج وهنا سينتفي الحدث تبعا.

معجم العلاقات العامة

[سالم الزهران]

ابا الظلوف.. هذا مكان عندكم
بو ظلف... هذا مرض يصيب الغنم في اظلافه الأمامية (هذا عندنا).

[سالم الزهران]

الزافر
عمود وسط الميلس تلتقي فوقة الأخشاب الرئيسية اللي تشيل السقف.