المجلس البلدي بين الأمس واليوم

[R 7 A L]

السلام عليكم ورحمة الله وبركاته
اغلبنا يعرف انه مجلس توصيات فقط
ماراح نتكلم عن انجازاتهم

راح نتكلم عن فكر المصوتين
هل تعتقدون انه تغير عن السنوات الماضية وعن او مجلس بلدي

قبل عشرين سنه كان اغلبنا اذا ماكان معظمنا مايعطون اصواتهم الا ل اقربائهم او جيرانهم او من يعرفونهم حتى وان كان برنامج العضو الاخر اقوى


اليوم اشوف ان الوضع تغير
ولو كنت في قطر هالايام راح اعطي صوتي للافضل


انتم شرايكم

[بوخميس]

عدد المصوتين في 1999

اكثر من اللي صوتوا في 2015*وهم*17000

مسوين انتخابات حق 17 الف شخص؟

[مضارب دوسري]

اصوت من باب المشاركه فقط لا اكثر ولا اقل

مع التحفظ التام على الفائز في كثير من المرات


دائما وللامانه والاسف تجد كل شخص يصوت للي من نفس القبيله او العائله

(لذلك من اول ماتشوف قائمة المرشحين انفسهم مع دوائرهم من السهل جدا تقول هذا اللي بيفوز في المنطقه الفلانيه)

لذلك كنت ولا زلت ضد فكرة مجلس شورى منتخب لانه لحد الان المناخ غير مناسب (فالانتخابات البلديه)
فالخوف ان تاتي الانتخابات في مجلس الشورى بمن لا يستحق على اكتاف من يستحق:happy:

[Rider]

ماعمري صوت لا افكر صوت مجلس مجرد أمتيازات للاعضاء فقط وبدون فعل

[SouthK]

المجلس البلدي وجوده و عدمه واحد .. بدون فايدة

[style]

لا حرام مايعطوتهم وأيد ،،مليون ريال بس من الديوان
يأخذ الفلوس ويقول لك طاف

[لطيف الروح]

حليب منزوع الدسم

[شموخ دائم]

,

,


مرحبا

شكرا على المضوع


كلنا نعرف ان المجلس البلدي واعضاءه ( مجرد مجلس استشاري ) فقط ولا يقدر أي عضو
يعمل أي شي في منطقته
الا بموافقه البلديه ورصد الميزانيه له
والعضو ما يوجد شي في يده لا من قريب ولا من بعيد

على الدوله ( انقاذ ) هذه العمليه الديموقراطيه
من خلال إعطاء ( صلاحيات ) للاعضاء

لان الناس بدت تفهم ان ( العضو ) مجرد شكل فقط لا غير

وهذا سبب عزوف الناس عن التصويت للاسف
الا اذا رايح لولد عمه او احد قرايبه

شي محزن بصراحه

اذا الدوله ما تدخلت بإصلاح المجلس

الي راح يحصل

عزوف الناس عن التصويت ( وهذا الان موجود )
ومن ثم

عزوف ( المرشحين )

وبالتالي بيكون ( موت ) اول عمليه ديموقراطيه في البلد


للأسف نشوف هذا الشي

موت بطيء سنه بعد سنه

والكل يتفرج

اما نعطي صلاحيات

او نلغي المجلس

ويكون انتخابات ( مجلس الشورى ) بديل عنه

اذا كنا نبحث عن مصلحه البلد

اما اذا نبي الموضوع

( شكلي )

فهو الان شكلي

بطريقه لا تخدم البلد في شي




,

,

[الجـــوديّ]

تجري عملية الانتخابات بدون روح من الطرفين .. مع إني أقدر جداً الشخص اللي يروح ويتعنى ويصوت ..

المهم إنه راح وشارك بالتصويت للي يرضاه ..حتى لو كان دور عضو المجلس البلدي فقط استشاري ..

لكن هل خلال هالسنوات .. هالاستشاري قدم مايخدم منطقته وبرأ ساحته ووعوده اللي قدمها في برنامجه الانتخابي ؟

لمحت يافطة مرشح فحوى مناداته إنه يبي يرتقي بالخدمات في منطقته .. وقد رشح نفسه من قبل في الدورة السابقة ومنطقته للحين تأن وتشتكي!

مرشحين منطقتنا ما أعرفهم الا وقت الانتخابات وبعد اعلان النتائج كلهم مالهم عينة !


شلون ياجماعة ؟

شلون يامرشحين ؟

شلون يالمجلس البلدي ؟

شلون يا البلدية؟

طوروا الموضوع شوي ..

الزموا المرشحين بوجود صفحة للتواصل .. احنا حريم مانقدر نروح مجالس الرجاجيل ... والا نتواصل واتساب

خل اهل المنطقة يلتفون على بعضهم .. ويوحدون صوتهم .. عشان عضو المجلس اللي ينوب عنهم يكون عنده تصور كامل عن مطالب أهل المنطقة

خل اذا صار انجاز كلنا نعرف ونفرح بانجاز المنطقة

مايصير كل وسائل التواصل إما مقطوعة أو مجهولة أو تعبانة واحنا ماندري عنها !!

اذا تصحح النظام والالية وواكب العصر اللي احنا فيه الكل بينهض ..

العضو المنتخب والناخب والمجلس والمنطقة ................... وقطر 3>

[معماري قطري]

بعض أعضاء البلدي صراحة مكسب للبلدي وللدولة مثل الدكتور مهندس محمد جاسم المسلماني وهو من الشباب اللي أكيد أضافوا الكثير للمجلس .. المهندسة شيخة الجفيري .. واحتمال غلطان في اسمها كذلك .. فوق كل شيء طبيعة عمل المجلس البلدي مهما يكون هندسية أو قريب من الهندسية

انا أتمنى تكون تخصصات محددة اللي تشغل المجلس البلدي وما تكون العضوية بلا شروط أو شروط سهلة خصوصاً ممثل المجلس لازم يفيد وما يفيد اللي ما فاد نفسه علمياً

[معماري قطري]

طالبنا بمطبات جدام بيتنا حيث الشارع ضيق ويسرعون فيه وايد .. أو كاميرات أمنية تصور رعونة بعض السائقين ويتخالفون .. واخوي خلص الموافقات واشتغل فيها ووافقوا على مطبين جدام بيتي وبيته وتم تركيبهم وافتكينا فترة من السرعة بس ما طولوا كم شهر وجات اللجنة شالتهم .. بيت يمني في نفس المنطقة شلوا مطب وخلوا مطب مع إن المطبات خلف بيته بس مسوي طبيلات في الخلف ويبي يطلع على راحته واحنا الشارع هو المنفذ الوحيد لنا وصار حادث لولدي بسبب سرعة أحدهم

[SouthK]

طالبنا بمطبات جدام بيتنا حيث الشارع ضيق ويسرعون فيه وايد .. أو كاميرات أمنية تصور رعونة بعض السائقين ويتخالفون .. واخوي خلص الموافقات واشتغل فيها ووافقوا على مطبين جدام بيتي وبيته وتم تركيبهم وافتكينا فترة من السرعة بس ما طولوا كم شهر وجات اللجنة شالتهم .. بيت يمني في نفس المنطقة شلوا مطب وخلوا مطب مع إن المطبات خلف بيته بس مسوي طبيلات في الخلف ويبي يطلع على راحته واحنا الشارع هو المنفذ الوحيد لنا وصار حادث لولدي بسبب سرعة أحدهم

انتوا بخير!

[nooora]

طالبنا بمطبات جدام بيتنا حيث الشارع ضيق ويسرعون فيه وايد .. أو كاميرات أمنية تصور رعونة بعض السائقين ويتخالفون .. واخوي خلص الموافقات واشتغل فيها ووافقوا على مطبين جدام بيتي وبيته وتم تركيبهم وافتكينا فترة من السرعة بس ما طولوا كم شهر وجات اللجنة شالتهم .. بيت يمني في نفس المنطقة شلوا مطب وخلوا مطب مع إن المطبات خلف بيته بس مسوي طبيلات في الخلف ويبي يطلع على راحته واحنا الشارع هو المنفذ الوحيد لنا وصار حادث لولدي بسبب سرعة أحدهم

المطبات والكاميراات الامنية ضروريه في كل فرجان ، الصبي عمره تقريبا 13 سنه يقود سيارة ابوه ويوصل امه !!!!!!

[وحيد-الشوق]

انا ماعمري عطيت صوتي لأحد للأسف الأغلبية شو إعلامي وهمهم الجواز الدبلوماسي والشرهات طبعاً ما أنكر أن هناك من يعمل ويجتهد لكن هل استفدنا شيء من المجلس غير الشعارات الرنانه!!

[معماري قطري]

انتوا بخير!

الحمد لله الحادث بسيط .. اللي متسبب فيه واحد شاب بحدود ال 19 وولدي كان 17 عنده ليسن تحت التعليم وطالع بالسيارة ريوس .. عادي فريج أي واحد يمشي فيه لازم ينتبه ويخفف .. ياهل يطلع والا حتى رجال شايل غرض أو كيس قمامة معرض يندعم من مثل ذيلا .. اللي صار إنه طالع من لفة ودايس وتفاجأ بسيارة ولدي واقفة في وسط الطريق .. دعمها في الزاوية الخلفية .. والشرطة حطوا الغلط على ولدي انه راجع ريوس والولد الثاني المشكلة صاده تشنج وطاح مغمى عليه

القصد من السالفة المجلس البلدي مقصر لأبعد الحدود مع إن العضو ولد عمي

[معماري قطري]

المطبات والكاميراات الامنية ضروريه في كل فرجان ، الصبي عمره تقريبا 13 سنه يقود سيارة ابوه ويوصل امه !!!!!!

هذا يهون 13 يعتبر كبير .. واحد يقول لي شاف شايب يسوق به ولده أو ولد ولده .. يقول يسوق واقف ويطل من تحت السكان حتى يشوف ولين بغى يقعد يرتاح حاط طابوقة على السيت

[Saranay]

أصبحت عملية ربحية لاعضاء المجلس للأسف لاتخدم الوطن والمواطن
السؤال إذا منعت الشرهات هل ستجد حد يرشح نفسه ؟

[R 7 A L]

شكراً للجميع
خلوا منكم ايجابيات وسلبيات الاعضاء
نبي نقارن بين فكر الناخبين بين اول سنه انتخابات وبين هالسنه هل تغير فكر الناخب ناحية من راح ينتخبه ولا نفس اول

[يمامـة]

ما اعرفهم و لا اعرف هل بالفعل يستحقون صوتي او لا.

لذلك ما اصوت حق احد..

Pardon
على صراحتي.

[يمامـة]

شكراً للجميع
خلوا منكم ايجابيات وسلبيات الاعضاء
نبي نقارن بين فكر الناخبين بين اول سنه انتخابات وبين هالسنه هل تغير فكر الناخب ناحية من راح ينتخبه ولا نفس اول

رحال

انت السؤال هذا لازم تاخذ اجابته من وسط اهل الفزعات
اللي يصوت للمرشح من قبيلته.
و اعتقد من غير اجزام.. ان الامر هذا مستمر.