افضل شركة تامين للسيارات

[QtrGate]

السلام عليكم
عندي سيارات البيت
كل سياره تأمينها غير
ومب عارف شنو المزايا الي فالتامين
حاب أوحد شركة التامين لكل السيارات

شنو تنصحوني؟

[S.T.Y.L.E]

عليكم السلام

كلهم علل ، لكن انا مستمر مع qic ( قطر للتأمين ) بحكم ان فروعهم فكل مكان وعندهم خدمة تواصل عالواتس اب وحتى الموقع تقدر تسجل منه بلاغ تعويض

[عاشق الدمعة]

وعليكم السلام ورحمة الله وبركاته .... والله يا أخوي أنا أتعامل مع الشركة العامة للتكافل ومعاملتهم ممتازة وسهلة وخدمتهم حلوة وعندهم خدمة الطريق في حالة الأعطال

[الغالي!]

التامين الشامل أنواع نصيحه اذابتامن شامل أخذ اعلى نوع تصليح في الشركه وعدم تحمل اي مبلغ ويعطونك سيارة بديله لأقدر الله صار حادث التكافل زين اشوفه

[وليف الشوق]

انصحك وبقوووووووووووه ( التكافل ))

[بوخميس]

الاسلامية للتأمين

وابعد عن شركات التأمين التجارية لان حالها حال البنوك الربوية

[monatee]

كلهم عسل وقت التأمين

وكلهم زفت وقت التصليح وبذات اذا انت المتضرر وبتصلح على تأمين الي داعمك


انا مع بيمه عشان اجدد التامين اونلاين ومنها اجدد الاستماره بمطراش
وتوصلني لين البيت

[جاسم الدوحة]

بيمة
(الفرع الإسلامي!) لقطر للتأمين

من أفضل الشركات في التعامل ، حسب تجربتي

[ابو عبدالله.]

الشركات الاسلاميه اولا

بيمه و التكافل و غيرها

بعضها يعطي 10% خصم اذا تجدد اون لاين

بعضها يعيد جزء من التأمين اخر السنه اذا ما عملت حادث بالموتر

مسأله التصليح كل الشركات سواسيه لكن الحذر من فهلوه بعض الموظفين ممكن يقول لك شغل اليد تدفع نصه وهذا غير قانوني

اذا تعرف حقوقك بتاخذها كامله وفوقها اكثر

مره قال لي موظف تأمينك منتهي ما نصلح لك. قلت له الحادث قبل انتهاءه بأسبوع. قال صح بنصلح

قال التأمين بأسم المالك السابق ما نصلح لك. قلت له خلاص اكتب ع ورقه انكم ما تصلحون. قال لا بضبطك

قلت وين مديرك ببلغ عليك الاضرار بمال الغير. حاولت تلغي التصليح بحجج غير قانونيه وفيها قضيه

المهم الموتر كان 2009 و الحادث في 2012 دخلوها تصليح بالوكاله عشان موظفهم ما يروح فيها

شركات التأمين مثل كل الشركات اذا تعرف حقوقك ما يلعبون معاك

بالتوفيق

[بوخالد911]

بيمة
Beema

من زمان معاهم
لو أمنت أون لاين
لك خصم بسيط

لو حبيت تأمن شامل
يطرشون لك مندوب

والتأمين الشامل لو ما سويت حادث ، جزء من المبلغ يرجع لك