العودة للماضي

[فهد الخاطر]

لكل إنسان ماضي وهناك من يتمنى عودة الماضي إذا طلب منك الإختيار فأي فترة تختار ؟؟؟

او اي مناسبة تريد ان تعود اليها ؟؟؟؟

او اي لحظات او مرحلة تبقى عالقة في ذهنك تتمنى لو انك تعود اليها ؟؟؟؟

[sara jsm]

يسعد مساك اخوي فهد .. نورت يامرحبا

كل مرحلة في حياتنا لها طعم مختلف ..
عن نفسي مرحلة الثانويه كانت مميزة لي .. بعمر 15-16-17
:
شكلك حنيت للماضي :) الله يكتب لك الافضل فيما كان .

[Rider]

نعم اتمنى العوده للزمن الجميل جيل الطيبين وخاص في بداية التسعينات الى نهايتها لكن الان الجيل الجديد بيقول من صجكم زمنكم مافيه شي على شنو عاجبكم

[كايد الوكره]

أجمل مرحله لي :
من التسعينات الى بدايه الألفيه ..

مرحله الاعداديه والشقاوه ..
مرحله الثانويه والتفكير في المستقبل ..

مرحله تصلي العصر وبعد متابعه الرسوم المتحركه تطلع للفريج تلعب كورة إلى أذان المغرب ..
وبعدها كلنا نتسابق على المسجد ..

مرحله الجيره الطيبه ..
مرحله الشوارع الفاضيه .. المشوار ياخذ لك ربع ساعه

[قطريه ماركه]

الطفولة .. مرحلة الإعدادية ..
الزمن اللي تحتفل فيه قطر ب 22 فراير ..
الزمن اللي ما فيه مجمعات ..
قطر قبل الزحمة ...

[الحياة الخالدة]

كل فترة على حياة الوالدة الله يرحمها ويغفر لها يوم كنت اقوم من بعد صلاة الفجر والقاها في الصالة قاعدة ومجهزة الشاي والقهوة ،، ريحة القهوة للحين ما تفارق خيالي
الله يرحم موتانا وموتاكم وجميع موتى المسلمين

[qatarman8008]

كل فترة فيها الذكريات المفرحة والمحزنة بنفس الوقت..
بالنسبة لي كانت طفولتي معاناة لاني كنت الولد الكبير وكان الاعتماد علي بكل شي..
يعني اقوم الصبح اروح العزبة اشوف شحال الغنم عقب اروح للمدرسة..
بعد مادخلت الاعدادية تطورنا جبنا راعي ههههه وصرت انا مدير العزبة ههه..
المهم فترة الاعدادية والثانوية بديت اشب واطول واشوف حالي زين مازين..
فترة بعد الثانوية تزوجت على طول والحمدلله صار عندي عيال..
تكت حياتي كلها سعادة اللهم لك الحمد الى ان الله قدر يتوفى الوالد اظلمت الدنيا في عيني عمري ماشفت هالظلام ولا كنت اتخيل انه كذا..
الحمدلله انسى واتناسى والله عوضني بوالدتي اللي هي تاج راسي وراس مالي حاليا اسال الله ان يجعلني بار بها..
لو تسالني تحب ترجع للماضي اقول لك لا..
المراحل ذيك كانت سعيدة وعشناها وطوينا صفحتها كل همي حاليا هو المستقبل..

[ابو عبدالله.]

والله الذكريات حلوه وكلنا لنا تجاربنا و حنين للماضي

من التعليقات تذكرت كرتون العصر و تحفيظ القرآن ايام لا ايباد ولا انترنت

وايد مراحل نتمنى ترجع و نعيشها مره ثانيه

الي احب اقوله بعد هالكلام

احنا ممكن نحدد طريقه حياتنا للمستقبل بحيث تكون مراحل تستحق الذكرى

نحدد لعيالنا اوضاع تستحق يتذكرونها لما يكبرون

مثل الاباء كيف زرعوا فينا مبادئ و ذكريات حلوه مع ان الحياه كانت بسيطه لكن تستحق الذكرى السعيده

نعطي انفسنا و ابنائنا وقت سعيد مش بس نعلم و نلبس و نشتري لهم و احنا بعيد او مشغولين عنهم

احيانا اجيب بالونات و اعبيها ماي و اخلي اليهال يفلتونها من الدريشه عشان تنفجر بالحوش
او اطلعهم بالحوش وكلن يفجرها بالثاني

ككبار ما نحس بأهميه الوقت السعيد في امور بسيطه لكن بنظرهم الدنيا وما فيها
مجرد وقت مستقطع يعطي سعاده و ذكرى لطفولتهم و تصوير الجوال ما يقصر

ايام زمان كان الوالد الله يرحمه يودينا بحر راس بوعبود ما كان فيه اي مباني بس اللعب هناك و السباحه للحين اتذكر وناستها

[كازانوفا]

احن الى زمن كنا تحت عين ابونا وخوفه علينا وكيف كان لا ينام قبل ما يطمن علينا هل اكلنا وشربنا وصحتنا جيده ام لاا..
رحم الله ابي وادخله جنة سقفها عرش الرحمن
كان اجمل زمان ..زمانه لن يعود ولا يعاد ..

[سليمان احمد]

2001
بالنسبه لي شخصيا
التفاصيل خاصه

[معماري قطري]

حبيت مشاركة الإخت سارة لكل زمان مميزاته

الحمد لله نعيش أفضل الأزمان خصوصاً فترة التقاعد

يمكن احن لأيام الدراسة خصوصاً في أمريكا كان الجدول كله مشغول والفعاليات وايد .. يوم الجمعة بعد الصلاة في العادة نوقت نهاية اسبوعنا الدراسي ونجتمع في مطعم هندي نتغدى ذاك الغدا الدسم ونعطيها نومة سوبر .. كانت غرفتي صغيرة وشقتي غرفة وصالة 9405 SW 140th court Miami 33186 وهذا العنوان اللي ما انساه طبعاً ال 9405 تجي قبل الساوث وست

كانت الغرفة مظلمة مغطي الستارة المعدنية ببساط سميك فيه نقوشات شاريه من مطعم ايراني والمكيف بارد ومواجهني وهدوء ساكن بروحي لكن ربعي حولي مشي اروح لهم .. والله يرحم سعود كانت شقته أقرب شيء وكانت مجلس الجميع .. هذي الأوقات بضغوطاتها كانت أحلى الأوقات

[شموخ دائم]

,

,


مرحبا


شكرا على الموضوع


اعتقد بالنسبه لي هي فتره ( الجامعه )

درست فتره في القاهره ولي فيها ذكريات جميله

وفي قطر

فيها أصدقاء وفيها ذكريات سكنا فتره بسكن جامعه قطر في السد
انا والربع

وفي الاجازات ( سفر ) و ( رحلات )

ومعسكرات

فيها انطلاقه وحريه وفيها ( عفويه )
ومن غير ( مسئوليات )

عموما

ما زلنا نستمتع برحله الحياه
وكل مرحله عمريه ولها ( جمالها ) اهم شي نعيشها
بتفاصيلها بعيد عن القلق والهم
لازم نتعلم ان كل يوم هو ( هديه ) من الله

نحمد الله عليه ونقوم بواجباتنا الدينيه والدنيويه

وتستمر الحياه

,

,

[معماري قطري]

هذا الوقت الحلو فيه دخول ضيف جديد علينا بنت ولدي ( حفيدتي ) استانس وانا اخربط عليها وهي تحاول تفهم شاقول .. توها في الشهر الخامس الله يحفظها

[فهد الخاطر]

هذا الوقت الحلو فيه دخول ضيف جديد علينا بنت ولدي ( حفيدتي ) استانس وانا اخربط عليها وهي تحاول تفهم شاقول .. توها في الشهر الخامس الله يحفظها
الله يحفظها ويستر عليها ويبلغكم فيها ،، شكراً على المشاركات عزيزي

[بوخالد911]

هلا بكم

مرحلة الثانوية
كانت ممتعة

وسنوات الجامعة بقطر كذلك

الزمن الجميل محفور في الذاكرة دوما.

[الاستاندر]

بالنسبة لي افضل زمن يوم ماكان فيه تلفونات ذكية هههههههههه

[فهد الخاطر]

هلا بكم

مرحلة الثانوية
كانت ممتعة

وسنوات الجامعة بقطر كذلك

الزمن الجميل محفور في الذاكرة دوما.
هلا وغلا بو خالد عاد أنت من رواد الشبكة ونورت الصفحة حبيبي ❤

[بوخالد911]

هلا وغلا بو خالد عاد أنت من رواد الشبكة ونورت الصفحة حبيبي â‌¤

ما عليك زود
بارك الله فيك
ويحفظك يا رب

[nooora]

ما احب ارجع للماضي ،، الماضي كان قاسي ومؤلم
الحمدلله على كال حال ،،

[معماري قطري]

الله يحفظها ويستر عليها ويبلغكم فيها ،، شكراً على المشاركات عزيزي

آمين والله يحفظ عيالكم وعيال قطر كلها وأهلها

[sara jsm]

هذا الوقت الحلو فيه دخول ضيف جديد علينا بنت ولدي ( حفيدتي ) استانس وانا اخربط عليها وهي تحاول تفهم شاقول .. توها في الشهر الخامس الله يحفظها

الله يحفظها ويخليها لكم ويخليكم لها ..
لين اكبرت شوي وقالت ( بابا عود ) :shy: بتستخف عليها زيادة ..

[معماري قطري]

الله يحفظها ويخليها لكم ويخليكم لها ..
لين اكبرت شوي وقالت ( بابا عود ) :shy: بتستخف عليها زيادة ..


الله يبلغكم في عيالكم اختي سارة وبقية القراء

[مضارب جديد]

اجمل وقت لما كان بر قطر لأهل قطر

كنت اذا ضاق خاطري

اطلع البر

جو نظيف بدون شبوك وتلوث بصري


كانت حياتنا بسيطه وممتعة
كل شيء ممتع

الحين وين نروح؟
مكاناتنا الي ربينا فيها صارت محميات
والناس اذا كلمتها نفسياتها بالأرض
ومحد مستحمل حد

[بوحمد1]

موضوع عجيب بس التفكير في الماضي مجرد ذكريات :( واحب اعيش الحاضر لانه في يوم من الايام بيكون ماضي ( فترة التسعينات كان فيها اكشن ) حياه بسيطه وكل واحد حاس بالثاني اما الحين وبعد التقدم التكنولوجي صار المجلس عباره عن كباين جوالات وكل واحد في وادي ،،، اشكرك على هالموضوع المميز .