ارجو الدخول

[ابوجوري]

السلام عليكم ورحمة الله وبركاته
اخواني واخواتي واشقائي
انا كنت في رحلة علاج في عام 1980 وقد تعرفت على أحد الإخوة القطريين كان يلعب بأحد الأندية القطرية والان اريد ان ابحث عنه هل احد يستطيع مساعدتي والتعرف عليه 102773

[Rider]

وش اسمه ياخوي

[معماري قطري]

عليكم السلام ورحمة الله وبركاته

يشبهني ذاك الوقت .. انا عالجت في لندن وخارج لندن في مصحة نسيت اسم المنطقة ما اذكر بالضبط 1981 أو 82 يمكن بس ما اعتقد 80 .. كان معانا واحد يشبهه اسمه سالم على ما اذكر الحبابي

الله يوفقك وتوصل له

انا صارت لي قصة غريبة مع وحدة اسبانية تواصلت معاي تسال عن شاب قطري تعرفت عليه وهي تدرس انجليزي في لندن في آخر السبعينات .. وهي سافرت المانيا تكمل دراستها وهو التحق بالدراسة في سان دييغو .. من العائلات الكبيرة اللي فيها ألف محمد وكل اللي تعرفه إنه في الجيش وراح يدرس سان دييغو وبالصدفة كان لي صديق يقول البحرية القطرية يرسلون سان دييغو للتدريب وهو كان هناك .. ما ادري شلون ربطت هذي المعلومة بالإسم وسئلت واحد من نفس القبيلة قال محد عندنا في البحرية ذاك الوقت واسمه محمد الا واحد وهو الحين مهاجر في دولة حصارية وعطني يوم باجيب لك رقمه

كان التواصل معاها على الايميل وقلت لها شصار واحتمال يطلع هو 50 - 50 وعطيتها رقمه واتصلت كم مرة ولا يرد بعدين خلته يرن فترة ورد .. طلع مسافر خارج الدولة اللي هاجر لها وكلمها تقول قلت له اسمي واني بصعوبة حصلت الرقم وابي اتأكد انت محمد الفلاني تقول قال لي ايوا من انتي تقول قلت بقول لك أول اسمي وانت علمني الباقي لو صحيح انت .. تقول قال اسم عائلتي بدون تفكير يعني طلع هو هو .. عاد رفيجي يضحك يقول جمعت راسين بالحلال

[Dana’1]

سبحان الله في ناس مستحيل يمرون عادي بحياتك .. يتمون ببالك و تتمنى تشوفهم أو على الأقل تعرف أخبارهم و إنهم بخير.
بإذن الله تلاقي الشخص الي تسأل عنه.

[sara jsm]

احب هالسوالف :strong

:

عطنا يااخوي اسمه او قبيلته او اي معلومة تعرفها عنه .. الدوحة صغيرة
ويمكن يكون معانا بالمنتدى ماتدري .. الشياب وايد هني :whistling:

[أم هشام]

سبحان الله في ناس مستحيل يمرون عادي بحياتك .. يتمون ببالك و تتمنى تشوفهم أو على الأقل تعرف أخبارهم و إنهم بخير.
بإذن الله تلاقي الشخص الي تسأل عنه.

ايه و الله صحيح

[معماري قطري]

استطراداً للسالفة اللي ذكرتها البنت كانت محبطة وتقول دورت عنوانه أو رقمه في الانترنت والسالفة لها حول 20 سنة .. أو 15 سنة بس لها فترة طويلة .. تقول سالت عنه في سفارات قطر في كم دولة .. كانت وقتها في 1978 عمرها 15 وهو عمره 18 .. ووقت ما تواصلت معاي كان عمرها 35 وكانت لها سنوات تحاول تعرف رقم تلفونه أو ايميله أو أي شيء عنه والصدفة قادت اليه

[سليمان احمد]

يشبه علي زيد ولا انا متأكد لكن ساعدنا على الأقل في اسمه او عايلته عشان يقدرون يساعدونك

[داااايم السيف]

اذا كان لاعب في نادي قطر فأكيد بيكون هو
حاول تستذكر اسمه او ع الاقل قبيلته
اعطني واحد من الفقره اعلاه وبدزلك رقمه ع طوووول

[سليمان احمد]

اذا كان لاعب في نادي قطر فأكيد بيكون هو
حاول تستذكر اسمه او ع الاقل قبيلته
اعطني واحد من الفقره اعلاه وبدزلك رقمه ع طوووول


هو يقول في احد الانديه القطريه مايقصد يلعب في نادي قطر