لاتثق في الاسم والا الحجم

[الغالي!]

السلام عليكم ورحمة الله وبركاتة

اخواني الاعضاء ووالمطلعين حبيت انبهكم عن بعض معارض السيارات ومحالات فحص السيارات مهم كان ذو سمعه والله على مااقوله شهيد
اليوم حبيت اخذ سيارة من اكبر المعارض حجم وسمعه واحتمال يتحول الى وكالة سيارات من كبرحجمه اتصلت عليه جوال قال احنا معرض س قلت له انتم عارضين vxr2017 موقع س وفي برنامج س قال اي قلت ابي الموتر اليوم وفلوسي كاش قال انا الحين مشغول والساعه 5 وعدنا في فريق بن محمود وترا انا فاحص السيارة في المركز الفلاني وهذا المحل من من اقدم المراكز للفحص اذا ماكان الاول او الثاني في شارع سلوى وراح ارسل لك الفحص على الواتساب وفعلا ارسله والسيارة مافيها شي نهائي جاني شك وفعلا رحت هناك فريق بن محمود وشفت السيارة في مكان تقول استور سيارات قال هذي كلها للمعرض الفلاني المهم شفت السارة بنفسي وطلبت منه افحص بطريقتي رفض قال خساره عليك قلت انا بدفع ماعندي مشكله رفض انه يروح قال انا مشغول برسال معاك اخوي قلت اوكي بعد الحاح قلت خلني اجرب خبرتي وطلع الموتر مدعوم وفيه شاصي قلت يمكن انا غلطان خذت رقم السيارة واتصلت بواحد من الربع في المرور اسال قال هذي السياره كانت مشطوبه جايها حادث قوي وبالخطا وهو يروني اوراق الفحص الي عنده بتلفون ويطلع عنده ورقتين وحده فحص مكتوب شاصي والثانيه مافي شي
النصيحة لاخواني
لا تثق باي معرض او اي ورقه فحص اذا مش انت فاحص الموتر وماخذ منه ورقه مختومه من محل الفحص ولا ترا بعد ماينفع الندم والقانون لايحمي الطيبين

[style]

السلام عليكم ورحمة الله وبركاتة

اخواني الاعضاء ووالمطلعين حبيت انبهكم عن بعض معارض السيارات ومحالات فحص السيارات مهم كان ذو سمعه والله على مااقوله شهيد
اليوم حبيت اخذ سيارة من اكبر المعارض حجم وسمعه واحتمال يتحول الى وكالة سيارات من كبرحجمه اتصلت عليه جوال قال احنا معرض س قلت له انتم عارضين vxr2017 موقع س وفي برنامج س قال اي قلت ابي الموتر اليوم وفلوسي كاش قال انا الحين مشغول والساعه 5 وعدنا في فريق بن محمود وترا انا فاحص السيارة في المركز الفلاني وهذا المحل من من اقدم المراكز للفحص اذا ماكان الاول او الثاني في شارع سلوى وراح ارسل لك الفحص على الواتساب وفعلا ارسله والسيارة مافيها شي نهائي جاني شك وفعلا رحت هناك فريق بن محمود وشفت السيارة في مكان تقول استور سيارات قال هذي كلها للمعرض الفلاني المهم شفت السارة بنفسي وطلبت منه افحص بطريقتي رفض قال خساره عليك قلت انا بدفع ماعندي مشكله رفض انه يروح قال انا مشغول برسال معاك اخوي قلت اوكي بعد الحاح قلت خلني اجرب خبرتي وطلع الموتر مدعوم وفيه شاصي قلت يمكن انا غلطان خذت رقم السيارة واتصلت بواحد من الربع في المرور اسال قال هذي السياره كانت مشطوبه جايها حادث قوي وبالخطا وهو يروني اوراق الفحص الي عنده بتلفون ويطلع عنده ورقتين وحده فحص مكتوب شاصي والثانيه مافي شي
النصيحة لاخواني
لا تثق باي معرض او اي ورقه فحص اذا مش انت فاحص الموتر وماخذ منه ورقه مختومه من محل الفحص ولا ترا بعد ماينفع الندم والقانون لايحمي الطيبين
الله بعدك عنها،،الناس صارت ماعندها ذمه،،يعتقد انها شطاره إذا باع البضاعة وهي فيها عيب وغير صالحه للاستعمال،،ناس صارت ورق
ياخوي حط اسم المعرض واسم مكان الفحص خل يتأدبون والكل يعرف

[معماري قطري]

وين حماية المستهلك عنهم هذا يعتبر في دول ثانية جريمة وتلاعب وعقابها كبير ورادع لكن الظاهر هذا السوق استوى مرتع للغش والكذب

[السكين]

التلاعب وصل للوكلاء فما بالك بالمعارض والشريطية .. الحمد لله ، الله أبعدك عنها لأنها شر لك .. حتى لو كنت دافع رسوم فحص 300 ريال فحص أهون من إنك تتورط فيها .. أحسنت التصرف .. لأن تجار السيارات أغلبهم بلا ذمة ولا ضمير والحلفان عندهم بشربة ماي ..إسأل مجرّب.

ولو تحط الإسم للعبرة .. تسوي خير في الجميع ..

[Rider]

اخوي انا عشت تجربة مع المعارض شهر ونص وشفت التلاعب بكل شي بعيني مافيا غير السيارات المعروضه في بعض المواقع بمسمى شخصي واخر شي يطلع راعي معرض بس عارفين سمعت المعارض قاموا يتخفون تحت مسمى شخصي ونقول البعض علشان مانعمم

[khaldoon]

في معرض و وكيل بنفس الوقت سعر سياراته الأصفار مثل سعر الوكاله

اخوي يا ريت لو تحط اسم المعرض لتكتمل الاستفادة من الموضوع

[أم هشام]

الله بعدك عنها،،الناس صارت ماعندها ذمه،،يعتقد انها شطاره إذا باع البضاعة وهي فيها عيب وغير صالحه للاستعمال،،ناس صارت ورق
ياخوي حط اسم المعرض واسم مكان الفحص خل يتأدبون والكل يعرف

اشكي عليهم لحماية المستهلك

[اللوز]

محد يشتري سمك في بحر
اذا اي سيارة من برع الوكالة أفحص وريح بالك
الا اذا بالميكرفون في شارع 10 فبدون فحص

[الغالي!]

https://www.qatarliving.com/vehicles/4x4suv/toyota-land-cruiser-gxr-2017oyota-land-cruiser-gxr-هذا رابط السياره نفسها 2017/44970457

[ابو عبدالله.]

الغش موجود ابد الدهر لكن المطلوب هو الوعي للمستهلك و الرقابه من الجهات المختصه

ما اذكر اني شريت من معرض الا شاحنه من 9 سنين و بغرض اعاده البيع بس

اغلب المواتر يا وكاله او من مواقع اجتماعيه تعرض سيارات شخصيه

الغشاش او المتصيد يعتمد على جهل الزبون فقط

بموتر او بضاعه او خدمه او حتى عقد سلفه من بنك و يحط بنود العقد بخط صغير لن يقرأه الزبون او عقد فضفاض بحكم انه تعامل مع زبائن و عرف كيف يحمي نفسه قانونيا و بصيغ تحفظ حقه و تقلل التزامه بالعقد قدر الامكان

كثير هي الامور المخفيه علينا. مثل ضمان المصنع محد يعرف ايش يغطي او الفتره الممنوحه او شروط ابطال الضمان

عقود السلف و ضرر تأجيل قسط من السلفه او اعاده جدوله

عقود تأجير سياره من وكاله و اعادتها بعد سنتين او دفع قيمتها كامله شروط الاعاده ممكن تكون صعبه جدا لكن عند التأجير شرح الشروط غير واضح او يضع العميل على نار ساخنه. عدد كيلومترات معينه سنويا او عدم حدوث خدش

عموما هناك قانون يحمي و في حاله شراء موتر مع ورقه فحص سليمه و تظهر عيوب يمكن مقاضاه البائع بها مع الاحتفاظ بورقه الفحص كدليل قبل شراء السياره مخفي بها وجود عيب بالشاصي

لو كنا مثقفين بالقانون كان انحلت مشاكل كثيره قبل ما تصير لنا

سندات اثبات او شهود او حدود المسأوليه لكل طرف بالاتفاق

[تاجر كشخة]

مممم ذكرتوني بفحص فني مشهور مسمينه على اسم دولة غربية المهم ناداني واحد من جنسية عربية ودخلني معاه المكتب وقالي اذا تبي فحص كمبيوتر مثل الوكالة ادفع الفين وشوي المهم ما مشت علي الحيله وطلع فحصهم خرطي شوف عيني

[khaldoon]

الملاحظة رقم 24

لما تروح تشتري سيارة و يقولك في المعرض او صاحب السياره هذا فحص حديث من كم يوم او يبين من الفحص للسياره انها مشيت بضعة كيلومترات فقط بعد الفحص و تشوف ما فيها ضربة بالشاصي او حوادث او أي شي لازم تكون منتبه ايش هي الفحوص اللي انعملت على السياره علشان تظهر النتيجه...كل شي بحسابه.... قيمة الفحص الشامل غير عن قيمة فحص الشاصي فقط او الماكينة فقط او الدهان فقط

يعني انا لما ابيع سيارتي و ابي اغش المشتري لو اروح أقول لمحل الفحص سوي فحص للسيارة بس لا تسوي فحص للدهان و الشاصي فما راح يكتبلي انها فيها حوادث و مدهونه ولا ماكله شاصي و بس اجي ابيع السياره راح أقول للمشتري شوف هالفحص مثل ما انت شايف ما فيها لا مشكله بالشاصي ولا حوادث كبيره!!!


صحيح في مطراش ينكتب حادث بليغ و الا حادث غير بليغ.....صديقي عمل حادث بسيارته و كلفه 42000 ريال قطري لان الغلط عليه و راحت مقدمة السيارة و سجل الحادث غير بليغ.... يعني ممكن ينقال وقت البيع خدوش و لتصليحها سجلت حادث بناء على قوانين المرور بس هي مب حادث!!!!
من غشنا فليس منا

--------

[sara jsm]

للحين استغرب من اللي ياكلون ويأكلون عيالهم مال حرام ..
الرسول صلى الله عليه وسلم قال ( من غشنا فليس منا ) ماخذينه من الابتدائي ..
بس بعض المسلمين مش مدركين خطورة اللي يسونه ..
ممكن تبيع شخص سيارة خربانه وبسبتك يسوي حادث ويموت وهذي جريمة اخرى في الدنيا والاخرة ..
لاحول ولاقوة الا بالله .. الله يثبتنا بس

[نفسي عزيزه]

امييين

[بوخالد911]

معظمهم حرامية ونصابين
هدفهم الفلوس ولا شي غيره

والحين للأسف من تروح المعارض بسلوى
تشوف المصريين لابسين ثياب !!!

يعني أكملت السالفة !!!!!!!!!!!!!!!!!!!

[sara jsm]

تشوف المصريين لابسين ثياب !!!
!!

يمكن صج جطري واخد بالك :funny:

[جرس الإغلاق]

اخوي انا عشت تجربة مع المعارض شهر ونص وشفت التلاعب بكل شي بعيني مافيا غير السيارات المعروضه في بعض المواقع بمسمى شخصي واخر شي يطلع راعي معرض بس عارفين سمعت المعارض قاموا يتخفون تحت مسمى شخصي ونقول البعض علشان مانعمم


فعلا مرت علي نفس القصه

شفت جمس 2019 للبيع شخصي مش معرض

دقيت عليه رد علي واحد واخد بال حضرتك يقول الجمس لي و ابي اغير اخذ موتر ثاني وماكان حافظ المواصفات اساسا

المهم حتى الكذبه ماقدر يضبطها

[سالم الزهران]

شريت جهاز ، طلعت علبته مب مقفلة تقفيلة مصنع
تواصلت مع البايع طنشني
عقب ثمان ساعات بلغت شكاوى المستهلك
عقب ساعتين تواصل معي البايع قال لي عطني رقم حسابك ونرد لك فلوسك واعتبر الجهاز هدية؟؟
قلت له لا برد الجهاز بس ورد لي فلوسي.
قال وده الفرع القريب منك .(تمام)
اتصل علي عقبه حماية المستهلك
قال لي انحلت المشكلة .. قلت نعم !
قال لي اسمح لي اقفل الطلب و عطني الكود اللي بيوصلك مسج.
عطيته الكود و تقييم زين لأني مب متعود من حماية المستهلك مثل هالإنجاز.
علاقة هالموقف بالموضوع... أن البايع جحدني؟ ما عاد حول لي فلوس وانا ما رديت الجهاز لأن الفرع رفض يستلمه!

(طبعاً عند حماية المستهلك : انحلت المشكلة من فلان ضد شركة فلان بالرقم والتاريخ و عطيتهم فايف ستارز بعد)!

ونا مش حسيبه .. بحول الله