كأس العالم للأندية !

[Rider]

استضافة قطر كأس العالم للأندية لكن لي ملاحظات ترى هم كم نادي لكن شفنا الويل فالشوارع لي قرب الملاعب من اغلق قبل المباريات بأكثر من اربع ساعات سؤالي ليش تعطلون خلق الله وتحولونهم الى شوارع ثانيه وتسون زحمه علشان كوره عيل بكره في كأس العالم للمنتخبات وش بتسون فينا مايصير نرضي هالاجانب على حساب الموطن والمقيم لي مالهم فالكوره
اما الامر الثاني استغرب من لي اشوفهم من الجهمور وخاصه العرب والخليجيين لي متعلق في نادي اجانبي شوي بيموت علشانه ويركض وراى لاعب اجنبي علشان يصور معاه ويوقف في البرد او المطر علشان بس يشوف للاعبين في الباص قلنا كوره لكن مش جنون يامسلمين لو حد يسالكم عن اسم حد من الاصحابه او التابعين
او الرسل ماعرفته لكن مهتم بتفاصيل حياة لاعب اجنبي طالعوا يمينكم وشمالكم وشوفوا اخوانكم في كل مكان يقتلون وانت تلهث وراى كوره
ارد وقول هي رياضة لكن بعقل مش جنون

[R 7 A L]

سمعت والعهد على الراوي
فترة كأس العالم اغلب الشوارع الي حول الملاعب الثمانية
الوسيل
وخليفة
وبوعبود
والوكرة
والبيت الخور
الريان
والثمامة
راح تغلق الشوارع وقت المباريات اغلاق كلي



يوم الخميس وقفت سيارتي عند فيلاجيو قلت بروح على المترو لكتارا منها اجربه ومنها اتمشى
المهم نزلت تحت لبوبات الدخول ولا العالم أمم محشر كلهم عند التذاكر واغلبهم 90% جماهير لنادري فيلامنغو مع هذاك اليوم مافية مباريات
ف لازم من الحين الواحد يرتب نفسه وقت بطولة كأس العالم

[شموخ دائم]

,

,


مرحبا


شكرا على الموضوع


اخوي الكريم

اليوم ما نقدر نعيش بعيد عن العالم ونحتاج نعرف انفسنا للعالم اجمع
وخير طريقه واسرعها هي ( الرياضه ) وخاصه الرياضه العالميه

يتابعها السياسي والاقتصادي والانسان البسيط


لما ( فرض علينا الحصار )

احتجنا نقول للعالم عن قضيتنا وعن الظلم الي وقع علينا ورجال قطر السياسيين والاقتصاديين والرياضيين
استخدمنا علاقاتنا الي بنيناها في السنوات السابقه من خلال تنظيم كاس العالم كان لنا أصدقاء بكل مكان وفي ( اهم الأماكن ) السياسيه

احتجنا الدول الي كنا ( نتبرع لها )
كان كثير من الناس يقول لا تتبرعون للخارج

احتجنا الدول الي سوينا فيها ( استثمارات ) مصانع مشتركه وفنادق
كان كثير من الناس يقول لا تستثمرون في الخارج


لما طلبوا من العالم يقاطعك ما لقوا احد يسمع كلامهم لان انت وصلت لتلك الدول قبلهم
بالتبرعات والاستثمار والرياضه كان لك وجود وأصدقاء قبلهم ولك روابط قويه بنيتها بسياسه المصالح
ووقفوا معاك وما احد قاطعك


لان عدوك أيضا له أصدقاء وله مصالح ويحاول يعوق تقدمك ويحاربك في الساحات الدوليه
إعلاميا وسياسيا ورياضيا

من هنا ( نحتاج العالم ) يفهم وضعنا ويفهم ان احنا ناس ( مسالمين ) وليس إرهابيين
الإرهابي ما يبني ملاعب وينظم مسابقات ويبني بنيه تحتيه ويهتم في التعليم
لازم يشوفون وضعنا عن قرب وليس من خلال ( مقالات جرايد ومجلات )
النهضه هذي تحتاج الناس تشوفها بعيونها

السلبيات

زحمه

واغلاقات شوارع

وضجه مشجعين

وزوار من كل دول العالم

ونتعلم من هذي الأمور كيف ( نخفف منها ) في كاس العالم ان شاء الله

الإيجابيات كثيره

بنيه تحتيه وسمعه عالميه وشوارع عالميه

ومرافق متطوره

راح تبقى لنا والى الأجيال القادمه ان شاء الله

الي كان مخطط له يستوي في 20 سنه صار الان في 5 سنوات

ما نقدر ( ننقلق على انفسنا ونقول ما نبي بطولات وما نبي مسابقات وما نبي شي

هذي دعوه الى ان نكون ( لاشي ) وهذا قمه السلبيه

في هذا العالم لازم تقول انا موجود


لازم تفرض نفسك على العالم في

السياسه

والاقتصاد

والرياضه


اما تكون قوي ومعروف ولك علاقاتك

او ياكلونك

:)


كل ريال دفعناها عادت علينا في هذي الازمه والفضل لله وللجهود الي بذلت

بكل شي تحتاج لك

( أساس ) توقف عليه


أتمنى النظره تكون أوسع واشمل من كونها بطوله او مناسبه رياضيه
انت تبني لك ( أصدقاء ) وشركاء


........

بالنسبه لهوس الرياضه ومحبي الرياضيين

فكل انسان ( مهووس بشي ما )

واحد عنده هوايه وحب ( طير ) او مقناص
وواحد عنده هوس وهوايه لسياره معينه
وواحد عنده هوس الموضه وهوس السفر
وهوس الرحلات والعزب

كلها هوايات لكن الانسان ما يشوف نفسه يشوف غيره

:)



,

,

[مرتبش]

الاخ شموخ دائم ..تعقيب جميل ورائع

[معماري قطري]

صادق يا اخوي شموخ

الرياضة بناء وعمار وثقافة وأكيد توجد سلبيات لكن الايجابيات أكثر .. ليش القوم الظالمين حاولوا جاهدين ضرب المصداقية القطرية في الاستضافة وفي نيل تنظيم البطولة؟ السبب ليس البطولة السبب قطر وكيانها وحكومتها وشعبها وحقدهم الدفين

أمس نتابع المباراة في الميلس ونسمع أصوات التشجيع في الملعب .. كانت خلطة حلوة وعشنا أجواء حلوة

شكراً قطـــــــــــــــــــــــر وليموت الحاقد بحقده

[معماري قطري]

من يذكر استاد خليفة أول ما انبنى أظن سنة 1976

انا من أهل هذي المنطقة وكانت بر ما فيها بناء وكنا نطلع نمشي نصيد ضبان أيام الصيف ونروح الزروع اللي حولنا اللي جنب الحديقة نسميه زرع بو يد .. لأن فيه واحد يده مقطوعة وكان شري ما يخلينا ندخل .. بعد ما انبنى استاد خليفة واستوت الشوارع حوله بدت تتطور المنطقة وتزدهر

شكثر استمر هالاستثمار في ملعب كان في بر؟ ما يزيد عن 40 سنة وتطورت المنطقة بمنشأءات كثيرة حوله ومنازل راقية وكله خير لأهل قطر

ألحين اشوف الملاعب ومحيطها الحديث كلها بؤر استقطاب بصري ومراكز مدنية حديثة حولها العمران بأنواعه .. كما أنها فيها منشأءات خدمية

[Ahmed86]

ردك رائع اخوي شموخ

و لا ازيد عليك الا اني اقول ان الدول تتذابح عشان تستضيف مثل هالاحداث ،اغلاق الشوارع اربع ساعات حول البيت مب آخر الدنيا

[Dana’1]

استخدام الميترو يخفف من الضغط صحيح ما يغطي كل الوجهات غير إن بعض المشاوير تتطلب وجود السيارة .. لكن إذا عندك مجال تستخدم الريل ليش لا ؟!
باليوم الوطني اضطريت استخدم الريل عشان أروح للأهل،،
شفت الشوارع زحمه قلت للسايق يوصلني محطة العزيزية و منها لكتارا نقطة التغيير مشيرب و وصلت تقريبا بـ40 دقيقة تقريبا ممكن أكثر شوي وهذا بوقت الذروة و المحطة مزدحمة
ولو رحت مع السايق ساعة ونص أقل شئ ممكن توصل لثلاث ساعات أو حتى أكثر من الزحمة وإغلاق بعض الطرق.

هذه إجراءات وقتيه بفترة البطولة وبترجع الأمور لطبيعتها بعد ما تنتهي ... طبعا فيه أمور ممكن تاخذ وقت لين 2022 أهم شي بصراحه إن هذه التعديلات تتم على أكمل وجه وما نشوف أي مشاكل في حال تغير الأجواء مثل ما نشوف بموسم الأمطار
فالصبر زين وبإذن الله تتسهل.

[Rider]

احترام كل شخص علق على الموضوع وانا ليس ضد البطولات سؤ كاس العالم او غيره انا رسالتي حق المسؤولين عن التنظيم في مجال سؤ الرياضية او ادارة المرور الخويا انه كاس العالم للاندية كان فيها سلبيات يجب ان نتفادنا في كاس العالم من اغلق شوارع او زحمه وتخفيفها قدر الامكان

[Rider]

ردك رائع اخوي شموخ

و لا ازيد عليك الا اني اقول ان الدول تتذابح عشان تستضيف مثل هالاحداث ،اغلاق الشوارع اربع ساعات حول البيت مب آخر الدنيا

ياخوي الظاهر الملاعب بعيده عن بيتك ههههه صدقني بتعرف المعاناه اذا كان بيتك قريب من المناطق لي فيها الملاعب

[naklan]

كيف نفسك اخوي رايدر مع الوضع
اطلع قبل المباراة بساعتين او في نصها
او بعد نهايتها بساعة
وممكن تستخدم طرق بديلة اذا وجدت
البطولات العالمية هذي تجلب الخير للبلد والاقتصاد
وتشهر البلد ويعرفه من لأ يعرفه وعلينا واجب وطني
وقت الأحداث ما تدش الأماكن المزدحمة مساعدة
للمنظمين وكلها كم يوم وينتهي الموضوع
ويبقى للذكرى طول العمر
النايم رزقه نايم
بعد

[السكين]

هذي ضريبة التنظيم وكل دولة منظمة تمر بهالأمور وربما أكثر ، بس أشوف هالبطولات أشبه بالبروفة لكأس العالم سواءاً للمنظمين أو للجماهير أو لرواد الطرق وحتى للإعلام ..

بس هذا لا يمنع من إنه نعرض السلبيات لتفاديها في الحدث الأكبر القادم ، لأن الخطأ وارد .

كل التوفيق لدولة قطر التي أثبتت بهذه البطولة أنها على أعلى قدر من المسئولية وأبكت دولاً بعينها :app:

[Rider]

ممكن ياخوان فعلا كلامكم صح لاني اول مره اشوف هالشي مب متعود

[bohilal191]

خلال فترة كأس العالم مافي مدارس وقالها وزير التعليم،،والله يديم علينا