مشكله في الديمر والليتات

[Meshaal7]

السلام عليكم ورحمه الله وبركاته

ياجماعه الخير انا سويت ملحق في بيت الوالد وركبت ليتات سبوت لايت وديمر للتحكم بالاضاءه بس طلعت لي مشكله في الاماكن الي فيها الديمر الليتات ترمش كل 3 دقايق لاقل من ثانيه وترجع طبيعي

فمادري المشكله كبيره ولا بسيطه

ياليت الخبراء في الكهرب يفيدوني

[معماري قطري]

يمكن مركب ال اي دي على ديمر عادي وما ينفع .. مر على محل يبيع ليتات بس شوف حد فاهم وفهمه المشكلة وخذ عينة معاك خل كهربي يفكها ويفك الديمر .. ولو كهربي فاهم بيحل لك المشكلة .. تقدر تغير الليتات لنوع قابل لتخفيض الاضاءة Dimmalbe وفيه منهم ال اي دي وغيرهم ويمكن ضروري تغير الديمر لنوع مناسب

[Meshaal7]

اخوي معماري قطر الليتات اليد ديمابل الي تقدر تتحكم بمستوى الاضاءه جربت اكثر من نوع اخر شي صفيت على الي انا مركبهم بس مادري هل له خص بقوه الاحمال الكهربائيه يعني المشكله الليتات ترمش اقل من ثانيه وترجع طبيعي

[معماري قطري]

اخوي معماري قطر الليتات اليد ديمابل الي تقدر تتحكم بمستوى الاضاءه جربت اكثر من نوع اخر شي صفيت على الي انا مركبهم بس مادري هل له خص بقوه الاحمال الكهربائيه يعني المشكله الليتات ترمش اقل من ثانيه وترجع طبيعي

أكيد المشكلة في الديمر شوف واحد متناسب مع كمية واط الليتات كمجموع ولو استمرت المشكلة معناها الخلل في اللمبات حتى لو مكتوب عليهم ديمبل ممكن فيهم خلل

[sara jsm]

وعليكم السلام

انا مش خبيرة في هالسوالف ..
لكن يوم بغيت اركب حق بيتي ليتات ال اي دي قالي الكهربائي مايتركب عليهم الديمر ..
الديمر يبي له الليتات العاديه اللي الحين ماعادت موجودة نفس قبل ..
وكنت مركبه وجربت وكذا ليت ينفجر مرة وحدة بدون سبب ..

:

ان شاءالله العضو عزيز يشوف الموضوع هو مهندس كهرباء واكيد بيفيدك ..

[Azizuk]

اليت الديمر يجي من المصنع مخصص يكون ديمر

انا اتوقع المشكلة من توصيل خط الكهرباء وسماكة السلك ولها حسبة كم سبوت لايت وحجم قوة الايت حتى لو ان ال اي دي مايصلح تشبك كل اليتات في سكت واحد لانه طبيعي راح يرومش اليت

جرب ركب ليت عادي على سويش ديمر يقعد اليت يرومش تقول فلاش لان تيار الكهرباء متذبذب مهب ثابت

كل سويش ديمر له قوى ومعيار كم يستحمل من احمال وحجم وسماكة الاسلاك

ونوع المبة له دور اذا لمبة صينيه ومهب من شركة معروفة راح يشتغل اول الامر فترة وبعد فترة يحتر المحول داخل المبة

كل لمبة ديمر يجي داخلها محول صغير واذا مافي تهوية والسقف حار يخترب المحول الداخلي فيها


هذي لمبة من شركة اورسوم واختبار بسيط والفرق بين المبة اللي تجي صناعة المانية وديمبر وراح تلاحظ فرق في عدسة الضوء والاختلاف اللي مابينها وبين المبة العاديه من نفس الشركة والمحول الداخلي اللي فيها

https://c.top4top.io/p_1576pmw5w3.png (https://top4top.io/)

هذا الاختبار البسيط راح تلاحظ المبة العادية ترومش على على سويش ديمر لان تيار الكهرباء متذبذب ومش موافق مع المبة لان مافيها محول يضبط لك قوى التيار الكهربائي

https://l.top4top.io/m_1576jlfjx0.mov

https://a.top4top.io/p_1576tvlc71.png (https://top4top.io/)

لاحظ في الصورة اللي تحت فرق العدسة بين المبة العادية والمبة ديمر

https://b.top4top.io/p_15761whu32.png (https://top4top.io/)


الحين اختبار المبة ديمر

https://h.top4top.io/p_15761l8im7.png (https://top4top.io/)

https://i.top4top.io/m_15766utra8.mov

لو تلاحظ في الصورة اللي تحت لمبة الديمر داخلها محول صغير هذا المحول اذا حتر وسقف الغرفة حاره بين الجبس والسقف تقعد المبة ترومش لان تيار الكهرباء اللي داخلها متذبذب

https://d.top4top.io/p_15763wher4.png (https://top4top.io/)

https://f.top4top.io/p_1576yadou5.png (https://top4top.io/)

وعندك في هالصورة اختلاف عدسة المبة بين العادية والمبة ديمر

https://g.top4top.io/p_1576b02lg6.png (https://top4top.io/)

وهذي المبة عادية بس الون اصفر نفس لمبة الديمبر وراح تلاحظ اختلاف في نصاع وقوة انعكاس العدسة

https://d.top4top.io/p_15760uhc50.png (https://top4top.io/)

https://e.top4top.io/p_1576grqs81.png (https://top4top.io/)

لاحظ فرق العدسة تحت

https://f.top4top.io/p_15761t52h2.png (https://top4top.io/)


في نوع لمبات سبوت تجي تصنيعها غير المبة تجي بزعانف تبريد من الخلف كانها رديتيتر

طبعا جودتها افضل وسعرها اغلى بواجد من لمبة الاسبوت العادية

في لمبات بتروح سعرها بين 300 دولار من شركة ايركو الى 100 دولار من شركات اخرى بس يقولون ضمان انها تشتغل بين 5 سنوات بدون مشاكل

انا شفت لمبات صناعة يصنية درجة اولى سعرها تقريبا 150 للمبة في محل بطريق سلوى جنب الشعلة وبضاعته ممتازة وحلوه

وأن شاءالله احد الأعضاء يعطينا ويفيدنا اكثر

[معماري قطري]

ما قصرت يا بو سعود

اوسرام الصناعة الألمانية من وين احصلها؟

[sara jsm]

ما قصرت يا بو سعود

اوسرام الصناعة الألمانية من وين احصلها؟


محل الشمائل في قريه بروة

[Azizuk]

ما قصرت يا بو سعود

اوسرام الصناعة الألمانية من وين احصلها؟


الله يسلمك وكيل الاوسرام هو الجيدة وله موزعين من ضمنهم محل الشمائل مثل ماذكرت اختنا سارة ومحل تورست جنب الشعلة في قرية بروة هذول اقوى موزعين حق الاوسرام وفي كذا محل بس اذا محتاج كميات تحصلهم عند الشمائل او تورست

وتقدر تاخذ من الوكيل دايركت الجيدة طلع وكيل كذا ماركة بس حاسب من الموظفين اللي هناك في الوكاله تحصله مايبي يبيعك بيقول لك روح للموزعين يحاول يلف ويدور مثل ماسوى معاي يوم رحت لهم حسيت ان يبيني اروح حق محل تورست واتصل عليه وقال لي روح له بيسنعك احنا مب متوفر حاليا

بعدين اخذت جميع احتياجاتي من الشمائل

محلات العامر اللي بطريق سلوى عنده سبوتات ليتات حلوه وسعرها مناسب مقارنه مع الاوروبي ايركو

اوسرام او فيليبس تقدر تطلب طلبيه لمبة عدد ساعات اطول عمر وزاية اكبر توصل لين زاوية 60 درجة

لان اللي في السوق كله زاوية 36 درجة ودرجة الون 2700 كلفين

حتى قوة الشمعة تقدر تطلبها اقوى

اوسرام ماعنده الا درجتين من الالوان 2700 الاصفر مايل للبرتقالي شوي و 6500 الاف الابيض الناصع

اما شركة فيليبس متوفر عندهم كذا درجة من اصغر درجة الى اقوى درجة بالطلب

وكيل فيليبس تكنوكيو وعندهم مكتب فوق تدخل لهم عن طريق الباب الخلفي

عندك بعد ماركة سيلفينيا موجودة عند دوحة الانوار جنب التيسير بطريق سلوى او محلهم اللي في قرية بروة

[معماري قطري]

مشكورين ما قصرتوا اخوي عبدالعزيز واختي سارة

ركبت بانلات 60 في 60 للمطبخ ولدورة المياه الرئيسية .. الواحد ب 80 بس وايد قوية انارتهم ولو احترقوا تبدلهم بالكامل .. صناعة صينية تحت التجربة نشوف شلون يكونون