مقاول حجر

[koketa]

صار خلاف بيني وبين مقاول اللي ركب الحجر على البيت
وفقدت الثقة فيه لانه يكذب وايد

الحين انا خايفه من الحجر اللي ركبه يطيح علينا ولا على العمال وتصير مشكلة

شلون اقدر أتأكد من سلامة التركيب وهل في شركات ممكن تسوي تشيك على الحجر ؟

[سعود.]

كيف كانت طريقة التركيب !!!

اسمنت ولا براغبي !!!

وهل تم رش الطابوق الخارجي رش اسود !!!

[داااايم السيف]

ضروري يكون بينكم عقد ضمان لعدة سنوات وغالبا يعطون مده لاتقل عن 20 سنه
والضمان يشمل عدم تغير اللون وعدم تسريب الرطوبه والمياه والغبار وحتى السقوط الناتج عن خلل في التركيب
العقد ضروري لان حال اللجوء للمحاكم وعدم وجود عقد يحفظ حقج راح تتضررين بدون شك
وبالتوفيق ان شاءالله

[وليف الشوق]

اولا روحي شوفي استشاري يطلع الاخطاء ويعطيك تقربر واذا شفتي اي شي سلبي في تركيب الحجر كلمي المقاول يعيد التركيب بالشكل الصحيح واذا مااقتنع روحي مركز الشرطه التابع لمنطقتك عشان يرفعون الموضوع للنيابه العامه ومن ثم المحكمه وغالباً المشكله والاتفاق والصلح راح ينحل في مركز الشرطه دون اللجوء للنيابه ولا تسكتين عن الموضوع لما له من اثار سلبيه مستقبلاً في حال عدم تركيب الحجر بالشكل الصحيح وبعد انقضاء مدة الضمان

[sara jsm]

اختي الخلافات تصير بس الموضوع مب شخصي ..
هاي شركة اكيد لها سمعتها وسجل تجاري ..
اقري العقد عدل وشوفي مدة الضمان تبتدي من بعد الانتهاء من التركيب ..
واذا الشركة عليها مشاكل شوفي استشاري او شركة تركيب ثانيه تعايين لج التركيب ..
بس مااتوقع ان الحجر يطيح هاي تعتبر جريمة وهو مب غبي ..
لاتحاتين ان شاءالله الامور طيبه ..

[معماري قطري]

أكثر شغل الحجر في قطر سرقات .. من خلال معرفتي بالكثيرين تورطوا مع مقاولين عرب لا ذمة ولا ضمير

العقد واضح وضوح الشمس بس عندنا قانون قضائي غريب .. إذا العقد يقول تركيب الحجر لكل الواجهات وقياس الواجهات مسؤولية المقاول وموقع عليه المقاول شينقص .. يقولون اللي يسمونهم خبراء قانونيين إن الكمية اللي سجلها المقاول استنفذت بالكامل ويحق له يطالب بزيادة جديدة وما يعتبر عقد جديد لإكمال الباقي .. زين العقد واضح .. هذا يسدون عيونهم وآذانهم عنه ويمكن يكون باقي الشغل 10% تطلع قيمتها الاضافية 30% زيادة .. المقاول يقول زادت الأسعار .. ويمكن يفرض نوعية حجر تختلف بس مقاربة .. حتى يطلع الرسم شيء والواقع شيء ثاني

دوم نصيحتي ابعدوا عن الحجر أفضل لكم

[معماري قطري]

التركيب حتى لو ميكانيكل تحصلون جزء عادي وتحصلون بعضه بمواد تعبانة وتصدي

وخلاص تعودوا عادي تخترب سمعته مع فلان ويتصيد لغيره ما فيه قانون يمنعه ولا موقع يراقب حسن وسوء الأداء وينشره للجميع يطلع عليه .. والمفروض يسوون جمعية مركبين الحجر يكون فيها مدققين ومراقبين للشغل والجودة وأكيد كل شيء بمقابل

[sara jsm]

اخوي بوعبدالله بتسوي جمعية شنو ولاشنو ..
هالمجال فيه ثغرات كثيرة وللاسف مالك رفيج فيه ..

اهم شي الواحد يتعامل مع الشركات المعروفه اللي لها شغل واضح في السوق

[البرونزي]

روح الاردن واشتر من المحاجر نفسها وجيب عمال
من الاردن زيارة واتفق معاهم على راتب وحدد الوقت
المناسب لانهاء البيت مثلا 4 او 5 شهور
التكلفة بتطلع لك اقل من نص السعر
عن تجربة ناس انا اتكلم

[معماري قطري]

اخوي بوعبدالله بتسوي جمعية شنو ولاشنو ..
هالمجال فيه ثغرات كثيرة وللاسف مالك رفيج فيه ..

اهم شي الواحد يتعامل مع الشركات المعروفه اللي لها شغل واضح في السوق

كلامي اختي عن الجمعيات ويمكن هي أقرب ترجمة ل Association اللي منتشرة في أمريكا ولا يحق لواحد يشتغل بدون ترخيصها .. مثلاً توجد جمعية الطرق وهذي تسوي دراسات وعقود ومواصفات يلتزم بها كل مقاول لكل حالة طريق .. مثلاً طريق بكود a والا غيره يعني لازم يلتزم بعرض محدد وسمك محدد ومواصفات كثيرة .. فيه جمعية أو نقابة البورتلاند سمنت .. وهو الاسمنت العادي .. إحنا للأسف في التقنين والمواصفات نمشي خطوة جدام ونرجع خطوتين وراء .. نسوي قوانين للبيع وليست للنشر وللثقافة العامة والالتزام بها

ببساطة للحين مواصفات البناء القطرية غير ملزمة ولا يعتد بها في المحاكم ويقولون العقد شريعة المتعاقدين والعقد كل قاضي وكل خبير هندسي يترجمه على كيفه

إختي الجمعيات الهندسية غير ويحق لها تحاسب وتبدي الرأي في قضية هندسية وقرارها ملزم .. محاكمنا جامعين مهندسين معطينهم درجة خبراء هندسيين كل مهندس له رأي يختلف 180 درجة عن الثاني بسبب كثرة الدجل والتأويلات والله يعلم ممكن المصالح .. وواحد مثلي يعرف إن الهندسة حسابات دقيقة ما تقبل التفاوت الكبير اللي نشوفه

لو طبقوها وطبقوها صح بتقل الحالات اللي فيها غش أو فشل وبتكون حقوق الجميع محفوظة

صحيح عندنا جمعية المهندسين القطرية بس ما لها أثر قوي في العمل الهندسي ومنتشر الشغل الهندسي الركيك

[معماري قطري]

روح الاردن واشتر من المحاجر نفسها وجيب عمال
من الاردن زيارة واتفق معاهم على راتب وحدد الوقت
المناسب لانهاء البيت مثلا 4 او 5 شهور
التكلفة بتطلع لك اقل من نص السعر
عن تجربة ناس انا اتكلم

عمال الأُردن تقريباً كلهم أما مصريين أو سوريين لكن في الغالب المسؤول والمتابع فورمان اردني .. المصريين هناك يعتبرون عمالة سائبة ويجون بأجر يومي أو شهري على حسب وسهل ينطرد الواحد وتحصل غيره