شركات التاثيث التركيه تقتحم المنافسه

[ابو عبدالله.]

السلام عليكم

البعض يبحث لتأثيث منزله او تجديده

وكلنا نعرف اسعار الاثاث و التصاميم الداخليه

التصاميم من 20 الف الى ما يتجاوز المئه الف بحسب المصمم ان كام معرفه ام لا

الأثاث يعتبر ميزانيه توازي نصف تكاليف البناء لبعض الفلل

مع اني سألت عن بعض تكاليف التأثيث مثل الخزائن و المطبخ الخارجي ستنلس ستيل و اطقم المجالس الخ

وجدت ان اسعارهم اكثر من مبالغ بها

ثلاث اطقم مصريه للمجلس تصل الى 72 الف بخلاف الستائر و طاوله التلفزيون الخ

خزائن الملابس بالمتر طبعا و توصل مئه الف لكل الغرف بحسب التفاصيل و الاكسسوارات

مطبخ ستيل بين 70 الى 90 الف بحسب المواصفات

ناهيكم عن باقي الامور من اثاث غرف و طاوله طعام لكذا شخص و اكسسواراتها

سافرت لتركيا قبل كورونا و زرت شركات اثاث في اسطنبول

اول شركتين ما عجبوني و اثاث فخم لكنه اوفر مثل ما يقولون لكن السعر مقبول نوعا ما

ثالث شركه حطولي واحد يتكلم انجليزي شافني ما اعرف ايش ابي بالضبط

اخذني للدور الثاني و شفت خليه نحل. مصممين و شاشه عرض و ملفات بالكمبيوتر لقطريين صمموا عنده

اول عرض لكم فيلا انصدمت قلت هذا يصمم بكم مليون انا ايش جابني عنده من روعه التصاميم والله

كل عينه اشوفها اقول لنفسي هذا غزر معاي وانا مش من هالفئه المليونيه

لين وصلنا لصور فيلا ب 13 غرفه نظام فندقي و ديكورات على الحائط و الاسقف مع الاثاث بتصميم شامل

قلت له وقف انت تعرض وانا اتخوف من الاسعار اكثر. هذه الفيلا بكم تصميمها و أثاثها

قال لي 75 الف دولار واذا تبي تركيب برسل معاك كم عامل لين الدوحه بس ادفع تذاكرهم و سكنهم

شيء خرافي كتصاميم و اسعار فقلت لنفسي وين اسعارنا و وين اسعارهم

نظام فندقي وهذا سعره ؟؟؟؟

لما رجعت سألت بعض الاصدقاء و واحد منهم كان له قريب بسفارتنا بتركيا و قال قريبي مأثث فيلته من هناك و اسعار افضل بعد

حتى موضوع التخوف من اي مشكله طمني ان ممكن السفاره توثق عقدك و حقك و تساعد المواطنين اذا احتاجوا شي

ايش رايكم

هل تسوى

هل جربتوا التأثيث من تركيا

هل توجد مشاكل من اي نوع

هل تعرفون شركات بتركيا ممكن نستفيد منها كأعضاء و نتعامل معاها

آرائكم ستثري الموضوع

[hasss1969]

السلام عليكم

البعض يبحث لتأثيث منزله او تجديده

وكلنا نعرف اسعار الاثاث و التصاميم الداخليه

التصاميم من 20 الف الى ما يتجاوز المئه الف بحسب المصمم ان كام معرفه ام لا

الأثاث يعتبر ميزانيه توازي نصف تكاليف البناء لبعض الفلل

مع اني سألت عن بعض تكاليف التأثيث مثل الخزائن و المطبخ الخارجي ستنلس ستيل و اطقم المجالس الخ

وجدت ان اسعارهم اكثر من مبالغ بها

ثلاث اطقم مصريه للمجلس تصل الى 72 الف بخلاف الستائر و طاوله التلفزيون الخ

خزائن الملابس بالمتر طبعا و توصل مئه الف لكل الغرف بحسب التفاصيل و الاكسسوارات

مطبخ ستيل بين 70 الى 90 الف بحسب المواصفات

ناهيكم عن باقي الامور من اثاث غرف و طاوله طعام لكذا شخص و اكسسواراتها

سافرت لتركيا قبل كورونا و زرت شركات اثاث في اسطنبول

اول شركتين ما عجبوني و اثاث فخم لكنه اوفر مثل ما يقولون لكن السعر مقبول نوعا ما

ثالث شركه حطولي واحد يتكلم انجليزي شافني ما اعرف ايش ابي بالضبط

اخذني للدور الثاني و شفت خليه نحل. مصممين و شاشه عرض و ملفات بالكمبيوتر لقطريين صمموا عنده

اول عرض لكم فيلا انصدمت قلت هذا يصمم بكم مليون انا ايش جابني عنده من روعه التصاميم والله

كل عينه اشوفها اقول لنفسي هذا غزر معاي وانا مش من هالفئه المليونيه

لين وصلنا لصور فيلا ب 13 غرفه نظام فندقي و ديكورات على الحائط و الاسقف مع الاثاث بتصميم شامل

قلت له وقف انت تعرض وانا اتخوف من الاسعار اكثر. هذه الفيلا بكم تصميمها و أثاثها

قال لي 75 الف دولار واذا تبي تركيب برسل معاك كم عامل لين الدوحه بس ادفع تذاكرهم و سكنهم

شيء خرافي كتصاميم و اسعار فقلت لنفسي وين اسعارنا و وين اسعارهم

نظام فندقي وهذا سعره ؟؟؟؟

لما رجعت سألت بعض الاصدقاء و واحد منهم كان له قريب بسفارتنا بتركيا و قال قريبي مأثث فيلته من هناك و اسعار افضل بعد

حتى موضوع التخوف من اي مشكله طمني ان ممكن السفاره توثق عقدك و حقك و تساعد المواطنين اذا احتاجوا شي

ايش رايكم

هل تسوى

هل جربتوا التأثيث من تركيا

هل توجد مشاكل من اي نوع

هل تعرفون شركات بتركيا ممكن نستفيد منها كأعضاء و نتعامل معاها

آرائكم ستثري الموضوع
هلا اخوي بن عبدالله..يوجد منطقة خاصة في اسطنبول فيها محلات ومصانع اثاث أشكال وألوان..
لك لك خاطر بدلك على شخص ثقة باذن الله تواصل معاه ويجيب لك أفضل أسعار وأجود أثاث. .

[شموخ دائم]

,

,


مرحبا


شكرا على الموضوع


ما شاء الله عليك جمعت معلومات طيبه

الي اقدر افيدك فيه لي صديق راح منطقه ( مودوكو ) مصانع الأثاث
تعرف هذي منطقه عباره عن مجمع للمصانع

وليس المحلات الي تبيع الأثاث

اخذ معاه خريطه البيت وفيها المقاسات على فلاش
وكل مصنع ينزل الخريطه ويعطيه ( عارضين نماذج من شغلهم ) في صاله بالمصنع

كل مصنع بيعطيك ( كوتيشن ) مفصل بالسعر وعدد القطع

تعامل مع 3 شركات هناك وشحن الأثاث الى الدوحه ومافي أي مشاكل
طاف على هذا الموضوع الان سنه

وحده من الشركات اثاثها افضل ( كواتي )
واعجبته شركه هذي

والشركه الأخرى ( الصبغ ) تاثر على الطاولات

يقول ان بعض المصانع ( كوالتي عالي ) تحت المواصفات الاوربيه
وبعض المصانع شعبيه اكثر والكوالتي متوسط

فالاختيار عليك لازم تروح لمصنع معروف بمواصفاته

المشكله ( يمكن يعجبك الاطقم ) بمصنع
ويعجبك ( السراير ) في مصنع اخر
وممكن تعجبك ( طاوله طعام وكراسيها ) في مصنع ثالث


ما راح تلاقي كل احتياجاتك وعلى ذوقك في مصنع واحد
الا اذا تنازلت عن بعض الأمور

الأسعار طبعا افضل


السلبيات

الوسطاء الي في الدوحه كل واحد يتعامل مع جهه ويجبرك عليها
السايق ممكن ياخذك لمصنع معين ويمدوحه لك عشان له عموله عندهم وما يدلك على الافضل
التكاسي نفس الشي يتعاملون مع مصنع معين ويبونك تشتري منه ويمدحونه ويذمون المصانع الأخرى
المترجم نفس الشي


,

,

[ابو عبدالله.]

مساكم بالخير

ما شاء الله طلعت الخبره

تسلمون على المعلومات

انا زرت هالمنطقه الي تقولون عنها و فعلا شيء طيب

خلال ساعه و ثلاث محلات او شركات تعتبر و طلعت ما لفيت اكثر لاني فهمت السالفه

مثل ما قلتوا جيب مخططك و بنسوي لك كل شي بالملي

و اشكركم على عرض المساعده بأشخاص ثقه للتعامل هناك

عندي عقده يا جماعه

ما اقدر امشي ورى واحد يدلني لان كل واحد له مصلحه معينه. يا نسبه يا مثل ما قلتوا يدلك على ربعه عشان ياخذ عمولته او يفهمك ان هذا احسن بس عشان انه يعرفهم

بخلي عرضكم لاشخاص ثقه محل اعتبار لاحقا لما اروح

لكن الي ببالي ان استفيد من خبره السفاره في التعامل بالعقد و الضمانات

و عن الشركات صديقي بيوصلني لقريبه الي اشترى من كم شركه و مستواها جيد جدا هذا الي افكر فيه حاليا والله اعلم اذا بغير الفكره لاحقا

السالفه الي مش داخله ببالي. ليش اسعارنا اغلى بكثير مع انها محلات عاديه عندنا مش مصانع و كوالتي

و الي يستوردونه مش بالجوده الي بتركيا لكن اغلى. يعني جايبين كوالتي ارخص و يبيعون بسعر اغلى من الجيد بكثير

و طبعا عندنا يشرحون لك ان البضاعه من ارقى المواصفات مع انها بالنسبه لي مااشوفها راقيه

الي تصميمها دفش و مليون لون و لمعه تقول صبغ صيني يكسر عينك مع الاضاءه. چيب يعني

ولد عمي ماخذ ثلاث اطقم مصريه للمجلس و خصم خاص طلع الواحد ب 24 الف. ولا تعلم احد بعد هههه

حسافه والله. الواحد وده يشتري بديرته و يخلي فلوسه لشركات بلاده لكن شركاتنا فيها مليون مستفيد غير المالك و تصير الاسعار مبالغ فيها

[ابو عبدالله.]

تعرفون ايش معناها ان تأثيث فيلا فخمه جدا ما يكلف 75 الف دولار

هذه ثلث القيمه الي بدفعها لو بشتري بقطر كل اثاثي و مواصفات اعلى بعد

هذا غير تكلفه المصمم الي طالعين فيها هالفتره و كنت على شفى حفره ان اجيب واحد بس يصمم و قالوا لي ب 80 الف اعتقد هذا من سنه تقريبا

على حسبتي فرق السعر بالاثاث كافيه ان تسدد قيمه الحجر بالفيلا
لان الحجر كلف 480 الف تقريبا و شغل كوالتي و تصاميم واجهات فاجأني صاحب الحجر فيها
هذا شامل حجر الوارش. الفريم فوق البيت و البنت هاوس و حجر بممر الملحق الخارجي كامل 22 متر و تصاميم حائط البيت من الخارج

يعني البيت كله حجر ما يبين اي شيء ثاني

الاثاث لو ب 50 الف دولار باخذه من تركيا. كان بيكلفني 600 الف و اكثر بالدوحه

المطبخ و المجلس و الصالات و جلسه للمسبح و الستائر و اثاث الغرف بخزائنها و طاولات المطعمين بديكوراتهم و فوقها تكاليف المصمم ب 80 الف

تصدقون ان فرق السعر يوازي سعر شقه بتركيا هههه يعني اثث بيتك بالدوحه و خذ شقه مجانيه بتركيا بنفس اسعار الاثاث فقط بالدوحه

اشكركم على نقطه الحذر من الوسطاء و سلبياتها لانها فعلا تتعب و ما احب حد يسوقني سوق على هواه
افضل اتعامل دايركت و بشركات سبق التعامل معاها من اصدقاء و بعلم السفاره كضمان لانهاء التعامل بسلاسه

اتمنى معلومات اكثر و تعليقات عن اي نقطه غفلنا عنها و تثري الموضوع

[ابو عبدالله.]

اخوي شموخ دائم. نقطه ان يعجبني شي بشركه و شي ثاني بشركه ثانيه ما فكرت فيها لكن صحيح. مهمه جدا

يعني الي بيصمم. من البدايه اختار الاطقم الي ببالي من خياراتهم عشان ما اتفق و بعدها اشوف شي بمحل ثاني و اغير رايي

اذن نحط هالنقطه بالبال مع الحكومه الموقره هههه.

[sara jsm]

السنوات اللي راحت الاغلب كان يأثث من الصين ..
او من السعودية لان الذوق حلو والاسعار مع الشحن ارخص بواااااايد ..

المشكله عندنا هني اسعار مرتفعه والاثاث تقول ليالي الحلمية ..
الذوق تعبان حتى لو القطع كوالتي عالي .. بس الناس انفتحت وشافت اوروبا ..
والاغلب يبي ديكور بيته اجنبي او مودرن مب انتيكا نفس اللي في شارع سلوى ..
:
شكلي باخذ العناويين منكم لين وصلت لهالمرحلة .. :thumbup1:

[ابو عبدالله.]

ههههه ضحكتني سالفه ليالي الحلميه

بالضبط والله. اثاث اوفر و دفش. مال اول للحين يجيبونه

طاوله عند باب الصاله مذهبه يعني فخم و كراسي المجلس ماكله المجلس كله من حجمها ما يمشي خلاص

صديق من كم سنه شاري طقم فوق العشرين قطعه و يقول صيده ب 14 الف و ابوه و عمه شروا مثله مستانسين

لما راحوا مكه وهم راجعين بخط جده لقوا نفس الطقم باربع الاف و الالوان طب و تخير

فرق عندنا بالاسعار تخلي الواحد غصب يروح برع حتى مع الشحن و التعب تسوى الفرقيه

استفدت من تعليقاتهم والله

[ALJokar]

موضوع شيق ويهمني جدا المعلومات هذي هنا مثل ماتفضلت الشركات عندنا
لو بنتعذر لها بنقدر نقول اجار المحلات والمعارض والمخازن هنا غالية ممكن سبب.
لكن مايمنع الواحد يسافر ويجيب بضاعتة برى الكوالتي أفضل والاختيارات كثيرة وأرخص يمكن.

[ابو عبدالله.]

صباح الخير

لا والله انا مش مقتنع ان التكاليف ترفع الاسعار بهالشكل

ناس تقول لك طقم صيني درجه اولى. وش دراني اذا اولى ولا عاشره. شدعوه هو بنفسه حاط معايير للاولى ولا الثانيه

طقم بجده 4 الاف و عندنا ب 14 الف

غرفه خزائن 4x4
فوق 24 الف بحسب الاكسسوارات
عيل خزائن لسبع غرف بكم

الستائر بروحها سالفه
اول ما سكنت بيتي الحالي بغيت ستاير كشخه و رحت شارع دوار البنك العربي ايامها كان مولع
المتر بدون شغل ب 120 ريال حرير هندي
رحت محل هندي معروف و شريته ب 38 ريال للمتر مات راعي الستاير حتى الحبل لربط الستاره يبيعونه فوق العشرين رحت اخذته بست ريال من محل جنبه

ياخي خلني اثق فيك و اشتري لا تحط اضعاف السعر

اذكر المحل بتركيا لما سولفت معاه قال لي الشهر الماضي جوني 35 قطري يصممون عندي

ولو ما شفت نماذج تذبح من الفخامه و السعر الزين و ملفات بأسماء قطريين كان ما صدقت و قلت هذا يبي يصيدني

يا جماعه فيلا كبيره فخمه 13 غرفه و باقي البيت. كامل ب 75 الف دولار

والله ان لو اشتري لها اثاث نفسه ان تطوف 600 الف
القطع الي مع الاثاث و ملصقه بالجدران و الاسقف كديكور والله تطوف مئه الف عندنا لو بسويها بروحها

احنا مساكين يا ريال محلوبين حلاب

[ابو عبدالله.]

الاخ الي ارسل رساله

صندوقك مليان ياخوي و بحط تعليقي اهني :)

صباح الخير اخوي

يجزانا و يجزاك كل خير

هي منطقه وحده بأسطنبول و معروفه اسأل الفندق وين محلات الاثاث بيعلمونك وهي اكبر تجمع لشركات الاثاث

وايد محلات تصمم لك مش واحد او اثنين.
انا دخلت ثلاث محلات بس و عرفت السالفه ان الاغلبيه عندهم تصميم و اثاث كامل بعقد واحد

ذيك الفتره اخذت ارقام شركه وحده الي قلت عنها بالموضوع لكن يوم قال لي صديق في منهم وايد و يوم بتروح بعطيك كذا محل لان قريبه كان بالسفاره قبل و شرى اثاثه كامل منهم

للامانه نسيت وين حطيت ارقام الشركه الاولى لاني تطمنت ان في غيرهم وايد بس اذكر شكل المحل لو بروح عقب

كلهم لهم حسابات بانستغرام و صفحات بجوجل سهل تحصلهم

والله مضيع رقم المحل ولا كنت بعطيك معلوماته

لا تحاتي خذ اهلك و روح حتى لو ما عندك ارقام. بس اوصل المنطقه الي فيها المحلات و تمشى و بتخلص بساعه لو حبيت

اعطي مخططك لمحلين ثلاثه و شوف عروضهم و اختار
ترى كلش سهالات و يمكن اذا جلست كم يوم يخلصون التصميم بعد

لك مني ان تذكرت او لقيت عنوان المحل الاولي اطرشه لك ان شاء الله

ترى التصميم شامل قطع على الجدران و الاسقف تطابق الاثاث. لو تبي. مولعين ياخوك هههه

[شموخ دائم]

,

,


مرحبا


اخوي الكريم

بوعبدالله

بس حبيت أوضح لك نقطه مهمه بخصوص ( سفاره قطر ) بالخارج

لي علاقات طيبه مع اكثر من مكان في اوربا وفي شرق اسيا الله يعطيهم العافيه على جهودهم هناك

لو طلبت منهم ( اسم شركه ) في الأثاث مثلا او شركات جلب عماله

السفاره وموظفينها ( يتجنب ) الاحراج او يزكي لك شركه معينه بالاسم

لان ممكن تصير مشاكل وبعدين حد يلوم السفاره ان رشحتوا لي الشركه هذي بالذات

السفاره تعطيك ( نصايح عامه ) وتحاول تتجنب الاحراج بذكر أسماء الشركات

ممكن تفيدك بمحامي معروف وتوفر لك مترجم

لكن ما يقدر يعطيك اسم شركه معينه يتجنبون الاحراج

بيعطيك قوانين التصدير والشحن وقيمه الضريبه وقانون التملك هناك

هم دورهم الأكبر ( يعطيك القوانين ) ويحذرك ويعطيك اسم المنطقه وممكن يوفر لك مترجم

هو يعطيك الارشادات العامه الي انت ممكن تأخذ منها المعلومه المناسبه لك

ويعطيك كتيبات لهذي الشغله

وممكن الموظف يعطيك اسم ( على مسئوليته الشخصيه ) كمساعده وليس باسم السفاره

لان الشركه الجيده اليوم يمكن بكره تكون غير جيده بسبب الظروف الي تحصل بالسوق


حبيت أوضح لك هذي الشغله



,

,



شموخ دائم

[ابو عبدالله.]

مساء الورد اخوي شموخ

توضيح سليم و مقنع جدا

و ذكرتني بموضوع انهم يفيدونك بامور التمليك و القوانين

لاني افكر بعد فتره اتملك شي يا باوروبا يا تركيا و اميل لتركيا اكثر حاليا

مؤكد انهم حذرين بتزكيه اي شركه

كنت باخذ عناوين شركات من صديق قريبه تعامل مع كذا شركه و شغلهم يقول روعه. حتى انا ممكن امر على كم شركه بزياره سريعه

فالي ابيه ان احاول الاستفاده من وجود السفاره كطرف للمعلومات و توثيق عقد او خصم السفاره مثلا
اضافه الى معلومات الشحن و الرسوم ان وجدت

وجود السفاره بالموضوع يعطي ثقه لي و يدفع الشركه للتعامل بمصداقيه اكثر ببنود العقد و وقت التسليم و امور اخرى

بيعرفون ان الزبون فاهم و حافظ حقه و معاه سفاره تحفظ حقوقه اذا صار خطأ منهم

اشكرك على النقاط و التوضيح وسع مداركي بامور ما حطيتها ببالي. و اهمها قوانين البلد و المترجم و المحامي خصوصا في موضوع التملك

على الاقل بتعرف اذا في ضريبه معينه او شروط نجهلها قبل الشراء

لما رحت تركيا من كم سنه جلست مع موظف بالسفاره و ذكر لي عن مشاكل الخليجيين في العقار و ان واحد شرى بيت قديم عشان يهده و يبني بيت جديد
لما قدم طلب للهدم قالوا له ان الارض مش للسكن اصلا و البيت القديم مبني بغير رخصه ولازم يهده على حسابه بعد

و طاحت في چبده الارض و بيدفع للهدم ايضا للاسف

ناسي السالفه و الحين ذكرتني فيها :)

[الكبير]

شكرا عالموضوع الطيب

انا من شهر رحت تركيا وشريت اثاث من مصانع الاثاث برع اسطنبول جهة بورصا.

اللي في اسطنبول اسمه سوق ماسكو بس شوي غالي واصلا يشترون من المصانع بسعر معين

صراحة مناطق المصانع اسعارهم ممتازة بس لازم واحد معك .

ان شاء الله خلال شهر بيوصل الاثاث والله يوفقكم

اللي يبي اي معلومة انا تحت امره