احلت للتقاعد

[مخطط قطري]

صعقت من الكتاب الوارد من الخدمات المشتركه في جهه عملي باحالتي الى التقاعد دون سابق انذار او تمهيد .. سنوات الخبره الايام التي قضيتها في عملي بجد واجتهاد وتفاني وتوظيف جميع المهارات والامكانيات لخدمه وطني اولا وجهه عملي ثانيا صحيح هي سنه الحياه ولكن لم ابلغ السن القانوني للتقاعد واشعر اني مازلت في قمه عطاءي اليوم احسست بأحساس المتقاعدين وشربت من نفس الكأس بمرارته وحنظله .... ( وضع المتقاعدين يجب ان يعاد دراسته نصيحه اقولها للموظفين الذين جايهم الدور اعد العده لهذا اليوم تراه قريب وبيجيك فجاءه رتب وضعك )
(منقول بتصرف بقلم المهندس / احمد الحسيني )

[مرتبش]

نعم وضع المتقاعدين يجب اعادة دراسته لعدة اسباب منها الخبرة ونسبة التقطير وصحة الموظف ورغبته في الاستمرار .. على الاقل جعل سن التقاعد اختياري من الستين او امكانية العمل في جهات ثانية حلول سريعة ماتفوت المشرعين

[ابو عبدالله.]

الله يجعل التقاعد خير له و لكل محال عليه

بمنطق شخصي

التقاعد ليس شيء سلبي ابدا. هي بالنظره اما سلبيه او ايجابيه للشخص

اولا
نتيجه حتميه على الجميع سواء وصل او لم يصل للستين و بالعاده يكون قريب جدا للستين

ثانيا
في ناس متشبعه و تتمنى التقاعد ومش حاصل لها و بقى بالدوام عشان ما ينتقص من راتبه التقاعدي اذا طلب استقاله تقاعديه قبل الستين بكم سنه

ثالثا وهو المهم

التجهز للتقاعد ضروره وليس رفاهيه
تأمين مدخول اضافي و نشاط يعوض عن نشاط العمل السابق
مكافئه النفس على المجهود الماضي بسنوات طويله بالعمل و مسؤولياته تجاه الاسره. خذ لك طراد او سو هواياته الي ما قدرت تسويها ايام الانشغال بالدوام. او سافر اكتشف بلدان حلوه و يا مكثرها

الاهتمام بالجانب الصحي
العب رياضه عدل ضروسك اكشف بشكل دوري و حافظ على معدلات الحيويه عندك. يعني نظم اكلك و وزنك و حاسب من الضغط و السكر و الكوليسترول الخ

الجانب الاجتماعي
التواصل بمن شغلنا الدوام عنهم اقارب و اصدقاء او جمعيات مثلا. التطوع و الخيريه

الجانب الروحي
معروف ان تقدم السن يرجع الانسان للجاني الروحي و يصبح متمسكا اكثر بدينه و هي فرصه للحفظ و تعلم الاحكام و الانضباط بأوقات الصلاه.

هذا الي انا اشوفه شخصيا بالموضوع

لكن الي اسمعه من البعض مركز على نقطتين فقط

استقطاعات الراتب و مشاكلها

الفراغ وعدم الاحساس بالاهميه او المسؤوليه كما السابق

والله اكن الاحترام لكل متقاعد لكن بضطر اقول

كله من تحت يدك

وينك من ثلاثين سنه تشتغل ما رتبت لهذا اليوم
من اشتغلوا كانت الامور اسهل للتجاره او التملك حتى الاراضي كانت ب 25 الف ببعض المناطق
قبل التقاعد بعشر سنوات عيالك كبار والي تزوج منهم و قلت مصارفيك فأكثر من مره تأتي الفرص لتطوير الوضع المالي قبل التقاعد
اخر خمس او عشر سنوات الراتب اعلى من الموظفين الاخرين من الجدد او منتصفي الخدمه و بالعاده تكون بمنصب او درجه وظيفيه جيده و ببدلات اعلى من غيرك

يعني كل شي زين و يساعد على تسديد ديون او ادخار و استثمار


عندي مبدأ مقتنع فيه

مثل ما ارتب نفسي بالعمل برتب نفسي بالتقاعد
بفتح دكان بسوي هوايه بلعب رياضه الي هو. لكن أكيد مب جالس انتقد الحياه و الوم تحويلي للتقاعد

سؤال يمكن يساء فهمه لكن المقصد واضح

هل كل التقاعدين مظلومين
اذا كلهم مظلومين عيل من الي كان ظالم لموظفيه او زملاءه

يمكن المحال للتقاعد حتى لو قال انا بصحتي خلوني بالعمل
يمكن هو نفسه الي معطل شغل المراجعين و زملاءه وما يداوم الخ

المقصد ان ممكن تحويله للتقاعد خيره له و لنا
و بيترقى الى تحته و بتفتح وظيفه لشخص جديد و بيتزوج بالراتب و يأسس اسره

يمكن المتقاعد متروس فلوس و بمنصب و مرتاح اصلا لكن يبي يداوم اكثر بس عشان وجاهته الاجتماعيه ما تتأثر و يحس بالاهميه

مش كل شكاي صاحب حق بالمعنى الانسب

كل الي بيدنا نقوله
ان ننصح بالتجهز للتقاعد و الانضباط المادي و تعلم اداره الثروه الي ياخذها كراتب سنوي قادر ان يأسس ادخار و استثمار طويل الاجل

هذا واحنا بلا ضرائب او فواتير و نتشكى. عيل لو بدول ثانيه ايش بنقول

[معماري قطري]

انا جربت التقاعد التمهيدي حول 10 سنين رجوع للعمل في تخصص ثاني كلش شوي وخفيف .. صحيح فترة كان فيها تدليع وسفر ومهمات وكانت حلوة بس اللي يزعل مب في تخصصي ولا مهنتي اللي تعلمت لها وعملت بها فترة طويلة .. من ال 10 سنين كنت في البيت حول 6 أو 7 سنين بلا عمل وراتبي يمشي كامل مع امتيازاتي ولا قصرت جهة عملي بس ما كنت أتمنى ادارياً ما يكون فيه استفادة من الخبرة والتخصص حتى لو في مكان ثاني

جاء التقاعد الرسمي العام فجأة وكان متوقع وجاء على كثيرين معاي .. في البداية جاني حزن بسيط وحسيت اني كبرت مع اني ما أنهيت ال 55 عام .. بعدين عرفت إن الراتب يكفي والحمد لله ويزيد وعيالي تعينوا أو في طور التعيين وصحتي أهم أتابع دكاترة جيدين الله يحفظهم ويطول في أعمارهم في كل التخصصات .. وإستويت انتقائي في اختياري للدكتور اللي ينفعني .. في البداية طحت صدفة في يد دكتورة أخصائية سكر كبيرة وخبرة وفاضلة .. قلبها على أهل قطر مب ببرود الأجانب خلص واللي بعده .. لدرجة تعصب وتهاوش وانا ابتسم واضحك بعدين فكرت في كلامها واستويت امشي على المسطرة

أذكر ولد خالي وهو مسؤولي الأعلى ما قصر معاي وطلب لي جهاز قياس السكر في 2015 ووقتها ما عمموه استعملته واندهشت من اللي يدور في جسمي والحمد لله توفقت في علاجي بمجهود مني ومن قسم علاج السكر وهذي الإنسانة اللي تعالج بفرض العلاج بإسلوب طيب وهذا اسلوب كل قسم السكر في مستشفى حمد

ألحين مرتاح والله فاتح علي ورازقني ولا اتمنى ارجع لدوام وغثاء وأذية .. أتشمس صباحاً من دريشة مكتبي البيتي الشرقية واطل على العصافير استمتع برؤيتهم مع الطيور الثانيين .. صراحة التقاعد طعمه حلو وحلو جداً

[سالم الزهران]

الخيرة فيما اختاره الله..
احد الزملاء مهندس قدم استقاله رغم ان باقي عليه سنتين و تنازل عن خمسمية يوم اجازات.. وناس كثير تتعاقد مع شركات ثانية حتى لو سنة اوسنتين وتكون انطلاقه جديدة لهم.. فالانسان احياناََ لازم يخاطر ويستعد للنتيجه.. فربما تكون للأفضل.

[معماري قطري]

" هذا واحنا بلا ضرائب او فواتير و نتشكى. عيل لو بدول ثانيه ايش بنقول "

إيه والله يا بو عبدالله الحمد لله الخير والنعمة وايد والأهم الصحة والأمان وهدوء النفس

[معماري قطري]

الخيرة فيما اختاره الله..
احد الزملاء مهندس قدم استقاله رغم ان باقي عليه سنتين و تنازل عن خمسمية يوم اجازات.. وناس كثير تتعاقد مع شركات ثانية حتى لو سنة اوسنتين وتكون انطلاقه جديدة لهم.. فالانسان احياناََ لازم يخاطر ويستعد للنتيجه.. فربما تكون للأفضل.

خاطرت كثير وغامرت خصوصاً في البورصة والحمد لله النتائج جيدة استثمارياً ومضاربياً فرص ما تحصلها في الشغل وتكون مدووش ومشتت والفرقية شيء بسيط .. وإشتر راحتك مثل ما يقولون

[مخطط قطري]

اشكركم جميعا اثريتو النقاش ... الحكمه في الموضوع التمهيد والاستعداد لحياه التقاعد لانها مصير كل موظف وقد تجيك بغته وفجاءه... وقانون التقاعد ظلم الموظفين كلهم ومانصفهم فبالتالي الترتيب ماراح يكون ذاتي انت اجتهد ورتب نفسك ( مرتبش اثرت نقطه مهمه وهي المشرعين اعتقد يجب اعاده النظر في قانون التقاعد واعتقد الموظف القطري يستحق الافضل ويليت النظر في التشريعات الاوروبيه لوضع المتقاعدين عندهم فيها انصاف وعداله ناخذ المناسب منها ونطبقه عندنا )
الاخ بوعبدالله اثرت نقاط جوهريه وفي غايه الاهميه وطبعا مب كل المتقاعدين مظلومين بس احنا نقول حياه لما بعد التقاعد وصحيح لازم يترك فرصه لغيره وناحيه الاهتمام بالهوايات والتواصل الاجتماعي والديني مهمين جدا
الاخ معماري دايمن بصماتك ايجابيه في كل موضوع ينطرح بس كونك متقاعد الله يعطيك الصحه والعافيه تشوف القانون منصفك ومرتاح ولا تحس يحتاج تحديث يما يتوافق مع الاوضاع الحاليه يبدولي انك سعيد مع التقاعد ونظمت وقتك واستثمارتك الصحيحه ولكن القانون تشوفه شلون معاك
سالم الزهران زميلك يجوز عنده يزنس خاص وهذي حالات استثنائيه في بعض الناس يدخل من تجارته اضعاف مايدخله من شغله ووده بالتفرغ او الاستقاله بس احنا نتكلم بشكل عام عن متقاعدين واوضاعهم وماعندهم الا راتب تقاعدي وهذرلا يمكن اكثر من نص المتقاعدين بهذا الوضع ويجوز ربع او ثلث المتقاعدين يملك بزنس خاص له

[ابو عبدالله.]

ما شاء الله كل الردود ايجابيه
الي جرب او يعرف ناس مجربه التقاعد

فقط نقطه ان البعض يرى القوانين تحتاج لتعديل

بتفق كمبدأ المساواه

يعني يكون هناك راتب لا يقل عن مستوى معين
المتقاعد اقل من 15 الف يحتاج تعديل وضع مثلا

او نقول اقل راتب 20 الف بحد ادنى

ايضا هناك امتيازات مفقوده و نشوفها بدول اخرى
الغاء رسوم تجديد بطاقه و جواز و امور اخرى تخفف معاناه اصحاب الرواتب التقاعديه

خصومات حقيقيه من بعض الشركات اقلها التابعه للدوله او لها نصيب في ملكيتها

دعم اكبر للمواد الاستهلاكيه

و اتكلم عن متقاعدين برواتب اقل من 30 الف او ما تحدده حالات البحث لهم

احد المقترحات الي قرأنا عنها كانت بدل السكن للمتقاعد

اشوفها مفيده جدا كدعم لراتبهم

[سالم الزهران]

واقترح بعد توظيف ابناء المتقاعد الخريجين واللي مر عليهم اكثر من سنة.

[احب قطر]

انا بسبب مدير وصل للسلطة عن طريق المحاباة وماكان قطري بوقتها ، احلت للتقاعد بسن 40 عام ..لا اعتبرة قمة العطاء ولكن اعتبرة بداية العطاء ، بعدها بسنتين او ثلاث تم تحويل المدير للتقاعد بسبب سوء الادارة وكذلك من قام بتعيينه ، الحمدلله كانت لي بصمات في جهة عملي وكنت من المتميزين ، وبفضل من الله كنت عامل حساب هذا اليوم من الناحية المادية ، ولكن اللي كان مزعلني مكان عملي والحال اللي وصل اليه بسبب فساد الادارة.

مع معرفتهم للواقع وفساد الادارة وتحويلهم للتقاعد ، اصبحنا من الماضي انا ونخبة من الزملاء اللي تم تحويلنا للتقاعد ظلما...مع العلم بان المدير كان يسعى لانهاء خدماتنا من دون تحويلنا للتقاعد ..وتكفلت جهت العمل بمبلغ 5 مليون ريال قطري دفعتها لصندوق التقاعد لشراء المدة المتبقية لي...

ولكن الظلم ظلمات يوم القيامة...المدير واجه امراض علمها عند رب العالمين ...واتمنى له الشفاء ...واتمنى ان يتوب ويستغفر لله على ماقام به في حقوق الناس.

[ابو عبدالله.]

صارت معاي ان غير قطري حاول تهميشي و طردي من الاداره لكن انصاد بايق روشن الاداره و فنشوه و مساعده ما تفنش لكن ضربه السرطان الله يجيركم و يجيرنا
وعلاج ست شهور بلندن

حتى بعد تفنيش المسؤول تكالب مدراء لطردي من جهه العمل عشان رفيجهم الي تفنش و خسر مستحقاته لنهايه الخدمه
لكن بعض مدراء الخير وقفوا في صفي و تم نقلي لجهه اخرى و لقيت ناس تخاف الله
اليوم الله وفقني و وظيفتي اعلى من الي تفنش و مساعده و كان يبي يفنشني ببدايه مشواري المهني

جمله حسبي الله و نعم الوكيل لها اعجازها
المسؤول تفنش
ولده ضبط بقضيه اختلاس و سجن
و المساعد مرض و زين الله شافاه لكن ضرب عليه آسيوي في تجاره و تجمعت عليه كم مليون من ذيك السنين للحين يسدد كم الف شهريا

للامانه. كنت زعلان من الي صار لكن بعد مده حمدت الله اني مريت بالتجربه ولا ما كنت بحسن قدراتي الشخصيه و كيف اتصرف و لو ضليت بنفس الاداره كان ممكن اكون بنفس الوضع الوظيفي للحين

لكن النقل ادخلني لوظائف بخبرات و بعدها كذا جهه طلبتني لوظائف افضل

الظلم ظلمات يوم القيامه

و ما اصابك ما كان ليخطأك

كله خير

[سالم الزهران]

يفاجؤونك بالتقاعد ونت بالأربعين ولازلت شاب أفضل من يجيك عقب 15 سنة وتكون في وضع أصعب ربما والنشاط أقل وأمور ضدك كثيرة.

[معماري قطري]

انا بسبب مدير وصل للسلطة عن طريق المحاباة وماكان قطري بوقتها ، احلت للتقاعد بسن 40 عام ..لا اعتبرة قمة العطاء ولكن اعتبرة بداية العطاء ، بعدها بسنتين او ثلاث تم تحويل المدير للتقاعد بسبب سوء الادارة وكذلك من قام بتعيينه ، الحمدلله كانت لي بصمات في جهة عملي وكنت من المتميزين ، وبفضل من الله كنت عامل حساب هذا اليوم من الناحية المادية ، ولكن اللي كان مزعلني مكان عملي والحال اللي وصل اليه بسبب فساد الادارة.

مع معرفتهم للواقع وفساد الادارة وتحويلهم للتقاعد ، اصبحنا من الماضي انا ونخبة من الزملاء اللي تم تحويلنا للتقاعد ظلما...مع العلم بان المدير كان يسعى لانهاء خدماتنا من دون تحويلنا للتقاعد ..وتكفلت جهت العمل بمبلغ 5 مليون ريال قطري دفعتها لصندوق التقاعد لشراء المدة المتبقية لي...

ولكن الظلم ظلمات يوم القيامة...المدير واجه امراض علمها عند رب العالمين ...واتمنى له الشفاء ...واتمنى ان يتوب ويستغفر لله على ماقام به في حقوق الناس.

السؤال هل نحن في دولة مؤسسات وقانون وحقوق؟

بعض الدول وخلونا من الدول الوزارات وكبار المسؤولين يسوون تحقيق شامل وينبشون في كل ملفات الماضي ويجيبون القدامى واللي ممكن انظلموا .. وأوقات كثيرة يتحاسب المدير حتى وإن فصل على سوء الإدارة والإضرار بالكثيرين غيره

[سالم الزهران]

اخوي معماري.. المسؤول العود له من معاملة مكتملة الطلبات وهو بناءً ع التوصية يعتمد.. وهو مخول بصلاحيات بيسأل عنها اذا مش في الدنيا ففي الآخرة.

المشكلة لو رحت تظلمت نفس المسؤول يحيلك الى لجنة، غالباََ هذي اللجنة تعلمك باللي بيصير قبل لا تبدأ هي في عملها.. فهم ارتكنوا الى روتين قديم ما يعالجه الا اللي الله يسخره لعمل الخير ويتبرع يعطي من وقته وجهده للخدمة العامة.

[سالم الزهران]

أحدهم ممسك بأمر تنفيذ صادر لصالحة من محكمة في بلد خليجي، ودخل به على الأمير فاستغرب الأمير وقال له: انت صكك بيدك فليش جاينا؟ قال : ابغي وقفتك معي يا الأمير لأن الصك/أمر التنفيذ بروحه عشان يتنفذ يبغي له عمر! قام الأمير وقع عليه بطلب الاسراع في تنفيذ محتواه.. توقيع فلان بن فلان.

الآن أمير لمنطقة وغيره كثير يتوقع أن الحكم يصدر اليوم والتنفيذ يتم اليوم الثاني.. وهذا حال الكثير والحلقة الضايعةموجودة بشكل من الاشكال ودور المواطن الواعي يعالج ويسبر وينصح بدون ما يضر قدر الإمكان.. والله المستعان

[معماري قطري]

اخوي معماري.. المسؤول العود له من معاملة مكتملة الطلبات وهو بناءً ع التوصية يعتمد.. وهو مخول بصلاحيات بيسأل عنها اذا مش في الدنيا ففي الآخرة.

المشكلة لو رحت تظلمت نفس المسؤول يحيلك الى لجنة، غالباََ هذي اللجنة تعلمك باللي بيصير قبل لا تبدأ هي في عملها.. فهم ارتكنوا الى روتين قديم ما يعالجه الا اللي الله يسخره لعمل الخير ويتبرع يعطي من وقته وجهده للخدمة العامة.

جانا مسؤول خلوق ومتدين ملتحي والله يحفظه وين ما يكون

بشوش ولبق في الكلام وذكي وكان عنده ماجستير محاسبة أو دكتوراء أعتقد .. كان يدير عدة قطاعات إمدادية منها القسم الهندسي وتحت إدارته آلاف وعدة أقسام

صدقني أذكره يمشي من مكان لمكان المباني كثيرة والإدارات كثيرة وهو في زيارات دائمة .. يشتغل ليل نهار وياخذ فايلات يراجعها معاه للبيت .. كنت من المظلومين اللي ينتظرون سنين مهمة أو دورة وكانوا شلة معينة هم اللي لهم الجمل بما حمل وغالبيتهم كبار واداريين ما يمارسون الشغل الهندسي الحقيقي اللي احنا نمارسه ونقدر نبت فيه .. يوم جاء تفاجأت باتصال لي من صديق يقول لي مستعد حق ألمانيا .. قلت شالسالفة؟ قال من صجك محد قال لك قلت والله توني اعرف منك .. قال رشحك فلان .. المشكلة ربعنا من حقدهم ما يبون حتى يقولون جهز نفسك .. تصدق ما بقى الا كم يوم يالله يالله الحق اسوي الفيزة

بعد فترة كشف سرقات ادارية وشغل رديء معمول بغالي ومقاولين دون المستوى يلقطون عمالتهم من الشارع ويسوون أردأ شغل وخصوصاً اللي يسمونها شغلات صيانة وشغلات هندسية صغرى .. تجيك شغلة يسويها أحسن مقاول ب 100000 هم يسوونها مع أسوأ مقاول ب 250000 وتحتها بشوي حتى يكونون تحت اللمت من وزارة المالية لأمر التنفيذ المباشر بدون مناقصة

هذا الشيء ما يرضي أي غيور على الشغل الهندسي السليم وعلى أموال بلاده ومنهم انا تكلمت مرات كثيرة عند مسؤوليني وكرهني بعضهم وبعضهم جاملني وسئلني محقق مرة فتحت معاه بطريقة مفتوحة قال لي انت هجومي وايد .. قلت هذي يا اخوي سرقات المهندسين ما ياخذون مباشر يطلبون ناس عارفينهم يسوون شغل ويسهلون لهم وبعدين يتقاسمون الغنيمة والضحية من يدفع

وإكتشفت إن هذا مستشري حتى على المستوى الخاص بين الاستشاريين النص كم والمقاولين والضحية المواطن ولو اشتكى ورفع قضية هو محق فيها وكاسبها 100% ينتفونه القضاء والدفاع ويطلع مفلس من الرباعي

اللجان مثل ما ذكرت هي في الغالب ينقصها اعطاء كل مختص حقه وترك الكلمة له .. كان مسؤولي من أصل فلسطيني بس قطري ارسلني لمعاينة مبنى كبير سقفه متضرر ويقولون آيل للسقوط .. رحت الا الصيانة شغالين فيه تكسر في السقف ومعرين الحديد وسقفه قطع كبيرة منه طاحت .. يعني المبنى قاعة كبيرة حول 20 في 15 مب غرفة عادية والانهيار كارثي وإخوك مهندس صغنن وقتها .. قلت عطوني ملف المبنى وصيانته وشفت فيه اختبارات كور تست للسقف بعض الأماكن قوتها 0 تنزل رمل .. والحديد بعضه باقي منه 25% بسبب الصدأ

ملف الصيانة شالوا العازل فوق حتى يبدلونه من سنتين ومعاه حتى شالوا السكريد واستوى فوق مثل الصحن للمطر .. وبقوا على هالحال لا ركبوا عازل جديد بسبب ميزانية أو كسل في الاجراءات الإدارية أو إغفال للموضوع .. جاء تقريري مفصل بلوم قسم الصيانة على خسارة المبنى وبأن المبنى يجب هدمه وبناءه من جديد .. مسؤول الصيانة كان وقتها الله يغفر له سوري بعد من أصل فلسطيني وعنده جواز قطري ومقرب للوزير ذاك الوقت .. وهذا رفض تقريري ولا تحرك من مكتبه وقالها صريحة تقريرك بيضر رفيجنا .. انا ما همني الا قول الحق بس أوقات فيه ناس ما تحب تسمع قول الحق وتتعبك على الفاضي

[معماري قطري]

انكبست الأفكار في مخي ونسيت موضوع المسؤول الخلوق والمنجز ادارياً ومالياً .. هذا كتب وطلب تحقيق في تجاوزات كبيرة وسووا تحقيق بعده قالوا صج فيه تجاوزات بس ليش يخون في ربعه وغيروه قاعدوه وجابوا واحد غيره يربط الحمار مكان ما يقول صاحبه اربطه

رفيجنا الخلوق والدكتور .. الله فتح عليه وفتح بزنس صناعي كبير واستوى كل شوي نشوفه في التلفزيون وإن شاء الله بالحلال وسوى مكتب محاسبة قوي .. وبعض ربعنا المتجاوزين ألحين ما فوقهم فوق من منصب لمنصب أعتقد انجازاتهم تعجب المسؤولين

[معماري قطري]

كل هذا وتبون البلاد تنصلح؟

الأمثلة كثيرة ومحاربة القطري من القطري نفسه والمستفيد ( اللي يربط الحمار مكان ما يقول صاحبه ) وسامحوني على المثل بس مثل ايطالي قديم وواقعي ايطاليا اللي ابتكروا ال Corruption

[معماري قطري]

أحدهم ممسك بأمر تنفيذ صادر لصالحة من محكمة في بلد خليجي، ودخل به على الأمير فاستغرب الأمير وقال له: انت صكك بيدك فليش جاينا؟ قال : ابغي وقفتك معي يا الأمير لأن الصك/أمر التنفيذ بروحه عشان يتنفذ يبغي له عمر! قام الأمير وقع عليه بطلب الاسراع في تنفيذ محتواه.. توقيع فلان بن فلان.

الآن أمير لمنطقة وغيره كثير يتوقع أن الحكم يصدر اليوم والتنفيذ يتم اليوم الثاني.. وهذا حال الكثير والحلقة الضايعةموجودة بشكل من الاشكال ودور المواطن الواعي يعالج ويسبر وينصح بدون ما يضر قدر الإمكان.. والله المستعان

نفس الوضع عندنا يا اخوي

قضية تافهة مثل المطالبة بايجار بيت تتحول محكمة وهذا ساكن ولا يدفع .. ويصدر حكم بالإخلاء ورفيجنا صاحب العقار مستانس بعد فترة يقولون له لا لازم تروح محكمة ثانية قسم تنفيذ الأحكام .. وذيك بعد لها اجراءاتها .. تصدق لو الحكم كتبوه نقش على الحجر كان خلصوه وارسلوه وتم وخلص رفيجنا

سالفة صارت لقريب وصديق .. وبعد ما صار وطلع اللي ما يدفع وساكن ببلاش استوى واجب على صاحب البيت يصينه وعلى لسانه يقول كلفني صيانة ووقت أكثر من قيمة الإيجار اللي دخلته منه

[ابو عبدالله.]

معلش يا باشا

نقطه بعلق عليها من بين حواركم

رفيجك المفروض يكتب في العقد. يعود العقار لحالته الجديده عند الاخلاء
يعني يدفعه الصيانه و الايجارات خلال فتره الصيانه بعد

صارت معاي و دفعوهم و صيانه ع حسابهم
بس للامانه تأخرت كم شهر بالمنازعات و التنفيذ. تقريبا سنه الا

[معماري قطري]

معلش يا باشا

نقطه بعلق عليها من بين حواركم

رفيجك المفروض يكتب في العقد. يعود العقار لحالته الجديده عند الاخلاء
يعني يدفعه الصيانه و الايجارات خلال فتره الصيانه بعد

صارت معاي و دفعوهم و صيانه ع حسابهم
بس للامانه تأخرت كم شهر بالمنازعات و التنفيذ. تقريبا سنه الا

مكتوب بس تبهدل حط محامي وتعب وركضة وفي النهاية خبير قانوني هندسي وقطري سعر له يمكن 10% من تكاليف الاصلاح

[معماري قطري]

الليلة رحت اتمشى في لوسيل المشروع اللي يقولون عنه ميخرش الميه بعد شفته مخرخر من كل صوب تسكير وما ادري شيسوون فيه .. وهذا دليل واضح على الفساد الهندسي في البلاد .. الشغل حتى يكون برفكتو يبي له فريق هندسي مشرف مناسب وقوانين رادعة للمقاول .. لو كل مقاول بيشتغل على البركة ولين اخترب شيء بيجي وبيعدل وبياخذ شهور مثل اللي حاصل في كم مكان السالفة بسيطة والمتضرر الإنسان اللي يشوف هالمناظر واللي يمكن يدخل في حاجز ما يبين في الظلام

[ابو عبدالله.]

مكتوب بس تبهدل حط محامي وتعب وركضة وفي النهاية خبير قانوني هندسي وقطري سعر له يمكن 10% من تكاليف الاصلاح

صباح الخير

نفس القصه المستأجر اشتكى و دفعوه رسوم الاستشاري ولما جلست معاه قال لي العيوب بسيطه
قلت له احسبها معاي و طلعت ست الاف و شوي مع ان انعمل صيانه بأكثر من ثلاثين الف لكن ضلت عيوب
قلت للقاضي دام بقت عيوب يعني هو سبب التأخير بالاخلاء ما كمل الاتفاق بالعقد

بس حبيت اوضح عشان المعلومه ممكن تفيد احد لما يقرأها

[ماجد البدر]

ارى انه يفترض وصول المواطن سن التقاعد فهو في خيار ان يبقى او يتقاعد بشرط انه قادر على العطاء ورغبه منه في الاستمرار وعدم التمهيد والاخطار قبل فتره جدا مؤلم لنفسية بل البعض يكون حساس جدا 35 سنة وفجاء في البيت دون تمهيد قبلها بسنة او اكثر
البعض تجيه جلطه

هذه سنة الحياة وفتح المجال للغير لياخذ مكانه ومنصبه وربما يؤدي العمل بشكل افضل لكن التمهيد ضروري


البعض يطالب بالتقاعد و التقاعد المبكر رغم خسارته كثير من الميزات من التقاعد الكامل بالسن القانوني
ويريد ان يتفرغ لحياة جديدة وممارسة هوايات معينه او سفر او تجارة
و الناس اجناس

[حمد 2002]

انا اذا احلت للتقاعد
بسوي رياضه بالفستفال كل يوم ..

[معماري قطري]

في أمريكا أغلب ولاياتها عندهم قانون سواقة السيارة يسمح للشياب يسوقون حتى بسن كبير لين يثبت عليه إنه ما يركز وقدراته ضعفت .. وأعتقد هذا نفس الشيء عندنا

العسكريين حدهم خدمة 15 أو 20 سنة بعدها يتقاعد أعتقد اختياري وممكن اجباري بس كثيرين متقاعدين يشتغلون كمدنيين في كل القطاعات وفي شغلات مهمة وبعضها تافهة والسن مفتوح .. ويمكن هم محتاجين أكثر يقاعدون اجباري ويعينون جدد لكثرة العاطلين عندهم

في الجامعات كانوا عندنا معلمين بصعوبة يمشون ولا يركزون ولا يشوفون زين .. معلم كان يعطينا امتحان من 4 مسائل طويل ومتعب رقبتنا تعورنا واحنا نحل .. هو لين حل الامتحان حل نموذجي مسئلة وحدة ولا يقدر يخلصها ويقرب الكتاب عند نظارته الكبيرة ويقول ات از هارد تو سي .. يوم قربت منه الا الخط واضح .. إضطرينا كعرب نتعاون على البر والتقوى كل واحد يحل مسئلة ويرسلها للباقي والعرب كلهم حصلوا امتياز a والبقية أقل .. كان يدرس تكييف من هشكل ما اذكر شيء من التكييف

[كنغ المضاربة]

يازين التقاعد زيناه تفتح لك مشروع صغير يساعد الراتب التقاعدي وتشوف حياتك كل يوم بديرة الى متى شغل شغل العمر يوقف والشغل ماوقف حلاته بعد يكون بعمر الاربعين يعني اقل منها بسنتين اكبر شويه تعيش الي باقي لك من عمر شكثر بتعيش خلاص تهنأ بحياتك الباقيه اخرتها قبر متر بمترين
وبعد تنقي لك شي من هالاديار الزينه الي طول السنه امطار وبراد وتاخذ لك فيها شقه صغيرونه حتى لو عقد سنوي بسعر بسيط وعيش يالذيب حياتك
لا مدير نفسية ولا مسؤول يدور عليك الزله بالعكس لو شفتهم بشارع انا واحد عادي احفص عليهم

[eXpert*]

نصيحتي تغدى في التقاعد قبل لا يتعشى فيك ..

أسعى له ولا تجعله يأتي إليك ..

خلك مستعد نفسياً ومادياً ..

حدد لك أهداف وحققها ..

لاتنتظر يركنونك بسبب تقييم مسؤول او تخفيض تكاليف ،، أنت من نفسك سلم دفة القيادة في الوقت المناسب ..

[كنغ المضاربة]

نصيحتي تغدى في التقاعد قبل لا يتعشى فيك ..

أسعى له ولا تجعله يأتي إليك ..

خلك مستعد نفسياً ومادياً ..

حدد لك أهداف وحققها ..

لاتنتظر يركنونك بسبب تقييم مسؤول او تخفيض تكاليف ،، أنت من نفسك سلم دفة القيادة في الوقت المناسب ..



اشهد انك صدقت دعواتكم شباب الله يكتب للي بالي يوافقون له يا اني بعزم أعضاء المنتدى كلهم على حاشي ورحلة بحرية على السيف بهالمناسبة

[h9466]

اشهد انك صدقت دعواتكم شباب الله يكتب للي بالي يوافقون له يا اني بعزم أعضاء المنتدى كلهم على حاشي ورحلة بحرية على السيف بهالمناسبة

ان شا الله يوافقون..
سجل اسمي في قائمة المدعوين للحاشي

[ابو عبدالله.]

هذا التشجيع الصح

معاكم بأذن الله
بس عطوني كم سنه اخلص الي ببالي و طالع تقاعد ان شاء الله
خلوها على 2025 عشان اتعشى معاكم

[راعي الكورفت]

بالعكس تفائل ترى التقاعد شي جميل.
تقدر تمارس هوايتك وتنام وتقوم براحتك وراتبك ماشي والحياه حلوه.

انا لين الحين باقي لي سنوات طويله عشان اتقاعد لكن لو خيروني بتقاعد مبكر ماراح اقول لا.

تحياتي.

[وليف الشوق]

انتظروني للعشا اذا الله احيياني لين اتقاعد 2022

[معماري قطري]

نصيحتي تغدى في التقاعد قبل لا يتعشى فيك ..

أسعى له ولا تجعله يأتي إليك ..

خلك مستعد نفسياً ومادياً ..

حدد لك أهداف وحققها ..

لاتنتظر يركنونك بسبب تقييم مسؤول او تخفيض تكاليف ،، أنت من نفسك سلم دفة القيادة في الوقت المناسب ..

كنت قبل متحمس ومشتط وابي وابي وكلمت واحد من الأهل يشتغل في الديوان والسالفة من زمان يشوف لي واسطة والا حركة والا شيء قال عطه خامس وريح نفسك .. فكرت في نصيحته واقتنعت ومن وقتها وانا مرتاح ومستعد للتقاعد

[معماري قطري]

قبل الله يذكر الأولين بالخير ومنهم واحد متواصل معاه دوم كان الراس الكبير بتاع حتتنا كان يسوي حفل .. وهو مجاله غير وربعه غير بس فارض احترامه على بقية الإدارات .. انا تجاوزاً قلت الراس الكبير إحنا راسنا كان ثاني بعدهم يجي مساعد الوزير ثم الوزير .. هذا كان يسوي حفل وترفيه ونجيب عيالنا ويحضرون المتقاعدين من ادارته ويكرمهم بكلام طيب وهدايا رمزية

ألحين انا وهو وراسنا الثاني كلنا متقاعدين ونتواصل مع بعض وتس اب ونعلق على بعض المتقاعدين وكورونا منعنا من الزيارات الخاصة لكنه شخص قبل كورونا دوم ميلسه مفتوح وجلساته ما تنمل

[كنغ المضاربة]

مستغرب منك اخوي بوعبدالله كيف عندك اصداقاء دوام لين الحين انا لو اطلع اجازة اسبوع وتتصل فيني يمكن اقولك مين انت ماعرفك هذا اذا رديت عليك اصلا ياخي شعور ماعرف اذا حد مثلي لكن احس بشعور الشغل وضغطه لما يكلمني شخص معاي بالشغل الحمدالله عندي اصدقاء خارج العمل التقي فيهم ياخي احساس غير لكن زميل عمل وخارج العمل شنو سوالفكم كل سالفة وسالفتين بيرجع يذكرك بالشغل ياخي حتى وجهه تحس نفسك بالشغل

[ابو عبدالله.]

صبحكم بالخير

بزنس اند بلچر دونت مكس توقذر

من النادر ان اخلي زميل عمل صديق خارج العمل

مشوار عشرين عام قليل اصادقهم خارج العمل

فقط الي يستاهل

الي يستاهل اعرف حتى ابوه و اخوانه و عمه

يمكن بعد التقاعد يتغير الوضع مثل اخونا معماري

مره زميل كان رجل سنع و تصادقنا خارج العمل لسنوات و بعدها قال خلنا نعرف الاهل على بعض

قلت له هذه انساها وما انصحك
بكره لو تتغير علي او اتغير عليك او تصير بيننا خلافات بنكون بعاد و الاهل على تواصل مب حلوه في حقنا
وحتى علومك بتكون عندي و علوني عندك

قال صدقت والله.
كان عندي رفيج بالشغل الاولي و عرفنا الاهل على بعض. بعدها طلع مب شي و تغير و ينوقل حچي بالدوام و ما نكلم بعد لكن الاهل على تواصل و صار الوضع محرج لي و له

قلت له من تحت يدك. بزنس اند بلچر دونت مكس. لا تخلط العمل بحياتك الخاصه ما تدري اذا الانسان سيء الا بعد مده و مخالطه تخيل لو يطلع سوالفك الخاصه

في واحد سافر دراسه ايام الثمانينات و اول ما وصل امريكا جلس يخربط بسوالف شينه و اتصل على رفيجه الي ما نجح بقبول الدراسه و قال له عن سوالف الوناسه
و زوجه رفيجه تعرف زوجته و خر السوالف لها

بنفس اليوم زوجته اتصلت عليه وقالت له يا ترجع بكره يا اروح بيت اهلي مع العيال

خرب و فضح نفسه و لين يومكم ما كمل دراسه ولا صار سينير الا بعد 25 سنه حك بوظيفه في الشمس لين قال بس

زملاء العمل لهم التقدير لكن مش اي زميل ممكن نطلعه على حياتنا الخاصه فقط السنع

و اكيد معماري فاهم و عارف هالشي

معماري برز عمرك ادور طراد من الحين هههههه

[كنغ المضاربة]

صدقت اخوي ابوعبدالله التجربة تختلف عن الكلام مثل اخونا الغالي معماري قطر عني مافكرت اجرب مثل ماقلت اخوي انت ان المشكلة ممكن تتطور او غيره والواحد مايحب عوار الراس العلاقات الرسمية بالعمل واصدقاء العمل اشوفها افضل ياما اصدقاء عمل وفي العمل تفتح معاه شوي وتطيح الميانة ممكن تلقاه قط كلمة بدون يثمنها او يقدرها في ناس تشوفها عادي ممكن ان الشخص مايقدر الكلام لكن انا بالنسبه لي ممكن هالكملة تشغل بالي شهور وسنوات وممكن توصل فيني اتعامل معاك فقط بالسلام والعمل يعني معاك شغل معاي ممكن اتكلم معاك غير كذا انسا

[معماري قطري]

مستغرب منك اخوي بوعبدالله كيف عندك اصداقاء دوام لين الحين انا لو اطلع اجازة اسبوع وتتصل فيني يمكن اقولك مين انت ماعرفك هذا اذا رديت عليك اصلا ياخي شعور ماعرف اذا حد مثلي لكن احس بشعور الشغل وضغطه لما يكلمني شخص معاي بالشغل الحمدالله عندي اصدقاء خارج العمل التقي فيهم ياخي احساس غير لكن زميل عمل وخارج العمل شنو سوالفكم كل سالفة وسالفتين بيرجع يذكرك بالشغل ياخي حتى وجهه تحس نفسك بالشغل

كان شغلنا وبيئته غير .. بيئة طيب وناس حولك تعتبرهم أهل وإخوان وكان عادي أوقات نداوم خارج أوقات الدوام أو ناخذ شغل البيت .. صراحة معطينا حقنا وأوقات شوي زيادة .. يمكن شوية تقييد في التطوير والتدريب التخصصي في تخصصك وهذا شوي يحزن

ألحين بنتي تخرجت مهندسة كهرباء ووديتها شغلي السابق ما ارتاحت الظاهر البنات هناك خوفوها حبت مجال الاتصالات وبعد حاولنا فترة طويلة ولا حصل لين جات مشاريع قوية وتخصصية ويحتاجون مهندسين كهرباء وطلبوها وعينوها في أثناء توقف التعيين والحمد لله راتبها يمشي بدون ما تداوم وألحين بتبدأ بعد العيد .. الحلو إن المشاريع داخلية خارجية بعضها في أمريكا وايطاليا وبريطانيا وانا مع التقاعد فاضي ومستعد للمرافقة

الله يوفقها تخصص جديد وتحدي جديد في مجال الالكترونيات بس هالمرة الكترونيات طيارات

[معماري قطري]

على طاري التواصل بعد الشغل سويت قروب للشباب اللي تقاعدوا معانا وكل وقت ادخل واحد منهم ونستانس مع بعض نعرف شيمر على ربعنا .. العرب منهم بعضهم حولوا كفالاتهم على اتش بي كي وكان مديرها معانا ذاك الزمان الحلو وطلع من التسعينات .. واللي مثلي حتى طموح قبل خلاص ما ابيه بدال ما اعطيه خامس وصلت عاشر مع تطور السيارات لعشر غيارات

[معماري قطري]

صبحكم بالخير

بزنس اند بلچر دونت مكس توقذر

من النادر ان اخلي زميل عمل صديق خارج العمل

مشوار عشرين عام قليل اصادقهم خارج العمل

فقط الي يستاهل

الي يستاهل اعرف حتى ابوه و اخوانه و عمه

يمكن بعد التقاعد يتغير الوضع مثل اخونا معماري

مره زميل كان رجل سنع و تصادقنا خارج العمل لسنوات و بعدها قال خلنا نعرف الاهل على بعض

قلت له هذه انساها وما انصحك
بكره لو تتغير علي او اتغير عليك او تصير بيننا خلافات بنكون بعاد و الاهل على تواصل مب حلوه في حقنا
وحتى علومك بتكون عندي و علوني عندك

قال صدقت والله.
كان عندي رفيج بالشغل الاولي و عرفنا الاهل على بعض. بعدها طلع مب شي و تغير و ينوقل حچي بالدوام و ما نكلم بعد لكن الاهل على تواصل و صار الوضع محرج لي و له

قلت له من تحت يدك. بزنس اند بلچر دونت مكس. لا تخلط العمل بحياتك الخاصه ما تدري اذا الانسان سيء الا بعد مده و مخالطه تخيل لو يطلع سوالفك الخاصه

في واحد سافر دراسه ايام الثمانينات و اول ما وصل امريكا جلس يخربط بسوالف شينه و اتصل على رفيجه الي ما نجح بقبول الدراسه و قال له عن سوالف الوناسه
و زوجه رفيجه تعرف زوجته و خر السوالف لها

بنفس اليوم زوجته اتصلت عليه وقالت له يا ترجع بكره يا اروح بيت اهلي مع العيال

خرب و فضح نفسه و لين يومكم ما كمل دراسه ولا صار سينير الا بعد 25 سنه حك بوظيفه في الشمس لين قال بس

زملاء العمل لهم التقدير لكن مش اي زميل ممكن نطلعه على حياتنا الخاصه فقط السنع

و اكيد معماري فاهم و عارف هالشي

معماري برز عمرك ادور طراد من الحين هههههه

عاد انا كلش مب مال بحر

أما اللي راح أمريكا هذا ما يعرف يتصرف .. كان ودى هله معاه واستانس .. انا كنت مالج ومقرر اتزوج الصيف وإخوي الله يغفر له قرر يتزوج شهر واحد وحدد وتجهز .. إستفزني إنه أصغر مني ويتزوج قبلي وزوجتي مدرسة قلت خلاص نتزوج ألحين ونسافر وباقي لي شوي واخلص وشقتي موجودة لي بنفسي إخوي الصغير كان توه يايني وتعرف على شباب هناك وعادي يستوي لاجيء مع أي حد منهم .. سويت زواج سريع بتحضير سريع وبرخيص ذاك الوقت وكنت مجمع مبلغ زين فوق 500000 من الرواتب استهلكت يمكن 200000 منه للزواج وسافرنا بعد زواج اخوي بيوم .. تزوجت قبله بيومين بس

رحنا ميامي الحب ونزلنا المطار وركبنا ذاك التكسي شفر كابرس ورحنا صوب شقتي وكنت مخليها ملخبطة وإخوي كان مستقر مع واحد من ربعه اللي توهم مبتدئين .. يوم دخلنا الشقة الا تفاجأت ام عبدالله من أكواب الشاي شكثرهم كلهم اللبتون فيهم ولا انغسلوا كنت كسول حدي .. ثاني يوم رحت الجامعة ورجعت الا شفيها شقتي متغيرة تبرق نظيفة .. وكانوا لي ربع متزوجين هناك قلة بس لهم اجتماعات حق أهلهم وقعدات حلوة واندمجت زوجتي معاهم ناس من قطر ومن الكويت والبحرين والسعودية

إستوت لنا ذكريات حلوة وكنت شبه فاضي مواد بسيطة وأغلب وقتي صياعة ودوارة في كل ميامي .. رجعنا قطر شهر 8 ويا ليتني تميت أكثر وكان عادي وقتها لا ضغوط ولا شيء بس فكرت زوجتي تولد في قطر كنت عنصري ولا ابي جوازهم ويمكن غلطان

[معماري قطري]

نسيت اقول زوجتي خذت اجازة بدون راتب وسافرنا سياحية حتى وقتها شريت التذكرة بواسطة واحد لبناني طلعت التذكرة لسنة رايح راد ب 3700 ونزلنا لندن ليلة قبل ما فيه رحلات مباشرة .. لا ويوم وصلت مستانس طرشت للسفارة كتاب اني تزوجت وابغي تذاكر لزوجتي وراتب زوجة حولوا رسالتي لقطر .. وفي قطر ردوا ليش يتزوج بدون موافقة مسبقة وعليه محاكمة ولا عطوني ريال .. وزين السفارة ما قالوا لي كنت باشغل بالي واحتمال ما امشي في دراستي .. يوم رجعت قطر سووا لي محاكمة عمل وكانت بسيطة إسمها أكبر منها .. قلت والله ما ادري إن الزواج ممنوع ولو ادري كنت قدمت طلب

[ابو عبدالله.]

ههههه خوش سالفه

اهم شي المحاكمه

ذكريات جميله و امريكا ايامها سابقتنا بسنوات. حتى مخك يتغير و يشوف بنظره افضل و اوسع من قبل

انا لفيت كذا ولايه

تكساس و وست فيرجينيا و كولورادو و غيرها

غلطتي ما رحت ميامي ولا لا فيغاااااس ههههه. كنا على قدنا. ايامها الفقر ضارب

الحين الي بيروح يسمت له موتر كشخه على حساب الوالد و مب عاجبه بعد

حظ هالجيل يتدلع

زين

طلعت مب مال بحر ولا بر ولا كوفي شوب ولا مال عشوات و زبايح مفطحه هههه

ممكن اعرف شنو جوك هههههه

لا تقول القراءه بذبحك :)

[ابو عبدالله.]

صدقت اخوي ابوعبدالله التجربة تختلف عن الكلام مثل اخونا الغالي معماري قطر عني مافكرت اجرب مثل ماقلت اخوي انت ان المشكلة ممكن تتطور او غيره والواحد مايحب عوار الراس العلاقات الرسمية بالعمل واصدقاء العمل اشوفها افضل ياما اصدقاء عمل وفي العمل تفتح معاه شوي وتطيح الميانة ممكن تلقاه قط كلمة بدون يثمنها او يقدرها في ناس تشوفها عادي ممكن ان الشخص مايقدر الكلام لكن انا بالنسبه لي ممكن هالكملة تشغل بالي شهور وسنوات وممكن توصل فيني اتعامل معاك فقط بالسلام والعمل يعني معاك شغل معاي ممكن اتكلم معاك غير كذا انسا

اما ترافج واحد و يطلع هيس ههههه تتحسف انك وثقت فيه و اذا بو لسان العن و العن

ما يهم الشخص. الحسافه على الثقه بخصوصياتك هذه الي تذبح

وايش لك بالبحر و اهواله و رزق الله على السيف

ربعنا موجودين برع الدوام و ما عندنا وقت اصلا نرافج زملاء العمل

[معماري قطري]

ههههه خوش سالفه

اهم شي المحاكمه

ذكريات جميله و امريكا ايامها سابقتنا بسنوات. حتى مخك يتغير و يشوف بنظره افضل و اوسع من قبل

انا لفيت كذا ولايه

تكساس و وست فيرجينيا و كولورادو و غيرها

غلطتي ما رحت ميامي ولا لا فيغاااااس ههههه. كنا على قدنا. ايامها الفقر ضارب

الحين الي بيروح يسمت له موتر كشخه على حساب الوالد و مب عاجبه بعد

حظ هالجيل يتدلع

زين

طلعت مب مال بحر ولا بر ولا كوفي شوب ولا مال عشوات و زبايح مفطحه هههه

ممكن اعرف شنو جوك هههههه

لا تقول القراءه بذبحك :)

شيل بس البحر الباقي كله ماشي

انا ما حبيت في أمريكا الا حياة فلوريدا ككل وكاليفورنيا رحت شوي واشنطن دي سي ما عجبتني ونيويورك كذلك ما حبيتها ويمكن أكون ظالمها لأني في السنتر ولا سقت ولفيت مناطق الأطراف والضواحي

[معماري قطري]

اما ترافج واحد و يطلع هيس ههههه تتحسف انك وثقت فيه و اذا بو لسان العن و العن

ما يهم الشخص. الحسافه على الثقه بخصوصياتك هذه الي تذبح

وايش لك بالبحر و اهواله و رزق الله على السيف

ربعنا موجودين برع الدوام و ما عندنا وقت اصلا نرافج زملاء العمل

زملاء العمل لو كانوا زملاء مهنة وبينك وبينهم شغل وهالشغل مستمر أكيد بتحب تتواصل معاهم دائماً .. أقل شيء عندكم شيء مشترك