احذر من الكراجات فهي تتعلم و تجرب على حسابك

[ابو عبدالله.]

السلام عليكم

من مر بتجربه عطل بالسياره و دفع تكلفه التصليح ولا يزال العطل موجود

تعلمت درس قاسي من الكراجات الخاصه لكن بعد فوات الاوان

من سنوات و تحدث معي مسأله دفع تكلفه للتصليح و يضل العطل موجود و كأن الكراجات تتعلم و تجرب او بعضها يتعمد تحديد المشكله دون علم صحيح بها

من شهر و سياره تعطلت و غريت امور و تكلفه و ضل العطل موجود الى ان ادخلتها للوكاله و تحدد العطل بسنسر واحد للكام شافت فقط
مع ان الكراجات حددت اسلاك البلكات و سنسر الهواء و فيول بمب الخ

لولا ان صديق نصحني بفحص الوكاله ب 450 ريال لكشف العطل الحقيقي كنت سأتغرم اكثر من 4000 ريال بالكراج
و قيمه الفحص تلغى اذا صلحت السنسر بالوكاله بقيمه 580 ريال فقط

سياره اخرى بعطل بثلاجه المكيف تكلف 4000 ريال
لكن بكراج آخر اكتشف ان انبوب صرف مياه الثلاجه مسدود و اصلحها ببلاش مجرد اكراميه للشخص الامين الي كشف المشكله الحقيقيه

سياره صالون مختله ميزانيه الرود تكلف 200 ريال . و كراج حدد التصليح بتغيير ذراع و جامبين و بوشات الاطار ب 1400 ريال اضافه لتكلفه الميزانيه

يمكن اننا نسينا كيف نتأكد من الاعطال بسبب هروبنا من غلاء تكاليف بعض الوكالات الى كراجات ارخص لكن لا نرى او لا نحدد ما يجب فحصه بالوكاله اولا

ثقافتنا كمستهلكين بنيت على صوره زرعت عن رخص الكراجات مقابل الوكالات

و ضلت مستمره الى ان وعى البعض اننا نفضل الكراجات فتحولت الى حقل تجارب و تعليم و دفع تكاليف غير مطلوبه فقط للهروب من الوكالات

بعض التصليحات مقبول اجراءها بالكراجات مثل الفرامل و التورنا. و تصليح رادييتر و انابيب و اناره الخ

لكن اعطال المحرك و السنسرات و المكيف و مضخات البترول و الامور المعقده تحتاج فحص سليم عبر خبراء الوكالات. حتى لو للفحص و العثور على الاعطال الحقيقيه و تحديدها و اخذ الخيار بعدها بأي مكان تصلح

اود ان اشكر الصديق الناصح و حل مشكلتي بكذا سياره و توفير الاف من قيمه تصليحات غير مطلوبه اصلا

و انصح الجميع بالحذر في موضوع اعطال السيارات


من مر بتجارب مماثله اتمنى التعليق و التوعيه

دمتم بود

[فيصل99]

اخبر كنت احس مشكله في تبديلات القير احيانا على فترات متقطعة ومتباعدة فـ رحت إلى كراج متخصص في الجيور وركب معاي سعادة المهندس الباشا هناك وقالي يبدو أنه الكلتشات منتهية شي من هالقبيل المهم قال لازم ننزل القير والتكلفة قريب ال 5000 ريال كنت بدخل السيارة ولكن قدر الله أني ماقدرت أخلي الموتر عنده وشاورت الموضوع بعدها على واحد من الربع قالي هل غيرت زيت الجير قبل قلت له من زمان ماغيرت قالي غير وجوف غيرته ماكلفني إلا شي بسيط وإختفت المشكله والموتر طبيعي إلى اليوم والحمد لله .
صاحب ثاني لي عنده مشكله في الفيوزات تحترق ويبند الموتر ومن كراج لكهربائي كل واحد يتفسلف بشي وياخذ منه ما لا يقل عن 800 ريال والمشكله ما نحلت .
اذا تبي بعد بتذكر لك

[سالم الزهران]

صرت اتجاهل الاعطال الخفيفة لين يبين لي العطل مضبوط، السيارات اليوم حساسات وكمبيوتر ممكن يطلع لك مشكلة عقب غسيل موتر او بعد مطب او لفة قوية.

لذلك ما ارى فيه بأس ياخذ العطل وقته افضل من انتطار المتنبئين اللي بالصناعية.

[ابو عبدالله.]

ههههه المتنبئين. عجبتني الكلمه

و اخونا فيصل مرت بتجارب مشابهه

الكل يتفنن في ارغام المستهلك مبالغ كبيره مقابل اعطال بسيطه و يوهمونهم بعيوب اكبر

هل تعتقدون ان حمايه المستهلك ممكن تلعب دور في هالموضوع

اعرف انهم شغالين مضبوط على الوكالات لكن الكراجات كيف يضبطونهم ؟

اعتقد ممكن يرغمون الكراجات على كتابه وصل بنوع العطل الي ذكره الزبون واذا كتب نوع التصليح وما ضبط التصليح يمكن ادانته او تغريمه عن التلاعب بالزبائن

او تعمد اظهار اعطال غير صحيحه ولا تتناسب مع المشكله المذكوره بالبدايه

ايش رايكم

ممكن حمايه المستهلك تفيدنا ضد اي تلاعب من الكراجات ؟

[Rider]

الكراجات مافيها فنيين خبره وسيارات تطورت مب السيارة السهلة كمبيوتر وسنتر وأشياء وايد لي في الكراجات مايعرفون لها

[معماري قطري]

انا صيانة عادية استويت ابعد عن الوكالة وأسويها في كراجات متخصصة والتكلفة بسيطة مقارنة بالوكالة وفي وقت أقل

[المبرمج صلاح]

للاسف الشديد 99 % من فني الكراجات في الدوحة هم فقط عمال للفك والتركيب فقط اذا شي فني ممكن يكلفك تبدل القطعة كاملة لان هذا اقصى حد علمه
بالتالي انا الاشياء البسيطة لازم اعرف مشكلتها بنفسي واروح اشتري القطعة جديدة مكان الخربانة اقوله فك هذه وركب هذه ما اعطية مجال يحلل بنفسه
الاشياء المعقدة اللي شكيت فيها و حاولت وندمت خليتهم يسوونها القير خربوه كامل وكلفني 4 الاف ريال وما ضبط
من يومها انا اي شي كبير وماعرف له في الوكالة اضمن
اما الاشياء الثانية الحمد لله اعرفها بنفسي واروح لهم اقولهم ايش يسوو بالضبط

[ابو عبدالله.]

الكراجات مافيها فنيين خبره وسيارات تطورت مب السيارة السهلة كمبيوتر وسنتر وأشياء وايد لي في الكراجات مايعرفون لها

لاحظت اخوي ان فعلا. غير متخصصين و الاغلب بالبركه اذا الموتر فيه شي معقد بس الامور البسيطه سفايف راس الراديتر هوز الخ

[ابو عبدالله.]

انا صيانة عادية استويت ابعد عن الوكالة وأسويها في كراجات متخصصة والتكلفة بسيطة مقارنة بالوكالة وفي وقت أقل

بعض الكراجات التخصصه اغلى من الوكالات

من فتره رفيجي اخذ موتره لكراج متخصص بالامريكي. و صلح. و عرف ان الوكاله تصلح نفس المشكله بسعر اقل ب 400 ريال
كانوا مسوين عرض بالوكاله

يعني لازم تكون ابديت عشان تعرف وين تصلح :)

[ابو عبدالله.]

للاسف الشديد 99 % من فني الكراجات في الدوحة هم فقط عمال للفك والتركيب فقط اذا شي فني ممكن يكلفك تبدل القطعة كاملة لان هذا اقصى حد علمه
بالتالي انا الاشياء البسيطة لازم اعرف مشكلتها بنفسي واروح اشتري القطعة جديدة مكان الخربانة اقوله فك هذه وركب هذه ما اعطية مجال يحلل بنفسه
الاشياء المعقدة اللي شكيت فيها و حاولت وندمت خليتهم يسوونها القير خربوه كامل وكلفني 4 الاف ريال وما ضبط
من يومها انا اي شي كبير وماعرف له في الوكالة اضمن
اما الاشياء الثانية الحمد لله اعرفها بنفسي واروح لهم اقولهم ايش يسوو بالضبط

كلام سليم اخوي صلاح

الجير و المكينه و الكمبيوتر لازم وكاله على الاقل الضمان موجود

الكراجات اقصى ضمان بيعطيك اسبوع على مكينه كامله بعدها خلك على اعصابك لين اليوم الي تبيع فيه الموتر

الي ضايقني ان كراج قال بدل اسلاك البواجي ب 2500 غير شغل اليد و بالوكاله طلع العيب بسنسر الكام شفت ب 580 ريال فقط

[sara jsm]

ترى السيارة مثل الانسان لازم تعالجها صح ..
انت دافع مبلغ وقدره في شراء هالسيارة واخر شي تروح توديها ( كراج ) عشان اي عطل !!؟
مايصير هالشي .. بالعقل لازم توديها الوكالة وحتى لو الضمان خلص يااخي كمل مع الوكاله عالتشييك الدوري ..
على الاقل ضامن ان القطع اصليه .. والفحص حقيقي .. مب تروح بقطعه وتطلع بقطعه ثانيه ..
في امور الواحد مايسترخص فيها .. انت مب كل يوم بتاخذ سيارة .. :no:

[تاجر كشخة]

انا اشوف ان موضوع الكراجات لازم يتغيير بشكل جذري
اولاً : تغيير العمالة الحالية الى فلبينية لمهنيتهم أو اروبية او حتى عربية متخصصة بشرط حصول كل العمالات على شهادة مهنة
ثانياً : تغيير شكل الكراجات الحالية من شكلها المتهالك لتوفير بيئة عمل مناسبة ومنظر يليق بالذوق العام مع تفتيش دوري بذلك
ثالثاً : الزام جميع الكراجات بتوفير ضمان شهر كحد ادنى

[ابو عبدالله.]

ترى السيارة مثل الانسان لازم تعالجها صح ..
انت دافع مبلغ وقدره في شراء هالسيارة واخر شي تروح توديها ( كراج ) عشان اي عطل !!؟
مايصير هالشي .. بالعقل لازم توديها الوكالة وحتى لو الضمان خلص يااخي كمل مع الوكاله عالتشييك الدوري ..
على الاقل ضامن ان القطع اصليه .. والفحص حقيقي .. مب تروح بقطعه وتطلع بقطعه ثانيه ..
في امور الواحد مايسترخص فيها .. انت مب كل يوم بتاخذ سيارة .. :no:

صباح الفل

نعم امور لازم الوكاله حتى تغيير الزيوت و البلكات و الامور الي لها فتره و ممشى تتغير عليه هذه لازم بالوكاله وهذا الي اسويه عشان يبين متى غيرت و ما امشي اكثر من اللازم على الزيت او الجير او البلكات. حتى وقت ما ببيع الموتر الشراي يشيك بالوكاله و يتطمن ان الصيانه الدوريه ماخذه حقها

لكن ايضا بعض الامور مبالغ فيها بالوكاله. كل تغيير للفرامل لازم تورنا عشان مرتين تورنا بعدها غير الدرام ويل يعني كل سنه بغير درامويل بالفين ريال. ليش

رادييتر يسرب و تصليحه بقطعه الهد العلوي قيمته 120 ريال و الشغل ب 150 تقريبا. بالوكاله لازم تغيير الرادييتر ب 4000 غير يطلعون امور بسيطه مع الرادييتر و توصل 6 الاف

صارت معاي من فتره بموترين يعني بدفع 12 الف و الشغله تتصلح بكراج للسيارتين 1200 بالكثير

هالكلام ما ينفع بالالماني و الاوروبي. هذولا لازم وكاله و بس. ولو عندي هالموديلات مستحيل اصلحهم برع الوكالات و مستحيل اخلي عندي موتر اوروبي اذا خلص ضمانه و كلكم تعرفون عن تكاليف الاوروبي اذا بدون ضمان

صديق بالعمل موتره اوروبي مر بنقعه مطر و الماي دخل للجير مع انه فورويل و الضمان ما يغطي عوامل الطبيعه ولا التأمين الشامل مع ان موتره شبه جديد و عليه ضمان و اضطر يدفع 85 الف تصليح او تبديل الجير هذا بعد الهواش و الصك و الحك و خصم

باعها و شرى امريكي قال حرمت الاوروبي و مصاريفه. حتى الضمان ما يسعفك بكل وقت

[ابو عبدالله.]

انا اشوف ان موضوع الكراجات لازم يتغيير بشكل جذري
اولاً : تغيير العمالة الحالية الى فلبينية لمهنيتهم أو اروبية او حتى عربية متخصصة بشرط حصول كل العمالات على شهادة مهنة
ثانياً : تغيير شكل الكراجات الحالية من شكلها المتهالك لتوفير بيئة عمل مناسبة ومنظر يليق بالذوق العام مع تفتيش دوري بذلك
ثالثاً : الزام جميع الكراجات بتوفير ضمان شهر كحد ادنى

جبتها مضبوط اخوي

من الاساس تتغير الكراجات لبيئه مناسبه شكلا و مضمونا

ترخيص المهنه او شهاداتها لازم تتوفر

احنا ب 2020 و صرنا بلد متحضر بامور كثير الا الكراجات حتى ما تدري بعضهم وين يصرف نفاياته من زيوت و شحوم و بعيني من كم سنه بكراج للدراجات شفت زيت يتصرف بالصرف الصحي

العماله ما عندها وعي بالبيئه ولا السلامه ومثل ما قالوا الاخوان يفك و يركب بس

[راعي الكورفت]

لو موترك جديد مايحتاج تصلحه يمشيك 5 سنين من دون مشاكل وتحت الضمان لو صارله شي توديه الوكاله

لكن المشكله لو السياره قديمه ! فمالك الا الكراجات .. لان الوكالات فعليا يصلخون في السعر

اخذها قاعده (الكراج مثل الحلاق)
ان لقيت واحد شاطر فخلك معاه ولا تغير

انا ساكن في الدوحه لكني اصلح مواتري القديمه في مسيعيد (كراج الجنوبي) .. ميكانيكي شاطر ورخيص

[سالم الزهران]

قديماََ اذكر وديت تويوتا سيدان الوكالة.. طلبو 912 ريال حق فحص شامل لانها خارج الضمان. دفعت لهم وعقب الفحص طلعوا لي مشاكل بحدود 6 الاف ريال.. سحبت عليهم ونا طالع وقفت اصب بترول طفت السيارة، اذكر اني دفيتها دف لين ابعدتها عن الزحمة.

رجعت للوكالة جحدوني الحاصل قبل الزيارة كانت سيارتي افضل، لان صار عندي مشاكل في السنسور حق الهواء.. بدل غير ما عاد نفع. فالوكالات تنفعك او تضرك (حض ونصيب).