كلية للبيع .. موضوع مؤسف!

[SouthK]

السلام عليكم و رحمة الله و بركاته

كلمني امس واحد صايبه الهون
قطري اصيل و اخلاقه حميدة
بث همه و القلب مغبون
يطلب الله و دعوة من يحبه

ما طلب مني معونة و لا يحزنون
و باب الدعاء و الفرج عند ربه
قلت ابث همه لمن بالخير يسترون
من شانت دنياه و على أهله

عليه دين ببخس المال الملعون
لكن قصر ما باليد امسكه
طق باب المعونة و صار مطعون
حتى ولد العم طرده و رده

راح لمن عنده مال قارون
بالزجر و العنف من المجلس طرده
الكل و من عرف بالصد ما يوفرون
هدوه للدنيا و قصر المدة

حتى صوته ما وصل بالتلفون
ما لقى من اهل المعنوة رفجة
قال أروح للمساجد و أصير مجنون
عنده عزة النفس تحكمه و ترده

قال لي اهج و اترك الظنون
في كل من جيته و طلبته
قلت له ربك من طلبته ممنون
عليك بالدعاء و السبب أخذه

ما طلب جاه و لا ثلاثمائة مليون
على ان المال محد يرده
عليه بعد الثمانين ألف اربعون
لأجل ما ينحبس و يفك أسره

من أهل خير كنتوا و يكونون
وصلكم العلم و من يسمعه
أبد لا تردون من جاكم مظنون
ترى المذكور ناوي يبيع كليته

و لاتعليق!

للتوضيح: الشخص المذكور صديق عليه دين و مب قادر يسده و ما ابغي اخوض في التفاصيل لان الايجاز افضل من الاسهاب.

[Dana’1]

الله يفرج همه و يقضي دينه

[sara jsm]

الله يفرج همه .. خل ياخذ اوراقه لقطر الخيريه ..
كل كم يوم اشوف المشاهير يحطون تبرعات للمديونين ..
وان شاءالله اموره تنحل ..

[سالم الزهران]

في الوقت اللي ناس كثير تعبر نحو الثراء نجد بعد ناس تكافح للبقاء. المشكل هو محد يدري شنو واجبه اذا كان عليه واجب أصلاََ

[SouthK]

الله يفرج همه .. خل ياخذ اوراقه لقطر الخيريه ..
كل كم يوم اشوف المشاهير يحطون تبرعات للمديونين ..
وان شاءالله اموره تنحل ..

4 شهور يا اختي و الطلب قيد الاجراء ..

[SouthK]

الله يفرج همه و يقضي دينه

اللهم آمين و يجيرنا من همه!

[SouthK]

في الوقت اللي ناس كثير تعبر نحو الثراء نجد بعد ناس تكافح للبقاء. المشكل هو محد يدري شنو واجبه اذا كان عليه واجب أصلاََ

واجبنا هو شكر الله على نعمته و ما نكون من المسرفين!

[مستر بن]

.
.
.

الله يفرج همه يارب . .

[SouthK]

.
.
.

الله يفرج همه يارب . .

اللهم آمين

[طلعة الروح]

4 شهور يا اختي و الطلب قيد الاجراء ..

لا حول ولا قوة الا بالله وين المسؤولين وليش ياخذ هالكثر وقت

خله يراجعهم ويعرف من شنو التأخير

[SouthK]

لا حول ولا قوة الا بالله وين المسؤولين وليش ياخذ هالكثر وقت

خله يراجعهم ويعرف من شنو التأخير

الرجل راجعهم وايد على كلامه و ما في جديد!

الله يعينه

[مرتبش]

الله يعينه وييسر امره
السلف تلف لابد للانسان من تحاشي الدين الا في اضيق الحدود .
عن الجمعيات الخيرية هذي الجمعيات تجمع تبرعات لاغراض مختلفة حسب رغبات المتبرعين فممكن الجمعية عندها فلوس لافطار صائم مثلا حسب اشتراط المتبرع وماتقدر تستخدمها في ديون المعسرين .. ممكن توعية اكثر بهذا الجانب مطلوبة منهم.

[طلعة الروح]

ليش ما ينضاف موضوعه ك تبرع في صفحة الجمعية الخيرية والناس تتبرع
لين الله ييسرها ويكتمل المبلغ؟

[SouthK]

ليش ما ينضاف موضوعه ك تبرع في صفحة الجمعية الخيرية والناس تتبرع
لين الله ييسرها ويكتمل المبلغ؟

هذا اقتراح جيد لكن ننتظر رأي المسؤول.

[SouthK]

الله يعينه وييسر امره
السلف تلف لابد للانسان من تحاشي الدين الا في اضيق الحدود .
عن الجمعيات الخيرية هذي الجمعيات تجمع تبرعات لاغراض مختلفة حسب رغبات المتبرعين فممكن الجمعية عندها فلوس لافطار صائم مثلا حسب اشتراط المتبرع وماتقدر تستخدمها في ديون المعسرين .. ممكن توعية اكثر بهذا الجانب مطلوبة منهم.

الحاجة هي اللي تخلي الواحد يتسلف .. لو انه محصل ما راح للبنك لكنه عزيز نفس!

[طلعة الروح]

دراسة حالة للشخص مثل سبب الديون المتكرره اللي عليه والغرض منها.
سبب عدم قدرته الحاليه على السداد.
مصدر دخله الحالي.

وبناءا عليها يقدرون يسددون له المبلغ كامل او حتى ينزلونه اعلان للتبرع في موقعهم لين يتجمع كل المبلغ ويتسدد الدين

[SouthK]

دراسة حالة للشخص مثل سبب الديون المتكرره اللي عليه والغرض منها.
سبب عدم قدرته الحاليه على السداد.
مصدر دخله الحالي.

وبناءا عليها يقدرون يسددون له المبلغ كامل او حتى ينزلونه اعلان للتبرع في موقعهم لين يتجمع كل المبلغ ويتسدد الدين

الغالبية من الشعب عليهم ديون فمن بيخلون و من بيعطون؟؟