ليش ما تكون عندنا شركة نظافة عامة مساهمة ومتطورة

[معماري قطري]

أتوقع الكل ملاحظ كيف شركات النظافة العامة تشتغل .. من ملاحظاتي يسحبون صندوق القمامة شوي جهة الشارع اللي هو ضيق أصلاً ويتركونه مكانه .. بعض الأماكن متروك على مكان ترابي مرتفع شوي عن الشارع وصعب دفعه فوق والمفروض تنعمل له قاعدة خرسانية تحت ومكان مخطط له وثابت فيه وشوي بعيد عن طرف الطريق حتى ما يضايق السيارات

هذي الشاحنات اللي تجمع القمامة أوقات تسوي مغامرات وتدخل شارع بمسار واحد وعكس السير وهذا برؤيتي بعيني محد قال لي .. حتى استغرب شلون بكل وقاحة مقابلني وليتاته مرتفعة في عيني ولا يتحرك .. غير عن صوت هذي الشاحنات المزعج وازعاج اللي يشتغلون فيها

أما نظافة الشوارع خصوصاً الداخلية وترتيبها فهي تحت المستوى لبلاد فيها خير وفيها مؤسسات وشغل منهجي

هذا فيديو عن قليل من الآليات الحديثة لتنظيف الطرق والشواطيء والمطارات وأعماق البحار والكثير غير هذي الآليات موجود في العالم وشركات النظافة عندنا بدائيين لأن عقدهم بدائي


https://www.youtube.com/watch?v=HJQV-BMWiIk

إقتراحي لين متى بتبقى شركات الخدمات العامة هذي تاخذ عقود كبيرة من الدولة وتسوي شغل يفشل وليش ما نتجه لشركة مساهمة كبرى تكون وتولد كبرى تسوي كل شغلات النظافة والتجميل وحتى الزراعة .. منها تستفيد الدولة ويستفيد الجميع وتكون رمز وطني مثل وقود وبلدنا وباقي شركاتنا المساهمة والوطنية

وهذي يبغي لها سرعة انشاء حتى تكون موجودة قبل 2022 وتظهر قطر بمظهر لائق

[SouthK]

انا ما اعرف ليش كل شي رابطينه ب 2022 ... ترى الدنيا ما بتوقف بعدها و لازم يكون تفكيرنا للاستدامة مب للحدث اللحظي!!!!

فكرة انشاء شركة مساهمة بيضر بمصالح تجار .. بمعنى آخر ما راح يستوي لكن هناك حلول لتطوير مستوى الخدمات!

اول شي بدل ما يكون صندوق القمامة محطوط على الرصيف او في الشارع يكون له مكان مخصص على الرصيف و ثابت و سيارة جمع القمامة بميكانيكية معينة ترفعه و تفرغه من محتواه و عقب ترده مكانه مثل ما هو موجود و مطبق في دول مختلفة و بفعالة ممتازة.

اقتراح ثاني هو تفعيل آلية المخالفات المرورية و الجدية من الجهات المسؤولة على تطبيق المخالفات لأن دام اللي خالف عارف ان محد بيحاسبه فالمخالفات مستمرة .. و حتى الجهات البلدية تطور خدمة التبليغ على مخالفات منتسبيها و هذي بتحد من المخالفات بشكل كبير و هذي عن تجربة شخصية خطوة فعّالة.

ثالث شي و هو الاهم تطوير برامج توجيه من الجهات البلدية لمنتسبيها عن ضرورة الالتزام بالقواعد و الآداب العامة و محاسبة المستهترين و هذا موضوع طويل نرجو تطبيقه.

[معماري قطري]

المشكلة يا اخوي كلها شركات خاصة ولا حد منتسب للبلدية العقد شيء والواقع شيء آخر والتكلفة غالبها ربح للمتعهد ويسوي اللي يقدر عليه بأرخص ما يمكن .. ولازم بيضغطون عليه وقت كاس العالم حتى تبين الدوحة جميلة للقادمين مب لنا إحنا وهذا الواقع .. عني انا أتمنى كل شيء صح من زمان

حتى الزراعة تستلمها شركات زراعة وبعضها مؤسسة في خارج قطر عرفت منها شركة عمانية جيدة .. وهذا ما يسمى الشراكة بين القطاع العام والخاص وبدوا فيه من زمان وناوين يتعمقون .. هو أكيد زين لكبار التجار والمتمكنين والقادرين على الفوز بهذي المناقصات لكن يبقى المستثمر الصغير والوسط غير قادر يساهم .. لذلك تمنيت لو يتم تأسيس شركة مساهمة تستلم مجال النفايات المنزلية وتكون متطورة بمثل هذي الآليات الحديثة

صدقني مب خسرانين لو تبقى ثلاث سنين بدون أرباح طول ما بلادنا تكون في خير ونظيفة ومرتبة

شيء ثاني هو إعادة تدوير المواد أعتقد الحكومة أنشأت مصنع تدوير متطور وهذا ممكن ينزل شركة منفصلة إكتتاب عام أو يتحول تابع لشركة النظافة هذي .. حتى الجلود للذبائح ما ادري من محتكرها ياخذها برخيص ويصدرها للخارج بغالي ولو تدخل في التدوير وتكون ملك الجميع وفائدتها للمساهمين أفضل بكثير

مثل هذي الشركة بتكون ناجحة وقوية وكبيرة مثل وقود وغيرها من شركاتنا الكبيرة

[SouthK]

يا الغالي كل اقتراح تفضلت به لا يخدم المصالح الخاصة و عى هذا الاساس لن يتم الالتفات له!!

[مضارب متعور]

هذا القطاع من غير الصواب إنه ما يكون قطاع خاص وتقوم فيه شركات خاصة.
فالمطلوب لتطوير مستوى الخدمة تحديد اشتراطات أكثر في عقود الخدمة نفسها وتحديد المهام المطلوبة والمستوى المطلوبة والرقابة عليها.

[النهار]

انا تقريبا كل يوم اقوم من النوم مفزوع وراء بيتي مطاعم ومحلات الساعه 2/30 او ثلاثه الا ربع تجي السياره تشيل الزباله وانتوا بكرامه
علشان يفرغون الحاويه يستخدمون طريقه الهز القويه للحاويه اربع حاويات هالوقت يكون سهده فجأه يطلع صوت تقول انفجار اوحادث

[معماري قطري]

انا تقريبا كل يوم اقوم من النوم مفزوع وراء بيتي مطاعم ومحلات الساعه 2/30 او ثلاثه الا ربع تجي السياره تشيل الزباله وانتوا بكرامه
علشان يفرغون الحاويه يستخدمون طريقه الهز القويه للحاويه اربع حاويات هالوقت يكون سهده فجأه يطلع صوت تقول انفجار اوحادث

صحيح إخوي النهار شغل بدائي بآلات بدائية والعالم تطور وايد في هذا المجال .. عرضت بعض التطور وباعرض المزيد .. فيه آليات هادئة وفيه الآن كهربية لا تلوث ولا روائح وفيه طرق لتفريغ القمامة .. فيه ربلات خاصة ما تسمع رقع الباب وفيه الرخيص .. المتعهد الخاص مب متفرغ يجيب الغالي حده تاتا مستعملة من الهند والا من أي دولة فقيرة

الله يعينك .. انا هالصوت أسمعه في مكتبي بس لعدم وجود ستاير ثقيلة والجدران غير معزولة 15 سم بس ومن حاوية وحدة يرقعونها من قلبهم تقول يتهاوشون معاها .. غرف النوم وبقية البيت سويتها طابوق دبل وكسرات للدرايش تساهم في كسر الصوت وستاير سميكة مع بلاك آوت كلها تمنع الصوت ما تسمعه كلش .. حل سهل لك ضيف فوم حتى 10 سم سيدة بدون ديكورات بس تقدر تسوي كسرات بسيطة فوق وهذا يتثبت بلاصق وميكانيكل وينعمل فوقه بلاستر بيعطيك عزل صوتي وعزل حراري خرافي والدرايش أما تركب يو بي في سي نوعية جيدة وتركب عليها ستاير سميكة والا تسوي لها صيانة متطورة وتركب ستاير سميكة مع بلاكآوت

[معماري قطري]

هذا القطاع من غير الصواب إنه ما يكون قطاع خاص وتقوم فيه شركات خاصة.
فالمطلوب لتطوير مستوى الخدمة تحديد اشتراطات أكثر في عقود الخدمة نفسها وتحديد المهام المطلوبة والمستوى المطلوبة والرقابة عليها.

دول العالم تستعمل الشركات الخاصة بإشراف قوي وبدون واسطات وشيلني واشيلك وقوانين صارمة تغيير الشركة يتم بشخطة قلم .. عندنا تحصل على الساحة بس شركة وحدة ماكلة اليابس والخضر .. وبالنسبة لنا كلنا نذكر شلون كانت محطات البترول قبل وشلون أصبحت في عهد وقود .. كلنا نتذكر خدمات المقاصب قبل وشلون أصبحت تحت إدارة شركة مساهمة قوية مثل ودام ودوم دعم الدولة ضروري .. دولة الله مغنيها وموسع عليها وتحب توسع على مواطنيها وتشركهم في التنمية وفي تنمية حلالهم

انا واحد من الأشخاص اللي طالبوا بمحطة بترول وغيري كثيرين من زمان وكان الحل شركة وقود

شركة بلدنا والشركات الزراعية المنتجة غيرها بعد أتمنى تتجه لتتحول لمساهمة عامة وبلدنا تحولت خطوة إيجابية

[معماري قطري]

يا الغالي كل اقتراح تفضلت به لا يخدم المصالح الخاصة و عى هذا الاساس لن يتم الالتفات له!!

سيلتفت إليه بإذن الله لثقتي فيمن يريد الخير لجميع أهل قطر وليس لأشخاص محدودين يؤدون شغل لا يرتقي لما تطمح له الدولة ككل

[معماري قطري]

إقترحت موضوع إعادة التدوير من حول 15 سنة إلى 20 سنة والحمد لله تم بصورة مهما كانت مبسطة الا إنه تم وأتمنى تتحول هذي لشركة مساهمة وتتوسع بقوة لكل مجالات التدوير وهي مجالات صعب أن تحصى وتدخل فيها تكنولوجيا مب صعبة على مطوعين الصعايب

[سالم الزهران]

كل شيء ممكن، اتذكر بعض الحارات القديمة بالمغرب ما كنت تتصور انها ممكن تترتب، زينوها واصبحت نظيفه ودواعيسها تنظف بالبخار وكله عشان سائح يجي يفرغ مخباته ويشتري كم شال صوف وكم قبعة تصنعها العجائز.

الحل سهل اذا لمعت في ذهنك فكرة وتصور للنظام اللي بتعتمده وايجابياته.

انا اشوف الحاويات الكبيرة مالها داعي ابداََ، والمفروض السيارة الكبيرة تلقط الاكياس من طرف الشارع ولا تدخل للشوارع الفرعية، والعامل هو من ينزل بدري ويلقط درام ورى درام ويجهزها للسيارة الكبيرة على ناصية الشارع، الموضوع يبي له درام بلاستك بو تايرين تحت و عامل واحد ممكن يخدم شارع فرعي فيه عشر فلل ويخلص منهم بنص ساعة.

[SouthK]

سيلتفت إليه بإذن الله لثقتي فيمن يريد الخير لجميع أهل قطر وليس لأشخاص محدودين يؤدون شغل لا يرتقي لما تطمح له الدولة ككل

ننطر و ما راح نشوف!!