حل الاعطال بالمنزل الجديد

[وليف الشوق]

السلام عليكم اخواني اخواتي بالمنتدى

حبيت استفسر للي عنده فكره
انا استلمت بيتي الجديد وطلعت كثير من العيوب
وللاسف ماطلعت العيوب واكتشفتها الا يوم استخدمت المرافق والخدمات في البيت
وكلمت المقاول لتفادي حيث العيوب والعمل على حلها واصلاحها لكن المقاول كل مره قاعد يماطل معاي ويتعذر انه مشغول مع انه وعدني يجي واخر مره اتصلت فيه وقال انا في الحجر 14 يوم ومااقدر اجي ... واحس انه يتهرب
اخواني / هل يحق لي الشكوى ضد المقاول ؟ ووين اشتكي عليه ؟ وهل يحق لي بعمل شكوى بما اني اخذت شهادة ( اتمام بناء ) وعلى من تقع المسؤوليه ؟ هل المقاول او المهندس المشرف على المشروع ؟ ارجوا افادتي من بعض خبرات وتجارب اخواني

[نفسي عزيزه]

عليكم السلام ورحمة الله وبركاته

والله يالشيخ سوالف البناء تاخذ الصحه والعمر من كثر مشاكلها والاخطاء لذالك الواحد قبل مايبني لابد يتاكد من مصداقية المقاول او حد مجربه وبضمان حد يضمنه لي او اروح للي بنو حق ناس اعرفهم واهل ثقه وبتحصل

لكن موضوعك يختلف انت اتممت البناء والحمدلله ولابد على المقاول يصلح ما افسده هو ولو ان اكثرهم يماطلون

مانقول غير حسبي الله ونعم الوكيل في بعضهم

انا مش خبير في الشكاوي مع ان المقاول خلى جابهتي تلمع من العرق والصراخ معاه من اربع سنوات وافتكيت منه الحمدلله لكن لو انا منك اشتكي عليه والله عدل مب عدل حبيبي انا دافع فلووووووس عرق جبيني بابتدي اشتكي بالمركز وهم بيدلوني وين اروح او شاسوي

المهم مب مخليه يرتاح بانقص عليه عاد الشكوى تتاخر ماتتاخر باشتكي وبانقص عليه وباتصل له باسوي له جو رعب لين يصلح اخطاءه هو يشوفنا ساكتين يتمادى مع غيرنا

السموحه طولت عليك بالرد بس اشتك خله يولي يقهرني ويروح يرقد مرتاح لااااااا الا اطلع له فالحلم بعد :waiting:

[نفسي عزيزه]

الخبير بهالامور العضو الطيب الخلوق بوعبدالله نكه ( معماري قطر )

تقدر تقول له شنو الاخطاء وشلون يتفادونها اذا ممكن التصليح او اي شي

[Dana’1]

حماية المستهلك أتوقع يفيدونك
و هذ الأمور بالذات إذا المقاول نفسه مايراهب الحلال و الحرام في شغله مشكله و صعب نوعما تاخذ حقك كاملللأسف
لكن ماهو مستحيل عالأقل حاول وكلم كل الجهات المسؤله تى الجهه اللي عطتك إتمام البناء على أي أساس إذا فيه أخطاء كبيره و واضحه
للأسف هذا المجال تعيس جدا عندنا بقطر نادر تلاقي متخصص اللي يشتغل صح و إذا لقيت غالين وهي نفس المواد بس طريقة الشغل غير
الله المستعان و الله يعوضك بالخير يا رب

[معماري قطري]

الله يعينك

قول طبيعة العيوب وشاللي ما اتفقت عليه وأخطوا فيه .. شغلة تشتكي لازم تقرير أولي منك وبعدين تدقيق في العقد والمواصفات والخرائط وكذلك زيارة ميدانية مما يسمى الخبير الهندسي

انا رافض فكرة الخبير أو المحكم الهندسي ولا رضيت أدخل هذي المعمعة لأنك تكون في الغالب غير منصف .. القوانين غير واضحة والشغل كلٍ يشتغل على كيفه وعملية العمالة السايبة مسؤولة عنها الدولة .. شلون الواحد يشتكي على عامل وهو مب مرخص ولا عنده خبرة ممكن في مجال الشغل اللي دخله .. والإستشاري غير محدد واجبه بعضهم يقعدون في مكتب بس شغلهم يوقعون وما فيه إشراف عام من الدولة غير يمكن على الكهربة وبعض الأمور للرخصة

من جانب الملاك وانا منهم يراودني الشيطان ابني بطرق التوائية الأخطاء كارثية .. واحد يكلمني من أيام يقول تركيب الطابوقة أقل شيء حصلته ريالين قلت له مب مهم السعر المهم طريقة التركيب .. قال صادق جربت واحد باكستاني قال بيشتغل العصر بس واشتغل وشغله بطيء وما يسوى مضطر أعيده .. أرسلت له يوتيوب للروابط الحديد وشرحت له ولازم المونة كفاية .. قال من نحط هالشروط يزيدون السعر .. قلت له مستحيل تطلب سيارة عادية بفلوس شوي بمواصفات سيارة بنتلي أو خل نقول وسط

في دول كثيرة فيه إشراف عام من الدولة ومرور عشوائي على المشاريع أي مشروع فيه لخبطة من الإستشاري بعلمه ومن المقاول يتحاسبون ويمكن يتوقفون عن الشغل وتنسحب رخصتهم وكذلك تنسحب مبالغ مالية للتأمين تكون ممسوكة عند الدولة كضمانات .. من يحاول يلف ويدور يطلع منتف

العقود في كل موضوع هندسي لازم فيه شروط عامة من الدولة محد يجاوزها وشروط خاصة من الملاك حسب رغبتهم تكون فيها تفصيل أكثر .. ولازم توثق وتعدل لو فيها فقرة مجحفة بالمالك أو غامضة أو حتى بتضيع المقاول وتخسره من قبل مكتب التوثيق .. مكتب التوثيق لازم فيه مختصين مب ربع مشي حالك

وقت الخلاف المفروض مكاتب التوثيق تكون خذت مقابل وعليها مسؤولية البت في الخلاف بسرعة حسب المواصفات العامة وشروط الدولة أولاً اللي يفترض كل مقاول يشتغل بها وحافظها عن غيب ولا يتجاوزها .. ثم الانتقال للشروط الخاصة والمواصفات وتفاصيل التركيب في العقد والبت سريعاً في الموضوع وآلية المحاسبة تكون ملزمة وسريعة

تصدقون قبل الوضع عندنا قريب من هذا وألحين تدهور الوضع من جاوا مهندزين مشي حالك .. بعد أريح حق مسؤولي البلدية والتخطيط شحادهم يدوشون نفسهم وبنفس الوقت فيه حصيلة كبيرة من المهندسين الخبرة يديرون أشغال خاصة ويستغلون هذي الثغرات لصالحهم وللأسف بعض الخبراء الهندسيين في المحاكم ما يفرقون بين مواصفات عامة ملزمة وشروط خاصة فيها عدة خيارات .. يمشون الخاص على العام وبعضهم يركزون في الخاص وينسون إن فيه شيء عام حتى لو ما ذكر في العقد المقاول ملزوم به والاستشاري وكذلك المالك لأنه يشتغل في دولة قانون

[معماري قطري]

بنفس الوقت أشوف ناس يشتغلون مع مقاول محترم وأكيد بعقد محترم واشراف محترم ويخلصون سرعة وبدون مشاكل

[معماري قطري]

الخبير بهالامور العضو الطيب الخلوق بوعبدالله نكه ( معماري قطر )

تقدر تقول له شنو الاخطاء وشلون يتفادونها اذا ممكن التصليح او اي شي

الله يعزك ويبقيك

عندي حمام بخار صوب حوض السباحة سقفه معمول فيبر مقوس حتى ما يتكثف الماي عليه وينقط على راس الجالس وفيه ليتات 3 خاصة ضد الماي ومشبوكة بلوحة مفاتيح خاصة بالبخار وضغطه .. الدريول بنغالي جايب عامل علة بنغالي مقترح إن الليتات هذي مب موجودة ويشيل واحد منها ويمد واير يبين وتبين الفتحة ويركب ليت على جنب .. رحت أشوف وقلت شغلة ما تعرفها خلها الليتات موجودة وتركيبها سهل مسئلة إنك تشتري من محل واحد ما تعرف غيره هذي خلها .. يقول لو سوى الفتحة أكبر حق ليت ثاني ممكن ما يركب صح ولا عنده دريل الفتح .. قلت له ركب الليتات المحترقة في الحمام وفي حوض السباحة وخل ذيه مثل ما هو وفارق

[معماري قطري]

قبل بايب فيتر جاء يشوف مشكلة مضخات الماي ما تسحب من الخزان الارضي للسقف .. ناقشني قال نظامك معقد وصعب ركب برشر عادي وكنسل ذيه .. فيه ب 150 ريال ويقول الكهربة ما توصل .. طبيعي ما توصل لأن فيه عوامة تحت تقطع الكهرباء لو الماي قليل وفيه عوامة فوق تقطع الكهرباء لو الخزان انترس وتشتغل لو الماء نزل عن مستوى معين

قلت له روح اشتر عوامة نفس الموجودة وبدلها وخلاص .. وكان لاعب في السيستم ما اشتغل تم يحوس حول ساعتين .. رجعت كلمت الشركة أرسلوا لي واحد بحركة سريعة يمكن دقيقتين شغل كل شيء ولا رضى ياخذ فلوس

[معماري قطري]

عندنا ناس ما يقولون ما يعرفون يسوون اي شيء

واحد مسوي حايط لبيته بين الأعمدة مب للسور للفيلا وبالنظر يبين مقوس كأنه كرشة بارزة قلت له يا اخوي شغل واضح غلط قال لا ما عليك البلاستر بيغطيه .. أي بلاستر البروز حول 10 سم والطابوق 20 سم بس هذا مع مرور الزمن يزيد تقوسه وتستوي كراكات قوية .. ناحسني كل شيء أذكره عنده له بدال الحل حلول والله أعلم سكن والا للحين والسالفة لها حول 10 سنين وكان يبني حول 5 سنين .. بعضهم يتعب نفسياً والسبب إنه إختار إنه يكون المهندس والمقاول وكل شيء ( فهلوي أوي )

[معماري قطري]

هذا واحد كويتي كاتب إنه أخطأ بعمل فتحة تصريف مياه المطر ومعاها ماي التكييف من فوق هنا وهذا خطأ لا يمكن اصلاحه .. انا اقترحت عليه اقتراح ونفذه في اليوتيوب الثاني وكان التنفيذ سريع وافتك من المشكلة


https://www.youtube.com/watch?v=hzPtzLQEoRs

المهندس والمصمم يشوف الخطأ أثناء التصميم ويتفاداه والعامل الفهلوي أوي يحاول يسوي أقل شغل ممكن ويحاول يمشي رايه على المالك وفيه مهندزين نفس العامل بسبب خبرتهم البسيطة

[معماري قطري]

وهذا فيديو الحل اللي سواه .. ما كنت أدري بوجود صفاية جديدة إقترحت يعمل رامب ويخفي البايب تحت الأرض ويطلعه للشارع .. كان ممكن يحط اصيص زراعة بعد ويخلي الماي يصب فيه لو عمله خارجي حتى لو جاء مطر قوي يتصرف صوب الشارع وبعيد عن البيت لو زاد عن الزراعة .. الرامب بيفيده في نقل الأغراض للمطبخ بعربة


https://www.youtube.com/watch?v=aWt79t-AqBM

[SouthK]

وين شيك الضمان؟
خذ شيك الضمان و اصرفه في البنك و اذا طلع بدون رصيد خل المقاول يغني ظلموه!!!
أما اذا طلع في رصيد خذ من المبلغ و صلح بيتك و رد الباقي على المقاول

[سالم الزهران]

وين شيك الضمان؟
خذ شيك الضمان و اصرفه في البنك و اذا طلع بدون رصيد خل المقاول يغني ظلموه!!!
أما اذا طلع في رصيد خذ من المبلغ و صلح بيتك و رد الباقي على المقاول

:thumbup1: :thumbup1: :thumbup1:

[sara jsm]

عندنا ناس ما يقولون ما يعرفون يسوون اي شيء

واحد مسوي حايط لبيته بين الأعمدة مب للسور للفيلا وبالنظر يبين مقوس كأنه كرشة بارزة قلت له يا اخوي شغل واضح غلط قال لا ما عليك البلاستر بيغطيه .. أي بلاستر البروز حول 10 سم والطابوق 20 سم بس هذا مع مرور الزمن يزيد تقوسه وتستوي كراكات قوية .. ناحسني كل شيء أذكره عنده له بدال الحل حلول والله أعلم سكن والا للحين والسالفة لها حول 10 سنين وكان يبني حول 5 سنين .. بعضهم يتعب نفسياً والسبب إنه إختار إنه يكون المهندس والمقاول وكل شيء ( فهلوي أوي )


والله صح وايد ناس جذي .. خاصه لو كان مصري او بنغالي مستحيل يقولون مايعرفون :telephone:

[معماري قطري]

والله صح وايد ناس جذي .. خاصه لو كان مصري او بنغالي مستحيل يقولون مايعرفون :telephone:

هذا عيب تشريعي وقانوني .. أتحدى أي قطري يشتغل فهلوي أوي والا بابا في معلوم في أي دولة فيها قانون بدون ترخيص وبعض الدول قانونها قوي وفيها سجن للمخالفين

[معماري قطري]

ليش عندنا كهربائيين مرخصين لبعض الشغلات المحددة وبعضها مهمة لكن متروكة لفنيين بسطاء بدون ترخيص وبدون ما يكونون مؤهلين ومدربين يركبون واير بسيط معين بدون ما يشبكونه صح بقطعة وصل خاصة ويغلفونها صح تنفتح لأي سبب وتسوي أوقات التماس وحرايق وبلاوي تخسر الملاك اللي وراهم ودونهم .. من المتسبب في هذا غير أصحاب القرار في المؤسسات هذي واللي بيدهم يضبطون العملية؟

[معماري قطري]

وين شيك الضمان؟
خذ شيك الضمان و اصرفه في البنك و اذا طلع بدون رصيد خل المقاول يغني ظلموه!!!
أما اذا طلع في رصيد خذ من المبلغ و صلح بيتك و رد الباقي على المقاول

يمكن 70% من القطريين ما يعرفون هذا الشيء والأكيد ما يطبقونه

الأهم من شيك الضمان اللي هو لضمان الدفعة المقدمة هو دفعة الصيانة المحتجزة .. هذي تدونها في شروط عقدك بإنك تحتجز جزء من كل دفعة مستحقة للمقاول كضمان صيانة في العادة تكون بين 5 - 10% وفي الغالب 5% والمفروض تطبق على كل المقاولين حتى الفرعيين والمتخصصين بأعمال تخصصية مثل الجبس والتكييف والمصاعد والنوافذ والخشب .. فوق هذا لو انعملت أفرع خاصة لمكاتب التوثيق الهندسي في مراكز الخدمات وكانوا عليها مهندسين ممارسين وفاهمين الثغرات وبقانون ملزم للجميع بيكون حتى ما فيه داعي لها وتنحجز هذي الدفعات كمبلغ ضمان حقوق العملاء في حساب معين للدولة أو لمكاتب التوثيق والترخيص ذي

لو أي عميل موثق والتوثيق يكون الزامي صارت له مشكلة أثناء فترة الضمان يطلب اصلاحها ولو حصل تردد قدم شكوى للمكتب وحتى يصير اونلاين ويجي معاين يعاين لو احتاج الأمر وتسجل غرامة على المقاول المرخص وتنسحب مبالغ منه وممكن يلغى ترخيصه ويعطى صاحب الحق حقه

فترة الضمان على الهيكل الإنشائي تختلف عن الليتات تختلف عن الجبس تختلف عن الأعمال الخشبية وكل هذي تحدد فترة معقولة بعد دراسة مختصين دراسة مستفيضة بعدها يتنافس أصحاب العمل في إعطاء ضمان أطول لأنهم عارفين جودتهم ويكون ضمان حقيقي

تجيك شركة مكيفات مثلاً تقول لك المصنع يعطي ضمان على الكمبريسر 5 سنين في الشمس مكشوف وإحنا لو ركبنا لك بطريقتنا والصيانة الدورية عندنا وعملنا لك مظلات فوق التجهيزات لتحرقها الشمس تكلفتنا بتكون كذا وحتى الصيانة الدورية مع الضمان مع قطع الغيار يقدرون يحطون تكلفتهم فيها .. كثيرين بيسعون للعقد الشامل والتميز والسمعة ويعطونك فترة ضمان 10 سنين وإنت تدري إن فيه جهة واعية في الدولة ومختصين ينتزعون حقك سريع بتوقع معاها حتى لو ضعف غيرها من الشركات والشركة بنفس الوقت بتكتسب سمعة

شوف في السيارات مثلاً شركة الفردان وإدارتهم تدري شهرتهم وصلت دول الخليج وأشعلت منافسة الوكلاء .. العملية تسويقية وقانونية والمفروض تدخل الدولة فيها تدخل قوي

[معماري قطري]

نجي لما يسمى التنافسية العادلة .. هذا موضوع طويل ومعقد ويضمن للكل تنافس عادل للحصول على عمل كبير سواء شخصي أو حكومي أو مؤسساتي عام أو خاص .. عندنا شبه معدومة وما يبرز الا صاحب النفوذ وهو اللي ياخذ المشروع والنقود .. يعضهم يحدد أجر عالي لشركته أو لإستشاريه ويضمن المناقصة على حساب التنافس العادل وهذا خلى كثيرين يوقفون شغلهم أو يبيعونه للسوبر هامور الأمور اللي يحرك كل شيء بمزاجه

عرفتوا ليش حابين هالحوسة؟

المتنفذين والمتمكنين ضامنين حقهم ويهمهم يضمنون ياكلون حق غيرهم بدون ما يعطونهم حقوقهم كاملة

[معماري قطري]

من وجهة نظري هذا مال حرام ولا يتوفق راعيه

بنفس الوقت بيئة العمل الهندسي والبناء أصبحت صعب تمشي بدون تجاوزات وغش وشغل مشي حالك

إتجهنا للسعر الرخيص مهما تكون الوسيلة والتفاصيل نركز على كم التكلفة ولا نركز على تفاصيل العمل والمواد .. إستووا شركاتنا يخشون عنك إجراءات عالمية يعتمدها العالم وكأننا دولة خارج هذا العالم .. مثال على ذلك الألمنيوم في السابق تنافسوا لتنزيل السعر وعمل نوافذ وابواب رديئة برخيص .. ألحين نفس الشيء يحصل في اليو بي في سي والشركات الجيدة مضطرة تنسى الجودة حتى تنزل السعر وتاخذ حصة بسيطة ومستحقة من الشركات الغش .. هذا كله في ذمة المسؤولين عن هذي العملية من مسؤولي الدولة البايع ما همه شيء طول ما هو يربح ويقدر يمشي بضاعة رخيصة بغالي

[بوNasser]

السلام عليكم ورحمة الله

موضوعي يمكن ماله علاقة مباشرة بمشاكل البنيان لكنه مرتبط نوعا ما بالدفعات المالية للأعمال المنفذة.

لو عملت ابواب يو بي في سي مثلا او غيرها تلقي الشركة تحط في العقد: 40% عند التوقيع + 40% عند التوريد وتركيب الفريمات + والباقي قبل التركيب النهائي ، او خلطة قريبه من هالنسب المهم ياخذون تقريبا فلوسهم كاملة قبل ما تستلم العمل بالكامل منهم.

يعني حتى لو تأخروا في الشغل ما تقدر تخصم شي منهم لأنك ما راح تستلم اغراضك كاملة قبل ما يستلمون فلوسهم كاملة.

عن تجربة سابقة: قطر يو بي في سي ركبت عندهم ابواب وشبابيك لملاحق بنيتها، وبعد ما خلصوا لقيتهم ما ركبوا الأقفال للبيبان وبعض الاكسسوارت، سألت العامل قال بكره ان شاء الله.

انتظرت يومين ثلاثة محد جاء، رحت لهم الشركة الا يقول لي المدير، اية باقي عليك الدفعه الأخيرة ( اعتقد كانت 10%) طيب تكلموا قولوا ماتخلوني معلق، وأعتقد كان في العقد ان الدفعة الأخيرة معا التركيب. بس من له خلق يتجادل ويعطل اعماله على اشياء مثل ذي.

الزبده: معظم الشركات في العقود ما تعطيك فرصة تمسك عليها فلوس بعد انجاز أو حتى مع انجاز العمل ( ويمكن بعضهم تمشكلوا مع ناس لذلك ياخذون احتياطاتهم مقدما).

تحياتي للجميع.

[معماري قطري]

هذي كلها تنحل لو العملية قانونية وموثقة في مكتب مختص مثل ما ذكرت

بنفس الوقت لو أي عميل ما دفع دفعة مستحقة يحق لمدير الشركة أو مندوبها يقدم شكوى حتى أونلاين ويتحاسب المتهرب وتكون عليه غرامة قوية تردعه .. القانون المفروض ينصف الإثنين ويساهم في رفع مستوى الشغل والعمال اللي يسوونه

[معماري قطري]

أحد الإخوان معانا هنا ومتواصل معاي دوم

ما شاء الله عليه دقيق وفاهم ويشتغل صح .. آخر مرة اتصل قال لي كلمه مدير الشركة الفلانية يقول بنطلع من المخزن ودرايشك جاهزة بنخزنها مغلفة في البيت لين تجهز انت بنركب قال صعبة ما خلصت الأرضيات .. يقول تفاجأ الا السيارة في البيت اللي ينبني ويبغون يدخلون الدرايش عاد هذا بعد ما استشارني وانا قلت له قول لهم ما عندي مشكلة تبوني مسؤول عن حمايتهم جيبوهم بيتي الحالي باخزنهم عندي مخزن .. هنا تورطوا وقالوا لا خلاص إحنا بنخزنهم بطريقتنا

الشركات الفاشلة كثيرة ومثل الدرايش والأثاث ومواد كثيرة تحتاج تخزين جيد ما تتغلف وتنرمي في الحوش أو في غرفة بدون أرضية وبدون أبواب والجهلة كثيرين والحرامية وممكن ناس من الشركة يعرفون بالموضوع ويجون ويسرقون

لو فيه قانون ملزم كان ما سووا هالسالفة بس تراجعوا أول ما قال لهم جيبوهم بيتي الحالي مع إنها ما تفرق كلها مشوار بسيط

[معماري قطري]

كلامك صحيح إخوي بو ناصر يمكن انت تفكر في جزء .. انا ملاحظاتي شاملة لكل هذي الأشياء الدفعات والجودة والضمان وطريقة التركيب الهندسية الصحيحة

[سالم الزهران]

https://www.youtube.com/watch?v=hzPtzLQEoRs

صباح الخير
الاخو الكويتي هذا متعبه تفكيره، وانا متوقع ان المقاول مشى معه لين قصاه. يعني هذي الشغلتين اللي ذكرها سهلة لكنه يشوفها نهاية العالم.

[معماري قطري]

https://www.youtube.com/watch?v=hzPtzLQEoRs

صباح الخير
الاخو الكويتي هذا متعبه تفكيره، وانا متوقع ان المقاول مشى معه لين قصاه. يعني هذي الشغلتين اللي ذكرها سهلة لكنه يشوفها نهاية العالم.

صحيح شغلات بسيطة .. أما نغير الباب ونرفع أرضيته من الخارج وعندهم مسموح ومسموح حتى يحط مظلة تظلل الدرج أو الرامب الخارجي .. يحتاج شغل وتصميم وبيستوي عنده ليوان مرتفع لمدخل البيت .. هذا حل وبنفس الوقت يرفع السور والباب لو حاب يستر المدخل أكثر

الحل الثاني لمشكلة الماي كان ضروري يسويه وزين سواه لأن ماي التكييف ينزل عن طريق هذا البايب والتكييف مركزي يعني بيكون دوم وقت الصيف وبيكون مزعج

أوقات إخوي سالم عقلنا الباطن يسوي لنا شغلة ما لها معنى ولو ما سويناها أفضل وأوقات تسوي تعديل بسيط للأفضل أو لتغيير روتين سكنك اللي مليت منه أو للإستفادة من مساحات موجودة وانت محتاج لها أو لحلول لمشاكل صيانة

[سالم الزهران]

فعلاََ.. المشاكل دامها مشاكل تصريف وتمديدات و اعادة تصميم لاجزاء محدودة فهذي شغلات مقدور عليها.

[سالم الزهران]

حتى البلاط حق الحوش هذا فيه عمال تفكه ويرجعون يركبونه نفسه.. اهم شيء فهم الشغل ومتابعته.

[معماري قطري]

حتى البلاط حق الحوش هذا فيه عمال تفكه ويرجعون يركبونه نفسه.. اهم شيء فهم الشغل ومتابعته.

سهالات يا بو زيد .. انا يوم اشتغلوا في الحوش حتى كسر البلاط استعملتها مشت الحال وعندي قطعة قديمة شكلها غير فيها نقشه تفرق بس نفس اللون قلت ركبها