رحلتنا الى اليونان أثينا وجزيرتين ميكونوس وسانتوريني

[معماري قطري]

السلام عليكم ورحمة الله وبركاته

السفر هذا الوقت ما انصح به همه أكبر منه لكن قدر الله وتشجعنا ورحنا أربع أشخاص انا وأُم العيال وبناتي الثنتين وكلنا نشيل نفسنا والحمد لله

وجهتنا الاولى أثينا ووصلنا العصر هناك برحلة خذت شوي أكثر من 4 ساعات .. من نزلنا صادنا سايق حرامي وصلنا بضعف السعر وكنا مضطرين ولا عندنا فكرة 150 يورو والعادة 80 أو 60

أول فندق سكنا فيه كان الكترا بالاس من فنادقهم وفي وسط مكان سياحي وللتسوق محلات كثيرة حولنا بس انا ما حبيته ولا عجبني حتى ما صورت فيه كلش .. ما ادري ذي الصورة هناك أو في المطار كنت مستانس على ثلاجة الأنسولين اللي مهديني اياها ولد عمي تشتغل على بطارية تنشحن يو اس بي وكهرباء عادية ومن ولاعة السيارة ولا وديت معاي الا واير اليو اس بي بس للأسف طلع ما يشحن وفضت بعد وصولنا الفندق

https://i.imgur.com/4eiLtJI.jpg

المشكلة الصيدليات ما تبيع ثلج مغلف ببلاستيك اللي يسمونه دراي آيس والفندق ثلاجته تبريدها زين بس بعض الفنادق لا وبنطلع وايد واضطر اشيل معاي الأنسولين ولازم بين 2 - 8 درجات مئوية وهناك 35 وفوق كأننا في الدوحة وشمسهم تصلخ .. قلت وينج يا بانكوك خدمات جيدة وجو زين ورخص

هذي الممرات اللي حول فندقنا

https://i.imgur.com/ztJxTKt.jpg

هذي الأرصفة زوينة بس عندهم شكثر مطبات وحفر وعندنا كرسي متحرك بصعوبة نقدر نحركه أم العيال جاتها اصابة بسيطة في كاحل القدم شلخ بسيط مب كسر بس نصحوها بعدم المشي ولبس جوتي يثبت القدم والحمد لله مشت الأُمور

أعلى الفندق يوجد مطعم الريوق وريوقهم كان زين والجلسة حلوة مطلة على هذي القلعة فوق الصخرة ذي

https://i.imgur.com/MvntjF0.jpg

باشوف صور ثانية عند الأهل للجزء هذا من الرحلة حتى احافظ على التسلسل

[معماري قطري]

لفت نظري اسم المحل أتيكا صورته حق رفيجنا عتيق قلت يمكن هو فاتح سلسلة المحلات ذي

[sara jsm]

هالكثر متذمر ومنزل موضوع*:looking:
اياااااا على تايلند :cry2:

في انتظار باقي الرحلة ..

[معماري قطري]

هالكثر متذمر ومنزل موضوع*:looking:
اياااااا على تايلند :cry2:

في انتظار باقي الرحلة ..

شمسهم تصلخ يا أُم جاسم والخدمات والبلاد وهذا تقييمي

الليلة باحط بعض الصور بانتظار يطرشون لي حتى أرتب المراحل

[معماري قطري]

شفتي شلون تايلند خدمات وسلاسة في التعامل خصوصاً صوب منطقة سيام اللي فيها كبرى الفنادق والمولات أما منطقة العرب إذا حن الواحد لطبخهم يمر هناك

[معماري قطري]

ما حصلت صور حق فندقنا الأول لكن انتقلنا بعد 4 أيام لجزيرة ميكونوس وسكنا في منطقة جديدة ريفية بعيدة شوي على جبل وفي منتجع حلو إسمه بانوراموس .. هذي صورة من شقة البنات كل شقة لها ليوان خاص وحوض سباحة وهم متجاورتين .. خدمتهم زينة يجيبون الريوق للشقة في الوقت اللي تحدده وفي سلة مغلفة والشاي والقهوة نسويهم في مطبخ الشقة الصغير

https://i.imgur.com/ZF53yD8.png

هذا مقطع داخلي للغرفة من داخل فوق مكان النوم وتحت صالة جلوس وصالة طعام وممكن بعد النوم تحت .. يعني غرفة وحدة تكفي اربع أشخاص


https://youtu.be/hV5sv1OWokg

هذي صورة للشاطيء جهة مركز المدينة والزحمة كلها هناك وايد سياح ومطاعم ومحلات بس مرتفعات ونزلات والجو حار يبدأ يحلو شوي بعد مغيب الشمس

https://i.imgur.com/RuxPYhr.jpg

[معماري قطري]

هذا الطريق الخارجي يودي حق مزارع جنبنا بعضها فيها غنم وبعضها بقر وبعضها الله يعزكم حمير ومسوين جو بأصواتهم أوقات حاولت اسجل ولا قدرت يوقفون مأدبين

الجدار الفاصل عريض وحجر وجهتي فيه شارع مسفلت داخلي مرتفع ارتفاع قوي صوب شققنا وتحتنا بدور تقريباً مكتب الإستقبال

https://i.imgur.com/j5M2jVt.jpg

الأراضي كثيرة وشكلها أسعارها معقولة

https://i.imgur.com/c43ed07.jpg


https://youtu.be/zxKx9r1y1W4

باكمل وقت ثاني إن شاء الله

[رجل تعليم]

حيا الله اخونا معماري ذكرتنا بالأيام الخالدة لقسم السياحة والسفر
متابع ان شاء الله والحمد لله على السلامة

[سالم الزهران]

اشكرك يا برنس الدوحة على الموضوع الشيق

[معماري قطري]

حيا الله اخونا معماري ذكرتنا بالأيام الخالدة لقسم السياحة والسفر
متابع ان شاء الله والحمد لله على السلامة

الله يحييك ويبقيك يا اخونا المغربي العربي الأبي

يسعدني مرورك

[sara jsm]

والله يابوعبدالله انت فنان في اظهار المناطق على حقيقتها ..
لو تشوف الناس اللي تصور مع الفلاتر تحسب ان اليونان جنه في الارض ..
لكن الحين اشوفها نفس الجميليه في الربيع :oops:

[معماري قطري]

اشكرك يا برنس الدوحة على الموضوع الشيق

العفو يا اخوي هذي للذكريات

هذا أعتقد المجمع الوحيد المغلق هناك وفيه ماركات وهناك قصدي في أثينا وبضايعهم زينة وفيه مطعم بعد فوق أعتقد صورته بس هذا مثل الممر تحت يمين المجمع ويسار أظن مكاتب أو شقق وتحت مطاعم فاخرة تغدينا في المطعم اللي جدام يسار

https://i.imgur.com/gVGJmsP.jpg

هذي الصورة خارج الفندق الكترا بالاس وهو يمين المطعم حوله الشجر فوق والتصوير جهة القلعة المرتفعة اللي حطيت لها صورة من المطعم .. الفندق زوين بس ضيق في الغرف ولا حبيته حبيت نغير والا كنا ناويين نرجع له .. موقعه مسكت وفيه ثاني بنفس الإسم موقعه أحلى ويبين أحسن

https://i.imgur.com/Jx620J6.jpg

تصوير البنية الله يهداها ما ادري شحابه في السماء

https://i.imgur.com/Pq1MYw0.jpg

أظن هذي في ميكونوس

https://i.imgur.com/fKUkF8r.jpg

صورة توضح العمارة القديمة في الجزر .. تعتمد على الحجر والطوب أو الطابوق بدون حديد كلش وتقويسة السقف تنعمل بالطوب وبلاستر من داخل وبرا ومن برا يكون نعيم وقوي ما يدخله الماء والتقوس يصرف المياه بسرعة ويعطي امتداد معقول للسقف

https://i.imgur.com/XgILBjm.jpg

أعتقد تم تحديث هذا النوع من البناء ولاحظت الأصباغ كلها تقريباً ايبوكسي لامعة وقوية الخارجية والداخلية للأرضيات اللي تنداس وللأماكن الرطبة .. شغل اقتصادي ويدوم وجيد .. قبل هم حضارة البناء عندهم قديمة وكان تركيب الحجر يدوي بمعدات بسيطة وبدون أي اسمنت ثم تطور لإستخدام الرماد والجص

https://i.imgur.com/WjSzkzI.jpg

هذا مطعم آخر تغدينا فيه في جزيرة ميكونوس وكان تابع لفندق

https://i.imgur.com/8fGYDOD.jpg

هذي من غرفتنا في سنتوريني ثالث محطة لنا

https://i.imgur.com/bF1R9oq.jpg

هذي الغرفة اللي شوي تحت وغرفتنا فوقها هذي استولوا عليها البنات وكانت أكبر حتى الجكوزي شوي أكبر

https://i.imgur.com/0Ft6lIu.jpg

سانتوريني جلسنا فيها يومين بس لكن كانت أغلى مكان الفندق هذا الليلة ب 2500 ريال للغرفة وغرفتنا أول ما دخلناها نمل شكثر عكروا مزاجنا بس جابوا مبيد ثاني يوم أول ليلة تنظيف ولا فاد .. والمرعب الصغير البريعصي طلع في ليوان الغرفة وجاء واحد متخصص مسكه من ذيله وراح به

https://i.imgur.com/FI1kZDu.jpg

هذا الدرج اللي يمر جنب غرفتنا وينزل للغرفة الثانية ونفس الشيء للي حق الريوق بس صوب ثاني قلبي بغى يوقف وانا اركب وأم عبدالله اضطرينا نختار لها الريوق ويوديه العامل بس مسكين يرجع مقطوع نفسه

https://i.imgur.com/F3ilPgx.jpg

جلسة تابعة للمطهم خارجية بس احنا نقعد داخل جهة مكان التصوير .. الحر يصلخ

https://i.imgur.com/k8eErMp.jpg

باتابع مرة ثانية وأكيد خلطت المراحل مع بعض بدون ترتيب

[سالم الزهران]

:nice:

[رجل تعليم]

شكرا معماري ..أحييت فينا كل شيء جميل والحمد لله

[معماري قطري]

والله يابوعبدالله انت فنان في اظهار المناطق على حقيقتها ..
لو تشوف الناس اللي تصور مع الفلاتر تحسب ان اليونان جنه في الارض ..
لكن الحين اشوفها نفس الجميليه في الربيع :oops:

سامحيني ما انتبهت لمشاركتج قبل

البلاد لها طبيعتها ومب بعيدة عنا تحت الخمس ساعات وأظن أربع وشي بسيط زيادة بس يمكن وقتنا ما كان حلو .. أكيد في الربيع بتكون أبرد وأحلى نفسها نفس الأُردن ربيعها حلو وخضار أكثر وزحمة العرب ما بتكون جاتها .. اللي بيروح وبيستأجر سيارة وبيتحرك براحته أفضل له وصحيح بيعاني بسبب المواقف القليلة والبعيدة .. إستغربت هناك السياح غالبيتهم على بطابط أم أربع تواير

إن شاء الله بكرة أتابع بصور ثانية

[السيف5]

متابع لك يابوعبدالله,,,,,,,,الله يعطيك الصحة

[معماري قطري]

متابع لك يابوعبدالله,,,,,,,,الله يعطيك الصحة

وإياك والجميع

كسل يا اخوي وانشغل في مواضيع ثانية وبإذن الله أواصل في أقرب وقت

[معماري قطري]

متابعة جديدة

حبيت أحواض السباحة في شقق ميكونوس وأنصح اللي يحب يروح يجربها .. نسيت كم ايجارها بس معقول مب انا مدير الحجوزات يقولون لي كم الإجمالي وادفع باللتي هي أحسن

الحوض عميق بس مرتفعة أطرافه واوفرفلو وقناة مفتوحة في ثلاث جهات

https://i.imgur.com/3vREhNF.jpg

https://i.imgur.com/wCEEKn0.jpg

هذا حوض شقتنا واللي فات حوض شقة البنات يمين بالضبط

https://i.imgur.com/XsFqzWp.jpg

الفندق كله حماية وكيمرات على الممرات والمداخل بس الباقي لا

المغاسل بسيطة عبارة عن قطعة حديد دائرية وتحت قطعة رخام مقصوصة في وسط قطعة الحديد

https://i.imgur.com/IgQ3xiJ.jpg



دورة مياه الدور الأرضي شوي أكبر من الداعوس اللي فوق وطلبنا كرسي حق أم عبدالله الله يشافي رجلها من الإصابة .. كلش ما ركبت فوق جهزوا لها سرير تحت والصالة الحمد لله واسعة

https://i.imgur.com/Rxt4yEZ.jpg

[معماري قطري]

https://i.imgur.com/DwkAXof.jpg


ما طبيت الحوض كلش

https://i.imgur.com/fpsSGhX.jpg

https://i.imgur.com/yvwZrvl.jpg

كنايسهم أكثر منهم وهذي دواعيسهم ضيقة وقديمة معمولة للمشي بس ومواقف السيارات بعيدة

https://i.imgur.com/nnLl6HZ.jpg

هذي الحديقة الوحيدة اللي زرناها في أثينا إسمها ناشيونال غاردن .. بعد الحاح مني وكانت حول 5 دقايق شمالي فندقنا الأخير قراند حياة .. كان أحلى فندق بس شوي بعيد عن مركز المدينة وسعره معقول يمكن أرخص الفنادق كلها الباقية وحجزناه من هناك ونقلنا شناطنا اللي بنخليها له وسافرنا الجزر خفاف .. خدمته خدمة 3 نجوم في بعض الأُمور بس بنيانه ورقيه 5 نجوم وعيبه على شارع فيه شوية إزعاج

نرجع للحديقة ونستمتع بأشجار الواشنطينا الطوال .. عاد التكس نقلنا انا وبنتي وأُم عبدالله والبنت الثانية ينتظرونا آخر الممر .. وتوقعت التذمر ووين جايبنا من البداية الا قالت يالله نطلع نمل وحشرات وحر لكن قعدنا في قهوة جانبية وصج النمل شوي وياكلنا

https://i.imgur.com/N1u6cLL.jpg

كان الوقت قرب المغرب لو وصلنا بعد المغرب بشوي أحلى بس مشكلتهم يسكرون 9 والمغرب متأخر .. توقيتاتهم ما تصلح مع إنه صيف والظاهر ما يبون يولعون ليتات وإحتمال حتى ما فيه

https://i.imgur.com/5qIOEi4.jpg

من يشوف هيليكوبتر

https://i.imgur.com/wyxa9cW.jpg

مؤكد وقتها في الربيع

https://i.imgur.com/4M9FRJ9.jpg

https://i.imgur.com/sKEVUDT.jpg

https://i.imgur.com/1FU7fkh.jpg

من فندقنا الأول الكترا بالاس في أثينا

https://i.imgur.com/Z3k309X.jpg

https://i.imgur.com/IaA24VX.jpg

https://i.imgur.com/gdcOXZQ.jpg

[sara jsm]

ماشاءالله الحمام الله يعزك بسيط ومرتب ..
حبيت الصور .. كمل كمل :)

[سالم الزهران]

خوش صور يبو عبدالله.. يسعدك ربي

[معماري قطري]

ماشاءالله الحمام الله يعزك بسيط ومرتب ..
حبيت الصور .. كمل كمل :)

صباح الخير

إرتفاعه بالضبط 2 متر ومستوى أرضيته نازل عن مستوى أرضية الحوش

[معماري قطري]

خوش صور يبو عبدالله.. يسعدك ربي

آمين ويسعدك ويسعد غاليك

[معماري قطري]

باتابع مع بعض الصور واسمحوا لي لو فيه شيء مكرر

هذي من ميكونوس والمنطقة شوي بعيدة عن مركز المدينة وهادية وجديدة بس الوصول لوسط المدينة حول 15 دقيقة وللمطار حول 20 دقيقة

https://i.imgur.com/WKfGT2e.jpg

هذي في سانتوريني واسم الفندق بيغاسوس ذكرني ببرنامج التجسس اللي شارينه الشياطين من الصهاينة

https://i.imgur.com/BLi6ERV.jpg

هذي غرفة البنات وذكرت إنها كانت المفروض لنا لأنها وايد أكبر بس نازلة أكثر والدرج صعب

https://i.imgur.com/0FIrsBo.jpg

https://i.imgur.com/0nwEtVa.jpg

https://i.imgur.com/gVqPkXU.jpg

https://i.imgur.com/k3rRq7a.jpg

https://i.imgur.com/e5P9hZT.jpg

مطعم الفندق مقسم على كم جلسة

https://i.imgur.com/YqF5VPt.jpg

أحد طرق ونوعيات حجر البناء

https://i.imgur.com/VlR5Iw3.jpg

تقوس أسقف المباني يخدم خاصيتين أولها يصرف المياه سرعة والثانية البناء هذا بطوب خفيف مثبت بالمونة الاسمنتية بدون خرسانة ولا حديد على طريقة الأقواس القديمة والثالثة خاصية معمارية التقوس يعطي الفضاء الداخلي سعة أكبر وجمال وسكينة

https://i.imgur.com/zmoHsUB.jpg

حبيت هذي الكسرة لبانتري صغير في مطعم فندق قراند حياة اللي سكناه في أثينا بعد عودتنا من الجزر وعندي له صور ثانية للغرف

https://i.imgur.com/9aNLsgi.jpg

https://i.imgur.com/sIkCSra.jpg

حلو تركيب الرخام على الخشب وعلى واجهات الأدراج

https://i.imgur.com/2c0bLaV.jpg

وإحنا نمشي لبوابة مطار سانتوريني ومرت الأُمور بسهولة مع إن كانت زحمة لا تطاق بس دخلونا قبل الناس بسبب الكرسي المتحرك وطلبنا واحد يساعدنا وخلصنا بسرعة للبوابة وانا مار قلت لهم شكلها ذي طيارتنا وكانت صج .. نزلنا بمصعد وركبنا من جهة الذيل وكنا أول ناس وحطونا وراء علشان قريب من الدخول والخروج .. بس ركوب الدرج كان صعب خصوصاً لأُم عبدالله اللي ولله الحمد بدت تتشافى من اصابتها.

عاد قصة الطيارة وطيرانها شلون ترتجف كأنها مصخنة وتسوي لها مطبات من لا شيء وتحن وتون وكان حر أول ما دخلنا مكيفها حار وريحة بترول ما ادري قاز .. فيه شيء غلط اللي جينا فيها جديدة وكبيرة وهذي تعيسة حتى خذت ساعة و10 دقايق .. رفيجي في ألمانيا طرشتها له مات ضحك قال هذي لنقل المواشي ويقول من صجك ركبت فيها قلت شسوي هذي اللي حصلت ولو هو عارف بيسوي قصة لهم ولنفسه

https://i.imgur.com/P1QASQP.jpg

[sara jsm]

حلوة ارضيه الغرفه حبيت التركيب جمييييل :)

الف سلامة على ام عبدالله وربي يشافيها ويعافيها ..
بس ماقلت هالطيارة لطيران داخلي ولا رجعتوا فيها الدوحة !؟

شخباري طيارة على مروحة :looking:

[معماري قطري]

حلوة ارضيه الغرفه حبيت التركيب جمييييل :)

الف سلامة على ام عبدالله وربي يشافيها ويعافيها ..
بس ماقلت هالطيارة لطيران داخلي ولا رجعتوا فيها الدوحة !؟

شخباري طيارة على مروحة :looking:

سامحيني على التأخير سهيت عن الموضوع وعندي بعد صور أكثر باحطهم

هذي صدمة كانت .. ذكرت عن طيارة الروحة لجزيرة ميكونوس كانت وايد زينة ومع نفس الطيران حاجزين .. إيه داخلي رحنا من أثينا لين ميكونوس بطيارة ومن ميكونوس لين سانتوريني بالمركب ومن سانتوريني لين ميكونوس خسسوا بنا بهذي الطيارة