بعض مخاوفي

[سالم الزهران]

السلام عليكم

من الأمور اللي أخشاها اني قصرت في جانب التربية، اهاف اننا نخرج للمجتمع موظف وموظفة فقط.

يعني ما قدرنا نربي عيالنا عشان يصيرون آباء وأمهات، لأن تركيزنا على الدراسة جاء على حساب أمور تربوية ثانية.

الحين البنت ما تدش مطبخ ولا تتقبل تلبي طلبات اخوتها لأنها عايشه منفصلة مع دراستها.

والولد مثل البنت محشوم مخدوم ولا يعرف يجيب مقاضي البيت ولا يدري غير عن جدوله الدراسي والعاب الاونلاين.

الخوف الأكبر بكره لو حاولوا يفتحون بيوت ما يقدرون، لا الشاب كفو من ناحية القيام بالبيت ولا البنت تقدر تقابل البيت ومسؤولياته.. الخ.

عشنا وشفنا ناس كلن راح لحال سبيله ولا عندهم نية يعيدون التجربة، لأنهم بالاساس تربوا بهذا الشكل مستقلين ولا يتحملون حتى الاستماع للطرف الآخر.

[سعود.]

نعم وللأسف هذا حاصل لدى البعض لاسباب عديدة

[معماري قطري]

والله يا بو زيد كنت أفكر مثلك

ما ادري دعيت ربي يوفق عيالي ما ادري دعوات أُمهم .. بس شفت البنت الصغيرة كله في المطبخ وتتفنن تسوي أكلات غريبة .. بعد فترة طلع لنا الولد الكبير يسوي همبرغر يطلبه من الملحمة نوعية لحم ما ابالغ اني عمري ما جربتها .. نسيت شقال لي .. بعدين طلع لنا بطبخة في الفرن للربيان الكبار مع الليمون والثوم وانا كلش هالثلاثي ما اقاومه والربيان مقصوص منظف ظهره بس بقشوره

الولد الصغير الدراسة علمته الطبخ والتعامل مع الناس

دوم تجينا هذي الهواجس والعيال توهم صغار بس من يكبرون اللي ما علمناهم إحنا تعلمهم الحياة .. أكيد فيه قصور وما فيه حد كامل

[سالم الزهران]

نعم وللأسف هذا حاصل لدى البعض لاسباب عديدة


والله يا بو زيد كنت أفكر مثلك

ما ادري دعيت ربي يوفق عيالي ما ادري دعوات أُمهم .. بس شفت البنت الصغيرة كله في المطبخ وتتفنن تسوي أكلات غريبة .. بعد فترة طلع لنا الولد الكبير يسوي همبرغر يطلبه من الملحمة نوعية لحم ما ابالغ اني عمري ما جربتها ..
دوم تجينا هذي الهواجس والعيال توهم صغار بس من يكبرون اللي ما علمناهم إحنا تعلمهم الحياة .. أكيد فيه قصور وما فيه حد كامل

حياك الله اخوي سعود و كذلك الاخو الكبير معماري.. الله يصلح لنا ولكم النية والذرية ولسائر المسلمين

[سالم الزهران]

عندي ملاحظة بحطها في سؤال :

هل وجودك في حياة ابناءك وجود مادي أو معنوي؟

أقصد كثير منا يقول أن الابناء ما عندهم أي اهتمام حتى بمعرفة من يصير لهم على سبيل المثال، ونا اتكلم عن فئة الشباب في سن الثانوية والكليات.

في عزوف من هالجيل انه يعرف حتى الثقافة الدينية، ما يعرف مثلاََ احكام الصلاة والسهو... الخ.

وين هذيلاك الشباب اللي ادا شافوا الابو يسوي اي شغله قاموا يطالعون شيسوي ويتعلمون!

اليوم الواحد فيهم ما يعرف يغسل فناجيل قهوة، اذا بتنتظره بياخذ مع الفنجال دقيقة وعليك الحساب.

اخشى أن هالزهد من قبل الابناء في التعلم، هو نابع من نظرة أن ما هناك شيء يستاهل تتعلمه.

يجوز اكون غلطان بل يا ليت أكون غلطان وما يكون وجود الابو في الحياة هو لتوفير الطلبات والسيارات والمصاريف فقط.

ندور من ابناءنا القيمة والمكانة اللي نستحقها كآباء، نبغي لنا قيمة معنوية بحيث نحس من الابناء أنهم مدخلينا في قلوبهم و يلتمسون دعواتنا ورضانا، احنا لليوم ما نسينا اهلنا وحتى الجماعة اللي لهم أثر في حياتنا.

ارجو من الولد مثلما ياخذ الفلوس بكل سرور يتقبل التوجيه والنصيحة بكل سرور ورضى. لأننا نبغي لهم الخير و لا نبي منهم الا ان يكونوا صالحين وقدوات طيبة وفي النهاية نحسب الولد الصالح في ميزان امه وابوه وكذلك المعلم اللي علمه ف المدرسه اذا أحسنوا النية.

[sara jsm]

وعليكم السلام بوزيد ..

هاي دور الوالدين .. التربيه والتعليم .. مثل ماتربيه على الاخلاق الطيبه ..
لازم تعلمه وتسنعه لبعض العلوم ..
ضروري البنت او الولد يتعلم يشل عمره ( يغسل ملابسه / ينظف غرفته / يكوي / يطبخ له لقمه )

الخادمة مش دايما موجودة ..
والام ممكن تمرض ممكن يحصل لها اي عارض ..
فالحياة لازم تستمر والبديل موجود ..

:

على فكرة سالم عندما في قطر مركز اسمه ( نوماس ) يمسكه خيره شباب قطر فيه قسمين منفصلين ..
الاولاد الصغار يعلمونهم ( علوم المجالس / العرضه القطريه / ركوب الخيل / المقناص…الخ
وللبنات يعلمونهم ( الخياطه / الطبخ / التقديم والضيافه .. الخ
حق الصغار لين 14 سنة ..
هالمركز جهه داعمه لجهود الوالدين ..

:

لكن من الاساس ( انت او انتي ) لازم تبتدون مع عيالكم ..
وعلى فكرة اللي تربى على السنع بيعلم عياله ويورثهم هالشي ..
اما اللي عايشين بالبركة فهذا اللي يحتاج اعادة تاهيل ..

[بوعابد7]

الاخلاق ماتوكل عيش اليوم :)

اليوم يسالون شنو شهادتك وشنو وظيفتك وشنو سيارتك.. عشان جي الوالدين صار أولى أولياتهم التحصيل العلمي لأبنائهم
الحياة صارت ماديه
صعب اليوم تقنع بنت تغسل ملابس ولا تدش تطبخ.. ولاصبي يجيب مقاضي البيت أو يخلص أمور الوالد والدريول موجود

يكبر الولد والبنت ويصير مب قادر يتحمل أي مسؤولية كبيره ومايكون عنده نضج حتى عقب الزواج

لكن يبقى أهم شي الوازع الديني .. باقي الامور تنحل

[sara jsm]

صعب اليوم تقنع بنت تغسل ملابس ولا تدش تطبخ.. ولاصبي يجيب مقاضي البيت أو يخلص أمور الوالد والدريول موجود


تدري اخوي من لغوا مادة ( الاقتصاد المنزلي ) من المناهج والبنات تردوا ..
قبل في المنهج الطبخ اجباري وغسيل المواعين عليه درجات والخياطه واساسيات الزواج والرضاعة … الخ هذولا كلهم ناخذهم من اول اعدادي ..
الحين مافي هالاشياء للاسف .. والطلاق زاد واللي تبي تتزوج تطلب بيت مع خادمة او حتى تسكن مع اهل زوجها لكن تكون لها خادمة .. لانها ماتعرف تغسل ولا تكوي حتى ..
طبعا مب الكل لكن نقول 80%

[سالم الزهران]

وعليكم السلام بوزيد ..

هاي دور الوالدين .. التربيه والتعليم .. مثل ماتربيه على الاخلاق الطيبه ..
لازم تعلمه وتسنعه لبعض العلوم ..
ضروري البنت او الولد يتعلم يشل عمره ( يغسل ملابسه / ينظف غرفته / يكوي / يطبخ له لقمه )

الخادمة مش دايما موجودة ..
والام ممكن تمرض ممكن يحصل لها اي عارض ..
فالحياة لازم تستمر والبديل موجود ..

:

على فكرة سالم عندما في قطر مركز اسمه ( نوماس ) يمسكه خيره شباب قطر فيه قسمين منفصلين ..
الاولاد الصغار يعلمونهم ( علوم المجالس / العرضه القطريه / ركوب الخيل / المقناص…الخ
وللبنات يعلمونهم ( الخياطه / الطبخ / التقديم والضيافه .. الخ
حق الصغار لين 14 سنة ..
هالمركز جهه داعمه لجهود الوالدين ..

:

لكن من الاساس ( انت او انتي ) لازم تبتدون مع عيالكم ..
وعلى فكرة اللي تربى على السنع بيعلم عياله ويورثهم هالشي ..
اما اللي عايشين بالبركة فهذا اللي يحتاج اعادة تاهيل ..

جزاك الله خير يا اخت سارة وفيك الخير، البيوت لا شك مهب سوى.. لكن الله يصلح حالنا ويوفق عيال المسلمين لما ينفعهم بدينهم و دنياهم

[سالم الزهران]

لكن يبقى أهم شي الوازع الديني .. باقي الامور تنحل

نورت اخوي بو عابد، وجزاك الله خير على مشاركتك الطيبة