البعض!!

[Rider]

السلام عليكم ورحمة الله وبركاته موضوع خفيف عن بعض الناس
ياخوي لبس كمامه لا عيب
ياخوي طق اشارة وانت لاف ليش شايفني هندي
ياخوي اربط حزام الأمان لا الثوب يتعفس
ياخوي ليش إذا طقيت لك هرن تزعل وتأشر بيديك
ياخوي تعال صل ليش انتوا لحد الحين تصلون
ياخوي تعال عندي المجلس بدل المجمعات لا انت مال اول
ياخوي لا تقط وساختك من السيارة انت وش عليك فيه عمال يأخذون راتب هم ينظفون
طبعا هذا شي بسيط من بعض الناس لي عنده شي يتحفنا

[سعود.]

( ياخوي تعال صل ليش انتوا لحد الحين تصلون )

مدري اسلوب مبالغة ولا جد فيه ناس تقولها :omg:

[sara jsm]

ياخوي لا تقط وساختك من السيارة انت وش عليك فيه عمال يأخذون راتب هم ينظفون

هالتصرف اكثر شي يستفزني ..رغم ان مخالفته 10000 ريال الا انها ماتطبق ..
هو واللي يتفلون الله يعزكم .. ودي بس يحطوني مفتشه في الشوارع .. والله اعدل ميزانيه البلديه من المخالفات :pic:
:
المواقف اللي تضر فيها نفسك مش مسؤولين عنها قلعتك ..
لكن الامور اللي تخالف قيمنا واخلاقنا ومجتمعنا وتضرنا بأي شكل وتسويها جدامنا فلازم تتحاسب عليها ..
:
اللي ياخذ موقفين لسيارته ( غير محترم )
اللي يدخن وعياله معاه بالسيارة ( ضار )
اللي يتسابقون عالخطوط وخاصة ليلة الجمعه ( مستهترين وقتله )
اللي يتاخر بدفع أجر اي عامل عنده ويروح يتغدا ويتعشى بالآلاف ( منافق )

[سالم الزهران]

السلام عليكم ورحمة الله وبركاته موضوع خفيف عن بعض الناس
ياخوي لبس كمامه لا عيب
هذا ما مر علي والكمامة غثيثة لكن الاجراءات لازم تطبق حتى لو ما عليها عقوبة.

ياخوي طق اشارة وانت لاف ليش شايفني هندي
المفروض شركات السيارة تربط الاشارة بلفة السكان أو تربطها بنظام المواقع والمسارات اللي في الشارع (طبعاََ تساعد اللي مب معترف في الاشارة).


ياخوي اربط حزام الأمان لا الثوب يتعفس
هذا يمكن ما قط شاف حوادث.. عموماََ الحزام مهم وليتهم في المصنع يخلونه خفيف.

ياخوي ليش إذا طقيت لك هرن تزعل وتأشر بيديك
هذا يعتمد احياناََ على دقة الهرن وأحياناََ على نفسية اللي تهرن له.

ياخوي تعال صل ليش انتوا لحد الحين تصلون
هذا يبي لك تدعيه للإسلام، واتوقع انه حتى لو يتغشمر فهو على خطر عظيم... السكران فاقد العقل ما يقول هذا الكلام.

ياخوي تعال عندي المجلس بدل المجمعات لا انت مال اول
المجالس الطيبة ما تفوت، لكن الناس تغيرت والمجالس تغيرت بعد وكلن له اختياره.

ياخوي لا تقط وساختك من السيارة انت وش عليك فيه عمال يأخذون راتب هم ينظفون
هذا ما فيه طب الا ان تكون بيدك صلاحية تنزلة يخم الشوارع لمدة اسبوع.

شكراََ يا رايدر

[بوعابد7]

ياخوي تعال صل ليش انتوا لحد الحين تصلون


اذا صج في حد يقول جيي عيل سلملي على كل شي ثاني :)
الي مايصلي مستحيل تلاقي اخلاقياته مظبوطه 100% الا اذا كان مب مسلم وله معتقدات اخرى

طبعا ادري تقصد اللامبلاه عند الاشخاص
اي شخص غير مبالي هو يضر نفسه اكثر من غيره فالاول والاخير حتى لو الامر كان فيه مضره للغير
وبتنعكس تصرفاته السلبية على حاضره ومستقبله بشكل سيء

[Rider]

( ياخوي تعال صل ليش انتوا لحد الحين تصلون )

مدري اسلوب مبالغة ولا جد فيه ناس تقولها :omg:

بالنسبة لي سمعتها من أكثر من شخص طبعا هو ممكن ماخذها من باب الضحك والاستهزاء

[Rider]

البعض ياخوي مايصير غرقت الشارع بالماي غسل سياراتك في المغسلة وانت وش دخلتك الماي بلاش

[معماري قطري]

هالتصرف اكثر شي يستفزني ..رغم ان مخالفته 10000 ريال الا انها ماتطبق ..
هو واللي يتفلون الله يعزكم .. ودي بس يحطوني مفتشه في الشوارع .. والله اعدل ميزانيه البلديه من المخالفات :pic:
:
المواقف اللي تضر فيها نفسك مش مسؤولين عنها قلعتك ..
لكن الامور اللي تخالف قيمنا واخلاقنا ومجتمعنا وتضرنا بأي شكل وتسويها جدامنا فلازم تتحاسب عليها ..
:
اللي ياخذ موقفين لسيارته ( غير محترم )
اللي يدخن وعياله معاه بالسيارة ( ضار )
اللي يتسابقون عالخطوط وخاصة ليلة الجمعه ( مستهترين وقتله )
اللي يتاخر بدفع أجر اي عامل عنده ويروح يتغدا ويتعشى بالآلاف ( منافق )


إصبري شوي اللي ما يتطبق بيتطبق بس قبل كاس العالم

[معماري قطري]

ما دام كل شيء استوى تماتيك في السيارة ليش ما تكون كذلك الإشارة لو انت مخطط رحلتك على نظام الملاحة

انا قليل استعمل الإشارة في قطر لأن أوقات ما لها فايدة وبرا الكل يستخدمها تضطر تكون مثل الجميع .. الغريبة إنت في مسرب وغصب عليك تمسك اتجاه المسرب وهذا شيء معروف للكل هنا ليش تعطي إشارة تزعج عيون الناس وتتعب نفسك

[وحيد-الشوق]

البعض للأسف حديثه وطلبه دائمًا بصيغة الأمر مافيه لو سمحت إذا ممكن بس عطني ابي واحد كابتشينو give me one cappuccino ترى الي تكلمه مايفرق عنك في شيء أبدًا أنت من طين وهو من طين ومصيركم للتراب

[Rider]

البعض للأسف حديثه وطلبه دائمًا بصيغة الأمر مافيه لو سمحت إذا ممكن بس عطني ابي واحد كابتشينو give me one cappuccino ترى الي تكلمه مايفرق عنك في شيء أبدًا أنت من طين وهو من طين ومصيركم للتراب

فعلا ياخوي البعض ياعامل العماله كأنهم عبيد عنده

[أبوماجد]

البعض ما يكذب خبر أنه صار مُدير أو مسؤول !!

فيُخاطب مَن هُم تحت إشرافه وكأنهم يشتغلون (( عِنده )) وليسَ (( مَعَه ))

فلا تنسى يا صديقي بأن كل يَد فوقها يَد ؛ وكل شارب و له مقص !!

[Rider]

البعض ما يكذب خبر أنه صار مُدير أو مسؤول !!

فيُخاطب مَن هُم تحت إشرافه وكأنهم يشتغلون (( عِنده )) وليسَ (( مَعَه ))

فلا تنسى يا صديقي بأن كل يَد فوقها يَد ؛ وكل شارب و له مقص !!

ماشاء الله عليك اخوي ابو ماجد قمت تبش في مواضيعنا القديمه وتجدد فيها الحياة

[أبوماجد]

أي بذرة طيبة مُباركة راح تنبت إما ثمر وإما زهر ، ودائما وراء الطيبين أمثالكم يا صديقي الغالي يبقى الأثر

ببساطة دعنا ننظر للأمور مِن حولنا بعَيني النحلة لا الذبابة ، فالنحلة تنظر للزهور والرياحين بعَكس تِلك الأخرى :)

[أبوماجد]

بعض حديثي النعمَة غرّتهم الحياة وزينتها ومظهرها الخَدّاع ، فنسوا أو تناسوا بأن

هذا هُوَ حالُ الدنيا التي قيلَ فيها : إن أقبَلت باض الحَمامُ على الوَتَد ، وإن أدبَرَت بالَ (حاشاكم) الحِمارُ على الأسَد

ولكن إياكَ أن تُحرقك !! لأن اللي عُمره ما تبخر، تبخر واحترق

[معماري قطري]

أي بذرة طيبة مُباركة راح تنبت إما ثمر وإما زهر ، ودائما وراء الطيبين أمثالكم يا صديقي الغالي يبقى الأثر

ببساطة دعنا ننظر للأمور مِن حولنا بعَيني النحلة لا الذبابة ، فالنحلة تنظر للزهور والرياحين بعَكس تِلك الأخرى :)

مع إن الذبانة عيونها مبققة كأنها ليتات فولكس واغن الخنفسانة

[أبوماجد]

مع إن الذبانة عيونها مبققة كأنها ليتات فولكس واغن الخنفسانة

لا .. ويقول لك ذاكرة الذبانة قصيرة جداً وتنسى بسرعة !!

بدليل أنك قد ما تكشها وتضربها تاخذ لفة وترد لك !! ويا هي سندارة هههههههه

أحلا صباح يا أحلا ابو عبدالله :)