مقاول لبناء مجلس خارجي

[بو يسوم]

السلام عليكم ورحمة الله وبركاته.

مطلوب مقاول لهدم وبناء مجلس خارجي ويكون سعره معقول .

[معماري قطري]

أعرف واحد بنى 8 في 10 مجلس وملحقاته سريع خلصه في شهر بالجبس والتكييف ومعاه مغاسل ودورة مياه وغرفة قهوة كلفه بحدود 50000 على كلامه .. الكراسي سواهم تفصيل سعرهم غير نسيت كم حول 20000 قال والدرايش والأبواب جاته هدية من مالك إحدى شركات اليو بي في سي .. خر شوي يوم جاء المطر نصحته بسيليكون بين السقف الحديد وسواه وما جاء مطر مرة ثانية للإختبار .. الجبس صمد

عاد كل ذيه خلال رمضان اللي راح وطلعت فيه شوية كراكات وعالجها وقلت له بتطلع مرة ثانية وطلعت مرة ثانية بس بسيطة كلش والسبب سوء تركيب الطابوق وتقليل المونة

[معماري قطري]

لو تبغي تسوي شيء حلو وبسعر بسيط سو جدران بطابوق السيبوريكس على صبية خفيفة 10 سم هي الأساس والطابوق هذا عند شركة ناصر بن خالد .. غالي شويتين بس عازل وخفيف وفوقه ركب حديد مخفي وساندويش بانل للسقف يكون معزول وأكيد ضروري التصميم يكون موجود عندك وتسوي له تصريف مياه من الجهة الخلفية وسلوب واحد ولو تبغي تغطي منظر الشينكو وهو يبين ورا تقدر تركب واجهة على حديد بعد اسمنت بورد .. تلحم الحديد في حديد تعليق السقف

[sara jsm]

وعليكم السلام ..

شوف في فريجكم من اللي قاعد يبني وخذ اسم الشركة من لوحة الاعلان وتواصل معاهم ..
وخذ عرض سعر بالمساحة اللي تبيها .. اهم شي لا تسترخص في بيتك خاصه المواد الاوليه ..

الله يوفقك

[بو يسوم]

الله يجزاكم خير على نصيحتكم الوافية

[صاحي ضميره]

من تجربه.. رجال امين.. ومهندس. واهله وجماعته كلهم ف قطر..
اسمه شركه اوسكار