انا في حيرة اتمنى منكم المشورة

[حورية]

السلام عليكم
اخواني ترددت الف مرة لما كتبت هذا الموضوع واستشيركم بس ادري ان انتو اخواني واكيد تتمنون لي الخير وادلوني على الخير انا اخواني كنت قاعدة في بيت ايجار وبعدين خذت سلفية وشريت قطعة ارض وخلصت السلفية وخذت سلفية ثانية ودخلت في السوق وايام الغلى كان اوكي وما بعت لان كنت منتظرة اكمل التصميم والخرائط حق البناء وما بعت الاسهم علشان الكل نصحني ان راح يرتفع اكثر وطبعا الايجارات ارتفعت وقعدت بيت اخوي قلت لمدة مؤقتة لما ابني يعني لمدة سنة ونص لكن عقب ما خلصت الخرائط نزل السوق مرة وحدة وخسرت ثلاث ارباع فلوسي والحين ما اقدر ابني وانا فعلا مش عارفة ايش اسوي خلصت سنة ونص وانا قاعدة بيت اخوي لا قادرة اخذ بيت ايجار ولا اقدر ابني وانا الحين قاعدة افكر ابيع الارض وادخل في الاسهم من جديد بس خايفة من هاي المجازفة هل اصبر لما يرتفع السوق او ما في امل لان حتى لو يرتفع ما اعتقد راح اقدر احصل قيمة البنيان ومش عارفة ادخل في اي مشروع ثاني ما ادري لاني عمري ما دخلت في مشاريع من قبل اتمنى يا اخواني تنصحوني لان بالفعل منحرجة لاني طولت بيت اخوي وما عندي حل ثاني واتمنى تعطوني حل ايكون لمصلحتي والله ايوفقكم ويستر عليكم دنيا وآخرة.

[نمر بن عدوان]

اختي لو كنتي تملكين سيوله كان ممكن ننصحج بالتعديل في بعض الشركات لكن المشكله ان الحل هو بيع الارض واعتقد هالشي صعب اقدر انصحج فيه لان الغيب مايعلمه الا الله ,, ماقدر اقول غير الله يفرج كربتج ان شالله وتحصلين مخرج يحل مشكلتج العويصه وربي يوفقج

[سهم عتيج]

ما تقدرين تبنين البيت عن طريق تمويل من بنك اسلامي مثلا؟؟؟

من الصعوبة اعطاء رأي من دون معرفة تفاصيل أكثر..

بس ما دام ان الأرض ملكك,, فان شاء الله الامور أسهل

عليك بالاستخارة في مثل هذه الامور,, وأسأل الله أن يحل مشكلتك..

[سهم طايش]

اهم نصيحة لا تفرطين في الارض مهما حصل

و الله يعوضج خير

[حالي الذوق]

لاحول ولاقوه الا بالله

الله يفرج الكربه ان شا الله

اختي اذا بتيعين الارض كم تقريبا بتجيب لك اقصد اذا كانت الارض كبيره فوق ال900 متر فممكن تجيب لك حول المليون او اكثر وممكن بقيمتها تشترين بيت او فله صغيره بمساحة 450 متر او 500 متر تقريبا

[AL-QATARE]

اختي حوريه يا ليت تصلين صلات الاستخاره وانطري ثلاث ايام وشوفي شنو يصير معاج
ولله يكتب فيه الخير لج

[يابعدهم كلهم]

اي والله اهم شيء الارض ماتنباع , خلج في بيت اخوج الين الله يفرجها وتتحسن الاوضاع وتقدرين تكملين بنيان البيت واااااالصبرررر زززززززين ,,,,,,,,,,



اما تبيعين الارض وتشترين في الاسهم اكبر غلطه ,,,





الله يعوض عليج :)






,,

[المهاجر]

اختي الكريمه
مثل ما قالوا الاخوان جزاهم الله خير لا تفرطين في الارض واصبري لين السنه الجديده وانشاء الرحمن تتعدل الاوضاع
وعليج بالدعاء وكثرة الاستغفار والصدقه وانشاء الله تلقين الخير
الله يوفقج

[qatar_moon]

لاحول ولاقوه الا بالله

الله يفرج الكربه ان شا الله

اختي اذا بتيعين الارض كم تقريبا بتجيب لك اقصد اذا كانت الارض كبيره فوق ال900 متر فممكن تجيب لك حول المليون او اكثر وممكن بقيمتها تشترين بيت او فله صغيره بمساحة 450 متر او 500 متر تقريبا

انا اشوفه حل ممتاز

والله يعينج ان شاء الله

[حورية]

السلام عليكم
اشكركم يا اخواني على نصيحتكم لي وانا بالفعل فكرت في موضوع اني ابيع الارض واشتري بيت بس للاسف حتى قيمة الارض ما راح اتجيب بيت لان الحين البيوت فوق المليونين وانا ما عندي سيولة ثانية غير الارض لان علي سلفيات والبنك ما راح ايسلفوني فوق السلفيات الي عندي وانا انشاء الله ما عندي غير الصبر والفرج من عند الله

[ســـــ ممتاز ـــهم]

لا تبيعين الارض ، الانسان يستثمر منشان يكون اصول وممتلكات مهب يبيع ممتلكاته عشان

يستثمر .

اصبري والله بيفرجها

[كويتي فهمان]

الله يفرج عليج

[ولـــد قطـــر]

ممكن البنك يبنيلك بضمان الارض

وتاجرين البيت وأجار البيت يروح للبنك الى بنى لمدة مادري كم الصراحة

وومكن ترفعين القسط علشان تخلصين بسرعة يعني اجار البيت + مبلغ من عندك للبنك تخلصين بسرعة من القرض

وبعدين يكون البيت ملكك

بس بنتظرين شوي في بيت اخوك

الله يعينك ويوفقك

[دنى النور]

اختي أرهني الأرض وخذي سلفة على اقساط بسيطة وطويلة الأجل ومن ثم أبني بيتك في نفس الأرض بالمبلغ الذي اقترضتية من البنك أو أي شركة تمويل

[دنى النور]

السلام عليكم
اشكركم يا اخواني على نصيحتكم لي وانا بالفعل فكرت في موضوع اني ابيع الارض واشتري بيت بس للاسف حتى قيمة الارض ما راح اتجيب بيت لان الحين البيوت فوق المليونين وانا ما عندي سيولة ثانية غير الارض لان علي سلفيات والبنك ما راح ايسلفوني فوق السلفيات الي عندي وانا انشاء الله ما عندي غير الصبر والفرج من عند الله
ارهني الأرض وبالمبلغ ابني البيت فيها

[المتألم]

الارض لا تباع

في اسوأ أسوأ أسوأ الظروف بورتكبن فيها بس بدون ارض وين الواحد
يضرب براسها
خلي الارض واقعدي عند اخوك هو ملزم فيك
والامور تتحسن ان شاء الله

فلا تبيعين الارض

سلااااااااااااااامي

[deepbluesea]

اختي مالك الا الصبر

الارض دام ما تجيب حتى قيمه بيت ، عيل مافيه فايده تبيعينها

احتفظي فيها احسن ، وموضوع انك تبيعينها وتشتري اسهم ، هذا حتى لا تفكرين فيه ، لانه عصفور في اليد احسن مليون مره من مليون على الشجره

وخاصه الاسهم عندنا حيرت حتى خبراء الاسهم

اما مسألة قعدتج عند اخوووج وانها طولت ، فأقولك بكل صراحه المفروض هالشي ماتفكرين فيه ابد ابد ، لانه في الاول والاخير اخوووج ، يعني مب غريب وانتي منه وفيه ، وهو ملزم فيج حتى لو العمر كله مب كم سنه بس

والله يفرج كربتج ان شاء الله عن قريب

[Rayyan]

اختي مالك الا الصبر

الارض دام ما تجيب حتى قيمه بيت ، عيل مافيه فايده تبيعينها

احتفظي فيها احسن ، وموضوع انك تبيعينها وتشتري اسهم ، هذا حتى لا تفكرين فيه ، لانه عصفور في اليد احسن مليون مره من مليون على الشجره

وخاصه الاسهم عندنا حيرت حتى خبراء الاسهم

اما مسألة قعدتج عند اخوووج وانها طولت ، فأقولك بكل صراحه المفروض هالشي ماتفكرين فيه ابد ابد ، لانه في الاول والاخير اخوووج ، يعني مب غريب وانتي منه وفيه ، وهو ملزم فيج حتى لو العمر كله مب كم سنه بس

والله يفرج كربتج ان شاء الله عن قريب


صدقت أخوي
هذا الكلام الصحيح

[Bin Hood]

السلام عليكم اختي الكريمة حورية

اولا احب اشكر الكل على ابداء النصيحة

ثانيا اقولج ان احنا في شهر رمضان وفي العشر الاواخر بعد

لذا توجهي بالدعاء للرزاق الكريم مجيب الدعاء

سبحانه يرزق من يشاء بغير حساب ويرزقه من حيث لايحتسب

رزق سيدنا زكريا بحيا وزجه عقيم بالاضافة انها تعدت سن اليأس بمراحل

ولا تستعجلي بالاجابة وتحري اوقات الاستجابة :

الثلث الاخير من الليل , عند الفطر , في السجود وغيرها من المواضع الكثير

اسأل الله الرزاق الكريم ان يفرج لك كربتك وجميع كرب المسلمين

[حورية]

السلام عليكم
اشكركم يا اخواني على اهتمامكم لموضوعي وبالفعل استخرت البارحة وجاني في النوم اني بنيت فلة كبيرة لكن تفاجأت ان المقاول غشني وبنى لي فلة من خشب بعد ما سكنت فيه وان الخشب بدأ ينهدم وبصراحة ما عرفت ايش تفسير الحلم ما ادري اذا كان هذا خير لي ولا شر الله يرحمنا برحمته.

[ســـــ ممتاز ـــهم]

السلام عليكم
اشكركم يا اخواني على اهتمامكم لموضوعي وبالفعل استخرت البارحة وجاني في النوم اني بنيت فلة كبيرة لكن تفاجأت ان المقاول غشني وبنى لي فلة من خشب بعد ما سكنت فيه وان الخشب بدأ ينهدم وبصراحة ما عرفت ايش تفسير الحلم ما ادري اذا كان هذا خير لي ولا شر الله يرحمنا برحمته.

لا خلاص انا مالي دعوة ...

شكله الموضوع بدا يقلب فلم رعب ..

[حورية]

السلام عليكم
فعلا اخوي انا بنفسي اشوفه فلم رعب وما ادري ليش كتبت الحلم بس لان الكل نصحني استخير والحمدلله استخرت وقلت هذا الي صار معاي وفعلا الي كاتبه لي الله راح ايصير.

[سهم طايش]

خير اللهم اجعله خير

[متفااائل]

الحلم إن شاء الله خير ولايدل على الشر إن شاء الله

والأرض احتفظي فيها مثل ما أنصحوج الأخوان واخوج ملزوم بج وسالفة الرهن أنتي ادرى بقدرتج على استيعاب أعباء جديدة

في فترة أرتفاع السوق لازم يكون القرار سليم وممكن تستشيرين محللين المنتدى سيما الكبار منهم ( خالد - بوخليفه ) حتى لو برسالة خاصه وماراح يقصرون وياج ولا تاخذين قرار من راسج أو من قرائه مشاركة أو من عليمي بالتحليل

ولج دعوة صادقة في ظهر الغيب في العشر الأواخر أنه يفرج كربتج ويحقق مطلبج

[حورية]

تسلم اخوي المتفائل بس ما اعرف ايشلون اقدر ارسل رسالة خاصة حق الاخ خالد ولا خليفة لاني ما جربت من قبل ارسل حق احد في المنتدى والله ايوفقك اخوي

[كحيلان]

السلام عليكم
فعلا اخوي انا بنفسي اشوفه فلم رعب وما ادري ليش كتبت الحلم بس لان الكل نصحني استخير والحمدلله استخرت وقلت هذا الي صار معاي وفعلا الي كاتبه لي الله راح ايصير.

انتبهي بس لاتدخلين جو الوسوسه ..

[Mr.Qatari]

دخلي معاج شريك يبني فلتين فله له والثانيه لج

[متفااائل]

السلام عليكم
اشكركم يا اخواني على اهتمامكم لموضوعي وبالفعل استخرت البارحة وجاني في النوم اني بنيت فلة كبيرة لكن تفاجأت ان المقاول غشني وبنى لي فلة من خشب بعد ما سكنت فيه وان الخشب بدأ ينهدم وبصراحة ما عرفت ايش تفسير الحلم ما ادري اذا كان هذا خير لي ولا شر الله يرحمنا برحمته.

أختي حلمج صراحة شغلني لأنه ملفت صراحة

وسألت من أحسبه له معرفه بالتأويل قال تأويل الرؤية أن البيت مبني من مال ربوي قول لها تتحرى في تمويل البيت الحلال وربي بيوفقها

عسى ربي يوفقج للخير والحلال يارب والسموحه منج

[حورية]

لا يا اخوي المتفائل انا للحين ما بنيت البيت بس بالحلم بس اقدر اقول لك ان الارض شريتها عن طريق الدولي الاسلامي بس تكملة سلفية الارض من بنك ربوي وهذا الكلام صحيح وكان هذا الشي غصبا علي لظروف طارئة والشخص الي قال لك كلامه صحيح وانا بعد كنت حاسة بهذا الشي ان الله مش اموفقني علشان في ارضي فيها فلوس ربوي وانشاء الله راح اشوف الموضوع ايشلون اقدر اطهر ومشكور يا اخوي على اهتمامك وايوفقك.