المساعد الشخصي الرقمي

مشاهدة النسخة كاملة : ظاهرة غريبة/للنقاش


ولد البلاد
06-01-2007, 05:18 PM
عادات وتصرفات غريبة كثيرة نلاحظ ظهورها في المجتمع القطري المحافظ في الآونة الأخيرة

وهنا سوف أتطرق إلى ظاهرة أكيد جميعنا لاحظها في المجمعات التجارية والأماكن العامة وهي ظاهرة تشابك الأيادي بين المتزوجين أو تعلق المرأة بذراع زوجها مع الالتصاق الغريب وكأنهما ليسا في مكان عام والبعض يطور الأمر بحيث يضع يده على كتف زوجته مع ميلانه عليها بصورة غريبة والبعض يلف يديه على خصر زوجته أو هي تفعل ذلك ؟؟

تصرفات وحركات تخدش الحياء العام ولا تراعي مشاعر الآخرين !!

هل هذا بغرض إظهار الحب والمودة أمام أنظار العالم ؟؟

وهل هذا هو المكان المناسب لإظهار هذه المودة ؟؟

أم هو التقليد الأعمى للغرب ؟؟

أم هو خطوة لتبديل مظاهر المجتمع إلى مظاهر جديدة فاسدة ودعوة إلى قبول كل ما هو مستورد من عادات وأخلاق بغض النظر عن ملائمتها لعاداتنا وأخلاقنا التي نستقيها من ديننا الإسلامي العظيم ؟؟

هل فقدنا رجولتنا وغيرتنا على أعراضنا وأصبحنا لا نفرق بين الخطأ وبين الصواب ؟؟

وقد بحثت في الانترنت عن هذة الظاهرة ووجدت ان بعض المنتديات الخليجية قد طرحتها للنقاش

وكان هناك مؤيد لهذة الظاهرة وله تفسيراته ...

وهناك المعارض لها وله أسبابة ....

فأحببت أن اطرح هذه الظاهرة للمناقشة في منتدانا العزيز

للاطلاع على رأي الإخوان والأخوات حولها

والإفادة عن السبل الكفيلة بمكافحة مثل هذه الظواهر الدخيلة على مجتمعنا القطري



.
البعد الخامس
06-01-2007, 05:36 PM
لاحظت أخوي هالشي من زمان من تقريبا 8 سنوات
بنت الحرمي
06-01-2007, 08:38 PM
صح انا هالشي شفته اكثر من مرة ..

سووري بس يعني هالناس ما عندهم بيت ولا السالفة مجرد اظهار الحب جدام الناس.. الله اعلم !!

الله يهدي الجميع ان شاءالله ..

يعطيك العافية اخوي الفاضل وجزاك الله كل خير
Gold Boy
06-01-2007, 08:47 PM
ههههه

حلات غريبه مره شفت وحده ماسكه زوجها من ايده في السوق وحاطه كتفها على كتفه باقي شوي وتطيح عليه احس كأنها مو مصدقه حالها انها متزوجه هههههههه
ولد البلاد
06-01-2007, 09:18 PM
لاحظت أخوي هالشي من زمان من تقريبا 8 سنوات


مشكور اخوي على المرور
بس ماقلت لنا وجهة نظرك في هذه الظاهرة


.
ام الحلوين
06-01-2007, 09:31 PM
اشكرك جزيل الشكر اخوي
انا معك لكن ساعات انا زوجي يمسك ايدي لو بنعبر شارع ووقتها والله ان وجيهنا تقطع من الفشيله

الله يهديهم بس
ولد البلاد
06-01-2007, 09:46 PM
صح انا هالشي شفته اكثر من مرة ..

سووري بس يعني هالناس ما عندهم بيت ولا السالفة مجرد اظهار الحب جدام الناس.. الله اعلم !!

الله يهدي الجميع ان شاءالله ..

يعطيك العافية اخوي الفاضل وجزاك الله كل خير



والله الظاهر اختي السالفه فشخره مثل مايقولون
اشكرج اختي على اهتمامج



.
المزن الرياني
06-01-2007, 09:52 PM
أعتقد المرأه هي الطرف المسؤول في القضيه

ياخي تبي تروي الناس ان الحب مقطع بعضه :d
مريديان
06-01-2007, 09:59 PM
مادري انا اشوف لو الزوج يمسك يد زوجته فقط..يخاف عليها او زيادة اهتمام فيها..يمكن غشوتها ثقيلة ماتشوف او لابسه هاي هيل...بالعكس شي حلو...

بس انه يحط يده على خصرها او ان يميل عليها وتميل عليه لا طبعا مب حلوه..يخلون هالاشياء بينهم وبين نفسهم وببيوتهم..:)

وتسلم اخوي على هالموضوع
السفير العربي
06-01-2007, 10:35 PM
ظاهــرة قبيحــة للغايــة ولاتنم إلا عن ســــوء أخلاق المتشابكين
وجهلهم بمعاني الأدب والذوق العام .. والمروءة سلوك يفتقدها
كثيــر من الرجـــال .

أشكرك ولد البلاد على هذا الطــرح المميــز .

تحيــاتي للجمــيع
سهم الخيانة
06-01-2007, 10:42 PM
ظاهــرة قبيحــة للغايــة ولاتنم إلا عن ســــوء أخلاق المتشابكين
وجهلهم بمعاني الأدب والذوق العام .. والمروءة سلوك يفتقدها
كثيــر من الرجـــال .

أشكرك ولد البلاد على هذا الطــرح المميــز .

تحيــاتي للجمــيع

مارح أزيد على كلامك يا السفير الحلم العربي :eek3: بس بكلمه وهي هذي الافعال تعد من قلة الأدب
دنيا الاسهم
06-01-2007, 10:46 PM
انا اشوف انها حركات ماصخة ولا لها داعي وتلاقيها تسوي هالحركات عشان يعرفون الناس انها متزوجة ولا يمكن تخاف تضيع:dance
ولا تطيح:eek2:
ولا عشان ما يشرد عنها:eek2:
على العموم المفروض هالحركات يخلونها في البيت:court:
ولد البلاد
06-01-2007, 11:59 PM
ههههه

حلات غريبه مره شفت وحده ماسكه زوجها من ايده في السوق وحاطه كتفها على كتفه باقي شوي وتطيح عليه احس كأنها مو مصدقه حالها انها متزوجه هههههههه


عيل اخوي انت ماشفت شيسون برا البلاد في الصيف يفصخون الحيا كلش :anger2:

مشكور اخوي على المساهمة

.
ولد البلاد
07-01-2007, 06:08 AM
اشكرك جزيل الشكر اخوي
انا معك لكن ساعات انا زوجي يمسك ايدي لو بنعبر شارع ووقتها والله ان وجيهنا تقطع من الفشيله

الله يهديهم بس


اللي بيمسك يد زوجته عشان عبور الشارع او عشان الزحمة او عشان نظرها ضعيف مثلا فهذا الشي مطلوب وواجب ومفروض مانتفشل منه
اشكرج اختي على المرور والمساهمة


.
ولد البلاد
07-01-2007, 07:05 PM
أعتقد المرأه هي الطرف المسؤول في القضيه

ياخي تبي تروي الناس ان الحب مقطع بعضه :d


انا اخالفج الراي اختي المفروض الرجال هو المسؤول دائما وهو الذي من المفروض ان يكون بيده القرار

اشكرج اختي على المرور والاهتمام.
haya99
08-01-2007, 06:24 AM
اذا لم تستحي فأصنع ماتشأ

انا اعتبر هذا دلع من البنات وميوعة من الشباب
والانسان اللي يحترم زوجته ويحترم نفسه ماظن يسوي هالشكل
والمفروض الانسان يطالعهم بنظره احتقار يمكن يستحون على دمهم ويتركون هالعاده البايخه

مشكور اخوي على هالموضوع المهم
ضوى
08-01-2007, 08:17 AM
اخواني اسمحوا لي انا لي راي مخالف شوي بهالقضية

ليش سميتوها ظاهرة قبيحة ؟؟ يعني الزوج لما يمسك ايد زوجته في المجمعات او بالاسواق حفاظاً عليها من المعاكسين ومن اللي يمشون ويضربون اكتافهم باكتاف الحريم هذا شئ قبيح ؟
ما اشوف اي شئ في ان الزوج يمسك ايد زوجته باي مكان طبعا مب تشابك حب وغرام عادي مسكة ايد عادية جدا ، اما سالفة يحطون ايدهم على الخصر وبمياعة فهذا شئ غير مقبول ابدا
ولو كان يمسك ايد زوجته بدليل الحب اشفيها ؟؟ خاصة اذا كانت المسكة طبيعة ولا فيها اي نوع من الدلع او المصاخة

شكرا لك اخوي على هالموضوع
ولد البلاد
08-01-2007, 11:16 PM
الاخت/مريديان
الاخ/السفير العربي
اشكركم على المرور والاهتمام

.
ولد البلاد
09-01-2007, 06:43 AM
الاخ/سهم الخيانة
الاخ/دنيا الاسهم

الشكر لكما على المرور والمساهمة.
فارس 2007
09-01-2007, 06:46 AM
أعتقد المرأه هي الطرف المسؤول في القضيه

ياخي تبي تروي الناس ان الحب مقطع بعضه :d


:app: :app: :app: :app: :app: :app:
{راشد}
09-01-2007, 07:05 AM
ياحسافه ع الرجوووله بس ,,

يعطيك العافيه
ولد البلاد
09-01-2007, 10:25 PM
اذا لم تستحي فأصنع ماتشأ

انا اعتبر هذا دلع من البنات وميوعة من الشباب
والانسان اللي يحترم زوجته ويحترم نفسه ماظن يسوي هالشكل
والمفروض الانسان يطالعهم بنظره احتقار يمكن يستحون على دمهم ويتركون هالعاده البايخه

مشكور اخوي على هالموضوع المهم



اوافقك في الراي اختي
واشكرج على المساهمة



.
jetstream---
10-01-2007, 08:55 AM
اذا الزوج يمسك يد زوجته بطريقة عاديه اثناء المشي في المجمعات او الزحمه فأعتقد هذا شي

عادي أو حتى مطلوب لان الواحد يتضايق ويغير على هله بس مازاد عن ذلك فهو من عدم

الرجوله
خالد32
10-01-2007, 09:43 AM
الحمد لله و لا واحد شفته منهم لابس ثوب بلادي كهم اجانب يعني الله حافظ اهل البلاد من هالمصاخه, لكن الخوف ان الصغار يتعودون على اللي يشوفونه و يصير عندهم شي عادي و يسوون مثلهم.
خاربه خاربه
10-01-2007, 10:02 AM
يمسك يد زوجته اوكي ماقلنا شي بس اللي مومتزوجه محد يغار عليها يعني :confused:

وبعدين موشرط يكون اللي ماسك يدها زوجته يصير بنته اخته صح والا لا :nice:

واكيد الي يسون اكثر يكون قلة ادب وانا شفت شي عيني عينك انقلب ويهي اللوان :shy:

ويعطيك العافيه يارب وربي يهدي الجميع :D
ولد البلاد
10-01-2007, 11:45 AM
اخواني اسمحوا لي انا لي راي مخالف شوي بهالقضية

ليش سميتوها ظاهرة قبيحة ؟؟ يعني الزوج لما يمسك ايد زوجته في المجمعات او بالاسواق حفاظاً عليها من المعاكسين ومن اللي يمشون ويضربون اكتافهم باكتاف الحريم هذا شئ قبيح ؟
ما اشوف اي شئ في ان الزوج يمسك ايد زوجته باي مكان طبعا مب تشابك حب وغرام عادي مسكة ايد عادية جدا ، اما سالفة يحطون ايدهم على الخصر وبمياعة فهذا شئ غير مقبول ابدا
ولو كان يمسك ايد زوجته بدليل الحب اشفيها ؟؟ خاصة اذا كانت المسكة طبيعة ولا فيها اي نوع من الدلع او المصاخة

شكرا لك اخوي على هالموضوع


مشكورة اختي على المرور والمساهمة



.
ولد البلاد
10-01-2007, 10:38 PM
:app: :app: :app: :app: :app: :app:



مشكور اخوي على المرور

.
ولد البلاد
10-01-2007, 10:39 PM
ياحسافه ع الرجوووله بس ,,

يعطيك العافيه



مشكور ياراشد على المرور والمساهمة

.
احلى سهم
11-01-2007, 01:28 AM
انا قطريه ادرس في بريطانيا ..
راح اتكلم بشي انا عارفته ومتاكده منه وصدقوني شفت اشيا صج تخلي الواحد يستحي من نفسه ..

كلنا عارفين الفروق اللي بين مجتمعاتنا الخليجيه المسلمه ومجتمعات الغرب غير المسلمين .. البريطانيين عندهم ان الشخص حر وويسوي اللي يسويه عااااادي..
واللي بيقعد يطالعه هو قليل الادب !!
والمراه هي اللي تفصل والرجل يلبس!!
ليش ما يقلد هالشي بعد :nice: (( يحبون التقليد ))


انا اجوف ان مافيها اي شي لو تشابكت الايادي اوصارت اي حركه مافيها ((مبالغه)) باظهار المحبه ..

وللي يسوي هالحركات .. يمكن 70% من اللي يشوفونك يقولون ما يستحي .. و 20% يقولون "انزين درينا !!" والباقي يضحكون (النسب غير دقيقه)

وفي النهايه .. وشعلي انا من الناس وشعلى الناس مني :dance
النيـــزك
11-01-2007, 01:55 AM
ياربع ترا الدعوه سهالات :d
سيف قطر
11-01-2007, 08:35 AM
تسلم اخوي ولد البلاد على طرحك .... واقول ... كل اناء بما فية ينضح.... وشكرا
ولد البلاد
11-01-2007, 07:24 PM
اذا الزوج يمسك يد زوجته بطريقة عاديه اثناء المشي في المجمعات او الزحمه فأعتقد هذا شي

عادي أو حتى مطلوب لان الواحد يتضايق ويغير على هله بس مازاد عن ذلك فهو من عدم

الرجوله



مشكور اخوي على المساهمة
ونحن نتكلم عن الحركات الغير عاديه والتي بدون اسباب ضرورية

.
ولد البلاد
11-01-2007, 07:27 PM
الحمد لله و لا واحد شفته منهم لابس ثوب بلادي كهم اجانب يعني الله حافظ اهل البلاد من هالمصاخه, لكن الخوف ان الصغار يتعودون على اللي يشوفونه و يصير عندهم شي عادي و يسوون مثلهم.



والله اخوي الكثير منهم لابسين ثياب وقطريين

اشكرك على المساهمة اخوي.
ولد البلاد
11-01-2007, 07:30 PM
يمسك يد زوجته اوكي ماقلنا شي بس اللي مومتزوجه محد يغار عليها يعني :confused:

وبعدين موشرط يكون اللي ماسك يدها زوجته يصير بنته اخته صح والا لا :nice:

واكيد الي يسون اكثر يكون قلة ادب وانا شفت شي عيني عينك انقلب ويهي اللوان :shy:

ويعطيك العافيه يارب وربي يهدي الجميع :D



والله اختي خاربة احنا الريايل لما نشوف هالحركات ننحرج ونصد عنهم
وهم مايستحون والامر عادي عندهم

اشكرج اختي على المرور والمساهمة


.
التيما
11-01-2007, 08:36 PM
انا صراحه لما اشوف هالمنظر اضحك لأنه هم يبكي وهم يضحك وأنا أتصور هالاشكال من يروحون البيت ما يواطن الواحد فيهم الثاني بس جدام العالم شوفونا والا ريال يغار على بيته ما يعرض شوفاته للناس كلن يطالعهم وين الغيره امحق وفعلا اذا لم تستح فاصنع ما شئت :anger1:
امل الحب
11-01-2007, 08:41 PM
تشابك الايدي بينهم موضوع عادي جدا..

بس الزيادة شوي يعني لك عليها..

الله يهدي الحميع ان شاء الله..
ابن الوطن
11-01-2007, 09:17 PM
عن عبدالله بن عمر رضي الله عنه قال : قال رسول الله صلى الله عليه وسلم : ( ثلاثة لاينظر الله عز وجل إليهم يوم القيامة :العاق لوالديه ، والمرأة المترجلة المشتبهة بالرجال والديوث) صحيح أخرجه أحمد والنسائي


الديوث من أخبث خلق الله قد ماتت الغيرة في قلبه ، يقول ابن القيم: ( وهذا يدل على أن أصل الدين الغيرة ، ومن لاغيرة له لا دين له ، فالغيره تحمي القلب فتحمي له الجوارح ، فتدفع السوء والفواحش ، وعدم الغيرة تميت القلب فتموت الجوارح ،فلا يبقى عندها دفع البته
ولد البلاد
12-01-2007, 02:26 PM
كلنا عارفين الفروق اللي بين مجتمعاتنا الخليجيه المسلمه ومجتمعات الغرب غير المسلمين .. البريطانيين عندهم ان الشخص حر وويسوي اللي يسويه عااااادي..
واللي بيقعد يطالعه هو قليل الادب !!
والمراه هي اللي تفصل والرجل يلبس!!
ليش ما يقلد هالشي بعد :nice: (( يحبون التقليد )):dance
مادري أختي هذي دعوة لتقليد الغرب ام العكس ؟؟



انا اجوف ان مافيها اي شي لو تشابكت الايادي اوصارت اي حركه مافيها ((مبالغه)) باظهار المحبه .. :dance
اختي هل تشوفين الاسواق والاماكن العامة مكان مناسب لاظهار المحبة بين الزوجين ؟؟
أين الحياء ؟؟ اين العادات والتقاليد ؟؟ اين مراعاة شعور الآخرين خاصة الشباب المراهق ؟؟
فقد قال رسولنا الكريم صلى الله عليه وسلم { الإيمان بضع وسبعون شعبة أو بضع وستون شعبة، فأفضلها قول لا إله إلا الله، وأدناها إماطة الأذى عن الطريق، والحياء شعبة من الإيمان }.
ومن فقد الحياء فهناك خلل في ايمانه وعليه مراجعة نفسة .


وللي يسوي هالحركات .. يمكن 70% من اللي يشوفونك يقولون ما يستحي .. و 20% يقولون "انزين درينا !!" والباقي يضحكون (النسب غير دقيقه):dance
هذا اثبات منك ان المجتمع يرفض مثل هذة العادات الدخيلة علية ...



وفي النهايه .. وشعلي انا من الناس وشعلى الناس مني :dance
هذة الجملة ومفهومها هي المدمرة لاخلاق المجتمعات وعاداتة للاسف وطريق الشيطان لتسهيل كل ماهو خطأ.
والمرادف لهذة العبارة هو (( إ ذا لم تستحي فاصنع ما شئت ))

وشكرا اختي على مرورك

.
همس
12-01-2007, 03:10 PM
حركه مالها داعي ،، يعني لازم يمسك يدها!
أنا للأسف الشديد يجي في بالي سوء الظن لما أشوف أثنين ماسكين يد بعض أن هذول مب متزوجين والله أعلم ،، يمكن تكون صاحبته و يبي يحسسها بالحب أو غيره..
سلمت أخي لغيرتك على أهلك و بلادك
احلى سهم
13-01-2007, 12:54 AM
ولد البلاد .. انا ضد الحركات المبالغ بها ..
اما ان واحد ماسك يد وحده .. شفيها؟؟
الناس ليش منقهره!! خلو الدنيا كلها وقعدوا يفكرون بواحد ماسك يد وحده!! (( هذي قضيه ثانيه بعد.. الا وهي "هذا فيه وهذي فيها" !!))
ما اشوف انه عيب ...

واذا خايفين على الصغار .. لا تخلونهم عند الخدامات وحطوا بالكم عليهم وبتجوفون التغيير ان شالله :nice:

و "شعلي انا من الناس وشعلى الناس مني" ماتعني ان لم تستح فاصنع ما شئت ..
انا اللي اقوله اني ما راح اصلح الدنيا ..
لو اصلح كل منا نفسه اولا .. وحاول نصح المقربين له .. لكان الوضع افضل!!


حركه مالها داعي ،، يعني لازم يمسك يدها!
أنا للأسف الشديد يجي في بالي سوء الظن لما أشوف أثنين ماسكين يد بعض أن هذول مب متزوجين والله أعلم ،، يمكن تكون صاحبته و يبي يحسسها بالحب أو غيره..
سلمت أخي لغيرتك على أهلك و بلادك

همس .. عندك او عندج تفكير يبيله اب قريد
ذكرتيني بحلقه طاش ماطاش اللي منعوها :funny:

حلقه الهيئه اللي قال حق صاحبه وقفهم
و رد عليه: يا رجال يمكن رجال وزوجته
قال له ما تجوفهم يتضاحكون والعياذ بالله :funny: :funny: :funny:
وطلعوا متزوجين omen
عيون الدوحه
13-01-2007, 01:06 AM
:app: :app: :app: :app: :app: :app: :app:

والله الموضوع حلوووووووو للنقاش ..... انا مب رافضه مبدا مسك اليد بس

للظروف او عشان شى بس عشان ( ياناااااس شوفوا انا احب زوجتي ) ماله

داعي وماله لزمه بس بيني وبين نفسي اقول ( الله يستر في البيت ) بس حركه

مو حلوه ومشكور اخوي عالموضوع الجرئ
ولد البلاد
13-01-2007, 09:43 AM
ياربع ترا الدعوه سهالات :d

اخوي لو كل ظاهرة غريبة على مجتمعنا قلنا عليها سهالات مثل ماتقول
لفقدنا قيمنا وعاداتنا الواحده تلو الاخرى

شكرا لك على مرورك

.
غالية ياقطر
13-01-2007, 06:56 PM
مشكور اخوي على طرح الموضوع ، بس انا اشوف انك مكبر الموضوع زياده عن حده ، لأنه حنا مانقدر نسمي الشي ظاهرة إلا اذا كان منتشر بشكل كبير موبس 10 أو 50 حالة وحتى لو كان منتشر والله بعد اسمهم زوج وزوجته وشدعوة الحين اذا الواحد مسك ايد زوجته فقد رجولته وغيرته شي عجيب ؟؟؟؟ وبصراحة انا على قد ماشفت ماشفت ان في اي قطري مصخها مع زوجته كل اللي اشوفه انه ماسك يدها وبس، وصدقني اخوي اذا هالظاهرة مثل ماسميتها ماعاجبتك عيل شتقول في اللي صرنا نشوفه وبكثرة هالايام ( كل واحد ماشيله مع وحدة فلبينية والا مادري شنو اصلها ومركبها سيارته والا قاعد معاها في سينما والا في مطعم ) في ذمتك شنو اللي أرحم الحين ؟؟؟؟
ومشكووووووووور على الطرح
مناحي السادس عشر
13-01-2007, 07:08 PM
ولد البلاد موضوعك حلو وانا معاك ميه بالميه شمعنى تمسك ايدها ياخي......... ياخي ليش هذا تقليد اعمى والمسلسلات هي اللي خربت الناس ((((ولو سلكوا جحر ضب لسلكتموه)))) والله الادب والحياء مطلووووب عمر حد شاف شيبه ماسك ايد عجوز طبعا مستحيل لانهم كانوا بوقت ياليت نعيشه مره ثانيه........................................ ....
النيـــزك
13-01-2007, 07:20 PM
اخوي لو كل ظاهرة غريبة على مجتمعنا قلنا عليها سهالات مثل ماتقول
لفقدنا قيمنا وعاداتنا الواحده تلو الاخرى

شكرا لك على مرورك

.

الله يعطيك العافيه اخوي انا قلتها من باب المرح وبنفس الوقت جدي في كلامي اللي انا قلته بس بطريقه يبيلها واحد يفهمها مو معنات كلامي سهالات انه فري عادي بس القصد شي تشوفه العين اكبر من الشي هذا شي من زمان ومشي وصارة موضه انصحك روح للسيتي مر خذ نضره وركز علي القيم والعادات علي العموم مشكور يالغالي علي طرح الموضوع وعسالله يحمينا انشالله من كل فتنه ...

مقلنالكم بلاش يجماعه الدعوه سهالااااااااااااااااات :nice:
ولد البلاد
13-01-2007, 08:10 PM
تسلم اخوي ولد البلاد على طرحك .... واقول ... كل اناء بما فية ينضح.... وشكرا

صدقت

شاكر مرورك ومساهمتك اخوي


.
ولد البلاد
13-01-2007, 08:23 PM
انا صراحه لما اشوف هالمنظر اضحك لأنه هم يبكي وهم يضحك وأنا أتصور هالاشكال من يروحون البيت ما يواطن الواحد فيهم الثاني بس جدام العالم شوفونا والا ريال يغار على بيته ما يعرض شوفاته للناس كلن يطالعهم وين الغيره امحق وفعلا اذا لم تستح فاصنع ما شئت :anger1:


فعلا تلاقين الموضوع كلة فشخرة وفي البيت طق نعل :court:
مشكورة اختي التيما على المساهمة

.
ولد البلاد
13-01-2007, 08:26 PM
تشابك الايدي بينهم موضوع عادي جدا..

بس الزيادة شوي يعني لك عليها..

الله يهدي الحميع ان شاء الله..

اختي يكون تشابك الايدي عادي لما يكون له حاجة فعليه وضرورية اما اذا كان الموضوع دلع وفشخرة فاعتقد انه مو عادي

مشكورة اختي على المرور والمساهمة


.
ولد البلاد
13-01-2007, 08:27 PM
عن عبدالله بن عمر رضي الله عنه قال : قال رسول الله صلى الله عليه وسلم : ( ثلاثة لاينظر الله عز وجل إليهم يوم القيامة :العاق لوالديه ، والمرأة المترجلة المشتبهة بالرجال والديوث) صحيح أخرجه أحمد والنسائي


الديوث من أخبث خلق الله قد ماتت الغيرة في قلبه ، يقول ابن القيم: ( وهذا يدل على أن أصل الدين الغيرة ، ومن لاغيرة له لا دين له ، فالغيره تحمي القلب فتحمي له الجوارح ، فتدفع السوء والفواحش ، وعدم الغيرة تميت القلب فتموت الجوارح ،فلا يبقى عندها دفع البته


جزاك الله خير اخوي
وشاكر لك مساهمتك

.
احلى سهم
14-01-2007, 12:22 AM
فعلا تلاقين الموضوع كلة فشخرة وفي البيت طق نعل :court:
مشكورة اختي التيما على المساهمة

.


شدراك ان في البيت طق نعل على قولتك؟؟

دايما التفكير السلبي هو الطاغي .. ياخوي كل واحد يسوي اللي يجوفه صح
وماعتقد ان هاللي تعلقون عليهم ما يعرفون شي في الدين والادب!!
ولد البلاد
14-01-2007, 10:40 AM
حركه مالها داعي ،، يعني لازم يمسك يدها!
أنا للأسف الشديد يجي في بالي سوء الظن لما أشوف أثنين ماسكين يد بعض أن هذول مب متزوجين والله أعلم ،، يمكن تكون صاحبته و يبي يحسسها بالحب أو غيره..
سلمت أخي لغيرتك على أهلك و بلادك


الله يسلمج اختي
شاكر مرورك ومساهمتك بالموضوع.
ولد البلاد
14-01-2007, 11:48 PM
:app: :app: :app: :app: :app: :app: :app:

والله الموضوع حلوووووووو للنقاش ..... انا مب رافضه مبدا مسك اليد بس

للظروف او عشان شى بس عشان ( ياناااااس شوفوا انا احب زوجتي ) ماله

داعي وماله لزمه بس بيني وبين نفسي اقول ( الله يستر في البيت ) بس حركه

مو حلوه ومشكور اخوي عالموضوع الجرئ



مشكورة اختي على المشاركة


.
الزاجل
15-01-2007, 06:42 AM
انا صراحه لما اشوف هالمنظر اضحك لأنه هم يبكي وهم يضحك وأنا أتصور هالاشكال من يروحون البيت ما يواطن الواحد فيهم الثاني بس جدام العالم شوفونا والا ريال يغار على بيته ما يعرض شوفاته للناس كلن يطالعهم وين الغيره امحق وفعلا اذا لم تستح فاصنع ما شئت :anger1:
:strong :strong :strong
ولد البلاد
15-01-2007, 12:27 PM
مشكور اخوي على طرح الموضوع ، بس انا اشوف انك مكبر الموضوع زياده عن حده


اختي انا مو مكبر الموضوع مثل ماقلتي انا طرحت وجهة نظري الرافضة لهذة الظاهرة وامثالها ومن ثم طرحتها للنقاش لبيان وجهات نظر الاعضاء الاخرين ويمكن لاحظتي ان اغلب الردود كانت ضد هذة الظاهرة ورفضها في مجتمعنا


لأنه حنا مانقدر نسمي الشي ظاهرة إلا اذا كان منتشر بشكل كبير موبس 10 أو 50 حالة


اختي كل ماهو مخالف لعاداتنا وتقاليدنا وللاخلاق العامة فهو يعتبر ظاهرة دخيلة على مجتمعنا حتى لو كانت منتشرة بشكل قليل
اختي هل ننتظر الا ان يصبح العدد بالآلاف حتى نسميها ظاهرة ومن ثم نبدأ بمناقشتها وايجاد حلول لها
ام ان الافضل مناقشة الظواهر والمشاكل في بداياتها قبل ان تستفحل


وصدقني اخوي اذا هالظاهرة مثل ماسميتها ماعاجبتك عيل شتقول في اللي صرنا نشوفه وبكثرة هالايام ( كل واحد ماشيله مع وحدة فلبينية والا مادري شنو اصلها ومركبها سيارته والا قاعد معاها في سينما والا في مطعم ) في ذمتك شنو اللي أرحم الحين ؟؟؟؟



اختي هذا تبرير لخطأ بخطأ اكبر منه
والظاهرة التي ذكرتيها اعتقد الجميع يرفضها ويجب علينا مكافحتها بالسبل الممكنة ويمكن طرحها بالمنتدى ومناقشه سبل مكافحتها


وشكرا على مرورك ومشاركتك بالموضوع


.

.
ولد البلاد
17-01-2007, 05:46 AM
ولد البلاد موضوعك حلو وانا معاك ميه بالميه شمعنى تمسك ايدها ياخي......... ياخي ليش هذا تقليد اعمى والمسلسلات هي اللي خربت الناس ((((ولو سلكوا جحر ضب لسلكتموه)))) والله الادب والحياء مطلووووب عمر حد شاف شيبه ماسك ايد عجوز طبعا مستحيل لانهم كانوا بوقت ياليت نعيشه مره ثانيه............................................


صدقت ياليت نعيشه مره ثانية

اشكرك اخوي مناحي على المرور والمشاركة


.
سهم قطر
29-01-2007, 12:51 AM
مشكور اخوي على هالموضوع الي فعلا منتشر بالتقليد
ومفروض نرفضه ونكافحه
قطرية وبس
29-01-2007, 11:16 AM
هلا أخواني وأخواتي
الموضوع إلي طرحه الأخ ولد البلاد موضوع صغير جدا عن المواضيع العديدة المنشرة هالأيام ولكنه بعد يعتبر نقطه مهمة لأن النقطة بتكبر وبتصير نقااااااااااااااااااااااط .

وماأقول إلا أفااااااااااااااااااااااا وأفاااااااااااااااااااااااا والله عليكم يالريايل السنعين مع إحترامي لإخواني في المنتدى والله لو واحد فيه خير ما يسوي الحركات هاذي جدام الناس يعننننننننننني نااااااااااااعم حيل ما يقدر يصبر لين يروح البيت .
وبعد أنا ما أقول الحق عليه بس لالالالالالالالالا ... بعد الحق على الاخت إلي ماشيه معاه زين قولي له إذا هو نسى نفسه وذكريه أنكم في مكان عاااااااام
أنا تطرقت لهذه النقطة لأن إلي شفته موب بس مسك اليد لالالا بعد على قولت الأخوان شوي وبتطيح عليه وهم يمشون ويبتسمون وجه لوجه .
وصحيح (إن لم تستحي ففعل ما شئت) .....
وسامحوني على الإطاله .
_QTR_
29-01-2007, 11:30 AM
شوفوا يا شباب

انا اشوف اذا الزوج والزوجة متشابكين باليد اعتقد هذا الشيء عادي

بس الحبيب حاط يده على الخصر ولا فوق الكتف ولا متشابكين بالاذرع كانهم في الكوشة او في العرس هذا الشيء هيب والله


وجزيل الشكر لاخوي ولد البلاد على هذا الطرح المميز
هاجر
29-01-2007, 12:06 PM
سبحان الله اللحين تركتوا الكفرة الفجرة اللي يمشوون بالمجمعات قدام عيونا وقدام عيالنا متشابكين ويبوسون بعض بوقاحه واللبس الفاضح ماقلتوا عاداتنا وتقاليدنا وبلادنا ودينا ، جيتوا على الرجل المتزوج بالحلال والمرأة اللي متزوجه بالحلال ليش يمسكوون ايد بعض سبحان الكريم اللي خلاكم تنشغلوون بعيوب الناس ونسيتوا عيوبكم ، والله احنا ماشفنا هالحركات والمياعه ومسك الخصر إلا من الأجانب أما أزواجنا وعيالنا ولله الحمد لو امسكوا ايادي زوجاتهم هو كنوع من الاحفاظ عليها وليس لإظهار الحب والغرام والعشق والهيام ، الصراحه سويتوها قضيه سياسيه على ولا شيء الأفضل أنك أخي الكريم تشيل عبارة الزوج وزوجته وتكتب الاجانب الكفار لما يتمايلون على بعض ومادري شيسوون والكوورنيش أكبر دليل.




الله يحفظ عيالنا من شرورهم ، أخي الكريم هذا رأي وهو لايفسد للود قضيه إن شاء الله بس الصراحه سويتوا من الحبه قبه
ولد البلاد
29-01-2007, 10:49 PM
مشكور اخوي على هالموضوع الي فعلا منتشر بالتقليد
ومفروض نرفضه ونكافحه


مشكور اخوي على المرور والاهتمام



.
قطرية وبس
30-01-2007, 10:49 AM
هلا أختي هاجر
الكفرة والفجرة إلي تتكلمين عنهم مالهم دين وتقاليد تحكمهم علشان جذية ما عليهم شرهه وشلون نقدر نكلمهم ولا نقولهم عيب عليكم .
لكن نجي للمسلمين العرب إلي عندهم تقاليد وعندهم شريعة تحكمهم وتحكم تصرفاتهم وفيه شي عيب وشي أدب وإحترام والشي إن زاد عن حده يصير ماسسسسسسسسسسسسسخ .
أرجو أن تكوني فهمتي قصدي ياأختي الغالية
ولد البلاد
01-02-2007, 05:42 AM
هلا أخواني وأخواتي
الموضوع إلي طرحه الأخ ولد البلاد موضوع صغير جدا عن المواضيع العديدة المنشرة هالأيام ولكنه بعد يعتبر نقطه مهمة لأن النقطة بتكبر وبتصير نقااااااااااااااااااااااط .

وماأقول إلا أفااااااااااااااااااااااا وأفاااااااااااااااااااااااا والله عليكم يالريايل السنعين مع إحترامي لإخواني في المنتدى والله لو واحد فيه خير ما يسوي الحركات هاذي جدام الناس يعننننننننننني نااااااااااااعم حيل ما يقدر يصبر لين يروح البيت .
وبعد أنا ما أقول الحق عليه بس لالالالالالالالالا ... بعد الحق على الاخت إلي ماشيه معاه زين قولي له إذا هو نسى نفسه وذكريه أنكم في مكان عاااااااام
أنا تطرقت لهذه النقطة لأن إلي شفته موب بس مسك اليد لالالا بعد على قولت الأخوان شوي وبتطيح عليه وهم يمشون ويبتسمون وجه لوجه .
وصحيح (إن لم تستحي ففعل ما شئت) .....
وسامحوني على الإطاله .


فعلا أفااااااااااااااااااااااا وأفاااااااااااااااااااااااا

مشكورة اختي على الاهتمام والتفاعل



.
ولد البلاد
02-02-2007, 01:50 PM
شوفوا يا شباب

انا اشوف اذا الزوج والزوجة متشابكين باليد اعتقد هذا الشيء عادي

بس الحبيب حاط يده على الخصر ولا فوق الكتف ولا متشابكين بالاذرع كانهم في الكوشة او في العرس هذا الشيء هيب والله


وجزيل الشكر لاخوي ولد البلاد على هذا الطرح المميز


والله بعضهم يسوي حركات تخليك تنحرج خاصة اذا كنت مع اولادك
وهم عادي عندهم ولا في احترام للآخرين

شكرا على المرور والاهتمام



.
ولد البلاد
03-02-2007, 12:07 AM
سبحان الله اللحين تركتوا الكفرة الفجرة اللي يمشوون بالمجمعات قدام عيونا وقدام عيالنا متشابكين ويبوسون بعض بوقاحه واللبس الفاضح ماقلتوا عاداتنا وتقاليدنا وبلادنا ودينا ، جيتوا على الرجل المتزوج بالحلال والمرأة اللي متزوجه بالحلال ليش يمسكوون ايد بعض سبحان الكريم اللي خلاكم تنشغلوون بعيوب الناس ونسيتوا عيوبكم ، والله احنا ماشفنا هالحركات والمياعه ومسك الخصر إلا من الأجانب أما أزواجنا وعيالنا ولله الحمد لو امسكوا ايادي زوجاتهم هو كنوع من الاحفاظ عليها وليس لإظهار الحب والغرام والعشق والهيام ، الصراحه سويتوها قضيه سياسيه على ولا شيء الأفضل أنك أخي الكريم تشيل عبارة الزوج وزوجته وتكتب الاجانب الكفار لما يتمايلون على بعض ومادري شيسوون والكوورنيش أكبر دليل.




الله يحفظ عيالنا من شرورهم ، أخي الكريم هذا رأي وهو لايفسد للود قضيه إن شاء الله بس الصراحه سويتوا من الحبه قبه


اختي انتي دخلتي في موضوع ثاني
موضوعنا عن الظواهر الي تمس عادات وتقاليد مجتمعنا القطري
وليست عادات وتقاليد مجتمعات اخرى
ولج الشكر على المرور والمشاركة



.
ولد البلاد
04-02-2007, 07:51 PM
هلا أختي هاجر
الكفرة والفجرة إلي تتكلمين عنهم مالهم دين وتقاليد تحكمهم علشان جذية ما عليهم شرهه وشلون نقدر نكلمهم ولا نقولهم عيب عليكم .
لكن نجي للمسلمين العرب إلي عندهم تقاليد وعندهم شريعة تحكمهم وتحكم تصرفاتهم وفيه شي عيب وشي أدب وإحترام والشي إن زاد عن حده يصير ماسسسسسسسسسسسسسخ .
أرجو أن تكوني فهمتي قصدي ياأختي الغالية


احسنتي اختي بتوضيحك
لك الشكر والاحترام




.