تجيبون الخدم وتقولون نغير على شرفنا ! وتجيبون الدريوليه وتقولون نغير على شرفنا ! ....

[المخلب]

السلام عليكم

موضوعي اليوم غير عن الدريول والخدامه والشخص الي يبيع بالمحلات النسائيه ..

ان شاء الله تستمتعون بالمقال .. واعذروني على الاطاله فيه ..

شد أنتباهي مقطع من مسلسل كوميدي عرض من كم يوم على أحدى القنوات على العرب سات ..

قال فيه الممثل لزوجته انا اغار عليج ومابيج تسوقين ! علشان كذا جبتلك الدريول ! :looking: .. قالت الممثله وانا اغار عليك من النسوان بس شسوي شغل البيت مايخلص فطلبت خدامه وطباخ ! ..

يحليلنا كلنا نغار على اهلنا .. لكن كل واحد وطريقه تفكيره .. :deal: ..

لكن بالعقل لو نبشنا بالسالفه للقينا ان الغيره عندنا طلعت اي كلام ! .. (( خرطي )) وتعال أقولك كيف ..

اذا أنت تغير على زوجتك وتدعي ذلك .. اجل كيف تركبها مع رجال غريب ! (( الدريول يعتبر غريب على الحرمه ! )) ومو من حقه ان يختلي فيها بسياره - حتى لو كان مجرد توصيل من والى .. - ياخي الدنيا غداره وكلن عارف هل الشئ .. ولنا في بومحمد عبره ..

بتسألني منو بومحمد ذا ؟:con2: ..


أنت اصبر وأقرى القصه عقب أحكم عليها .. وبتعرف ان شاء الله منو بو محمد .. :strong

بومحمد رجال توه متزوج ! ملتزم بعمله .. خلوق وذو كفائه عاليه .. زوجته ولله الحمد حرمه أخلاقها عاليه لا تطلب الا الي تحتاجه ولا تكلف زوجها فوق طاقته .. تشتغل مدرسه في أحدى المدارس خارج مدينه الدوحه ..

مرت الايام واذا بومحمد يجي البيت وهو مهموم ..

أم محمد : شسالفه يا بومحمد عسى ماشر ؟

بومحمد : والله شقولج يا خويتي .. جاء لنا مدير جديد على القسم ! واحد الله يكافي شر .. غثه .. وطالب مني ومن الكل ان نداوم من الساعه 7.5 الصبح والا بيخصم علينا ! ..

أم محمد : تعوذ من ابليس ياالغالي .. زين ماعلي روح وحاول تمشي حالك يمكن راسه يابس لانه توه متعين ! وبكره يلين !! ..

بومحمد : المشكله الي مضيق خلقي يا أم محمد أن شلون بوديج المدرسه وبروح الدوام كل يوم .. !!!

أم محمد هنا اسكتت (( جلست تفكر ... )) ولكن شكلها مالقت حل ! .. فقالت ..

أم محمد : الله كريم .. بحاول ادبر هل الاسبوع مع صديقتي تمر علي وهي رايحه الدوام ..

وبعد مرور شهرين ..

أم محمد : يا بو محمد تكفى أبي أتعلم سواقه .. الحاله هذي ماتنطاق صاروا المدرسات يحشون فيني ! وصديقتي زهقت مني يا بومحمد ..

بو محمد : اووووهوووو كم مره أقولج سالفه السواقه خلاص No Way .. ولا تجيبين طاريها أبد ..!!

أم محمد : طيب وش الحل .؟؟؟

بو محمد : خلاص انا قدمت فيزا لدريول ! وهو بيوديج وبيجيبك ! ..

أم محمد : نصبر ونشوف ..

وبعد أسبوع ..

وصل الدريول .. هندي الجنسيه , العمر 25 سنه ! , كان يعمل في احد الدول الخليجيه .. ( يعني ليسنه معتمد مو ليسن سيكل ياخذه من المطار وهو جاي crazy .. ) .. خدم في الدروله 4 سنوات .. صقع 6 مرات وفي احد المرات كنسل سياره كفيله ..

بو محمد كان في استقباله في المطار اخذه الى البيت .. ورماه في غرفه الدريول ( الحارس ) الي خارج المنزل .. وطبعا تم بناء هذه الغرفه كجزء من الملحق ( المجلس الخارجي ) ..

بومحمد : أم محمد وينك .. ؟؟؟؟؟

أم محمد : يا هلا .. هنا فوق أصعد ..

بو محمد : جاء الدريول ... وهو الحين في غرفته أن بعد ساعه بطلع وياه لفه وأشوفه يعرف يسوق ولالا ..

ام محمد : يالله مبروك .. وجعلك سالم لي يا زوجي الغالي .. (( وطاحت عليه من الكلام الحلو والزين .. كان جايب لها خاتم الماس مو دريول :looking: )) ..

الهندي بكل صراحه سويق ! .. - أظاهر تأدب من الـ 6 حوادث الي مر فيها !! وصارت عنده خبره - وألتزامي مروريا ! .. - يربط احزام ولا يسرع ويمسك السيييد اليمين ;) - ..

ولكن ..

عيبه الوحيد انه مغازلجي (( يعني دريول وقح ! )) .. والمشكله ان ام محمد ماعندها عيال - نعم احنا سميناها ام محمد علشان نستر عليها .. :) - ولكن للاسف الانسان يتغير مع الدنيا .. فكانت لما تعدل البوشيه - اللفه - ( شئ مثل الحجاب تلفه الفتاه الخليجيه حول شعرها لكي تستره عن الاجنبي ) - كانت ترفعها لفوق فيبان للدريول شعرها ومافتن رقبتها وزينتها .. وهنا تقع الفتنه ! ..

الدريول عينه زايغه .. وصاير يقز بأم محمد في الروحه وفي الرده ! .. هي كانت تلاحظ هذا الشئ ولكن حاولت تسكت علشان زوجها مايسفر الدريول وتبقى بدون سواق يوديها ويجيبها .. او على الاقل لين ماتنتهي مشكله المدير المتعجرف الي متولي زوجها بالعمل ! ...

الايام مضت والشهور عدت .. ومابقى على انتهاء مده الدريول الا 4 شهور تقريبا ! ..

واثناء سير الدريول الى المدرسه لأرجاع معزبته ام محمد دعم وعفس باب السياره ! ..

اتصلت الشرطه بأبو محمد جاء يركض للمخفر وحرر البلاغ وخلص الاوراق ويوم رد البيت هاوش الدريول على الحادث ! .. لدرجه انه جاب الخيزرانه وضربها على ظهر الهندي ! .. ( كنوع من التأديب والحره على السعر الي راح يدفعه على تصليح الباب ) ..

فما كان من الهندي الا انه حلف انه قبل لا يمشي يسوي شئ يخرب فيه حياه المعزب ! ..

مرت الايام .. واذا بتلفون جاء لأم محمد الساعه 5 المغرب تقريبا من زميله لها في المدرسه ..

سلوى : هلا يا ام محمد شخبارك ؟

ام محمد : والله بخير .. خير ان شاء الله اول مره تتصلين علي بهذا الوقت ؟

سلوى : الحمد لله ابشرك خير .. شوفي ترى المديره أختها جابت ولد وعزمت كل المدرسات على بوفيه مفتوح في المدرسه الليله ..

ام محمد : صج .. يالله مبروك .. بس الساعه كم ؟؟

سلوى : الساعه 9.5 تقريبا وتقول لو تقدرون تجون قبل بربع ساعه احسن علشان نتجمع ونسولف ..

ام محمد : والله مادري وش اقولك .. خلاص اكلم بو محمد وارد عليج ..

سلوى : يالله انا انتظرك ..

..

ام محمد اتصلت على بومحمد الي كان ذيك الساعه مناوب ! (( لان شغله شفتات بسبب المدير الفاشل )) .. لكن مارد عليها .. ! حاوله مره مرتين ثلاث ومافي فايده ..

قالت مالي الا ارسل رساله ( مسج ) وهو لين شاف المسج يرد علي .. وبيعرف اني طلعت ورحت المدرسه ..

طلعت ام محمد من البيت وكالعاده مع الدريول ! ..

هنا الدريول فكر قال هذا احسن وقت اسوي فيه جريمتي ! .. وانا الحين عندي الفلوس الكافيه اني اقطع تذكره وانحاش وبموافقه الكفيل طبعا !! .. (( كيف ؟ ))

وصلها الدريول المدرسه ..

ورجع البيت .. ودخل داخل .. والي ساعده انه يخش الفيلا عده امور منها ان محد في الفيلا اصلا ! و ام محمد نست المفتاح على سيت السياره ! ..

صعد لغرفه المعزب دور على راحته على جواز السفر والاقامه وغيرها ! وشوفوا كيف حظه بومحمد كان مخطط انه يسفره قبل موعده الاصلي بأسبوع فحجز له تذكره روحه بلا رده الى بلاده وحط التذكره في الجواز ( عباله بو الشباب انه ذكي وما بيحس الدريول ) .. ومره وحده حط بجيبه كم ريال على كم قلاده ! .. ولكن مجرد ان اخذ الجواز قال لحظه انا ماكملت انتقامي كامل ! ..

جهز اغراضه وحطهم في السياره وراح المطار ! ..

في المطار بدل التذكره وقلب الوقت الى أقرب طياره !! .. ويا زين الحظ لين تجمع !! حصل له طياره على الساعه 12 بالليل ! وكانت الطياره محجوزه بالكامل ولكن اعتذروا شخصين عن السفر بهذا الوقت ففضى له كرسي ! .. كمل الاجرائات ودخل شناطه الشحن ! .. ختم الجواز وتأكد ان كل شئ تمام ..

أتصلت ام محمد على جوال الدريول تقوله تعال الحين .. هنا الدريول خالف كل التوقعات ! .. قال لها انا جاي .. !

راح الدريول لها ! .. وخذها من المدرسه لكن بدل مايوديها البيت !! وقف ودش برمله ( صحرى ) على الخط ! وهجم على ام محمد وأغتصبها ! .. ورماها هي والجوال واغراضها في البر وحرك .. - خسيس -

راح للمطار .. صف السياره غلط بعد ما قطع 3 اشارات حمراء ! ..

ولأن أجرائاته خالصه ركب الطياره وطار بلا عوده !! ..

هنا نرجع لأم محمد المسكينه ! .. الي لولا الله سبحانه ! ثم الجوال الي بيدها !! كان ماعاشت ! ..

أتصلت على زوجها وطلب الشرطه والاسعاف ولقطوها وخذوها للمستشفى ..

بلغوا جميع الدوريات والجمارك على اسم الشخص وبياناته ! .. ولكن شالفايده بعد ماطارت الطيور بارزاقها ..

بومحمد طق على راسه من الندم ! .. فكر شستفاد الحين ؟

الدريول وخدش شرف مرته ! .. الدريول طلعله فاتوره مخالفات 3 اشارات وسرعه و عدم صف السياره بشكل سليم بالمطار ! .. الدريول تسبب في خسارته لوظيفته ! (( لان المدير ماصدق انه لقى عليه غلطه بسبب تركه القسم اثناء الشفت ! )) ..

وللعلم الطباخ أخس من الدريول ! لانه يعيش بين أصحاب البيت ( في مطبخهم ) .. فكيف بتغار على اهلك وهو رجال غريب بينكم

يعني مشاكل لا تعد ولا تحصى ..



ونجي الحين للخدامات والسائقات ..

دام انك تحافظ على شرفك وماتبي حد يشوفهم .. اجل كيف تشوف انت شرف الناس ! ..

جيبتك للخدامه الى بيتك ! عباره عن رؤيتك الى شرف الناس الاخرى !! ..

بتقولي لاء تفرق !

ويا سواد ليلها من تفرق ! .. مافي فرق يالغالي .. ذي حرمه وذي حرمه وزوجتك ماتفرق عن الخدامه بشئ !! الا بالعلم ! .. والحاجه ! .. ولولا حاجتها ماجات وأشتغلت ! ..

وبعدين يا حرمه المفروض ماتجيبين أمراه اجنبيه الى بيتك ! وان احتجتي مساعده فأطلبيها من زوجك يساعدك فيها !! ..

وان قلنا كلش كلش لازم تجيبين جيبي لك وحده محتشمه عفيفه بحجابها ! ماعليها من حد الا بشغلها ! .. لا تسولف مع الشباب ولا مع زوجك ! .. حدها الشغل وبس ! ..

وترى الرجال ينفتن ! خاصه ان كانت الخدامه أحلى من زوجته (( ساعات في نسوان تستغرب منهم ! يجيبون لك خدم أحلى من وجيهم ! )) تحس زوجها ينصدم يقول لو أدري كان تزوجت الخدامه بدل زوجتي :court: ..

فأن بغيتي تجيبين جيبي متزوجه ! وصاحبه أخلاق عاليه ! .. وما تأخذ الاوامر الا منك انتي ! .. ومب أحلى منك علشان ما تجذب زوجك وتخليج انتي ماتسوين بيزه ! ..

اما الحين نجي للشئ الكبير ..

وهو شغل الرجال في محال النساء ! ..

استغربت لما دخلت محل للملابس النسائيه العاديه ( وليس الملابس الداخليه ) ! ..

فوجدت رجال - كما يقال عنه - حاطله بودره ومكحل عينه وجل بالشعر وبدله رص على جسمه ! ..

ويلفلف .. في المحل ..

سألت احدى العاملات .. قالت لي : هذا شغال ويانا يبيع ! ..

أستغربت .. المحل محل نسائي ! فأيش الي خله امثاله يجون هنا ! ..

طلعت من المحل ورحت الى محل اخر ( انا مع الأهل :deal: ) .. محل عطورات ! نسائيه .. واذا بالي يبيع رجال صوب عطورات النساء !! .. وصوب عطورات الرجال بنت ! ..

قلت يمكن مغلطين ! .. ماشوف الا جاتلي تبي ترش لي من العطر ..

سالتها : عربي وله انجليزي ؟

قالت : عربيه من المغرب .. برقش برقش .. ماروكو ..

أبتسمت وقلت : ماشاء الله عليج نشيطه بس كانك مغلطه بالموقع ! المفروض انتي صوب النسوان ! ..

أضحكت .. بصوت عالي حسيت بالاحراج بسببها .. :looking: .. وقالت : لا انا مكاني هنا ! وهذاك الي اسمه تامر مكانه مع النسوان ! ..

انا تعجبت .. فقلت لها : طيب هذا على طول وله بس اليوم ؟

قالت : على طول .. من اول مافتحنا المحل وهذا هو الروتين ! ..

قلت : طيب .. ليش ؟

قالت : اممممم والله يمكن راعي المحل يبي هذا الشئ ! ..

حست اني مو مقتنع بكلامها .. فخذتني لزاويه علشان تبعد أنظار السوبر فايزر المسؤول عنها .. وهمست لي وقالت : شوف يا ... المسأله ومافيها ان سياسه المحل تطلب منا أن نكون في عكس الجنس الي ننتمي له ! ..

قلت : يعني البنت مع الرجال و الرجال مع البنت هذي هي السياسه هنا ! ..

قالت : بالضبط .. علشان أنا كوني بنت أقدر ااثر فيك او في اي واحد رجل وأقدر اقنعه انه يشتري بأسلوبي .. بعكس الرجل مع الرجل مايقدرش انه يقنعك او يقنع اي رجل اخر بشراء العطر هذا !! لكنه يقدر يقنع البنات بهذا الشئ ! ..

هنا عرفت السر ..

ولكن .. ان قلنا هذي الحركه تمشي مع العطور .. وفرضنا انها صح ! ( مع انها غلط مليون بالميه ! ) .. لكن شدخل الرجال في ملابس الحريم ؟؟

يعني بالله عليكم وشو بقيس هو ! .. حرمه مع حرمه يقدرون يمشون روحهم ! .. بس حرمه مع رجال وش تبيها تقوله هاتلي ذا من قياسي crazy .. وله هاتلي ذاك من قياسها ! .. :looking: :court: .. أصلا غيرتي على اهلي بتمنعني اني اخليهم يرتادون هل المحلات هذي ! ..

حتى الملابس الرجاليه .. هل اليومين صارت موضه جبلك كم بنت وشغلهم في محل أغتر او ثياب او اي محل رجالي فيه ثياب رجاليه ! وشف شلون البيع الصير ! .. ( المبيعات بتصير من أقوى المبيعات ! ) .. طيب انا فرضا عندي كلام ماقدر اقوله الا لرجال ! ( ياخي استحي اقوله ) شتبيني اسوي !! اقول للبنت هاتيه ! .. ماهي عدله بحقي ولا بحقها :court:

وأكبر دليل على كلامي في محلات السيف بالبحرين ( الي راح البحرين منكم ) .. محل الغتر الي هناك مشغله بنات ! .. وحتى محل عائشه للبخور والعود مب ربحان الا من البنات الي يجبهم ذاك .. ( والي راح البحرين عارف هل الشئ ) ..

طبعا انا ضربت المثال في البحرين لانها واقع مرير للاسف ! .. والصراحه مهما يكن الواحد يأمر بالمعروف وينهى عن المنكر !


طيب ليه ما يخلونه البيع فقط للنساء في الملابس النسائيه ! وللرجال في الملابس الرجاليه ! ..

والله في نسوان كثيره تبي تترزق الله ! .. يبون هم يشرفون على محلاتهم بنفسهم ! .. بس كل وحده مثل مانقول تنخش ! .. لو كل وحده حاسه وحاطه في بالها انها تقدر تنجز هل العمل ! خلها تباشر ! منها تستفيد ومنها تفيد نسوان توهقوا مع الرجاجيل !! ..

والحكومتنا المفروض تدخل ! .. تمنع بيع الرجال في ملابس النساء ! او اي محلات نسائيه ! (( متخصصه للنساء )) ..

هذا راايي والله أعلم .. والله يستر على الجميع .. تحياتي لكم .. المخلب ..

[مطيع الله]

صحيح معينك لا ينضب
من وين تجيب هالمواضيع اللي بالهبل!!
الحل عندي وانا اخوك
مرتك معك لا تسوق ولا دريول وهذا اللي اغلبية الناس مطبقينه
واذا الحالة خاصة لا تعممها على الجميع
ومشاكل غيرنا نتيجة لأفعالهم التي لا نفعلها فكيف تطبق حلول مشاكلهم علينا؟؟

اتمنى يكون الرد في السياق وشكراً

[المخلب]

صحيح معينك لا ينضب
من وين تجيب هالمواضيع اللي بالهبل!!

اذكر الله لا أطيح الحين .. :court: ..


الحل عندي وانا اخوك
مرتك معك لا تسوق ولا دريول وهذا اللي اغلبية الناس مطبقينه

انت فهمت القصد .. انا اقصد ان الدريول الله يكافي شره ! .. لانجيبه ابرك ترى شره سابق خيره ! .. وهل اليومين السائقات ( نساء ) هي خدامه هي سواقه ! أريح وأفيد !! خاصه للحريم الي ماعندهم عيال في سن المدارس !! ومحتاجين توصيله بدون ما تلعوز زوجها وبدون ما تجيب دريول رجال غريب يضايق عليها ! :D ..


واذا الحالة خاصة لا تعممها على الجميع
ومشاكل غيرنا نتيجة لأفعالهم التي لا نفعلها فكيف تطبق حلول مشاكلهم علينا؟؟

الا في .. في محلات في قطر في سوق واقف وغيره كلها رجال ! وهي بالاصل محلات نسائيه ! .. وهذا الشئ مهو بخيال واقع لا نهرب منه !! ..



اتمنى يكون الرد في السياق وشكراً


هو في السياق ومو في السياق (( ففتي ففتي .. )) .. بس تشكر على الرد :nice: ..

تحياتي لك .. كأحد المعجبين بمواضيعي .. :shy:

[حمد]

ماعندنا اي رجل غريب بالبيت .. احنا نودي حريمنا واحنا انجيبهم .

وكل الامور ماشيه ولله الحمد

[بيبي هامور]

والاسوء في صالونات يشتغلون فيها رجال ..

مره شفت محل بيع ملابس نسائيه .. مكتوب على باب المحل ممنوع دخول الرجال .. والي يبيعون بالمحل رجال :confused:

,
,
,

[qatari1]

ماعندنا اي رجل غريب بالبيت .. احنا نودي حريمنا واحنا انجيبهم .

وكل الامور ماشيه ولله الحمد

هذا الكلام السنع:nice:

المصيبة تلاقي الشباب رايحين مكان وخواتهم رايحين مع الدريول نفس المكان:court:

[qatari1]

طولت السالفة يا المخلب بقصة أم محمد، وخربت الموضوع الأصلي، وخاصة الفلم الهندى اللي سواه السواق، والصدف العجيبة اللي صارت معاه:(

[البسمةالعذبه]

المخلب مواضيعك حلوه ,,

تشكر عليها بصراحه ,,

انا بقولك ,, احنى نحتاج السواق ,,

يعني ابوي يطلع للدوام بدري ,, اخواني متزوجين

كل واحد عنده التزامات ,, يعني مب معقوله كل يوم بدق عليهم بقول ودوني المكان الفلاني

بعدين سواقنا من زمان عندنا من 30سنه تقريبا هو ومرته ,, يعني الوضع طبيعي عندنا ,,

واذا بطلع معاه اكيد مع امي يعني ما اطلع بروحي ,, بس في مشاوير مدارس وغيره وغيره ,,

لكن اذا ابوي موجود على طول ما يقول لا يوديني المكان الي ابغيه ,,

والخدم والله يقهرون لكن شاقول شاخلي ,, خلني ساكته احسن ,,

بلاهم اكثر من فايدتهم ,,

[غزلان]

قضايا مهمه اخوي المخلب
وجود الخدم في المنزل امر ضروري لعدم تفرغ كل الأهل لتوصيل اهلهم خصوصا اذا كان هناك تنوع في مراحل الدراسه ابتدايء واعدادي وثانوي وغيرها صعب ان الوالد او الأخ يقدر يوصل الكل..والشي الثاني اذا السواق او الخادمه كانت عليهم رقابه او شروط صارمه مابيقدرون ييتمادون بشي..

00
محلات الملابس شي مزعج ومحرج صرنا نشترى من برا ونريح حالنا من الأحراج:o

شكرا لك

[كون جنبك]

الخدم والدريوليه .. مصيبه عظيمه والله يستر منهم .... ومافي داعي لهم ...
ومساؤهم اكثر من مزاياهم ...

[بوخالد2]

موضوع جميل ويعالج قضايا خطيره في المجتمع من الامور التى يفعلها السواقين او الخدم

لكن الحمدالله انها ماعندنا ادريول وكلن من الاخوان قايم بواجبه وليش خلق رجال (( الرجال قوامون على النساء )) سواء زوجته او امه او اخته او اخوانه الصغار

عندنا سواق يودي الحريم لكن نادر اخوى المخلب حتى لو راح يوصلهم الجامعه لازم العجوز معاهم


وتسلم على الموضوع الراائع

[المخلب]

ماعندنا اي رجل غريب بالبيت .. احنا نودي حريمنا واحنا انجيبهم .

وكل الامور ماشيه ولله الحمد


كفو والله ..

تحياتي لك ..

[سهم طايش]

الموضوع طويل وايد ( رواية قصيره )

يا ليت تختصره شوي علشان نركز في الهدف

انا من اشوف موضوع طويل بهالطريقه اتكيسل اقراه 0

[المخلب]

الموضوع طويل وايد ( رواية قصيره )

يا ليت تختصره شوي علشان نركز في الهدف

انا من اشوف موضوع طويل بهالطريقه اتكيسل اقراه 0


قبل ما أرد على الباقي برد عليك يالغالي ..

الموضوع هذا تقرير .. يعني مو سؤال ويحتاج الرد عليه ..

فالتقارير لازم تكون مبسطه و شامله .. ( وهذا الي تشوفه مختصر .. صحيح تعبني .. بس بيفيدني بالمستقبل .. ) تحياتي لك .. :) . وشكرا على المرور ..

[المخلب]

طولت السالفة يا المخلب بقصة أم محمد، وخربت الموضوع الأصلي، وخاصة الفلم الهندى اللي سواه السواق، والصدف العجيبة اللي صارت معاه:(


:court: .. هذا تقرير يعني لازم تشوفونه كذا ! .. مو سؤال ويحتاج الاجابه عليه .. بعدين الفلم الهندي الي شفته هذا واقع .. مو من خيال المخلب :funny:

[المخلب]

والاسوء في صالونات يشتغلون فيها رجال ..

مره شفت محل بيع ملابس نسائيه .. مكتوب على باب المحل ممنوع دخول الرجال .. والي يبيعون بالمحل رجال :confused:

,
,
,

سبحان الله .. حلال على ناس وحرام على غيرهم .. :court: ..:funny:

شكرا لك .

[المخلب]

المخلب مواضيعك حلوه ,,

تشكر عليها بصراحه ,,

انا بقولك ,, احنى نحتاج السواق ,,

يعني ابوي يطلع للدوام بدري ,, اخواني متزوجين

كل واحد عنده التزامات ,, يعني مب معقوله كل يوم بدق عليهم بقول ودوني المكان الفلاني

بعدين سواقنا من زمان عندنا من 30سنه تقريبا هو ومرته ,, يعني الوضع طبيعي عندنا ,,

واذا بطلع معاه اكيد مع امي يعني ما اطلع بروحي ,, بس في مشاوير مدارس وغيره وغيره ,,

لكن اذا ابوي موجود على طول ما يقول لا يوديني المكان الي ابغيه ,,

والخدم والله يقهرون لكن شاقول شاخلي ,, خلني ساكته احسن ,,

بلاهم اكثر من فايدتهم ,,


اشكرك .. ونادر ماتحصلين زين ..

[المخلب]

قضايا مهمه اخوي المخلب
وجود الخدم في المنزل امر ضروري لعدم تفرغ كل الأهل لتوصيل اهلهم خصوصا اذا كان هناك تنوع في مراحل الدراسه ابتدايء واعدادي وثانوي وغيرها صعب ان الوالد او الأخ يقدر يوصل الكل..والشي الثاني اذا السواق او الخادمه كانت عليهم رقابه او شروط صارمه مابيقدرون ييتمادون بشي..

00
محلات الملابس شي مزعج ومحرج صرنا نشترى من برا ونريح حالنا من الأحراج:o

شكرا لك




شكرا لج .. وقريب بسمحون ببيع النساء في محلات النسائيه فقط من دون الرجال !

[المخلب]

الخدم والدريوليه .. مصيبه عظيمه والله يستر منهم .... ومافي داعي لهم ...
ومساؤهم اكثر من مزاياهم ...

اي والله ..

شكرا لك .

[تيتانيوم]

يازين الخدم المسلمين :ثقه - احترام- ترتاح لهم نفسيا

[البسمةالعذبه]

بقولكم شي مره سواقنا الي متعودين عليه سافر ,,

وابوي جاب بداله واحد وصغير يمكن عمره 24

المهم كل ما اتصل له اقول له جيب كذا وكذا

يقول ان شاء الله آمر تدلل من عيوني :anger2:

اسكر منه اقول يمه اشفيه ذيه مصدق عمره ,,

تقول شيقول ,, وقلت لها امي ولعت :anger1:

وعلى طول ابوي درى وطيره :funny:

وما خفي اعظم ,,

الله يستر علينا والله ,,

[التيما]

احنا والحمد لله بيت مليان ناس اخواني وخواتي وماعندنا الا خدامتين مع الوالده ودريول مومحتاجين لان الكل في البيت يسوق وكلن له سيارته فالحمد لله سليمه بس في ناس فعلا تحتاج دريول وياريته يكون سواقه مب سواق والحين اشوف وايد عوايل تشغل حريم لبناتهم واللي يغار فعلا يودي هله والله مره يوم كانوا اخواني يجوني ويودوني الدوام شنو كنت مستانسه راااحه ولاعوار راس ولا شي وسوالف مع اخواني لاني ما اشوفهم الا شوي فكانت فرصه نقعد نسولف مع هالزحمه وخساره اللي ماجرب يوصل هله ...

وبخصوص محلات الحريم اللي فيها رياييل عاد انا سم بدني ويطلع لي قرون لين يا وحاجاني ريال في المحل اخزززه من قلب يعني شتبي ؟ بس هو يشوف النظره ما اشوف عقب الا غبرته ..

[ROSE]

تعبت وانا اقرى يالمخلب :court:


بخصوص الخادمات دام الوحده واثقة من نفسها والزوج ملتزم فوين الخطأ في انها

تجيب خادمه لبيتها ، وخاصه ان المرأة في الخليج اصبحت امرأة عامله

يعني تروح شغلها وبعدين ترجع تباشر زوجها وعيالها متى بيصير عندها وقت

تخدم البيت ، واذا قامت تسوي كل هالامور بروحها بعدين قعدوا اشتكوا

ماتسوي ورحيتها بصل وثوم ، ولا مهمله زوجها وراح تزوج عليها ومن هالمشاكل اللي

مالها عدد


اما الدريول الحمدلله انا اسوق بنفسي وماقد جبنا حد ولكن من خلال اطلاعي

للبيوت القطريه فيه ناس تحتاج للسائق مب شرط يكون صغير في السن

بس اذا وحده مع امها وخواتها في البيت واخوانها متزوجين والاب مشغول في اعماله

من بيلبي لهم احتياجاتهم ؟


اشكرك اخوي المخلب على الموضوع

[المخلب]

بقولكم شي مره سواقنا الي متعودين عليه سافر ,,

وابوي جاب بداله واحد وصغير يمكن عمره 24

المهم كل ما اتصل له اقول له جيب كذا وكذا

يقول ان شاء الله آمر تدلل من عيوني :anger2:

اسكر منه اقول يمه اشفيه ذيه مصدق عمره ,,

تقول شيقول ,, وقلت لها امي ولعت :anger1:

وعلى طول ابوي درى وطيره :funny:

وما خفي اعظم ,,

الله يستر علينا والله ,,

شكرا لج .. والعبره بالدروس ..

[المخلب]

احنا والحمد لله بيت مليان ناس اخواني وخواتي وماعندنا الا خدامتين مع الوالده ودريول مومحتاجين لان الكل في البيت يسوق وكلن له سيارته فالحمد لله سليمه بس في ناس فعلا تحتاج دريول وياريته يكون سواقه مب سواق والحين اشوف وايد عوايل تشغل حريم لبناتهم واللي يغار فعلا يودي هله والله مره يوم كانوا اخواني يجوني ويودوني الدوام شنو كنت مستانسه راااحه ولاعوار راس ولا شي وسوالف مع اخواني لاني ما اشوفهم الا شوي فكانت فرصه نقعد نسولف مع هالزحمه وخساره اللي ماجرب يوصل هله ...

وبخصوص محلات الحريم اللي فيها رياييل عاد انا سم بدني ويطلع لي قرون لين يا وحاجاني ريال في المحل اخزززه من قلب يعني شتبي ؟ بس هو يشوف النظره ما اشوف عقب الا غبرته ..


شئ طيب .. والله يوفق .. :) ..

شكرا لج

[المخلب]

تعبت وانا اقرى يالمخلب :court:


بخصوص الخادمات دام الوحده واثقة من نفسها والزوج ملتزم فوين الخطأ في انها

تجيب خادمه لبيتها ، وخاصه ان المرأة في الخليج اصبحت امرأة عامله

يعني تروح شغلها وبعدين ترجع تباشر زوجها وعيالها متى بيصير عندها وقت

تخدم البيت ، واذا قامت تسوي كل هالامور بروحها بعدين قعدوا اشتكوا

ماتسوي ورحيتها بصل وثوم ، ولا مهمله زوجها وراح تزوج عليها ومن هالمشاكل اللي

مالها عدد


اما الدريول الحمدلله انا اسوق بنفسي وماقد جبنا حد ولكن من خلال اطلاعي

للبيوت القطريه فيه ناس تحتاج للسائق مب شرط يكون صغير في السن

بس اذا وحده مع امها وخواتها في البيت واخوانها متزوجين والاب مشغول في اعماله

من بيلبي لهم احتياجاتهم ؟


اشكرك اخوي المخلب على الموضوع

هذي وحده من الناس الي تقرى شوي وتطقع للباقي .. :court:

لو انج قاريه الموضوع كامل كان عرفتي القصه ههههه .. مو المسأله مسأله وحده واثقه من نفسها .. المسأله في : ليش نقول ان نخاف على اعراضنا واحنا نخليهم مع رجال غريب !! .. :confused: وبأمكانا ان نجيب سائقه بدل الدريول ! .. او ان نعطي الخرمه الليسن ونخلص من وجع الراس !

والعفو على الرد .. بس وين ردج على المحل ؟ :D

[المخلب]

يازين الخدم المسلمين :ثقه - احترام- ترتاح لهم نفسيا



يقال ! .. بس مو كلهم ..

تحياتي لك .. :nice:

[المخلب]

للعلم الي يقول ان الموضوع طويل !! ..

تراه فقط 6 صفحات على الوورد .. يعني ولا شئ ! .. بنسبه لغيره .

[Qa6ar]

جزاك الله يالمخلب وبيض الله وجهك

ام محمد مره ومتزوجه ويمكن عمرها فوق 25 وعاقل المشكله اتشوف بنات تحت العشرين

مع الدريول بأنفسهم..... يالله ان تهداهم وتصلحهم

باقولك سالفه....

سمعت من مصدر موثوق عن وحده عمرها 18 سنه ومو متزوجه تعرفت على واحد ومرت

الايام وقالت انه الدريول في بيتهم هتك عرضها وهي عمرها 14 سنه تخيل 14 سنه

استغرب اللي تعرف عليها وقالها كيف.. طلعت السالفه مثل سالفه ام محمد يوصلها المدرسه

والبيت بعيد من المدرسه ومع الايام وصل لحاجته .... جزاك الله خير مره اخرى وان الذكرى

تنفع المؤمنين

وتعجبني جرائتك الامحدوده بالطرح

[المخلب]

جزاك الله يالمخلب وبيض الله وجهك

ام محمد مره ومتزوجه ويمكن عمرها فوق 25 وعاقل المشكله اتشوف بنات تحت العشرين

مع الدريول بأنفسهم..... يالله ان تهداهم وتصلحهم

باقولك سالفه....

سمعت من مصدر موثوق عن وحده عمرها 18 سنه ومو متزوجه تعرفت على واحد ومرت

الايام وقالت انه الدريول في بيتهم هتك عرضها وهي عمرها 14 سنه تخيل 14 سنه

استغرب اللي تعرف عليها وقالها كيف.. طلعت السالفه مثل سالفه ام محمد يوصلها المدرسه

والبيت بعيد من المدرسه ومع الايام وصل لحاجته .... جزاك الله خير مره اخرى وان الذكرى

تنفع المؤمنين

وتعجبني جرائتك الامحدوده بالطرح

عزيز وغالي .. وهذا من طيب اصلك ..

تحياتي لك .

[غزلان]

شكرا لج .. وقريب بسمحون ببيع النساء في محلات النسائيه فقط من دون الرجال !

))((
صحيح ولا في الأحلام:confused:

[superstaar]

لالا والزوج ينتظر برع والمرأة تدخل المحل او السوق وتاخذ راحته مع ريال راعي المحل ويمكن ريال يعرف مقاسه اكثر من زوجه نسأل الله العافيه

[بوخالد2]

بقولكم شي مره سواقنا الي متعودين عليه سافر ,,

وابوي جاب بداله واحد وصغير يمكن عمره 24

المهم كل ما اتصل له اقول له جيب كذا وكذا

يقول ان شاء الله آمر تدلل من عيوني :anger2:

اسكر منه اقول يمه اشفيه ذيه مصدق عمره ,,

تقول شيقول ,, وقلت لها امي ولعت :anger1:

وعلى طول ابوي درى وطيره :funny:

وما خفي اعظم ,,

الله يستر علينا والله ,,

هههههههههههههههههههههههه

خبل ذا :eek2: :eek2:

زين ان اطرده ابوووج :strong

[بوخالد2]

اخووى المخلب ليه ماترد على موضوعي 00 اذا مب عاجبك مروري علمين علشان ماامره مره ثانيه واتعب نفسي يالغالي :mad:

[ROSE]

هذي وحده من الناس الي تقرى شوي وتطقع للباقي .. :court:

لو انج قاريه الموضوع كامل كان عرفتي القصه ههههه .. مو المسأله مسأله وحده واثقه من نفسها .. المسأله في : ليش نقول ان نخاف على اعراضنا واحنا نخليهم مع رجال غريب !! .. :confused: وبأمكانا ان نجيب سائقه بدل الدريول ! .. او ان نعطي الخرمه الليسن ونخلص من وجع الراس !

والعفو على الرد .. بس وين ردج على المحل ؟ :D
شاسوي الموضوع طويل اقراه على دفعات :eek3:

برد عليك بعد مااخلصه اليوم ان شاء الله :D

[nooora]

لالا والزوج ينتظر برع والمرأة تدخل المحل او السوق وتاخذ راحته مع ريال راعي المحل ويمكن ريال يعرف مقاسه اكثر من زوجه نسأل الله العافيه





ههههههههههههههههههههههههههههههههههه

[الزاجل]

هلووو المخلب ..

بخصوص السائق .. اجده افضل من السائقة سواء كانت ربة المنزل
او مستقدمة بهدف السواقة ..
والسب ان مكان المرأة الطبيعي سواء كانت مستقدمة او من الدولة
نفسها المنزل .. فالسائق ممكن يحوط في الفريج بهدف تأمين حاجيات
المنزل في حين حواطة المرأة بالسيارة مب شي كلش كلش كلش ..
ولكن الركوب مع السائق لابد ان يكون مع ضوابط
ما يجوز المرأة تتطيب وتاخذ راحتها في الكلام والضحك والغشمرة
جدامه دام انها راكبة السيارة ..

اما بخصوص الخادمة ... الخادمة وجودها في المنزل نفس وجود
الجواري في زمن رسولنا الكريم .. اهم شي ان تعطى حقوقها كاملة
وان تطالب بستر ما يمكن ستره تجنبا للاغراء.. وان تعامل
كما النساء في البيت .. فلا تدخل لمجالس الرجال ولا الى غرف
نوم الشباب في وجودهم .. يعني نراعي انها غير محرم على الرجال ..

اما بخصوص بائعي الملابس الداخلية
حدث بلا حرج .. والنساء اعلم منا بهذا الموضوع
في حين لا غيرة ولا حمية من المسؤولين ..
ولابد من الرجل ان يصاحب قريبته الى محلات بيع الملابس
الداخلية في حال كان البائع رجلا ..
ولكن المشكلة في اللي يدخلون من غير محرم بيستحون منه
وبيقولون: وييه مالت عليه ما يستحي ذيه داش اهنيه
وكأن بائع الملابس يستحي لما يقرر لها المقاس المناسب
والموديل الأجمل واللون الافضل ..

:looking:

[المخلب]

))((
صحيح ولا في الأحلام:confused:


لا صحيح والفكره على الورق حاليا ! .. يعني يبيلها كم شهر ! ..

وعلى فكره المملكه السعوديه بدأت بهذه الخطوه بشكل جدي في المحال النسائيه ! ..

[المخلب]

لالا والزوج ينتظر برع والمرأة تدخل المحل او السوق وتاخذ راحته مع ريال راعي المحل ويمكن ريال يعرف مقاسه اكثر من زوجه نسأل الله العافيه


ههههه صدقت .. بس مو كلهم :court: ..

تحياتي لك ..

[المخلب]

اخووى المخلب ليه ماترد على موضوعي 00 اذا مب عاجبك مروري علمين علشان ماامره مره ثانيه واتعب نفسي يالغالي :mad:

افا .. :looking: .. وين موضوعك ؟

لحظه أشيك ! .. والله ماشفته لحظه ! ..

[المخلب]

شاسوي الموضوع طويل اقراه على دفعات :eek3:

برد عليك بعد مااخلصه اليوم ان شاء الله :D


منتظر ردك لما تخلصينه يا مس .. :looking:

[المخلب]

موضوع جميل ويعالج قضايا خطيره في المجتمع من الامور التى يفعلها السواقين او الخدم

لكن الحمدالله انها ماعندنا ادريول وكلن من الاخوان قايم بواجبه وليش خلق رجال (( الرجال قوامون على النساء )) سواء زوجته او امه او اخته او اخوانه الصغار

عندنا سواق يودي الحريم لكن نادر اخوى المخلب حتى لو راح يوصلهم الجامعه لازم العجوز معاهم


وتسلم على الموضوع الراائع


اسمحلي يا بوخالد .. (( شكلك زعلان ألف . ! )) :eek2: ..

والله مانتبهت .. شف الصدفه دش سهم طايش ورديت عليه وقلت برجع للكل ونسيت ردك ! :o ..

والله مانتبهت والله العالم ..

..........

نرجع لتعقيبك ..

تعليق رائع .. وملاحظتك في محلها ..

بس زعلني بردك شئ ! ..

( شلون تقول لأمك عجوز ! .. مو عدله بحقها يا خوي ! :o ) ..

وادري انها جات من حسن نيه ..

تحياتي لك .. وأسمحلي ولا تزعل :D

[المخلب]

هلووو المخلب ..

بخصوص السائق .. اجده افضل من السائقة سواء كانت ربة المنزل
او مستقدمة بهدف السواقة ..
والسب ان مكان المرأة الطبيعي سواء كانت مستقدمة او من الدولة
نفسها المنزل .. فالسائق ممكن يحوط في الفريج بهدف تأمين حاجيات
المنزل في حين حواطة المرأة بالسيارة مب شي كلش كلش كلش ..
ولكن الركوب مع السائق لابد ان يكون مع ضوابط
ما يجوز المرأة تتطيب وتاخذ راحتها في الكلام والضحك والغشمرة
جدامه دام انها راكبة السيارة ..

اما بخصوص الخادمة ... الخادمة وجودها في المنزل نفس وجود
الجواري في زمن رسولنا الكريم .. اهم شي ان تعطى حقوقها كاملة
وان تطالب بستر ما يمكن ستره تجنبا للاغراء.. وان تعامل
كما النساء في البيت .. فلا تدخل لمجالس الرجال ولا الى غرف
نوم الشباب في وجودهم .. يعني نراعي انها غير محرم على الرجال ..

اما بخصوص بائعي الملابس الداخلية
حدث بلا حرج .. والنساء اعلم منا بهذا الموضوع
في حين لا غيرة ولا حمية من المسؤولين ..
ولابد من الرجل ان يصاحب قريبته الى محلات بيع الملابس
الداخلية في حال كان البائع رجلا ..
ولكن المشكلة في اللي يدخلون من غير محرم بيستحون منه
وبيقولون: وييه مالت عليه ما يستحي ذيه داش اهنيه
وكأن بائع الملابس يستحي لما يقرر لها المقاس المناسب
والموديل الأجمل واللون الافضل ..

:looking:


معاك حق .. واشكرك على المداخله الكريمه ..

والموضوع موضوعك .. واحنا ضيوفه . ;) ..

تحياتي لك .

[بوخالد2]

اسمحلي يا بوخالد .. (( شكلك زعلان ألف . ! )) :eek2: ..

والله مانتبهت .. شف الصدفه دش سهم طايش ورديت عليه وقلت برجع للكل ونسيت ردك ! :o ..

والله مانتبهت والله العالم ..

..........

نرجع لتعقيبك ..

تعليق رائع .. وملاحظتك في محلها ..

بس زعلني بردك شئ ! ..

( شلون تقول لأمك عجوز ! .. مو عدله بحقها يا خوي ! :o ) ..

وادري انها جات من حسن نيه ..

تحياتي لك .. وأسمحلي ولا تزعل :D

تسلم يالغالي :nice:

وبنسبه للولده يعني صاار شي متداول انك اتقول عند الشيبه او العجووز قاعد

والله يعطيهم الصحه والعافيه ان شاءالله -- واسمحلي انا حمقي :eek2:

[المخلب]

تسلم يالغالي :nice:

وبنسبه للولده يعني صاار شي متداول انك اتقول عند الشيبه او العجووز قاعد

والله يعطيهم الصحه والعافيه ان شاءالله -- واسمحلي انا حمقي :eek2:

ههههه .. يالله مو مشكله .. :D ..

[مكنتوش]

يوووووووو يالمخلب الموضوع شـطــــــــــــــــــــــول

القراء ع دفعات
الاخوان ماقصرو في الاراء
شكرا على الخاص ولازال تحت التجربة مع بعض المشاكل القليلة
راح يكون بينا تواصل ان شاءالله

[المخلب]

يوووووووو يالمخلب الموضوع شـطــــــــــــــــــــــول

القراء ع دفعات
الاخوان ماقصرو في الاراء
شكرا على الخاص ولازال تحت التجربة مع بعض المشاكل القليلة
راح يكون بينا تواصل ان شاءالله

:) .. العفو .. وان ماعرفت بلغني اشرحه لك من جديد .. :nice: