الله يصبحكم بالخير ..ايهم الاول .

الله يجعله صباح سعيد عليكم ... ومبروك عليكم الحيا ...بغيت استفسر يالربع خطوات تشطيب الحمامات الله يعزكم بالترتيب ...يعني من قبل من ...العازل بعدين الحوايط بعدين الارضيات ..عشاني جيت ابي استغل جبس قالي واحد عزيز لازم تخلص عوازل الحمامات ( اعزكم الله ) عشان لو اشتغل راعي الجبس ماراح تشوف اسفل الحمامات راح يغطيها الجبس في الاختبار ..والعوازل قالوا احسن تسوي حوائط الحمامات مع العلم اني لحد الان ما مددت مواسير المياة في الحوائط .....ولو عندكم رابط خطواط تشطيب بالاولوية يليت تحطونها او تفيدوني بالترتيبها في ردودكم ولكم خالص التقدير و الحب

السلام عليكم ورحمة الله وبركاته اخوي الملياردير ..

اولا تمديد البيبات اللي بالحوائط ..

ثانيا تركيب بلاط الحوائط ..

ثالثا تركيب العوازل المائيه ..

رابعا تمديد بيبات الصرف الصحي ..

خامسا تركيب بلاط الارضيات ..

واخيرا شغل الجبس والديكور ..

جزاك الله خير ....ربي يزيد اسهمك في الخير والجنة

انا افضل الخطوة الرابعة تجي قبل الثالثة حتى نخلص العزل صح وحول البايبات بطريقة صح .. مهم يكونون شغالين العازل عليهم اشراف قوي ولا يحرقون البايبات ويذوبونها ويضعفونها .. بايبات الصرف الصحي الكبيرة .. وبعد تمديدها بنلاحظ فتحات لازم تتكسر بالبلاستر ولازم تنعمل الزاوية مايلة حتى العازل ما ينكسر 90 درجة وينقص ويسرب.

بعد تركيب البايبات والعزل والفحص نحط الرمل اللي يستحسن يكون مغسول ومحطوط فيه مبيد للنمل الأبيض ونسوي فوقه سلوب بصبية بسمك 5 - 7 سم حسب مساحة الحمام .. ويستحسن هذا البلاستر تكون فيه مادة مقوية وضد التشققات مثل الفايبر .. بعدين الحمايات الضرورية ونكمل باقي الشغل اللي مهم نترك بلاطة الحائط الأخيرة ونركبها بعد ما نركب العازل ونمدده تحتها بشوي حول 10 سم .. ونسوي على هذي البلاطة lock بصبية الأرضية واللي يجي عليها بلاط الأرضية بعد ما نخلص الأسقف .. نسوي الأسقف واحنا حاطين حمايات للبايبات وللأرضية من السقالات.

فيه أشياء كثيرة لازم يتابعها مهندس مشرف صعبة على الشخص العادي يتابعها .. مثل السلوب ومثل فحص البايبات للتغذية وللصرف وحمايتها صح .. ومثل وزنية مستوى البلاط مع باقي الأرضيات .. مثل التأكد من استواء البلاستر للحوائط وقوته وتماسكه وعدم تشققه .. والتفاصيل اللي بنسويها عند الباب وفريم الباب .. هل بنسوي نعلة رخام ولا بنكتفي بفاصل ألمنيوم أو نحاس .. وكله يعتمد على تشطيب الأرضية المجاورة وعلى خطتنا التصميمية.

تبون الصج اتعجب من اللي يسأل سؤال هالشكل .. وسامحني إخوي الملياردير .. خوف مني على بنيانك .. الا في حالة استفسار لوجود لبس بين كلام المقاول والاستشاري .. لأَن مثل ما تشوف المجال واسع وصعب نوضح كل شيء.

سالفة ويا حبي للسوالف .. جاني من أيام مهندس كيميائي .. ما شاء الله عليه مفتح ومنتبه ونشاطه واضح الله يحفظه .. بالصدفه طلع والده زميل دراسة قديم لي وجلسنا جلسة مطولة حول 3 ساعات ونص .. شرحت له جزئيات وعلقت على بعض التفاصيل سريع سريع وهو نورني بأُمور منها طريقة الصرف الأمريكية للمنهولات .. بدون منهولات وبايبات تسليك لو دعت الحاجة .. وكان جايب كتاب معاه يوضح الطريقة .. والزين النقاش كان من الجهتين والفهم يستوي بسرعة مني أو منه .. وحتى المصطلحات الهندسية كان حافظها بسبب اطلاعه .. هذا نقدر نقول ما عليه خوف لكن الخوف على الكثيرين بسبب ركاكة النظام الهندسي عندنا والقوانين وعدم الترخيص وعدم وجود مدارس مهنية تخصصية .. فيه مدارس سواقة ولا فيه مدارس بناء حقيقية.

جزاك الله خير ... اخوي معماري على ردك ... بس انت عارف اكثر مني ان النظام اللي عندك في قطر وعدم وجود جه رقابية تقوم بدورها تجاه المقاولين و الاستشارين خلا الوضع لهم يلعبون فيه على كيفهم و المتضرر بالدرجه الاولى المواطن .... خلني ساكت الله يرحمنا برحمته

بالعكس اخوي الصوت لو طلع من كم جهة ووصل إذن المسؤول بيعرف إن فيه ناس تعاني

حتى أسعار الإشراف خيالية ولازم لها قوانين تحددها وتحدد مسؤولية المهندس المشرف وتخصصات من في المكتب وتطوير الأدوات الإشرافية حتى تواكب التطور .. يجيني مهندس يقول لي بص حدرتك دي الغرفة طولها 10 متر ويتم يقيس بخطواته .. ولا يجيني مهندس مشرف لا معاه العقد والرسومات ويتفرفر شوي في البنيان ويروح .. ولا يشرف على الصب لا يسوي اختبار القمع لكل سيارة خرسانة ولا ياخذ عينات ويعتبرون المقاول مسؤول عن هذا الشيء.

أحياناً نحصل المشرف هو السوبر مهندس واللي فاهم كل شيء .. من بداية البنيان لين آخر التشطيب وكله يبربر ما يبرر .. دي الخرسانة ريحت والحديد المصدي أحسن ويمسك في الخرسانة ولو فيه شلوخ لا دي حاقه بسيطة حتروح مع الزمن ولا حتتعود عليها .. المشرف الزين وايد غالي ويجيب طاقم مهندسين مختصين يتابعون كل شيء وهذا بعد يبي له ترتيب وتحديد .. مثلاً كل زيارة تكلف 1000 ريال وتستمر ساعة أقل شيء .. واحد طالب ب 50000 شهرياً كمكتب وكان مشرف لي ب 1200 في 2004 وفي الأخير تم يتابع بدون دفعات لأن الباقي أشياء بسيطة جداً .. نبي قوانين صريحة وصحيحة تنظم العملية لأَن الخسارة كبيرة واقتصاد دولة الشغل الرديء ينعكس على الكل والأموال تطلع من الدولة وبغير وجه حق.