ماشاء الله شغل حلو تغير التصميم وايد اخوي بخصوص المنور لي بنص وايد حلو هل ممكن اسوي قبة ونزل اثريا منه..
ماشاء الله شغل حلو تغير التصميم وايد اخوي بخصوص المنور لي بنص وايد حلو هل ممكن اسوي قبة ونزل اثريا منه..
هذا أنسب وأرخص القبة بتكلفك أكثر وضبط درايشها صعب .. هذا يجي بشكل هرمي ومرتفع يبين من الخارج وتقدر تنزل منه ثريا وتحط إنارة مخفية ملونة أو بألوان متغيرة وتبين منعكسة على الزجاج من الخارجاقتباس:
المشاركة الأصلية كتبت بواسطة boahmed87
الجلسة نازلة حول 60 سم تكون أحلى وتقدر تشوف وراها
الغرفة الرئيسية مقسومة ببابين باب يدخلك على مكتب أو جلسة خاصة أول شيء وفي رأيي المكتب أفضل وتخلي واجهتها قزاز وبعدين يجيك باب الغرفة
لو رسيت على هذا التصميم باقي الارتفاع اللي تبيه وباطور الدرج على أساسه .. انا رايي ما يزيد عن 4 أمتار من أرضية لأرضية يعني صافي لازم تشيل منه خرسانة السقف والجبس النازل .. ممكن يجيك 3 متر لو سويت دكت سبلت للتكييف ولو ما سويت بتوصل 3.6 تقريباً
لو حاب القبة تقدر تسويها وتخلي رقبتها طويلة والنوافذ عمودية في جدار رقبة القبة وتكون بالضبط فوق السجادة الدائرية .. وتصغر السكايلايت الهرمي تسويه 2 في 2 .. هو ألحين 4 في 2 وتحت المنور عندك ساحة كبيرة فاضية للزراعة الداخلية
يعطيك العافية السكاي لايت وايد حلو وفكرة احلى من القبة وبغطي مساحة كبيرهاقتباس:
المشاركة الأصلية كتبت بواسطة معماري قطري
بخصوص الارتفاع على 5.10 سئلت قالوا عادي الغرفة الرئيسية سوا لي تشوفه افضل عادي مادام في صاله فوق المكتب بكون فكره افضل .
في هالحالة تحتاج 34 عتبة درج ولو تبيه صافي 5.1 يعتمد على التصميم الانشائي للأرضيات .. ممكن يكون عندك من 20 - حتى 40 حسب المصمم + الجبس النازل شكثر بيكون .. خلنا نفترض من أرضية لأرضية ونحدد 34 عتبة ونشوف شكبر بيطلع لنا الدرجاقتباس:
المشاركة الأصلية كتبت بواسطة boahmed87
سويت لك الوضع شلون بيكون حق 5.4 من صبية لصبية يعني بتضمن 5.1 ارتفاع صافي وحسب الجبس بيقل وحسب الدكتات بعد بيقل لكن مب مستوي أقل من 4 متر صافي وهو ارتفاع مزعج وغير اقتصادي وفي النهاية القرار لك .. شبيبقى لك من ارتفاع للبنتهاوس خل نحسبها .. أرضية البيت بعتبات مريحة 12 سم بترتفع 48 سم + 5.4 متر للدور الأرضي + 5.4 متر للدور الأول = 11.28 متر ويبقى لنا للبنتهاوس من ال 12.5 أو خل نقول 13 .. 1.72 .. والدرج كبر وأكيد بيستوي متعب كثير
http://i.imgur.com/e2VfjLw.png
وهذا الدور الأول .. طبعاً الدرج خذ مكان البانتري واضطريت انقله لقريب الجلسة الدائرية .. والمخزن في البنتهاوس ممكن نقله جنب الدرج وبحيث يكون فوق الدرج النازل .. بس للأسف ما بقى عندنا ارتفاع للبنتهاوس .. الأرقام ما نختارها عشوائي لازم اختيارنا يكون محسوب
http://i.imgur.com/PtBrrMy.png
أخوي المعماري يعطيك العافية
بغيت أسأل ايش الارتفاع المناسب في حالة عمل الدكت اسبلت
اربع ونص متر أو أربع أمتار تكفي.
لو افترضت بتسوي ارتفاع 4 متر حتى تسوي دكتات تكييف وبتنقص من ال 4 متر سمك الأرضية حول 35 سم و الدكتات حول 40 سم والجبس حول 20 سم بتصفي على صافي ارتفاع 3 أمتار وخمسه سم وهو مناسب جداً .. وبيكون عندك ارتفاع البنتهاوس قابل للسكن .. خل نحسبها 4 + 4 + 0.48 = 8.48 وبيبقى لنا للبنتهاوس 4 متر نشيل منها سور سقف البنتهاوس ولنفترض بس طابوقتين 40 سم .. بتبقى 3.6 متر ونشيل منها صبية السقف ولنفترض 30 سم بتبقى 3.3 بتكون كافية حق 40 سم دكتات وبتبقى 2.9 متر صافي لو حطينا جبس ملاصق للدكت ولو نزلنا 19 سم بتبقى 2.8 وهو ارتفاع معقول ومريح جداً وبينزل شوي من الأطراف حسب سمك كورنيش الجبس
الله يعافيك اخوي ستارز .. حتى 3 متر تكفي بس توزيع الدكتات وتصميم التكييف والجبس هو اللي يخلي الارتفاع مناسب .. لو بتصفي على 2.4 بعد مريح الارتفاع وعملي وبعضهم يخلونه متدرج ويخلون الوسط مرتفع أكثر والأطراف نازلاقتباس:
المشاركة الأصلية كتبت بواسطة Stars
4 متر مناسب جداً وذكرت قبل شوي شلون تحسبها .. بس لسهولة التمديد للدكتات سو فلات سلاب اللي تجي بدون جسور جانبية .. أو الجسور مخفية في الصبية
عندك في الكويت مثلاً الارتفاع محدود لكن الدرايش مسموحة والارتدادات أقل منا ويحق لهم يوقفون في طرف الشارع ويكون الشارع مدمج مع بيوتهم .. يضطرون يسوون الأدوار أقل ارتفاع وأكثر عدد .. يعني يسوي 4 أدوار في الارتفاع الكلي المسموح غير عن البيسمنت
لو قللنا عدد العتبات للدرج بيصغر شوي وبيتضبط باستراحتين مع إن لو دائري أحلى بدون استراحة وبنحصل ارتفاع مريح لكل الأدوار 4.06 متر بارتفاع لكل عتبة 14 سم والبنتهاوس بيبقى له ارتفاع 3.63 اعتقد
سويت هذا المقترح وأشوفه وايد أحلى
http://i.imgur.com/TgTPmFA.png
اقتباس:
المشاركة الأصلية كتبت بواسطة معماري قطري
بس مشكلة الفلات سلاب بتكون أرضية الحمامات الله يكرمكم
بنفس منسوب ارضية الغرف فتمديدات الصرف الصحي بتكون مشكله في حد علمي
بيصير اعتبه بين الحمامات والغرف اذا ماكنت غلطان
ممكن عملها نازلة للحمامات بس هي تعتمد على المهندس الانشائي الشاطر .. في بيتي ممكسين كم نوع .. وشفت مغامرات انشائية من اتحاد قطر للتخطيط كنت متخوف منها وهم طمنونياقتباس:
المشاركة الأصلية كتبت بواسطة Stars
سويت بعض التعديلات البارحة ولا بمقتنع بارتفاع كل دور 5 متر لأسباب ذكرتها تتلخص في ما بيبقى شيء للبنتهاوس .. خفضت الإرتفاع من أرضية لأرضية ل 4.06 متر بالضبط وكل عتبة 14 سم ارتفاعها
مساحة الحوش ترتبت أكثر للزراعة ومواقف مظللة .. والمظلة يكون سقفها حديد مخفي بواجهة خرسانية يتثبت فوقها الحديد بدون عمدان طالعة .. عرضها 7 متر و 45 سم وطولها حول 11 متر .. ممكن لو حبينا نسوي أرفف تخزين نقلل العرض شوي
جهة حوض السباحة ممكن نخليها مكشوفة أو مغطاة بسقف زجاجي بقواطع ألمنيوم مقواة بالحديد .. تكلفته حول 300000 والإختصاصي للألمنيوم يضبطونه وشايفه في بيت .. وممكن بحديد وبلاستيك بيطلع كثير أرخص حول 30 ألف وممكن أقل .. عندنا خدمات متكاملة غرفة بخار وتغيير ملابس وجكوزي مفتوح ودورة مياه واحدة للأسف .. مساحة الحوض 4 في 8 ويستحسن يكون عمقه واحد بحدود 125 سم
جدام المدخل عندنا مساحة لزرع ست أشجار واشنتونيا لو طلعت بتوصل للدور الأول وأعلى وبتعطي منظر حلو للمدخل بس يبغي لها حوض غزير بحدود 2 متر وعرض 1.2 متر .. بما أن الحمام والمغاسل كانوا عائقين في الصالة اللي قرب حوض السباحة ألغيتهم وعندنا اللي قرب المطبخ قريبين وسهل الوصول لهم .. فتحت مكانهم باب قزاز عريض يطل على الحوض
الأهم عندي الدرج الخلفي ترتب وتوسع المطبخ
صراحة انهمكت كثير في التصميم ذيه
http://i.imgur.com/1m5i4xZ.png
الدور الأول أبرز التعديلات تم اضافة نافذتين اللي تكون بارزة ومفتوحة على 3 جهات .. هذي تجي مع جلسة قرب الدرايش وواجهتها الداخلية تكون قوس والستارة تجي ثابتة في القوس من داخل .. تنسحب وتتعلق في الأطراف لسهولة الفتح يومياً وممكن استغلال الجلسة ونفر التلفزيون جهتها لو حبينا أو نشوفه من على السرير
نوافذ الدور الأرضي أغلبها ضمنية وما ركزت عليها وحتى اللي صوب بيت الدرج ولازم تندرس مع الواجهات ومثل ما ذكرت في السابق مب شرط يكونون متكررين فوق وتحت .. ممكن فوق أعرض أو أصغر
http://i.imgur.com/fJa2bdZ.png
توقعاتي للتكلفة لو تشطيب جيد وتكييف دكت سبلت في حدود 4 مليون .. لو سبلت وتشطيب أقل درجة حول 2.8 الى 3 مليون .. والشكر الجزيل للأخ بو أحمد اللي عطانا الفرصة نعدل شوي والله يوفقه في البنيان
الحمام الرئيسي ممكن يضيف له بديه وممكن يسوي كسرة بسيطة جهة غرفة الملابس حق غسالة لو حب .. وغرفة الملابس تختلف عن خزائن الحائط إن عرض كبتها حول 40 سم وبدون باب ثلاث أرباع الملابس داخل الكبت والربع طالع للفرز وسهولة التناول .. مع بعض التقسيمات للأدراج أو الأرفف
يعطيك العافية اخوي بو عبدالله التصميم صار احلى بوايد من قبل خذت استفدت منك وايد افكار واهم شي الارتفاع بسوي 4 علشان يكون الدرج مريح و مدخل البيت بعد بتغير وفي اشياء ثانية ان شاء الله كلها بتكون للافضل من بعد ماشفت افكارك الجميلة ماقصرت ياخوي والله يجزاك خير .
يعطيك العافية استاذ معماري ، ماشالله تصميم جميل
الله يوفقك اخوي بواحمد بالتصميم الي يرضيك
حاولت ارسم الفكرة الي في بالي للحديقة على يمين البيت ومعاها بركة طويله متصلة فيها ، بس للحين ما خلصتها
واشوفكم ماشالله ختمتوا التعديلات وشطبتوا :o
الله يعافيك ويوفقك ودوم التزم بخطة وحدة ولا تغير الا بعد تفكير عميق ولو لك حاجة ضرورية للتغيير .. بعض المقاولين ويتضامنون معاهم استشاريين يقنعون المالك بتغيير معين ويطلعون من ورا هالتغيير مبالغ كبيرة .. انا حتى مواد التشطيب أقدر افيدك فيها وحتى العقد بطريقة تريحك وتسوي لك تحكم قوي في ميزانية بيتك وبنيانهاقتباس:
المشاركة الأصلية كتبت بواسطة boahmed87
الله يعافيج إختي ومبارك عليج الشهر الكريم ولو إنها متأخرةاقتباس:
المشاركة الأصلية كتبت بواسطة sweet qatar
دوم لازم نبلور فكرة التصميم ويتخيلها المالك والله يعين كل من يبني .. من أيام مار عند صديق بدايات مزاولة المهنة فوزي اسماعيل وهو مهندس إنشائي متمرس ومن أفضل الانشائيين ويدير حالياً مكتب ام زد وشركاه .. كنا طالبين مساعدته في تصميم فيلا كبيرة .. واعتذر بخصوص عندهم ضغوطات وشغل كبير ولا يقدرون يفرغون مهندسين لمشاريع خاصة وسكنية .. ذكر لي بأن تكلفة المتر المربع حالياً تبدأ من 4000 الى 6000 ريال .. كنت متوقع فيها مبالغة بس تواصل معاي أحد الإخوان بخصوص بناء عمارة وطالعة عليه تكلفة المتر المربع 4080 ريال بالتكييف ( دكت سبليت ) ورخام في كثير من المناطق
يعني اللي بيتعب وبيختار شركات وسط ما بين 2500 و 3000 حسب التشطيب .. الشركات الرخيصة وتكوين فريق من العمال السايبين هذا بيصير من الماضي وضرره أكثر من منفعته
اقتباس:
المشاركة الأصلية كتبت بواسطة معماري قطري
مبارك علينا وعليك ما بقى من الشهر
الاسعار لها مدة على هالرينج و كل ما قلنا بتنزل ،، تزيد !!
للاسف في سوق قطر السعر مب مقياس للجودة ابدا ، ممكن تدفع اعلى سعر في السوق عشان تشتري راحتك
وتنصدم ان التنفيذ كان دون المستوى
مب من شوي الي يبني يجيه ضغط و سكر ... الله يعين و ييسر على عباده
ان شاء الله اخوي بكون متواصل معاك في الخطوات القادمة .اقتباس:
المشاركة الأصلية كتبت بواسطة معماري قطري
الحكومة لازم يكون لها دور في ضبط هالأُمور .. جودة الشغل وترخيص العمال حسب مؤهلاتهم وخبراتهم .. جودة المواد اللي تدخل البلاد .. تحديد أُصول أي صنعة بدل تركها عائمة .. جهات تدقيق وتوثيق العقود بما يضمن صالح المالك والموفر للخدمة .. تسهيل اجراءات التقاضي والأُمور القانونية الهندسية بما فيها سرعة التجاوب مع أي شكوىاقتباس:
المشاركة الأصلية كتبت بواسطة sweet qatar
خلاص بو أحمد حتى ما تتشتت بارسل لك التصميم الأخير فايل صورة واوتوكاد خل الاستشاري يكمل شغله على أساسه وأي شيء ما يفهمه بلغني .. الجلسات المقوسة فوق وتحت نازلة مب مرتفعة .. غايصة في الأرض 60 سماقتباس:
المشاركة الأصلية كتبت بواسطة boahmed87
باقي البنتهاوس باشتغل عليه اليوم أو بكرة .. إستوى عندك مجموع 7 غرف أغلبها بغرفة ملابس كاملة ومساحات موزعة توزيع جيد .. نصيحتي للتكييف لو حاب الدكت سبلت خله للغرفة الرئيسية والمكتب والباقي سوه أما المعلق اللي يوزع لأربع جهات أو سبلت جداري عادي
أرضية الدرج عندك سوها بورسلان من النوع السميك سمك 12 أو 14 ملم وخل واجهات العتبات سيراميك بنقوشات أو سو الجوانب بس قرانيت والوسط سجاد بتطلع مريحة وأرخص من الكامل رخام .. والدرابزين سوه عمودي بدون دزاينات مكلفة
هذي صورة الدور الأرضي مع المداخل والحوش ومستويات الأرضيات مكتوبة بالأرقام جاهزة للتطبيق .. باقي نوافذ المجلس والصالة الطويلة وهذي أقترح يسويها عريضة ولو تجي مقوسة من فوق أحلى وكذلك الدرج يبغي له طوالية
http://i.imgur.com/eIliJ2x.png
وهذا الدور الأول متضمن المستويات .. وبالنسبة للحمامات ممكن تسوي نزول 2 سم أو تكتفي بعتبة رخام فاصل عند الباب بارتفاع 2 سم والسلوب يكون جهة فتحة الصرف الصحي
http://i.imgur.com/BLq2Q4s.png
الحمامات الصغار ممكن تسوي بانيو لو حبيت بدال الشاور بس تحتاج تعديل بسيط لو تحب قول .. والرئيسي الشاور والجكوزي معزولين بباب قزاز عن الرطوبة وممكن تركب جهاز بخار ويكون حمام مزدوج بخار وجكوزي وشاور
وصلنا لدور السقف وبهذا ننتهي من أساسيات التصميم والباقي الواجهات والانشائي والكهرباء وكله لازم ينبني على هذا الأساس وبيكون سهل وصح
صغرت شوي في البنتهاوس حول 12 متر مربع واستوت نسبة مساحته 43% بس لازم نضيف غرفة للتانكي والصخانات وهذي بحدود 10 متر مربع ومقترح مكانها يكون فوق العمود الضخم اللي ماسك الجلسة المنحنية وكان قبل للدرج .. وبحيث تكون بإرتفاع بسيط
http://i.imgur.com/WRavA6c.png
البنتهاوس مهم لكل بيت ولازم نسويه بأكبر مساحة ممكنة ويوافق عليها التخطيط .. حتى لو ما نحتاجه في الوقت الحالي ممكن أحد العيال يتزوج ويحتاج لسكن مؤقت في بيت ابوه .. وممكن نستغل الغرف فوق للرياضة أو الهوايات
موضوع قييييم. وتستاهل كل التقدير عليه
طال عمرك ارضي توها طلعت وللحين ماحصلت مخطط يسر الخاطر. والارض مساحتها ظ©ظ©ظ* متر مربع ����. كبدايه. وين ابتدي. اروح للمساح اول والا اشوف لي مخطط ولا كيف.
مع العلم انني ابغي اركب لفت فالبيت.
لك كل الشكر اخوي رياني وانا رياني سابقاً وقلبي يميل للريان خصوصاً بوجود سعود بن خالد وتصريحاته الرنانةاقتباس:
المشاركة الأصلية كتبت بواسطة Rayane
المساح خله آخر شيء قبل لا تبني الا لو تبي تحدد زواياها بطابوق يحمي العلامات المساحية وتتخيل وضعها كيف مع البنيان .. هذا لو كان ما فيه طريق وكالعادة بيوتنا نبنيها في بر أحياناً
مخطط يسر الخاطر صعبه تحصله لأَن غالبية الموجود نسخ ولصق وبدون تطوير .. تحكمت في هذي العملية الأسعار والتسابق في تنزيل السعر والأراضي المحددة بطريقة متقاربة وشروط التخطيط وأخيراً الذوق العام
الأمريكان وعرضت كم مخطط لهم هنا عندهم نماذج تلبي بعد متطلبات كافة الأذواق وتناسب كل الولايات .. ويطورون عليها ولا يوقفون بس هناك لو تبغي مخطط فيه وبرخيص بحدود 500 دولار + أي مصاريف حسب الولاية وبالنت تخلص شغلك في دقائق وتوصلك الموافقات والخرائط في فترة قياسية يمكن اسبوع .. بعدها التنفيذ المقاولين مؤهلين وعقودهم مختصرة بس ملزومين بالقوانين .. مقاول صارت عليه قضية بسبب بناء صار له 10 سنوات وفيه مشكلة في الأساسات وعدلهم غصب ودفع غرامات وأعلن افلاسه
انت عطني حدود أرضك وأبعادها أو صورها من الملكية وحطها هنا أو خاص وبحاول أركب لك نموذج معين عليها
أو شوف استشاري وفيه جيدين وفيه بعد سوبر جيدين مثل مكتب ابراهيم الجيدة ومكتب ولد عمي بس الأخير قال لي ما اخذ بيوت كلش .. وابراهيم الجيدة هو مصمم برج برزان وشفت صور حق بيته في مجلة كان بيت خرافي والزين دوم غالي وصدقني المكاتب الحين مضغوطة بشكل غير طبيعي
لو تبغي تصميم خاص ومميز بتتعب وبتاخذ وقت .. تبي تصميم بيتي حلالك مساحته 1070 .. 7 غرف كلها بدورات مياه وبعضها بغرف ملابس و3 صالات ومجلسين وكلفني حول 3 ملايين بين 2004 و 2006 .. التصميم اتوقع عند الاستشاري لأن نسختي كانت على كمبيوتر تعطل وضاعت النسخة
جزاك الله خير وماقصرت. شرح وافي ومفصل.
والسموحه على التاخير فالرد.
بكره ان شاء الله باستلم الملكيه والخريطه
الله يوفقك وشوف الموضوع هذا من بداياته بتحصل تصاميم وأفكار تقدر تبني عليها وتعدل وتغير حسب حاجتكاقتباس:
المشاركة الأصلية كتبت بواسطة Rayane
اخوي معماري قطر احب استفسر عن موضوع الارتفاع المناسب للفيلا
13 ونص ارتفاع للفيلا هل هو مناسب
اذا وضعنا بعين الاعتبار الارضي 5
والدور الاول 4
والبنت هاوس 3.5
إستوت 11 ونص بس لا تنسى عندك بين 45 و 60 سم ارتفاع لأرضية الدور الأرضي عن الحوش + حول 20 - 30 ارتفاع لأرضية الحوش عن الشارع + معدل 30 سم للأرضيات وهي ثلاث أسقف + سور سقف البنتهاوس على فرض سويته صغير 40 أو 60 سم .. هذي كلها تطلع حول 2.4 متر وبعضهم الله يهداهم يسوي حوش البيت جنه طعس ويرفعه متر حتى يجرب الدبل وقت الدخول .. 11.5 + 2.4 = 13.9 واللي في التخطيط بعضهم يحاسبون على السنتيمتر وجارك يسامحونه في مترين وثلاثه زيادةاقتباس:
المشاركة الأصلية كتبت بواسطة أهلي العميد
انا البنتهاوس عندي سويته نازل وطلع مريح .. حول 2.5 متر بدون جبس .. مب كل البيت نسويه جبس و 3 متر ارتفاع مناسب جداً .. لغرف النوم تسوي جبس وتسويه مستويات يطلع أحلى .. يعني تنزل الارتفاع صوب السرير وترفع شوي باقي الغرفة .. وتخلي غرفة الملابس كورنيش بس وليتات معلقة نازلة موجههة على مكان تعليق الملابس .. التسريحة والمغسلة تسوي لها قطعة سقف نازلة مع سبوتات تنور المكان
بيت الدرج ممكن تنزله في الأخير لقريب المترين حتى يطلع الشكل الخارجي متوازن
يعني لو تشوف البيت من الخارج تحصل كتل كتلة الدرج نازلة شوي والبنتهاوس شوي أرفع وسور السطح الباقي ترفعه شوي يوازن الشكل .. وهذي صراحة كلها دراسة تخصصية ومعمارية ما للشخص العادي تدخل فيها والاستشاري المفروض يبرزها بمهنية .. بس استووا كثير من الاستشاريين يشتغلون بالأوامر من المالك ويسوون اللي يبغي بدون نقاش ووجع راس وهذا غلط
مر مناطق قطر كلها وشوف تقدر تنقش التصميم اللي مشتغل فيه راعي البيت واللي مشتغل فيه شخص مختص .. تحصل بيت كشخة أحياناً بس مسوي حركة مخربته بالكامل وتحس إنه تصميم منقول وتدخل المالك بالغلط وبطيب نية وطلعت تجربته فاشلة
بيوت الكويتيين محدودة الارتفاع لكن غير محدودة الطوابق وكل طابق تفتح فيه درايش بكامل الحدود المسموحة .. يعني فرضاً لو ارتفاعهم محدد ب 15 متر بعضهم يسوون 2 بيسمنت وشفت تصميم لواحد مسوي السيارة أول ما تدخل تنزل تحت .. توصل لحلقة نص دائرية وبابين للحوش في أطراف نص الدائرة والمواقف بينهم تحت الأرض .. مغطاة من فوق بخرسانات فيها فتحات كبار للتهوئة وغرفة السائق تحت قرب المواقف .. وفوق مدخل للزوار وحديقة ودرابزينات تطل على القسم التحتي
زين تدخل البيسمنت تحصل بعد عندك دور بيسمنت تحت وفيه حوض سباحة .. وتحصل البيت من داخل مجوف ومدرج وكله يطل على البيسمنت وكل الأدوار مفتوحة على بعض .. فوق السقف سكايلايت كبير ينور البيت كله
استغلالهم للارتفاع المسموح يعني بدل ما نسوي 3 أدوار بإرتفاع 5 متر ليش ما نسوي 4 والا 5 بارتفاع 3 متر شامل الصبيات .. بس هناك قوانينهم التخطيطية وحدة ومعروفة وطرق التجاوز عليها مسموحة ومحددة وقانونية لكن عندنا الوضع مجبوس
عندنا قانون البنتهاوس محدود ب 40% من مساحة السطح ما ادري 60% نسيت الصراحة وبعدين ما تقدر تفتح نوافذ جانبية الا المطلة على السطح .. لو يسوونه دور كامل وبنوافذ مع ألمنيوم يمنع الرؤية أسفل جهة الجار ويسمح بالرؤية الأُفقية ودخول النور بيكون أفضل .. كذلك يقولون لك بدل ال 13 متر للارتفاع تكرمنا عليكم وزدناها ل 15 متر وتقدرون تلتزمون بالارتدادات 3 متر والواجهات 5 متر أو حتى 6 متر وتقدر تقسم بيتك على 3 أدوار وموقف تحت البنيان في مستوى الأرض أو 4 أدوار شقق لك ولعيالك والدور الارضي مجلس تقدر تمده لقرب الخارج ويكون فيه ممر للبيت
التسهيل ضرورة ملحة وتعديل القوانين ضروري اليوم قبل بكرة
صادق يالغالي
ايضا في نقطه البلاط الخارجي يفضل يكون لونه غامق
لانه بصراحه الفاتح يتحول ل املح في قطر
خصوصا الالوان الاحمر والاصفر تلاقيها فجأه صارت ملحه وقبيحه
اما اللون الغامق مثل الرمادي لما يصير املح عالاقل يصير رصاصي ههههههههه
هذي الملاحظه شفتها في اغلب البيوت
صحيح أنسب الألوان الرمادي ولو تحصل رمادي غامق إخذه بدون تردد .. حتى تواير السيارات ما تبين فيهاقتباس:
المشاركة الأصلية كتبت بواسطة مضارب دوسري