الأساسات الموضحة بتكون على عمق مترين وبعضها ممكن يكون بارز داخل حيز البيسمنت وبعضها اللي يعيق الحركة بيكون محفور له وتحت مستوى الأرضية
التمديدات كلها بتكون معلقة في سقف البيسمنت والإرتفاع الصافي بيكون أقل شيء مكان البيبات 1.8 متر .. حتى خط الصرف الصحي التابع للمحلق بسهولة يتمدد تحت وتمديد مباشر بدون منهولات فقط فتحات تسليك تفتح وقت الحاجة
التعديلات اللي تمت على المجلس بسيطة أهمها عمل أرضية دائرية مرتفعة قليلاً بحدود 5 سم وراء الكراسي لتحدد موقع الكراسي بالضبط لتكون خلال دائرة ومتقدمة عن الجدران .. هذي الأرضية الباقية المرتفعة توصل فيها النوافذ للأرض .. وبعض النوافذ بتكون كاملة من فوق لتحت مفتوحة بزجاج شفاف وبعضها اللي مظللة بالأسود بتكون جزئية الجزء العلوي شفاف والسفلي تشكيلة نافذة وخلفها نور صناعي وقد تكون بزجاج ملون أو معشق حتى لا تطل على منطقة المسبح
نتجت عندنا فراغات ممكن استغلالها لنباتات ظل
التكييف سيكون هنا دكت سبلت مضطر والا تمنيت يكون سبلت عادي .. الدفع على الجدران ونازل خلف الكراسي والسحب من جهة القبة حيث يرتفع الهواء الحار للقبة
بالنسبة لمنطقة حوض السباحة بتكون الجلسة قرب الحوض مرتفعة 120 سم ومتصلة مع جدران الحوض حيث يمكن النزول للحوض من الجلسة مباشرة والجلوس داخل مغمور بالمياه للرقبة ودفع المياه بيكون خلف ظهر الجالس باتجاه اليسار حيث ينزل على قناة مفتوحة ويسحب للفلترة ويرجع مرة ثانية وطبعاً فوق الحوض سقف زجاجي قابل للفتح في الأجواء المناسبة
https://i.imgur.com/SBceE20.png
على اليسار تبين فتحة البيسمنت اللي بتكون مغطاة بباب حديدي بفتحات للتهوئة للتكييف الخاص بالبيت واللي بيكون تحت البيت وممكن المشي والانتقال لخلف البيت .. أكيد بعد الرخصة سيتم فتح الغرفة على منطقة الحوض
شغال على الواجهات اللي بتكون بسيطة وبصبغ أبيض مع بعض الجي ار سي بلون ثاني .. وسويت بعض التعديلات البسيطة إن شاء الله استعداداً لتنفيذ التصميم مع باقي التخصصات الهندسية عن طريق استشاري جيد
هذي الواجهة من الشارع ونصيحة اللي يسوي له استشاري واجهة يقول له يسوي الشكل شلون بيبين من الخارج والشارع ما يحط البيت بس بنفسه .. البيت بنفسه أكيد واجهته من هذي الجهة غير هو جدامه حوض السباحة والمجلس مغير الشكل .. الواجهة المفتوحة جهة الجنوب بيكون المدخل والوضع يختلف لأنها مفتوحة اللي داخل البيت يشوفها كاملة لذلك تناسقها مهم
يعني البيت له واجهتين رئيسيتين ومحتد اخليه واجهته جانبية بدال ما تكون مقابلة الشارع بسبب وضعية الأرض وانفتاحها على شارع وسكة
ما كملت شغل الواجهة باقي شوي ولونت المجلس رصاصي حتى يفرق عن باقي البنيان
https://i.imgur.com/JS2Emjj.png
الحائط الخارجي بسيط ومسطح بأعمدة مخفية وبشوية زوايا متدرجة لأن بيكون جدامه شجر يغطيه .. ركزت على البوابة ومنطقة المجلس ببعض الكسرات المعمارية والجي ار سي
بيكون بين الأعمدة حديد حماية عن لحد يدخل وكاميرات تصوير
https://i.imgur.com/dNk2Yre.png
مخطط للكسرات العلوية اخليها بيضاء باضاءة ال اي دي مخفية تنعكس على واجهة الكسرة اللي مثل العتبة .. مفكر في لون أزرق تحت وفوق أبيض في وقت الصيف ويتغير اللون للأحمر وقت الشتاء والأبيض يبقى أبيض .. الإنارة الخارجية كلها بخليها خلايا شمسية بإذن الله
سويت صورة مقربة لنموذج شكل النوافذ وانا مركز على إن تكون جميعها بخطوط مستقيمة لأني ناوي احط شترات لغرف النوم فقط .. عندي الحائط عريض بعرض يزيد عن 40 سم وبيكون بوكس الشتر مخفي مع الحائط وباركز حتى الداخل تكون الستارة ديكورية وخفيفة .. التجميل البسيط بيعطي البيت شخصية وما اعتقد بيكلف مثل الحجر أو التلطيخ المبالغ فيه
اليمين بيكون للواجهة المقابلة جنوب وللنوافذ السفلية وللقزاز اللي في التجويف والأماكن القريبة من الرؤية والمرور .. اليسار لفوق ولباقي الأماكن
الزوايا المسماة بالقمرية هذه مجوفة بثلاث تجويفات كما هو واضح وتطوير للتراثية ووضحت طريقة تصميمها في السابق .. هذي تصميم خاص حلال على اللي يبيه وأي معمل جي ار سي ممكن يسويها
اللون مفكر اغامر في هذي القطع بلون بارز مثل الأصفر الفاتح قريب من ذيه .. والإطار بيكون بلون قريب وبنقشة باتفق عليها وهو بعرض 10 سم .. الدريشة الصغيرة تنفتح كلها في الاتجاهين والكبيرة بس الجزء الوسطي
فكرة ثانية اطبق التصميم اليمين مع نقوش رفيعة تحت وفوق بسيطة وكتل تبين من بعيد
https://i.imgur.com/wpSNC4d.png
صف الأدوار جنب بعض طريقة مهمة لمراجعة المخططات ولتخطيط الخدمات والدكتات وكذلك الهيكل الانشائي .. ولازم نضطر نعدل شوي على المعماري لأن الصورة تكون شاملة أكثر
سويت تعديلات طفيفة وكذلك حددت مسارات بايبات الصرف الصحي اللي بتكون رأسية مستقيمة من فوق لتحت وأكيد لها فتحة تهؤئة فوق السطح .. ثم تتجه كلها معلقة تحت السقف للبيسمنت الخدمي وباتجاه الفتحة الكبيرة للتهؤئة وثم لمنهول وحيد رئيسي ومنه للصرف الحكومي أو خزان الصرف الصحي
تغذية المياه الحارة والباردة بتكون كذلك من خلال دكت وممكن نسحب أي بايب ونغيره بدون أي تكسير من البيسمنت الخدمي .. وضحتها بدائرة بقطر 10 سم بتكون بايب كافي حق ثلاث بيبات تغذية واحد للحار وواحد للبارد وواحد للتدوير
شيء مهم كذلك ناوي اخطط له وهو تصريف مياه التكييف عن طريق بايبات تنزل للبيسمنت ويتخزن في تانكي خاص للزراعة
إن شاء الله تكون الصورة واضحة وباركز بصور مركزة أكثر
https://i.imgur.com/nnM0H2i.png
رتبت خطوط الصرف الصحي اللي بالأخضر المتقطع ووصلتها بالنقاط اللي بتنزل رأسياً من كل دورتين مياه فوق بعض .. وهذا مسارها الأُفقي معلقة في سقف البيسمنت وأكيد لها نقاط فحص وتسليك وبدون منهولات نهائياً مع نظام منع الارتجاع أو ما يسمى بالرداد ضد الروائح والحشرات .. الخطوط الرفيعة 10 سم والخط اللي جاي من الملحق شبه رئيسي 15 سم لأنه يجمع المطبخ الخارجي وغرفة الخادمات .. والخط الأخير 20 سم وبيكون أقصرها لوجود نقطة الصرف الحكومي قرب الباب أو كذلك خزان الصرف الصحي قريب لو لم يتم عمل شبكة حكومية كالمعتاد
خطوط التغذية بالأزرق ومتجهة كذلك لفتحة بايب 10 سم نازل رأسياً من دورات المياه فوق ويتم ادخال البايبات الأصغر للمياه داخله وفتحها على الحمامات من خلال فتحة قابلة للفتح والاغلاق بقطعة خشب عليها سيراميك تركب بسيليكون أو بباب صغير خاص من الألمنيوم مثبت عليه بلاط .. يعني الفحص والاستبدال بيكون سهل وسريع .. حتى محابس المياه الخاصة بخطوط التغذية بتكون مخفية داخل هذه الفتحة
ارتفاع البيسمنت حسب حساباتي بيكون متدرج من متر و70 سم الى مترين و 20 حسب وجود بعض الجسور الساقطة .. كذلك الخرسانات تحت بتكون غير مشطبة وبدون بلاستر وحمايتها من الماء بتكون جهة الخارج مع عمل تصريف خارجي لأي مياه قريبة من الجدران كمياه المطر .. أما الحماية ضد مياه الري فوضحت مكان الشجر فوق والجدول المائي وهي بعيدة نسبياً عن الأساسات وسيعمل لها حماية جانبية ضد أي تسريب وحفر من الأساس لعمق مترين ودفان زراعي
الجدول المائي بيكون بعمق بحدود 30 سم ومتدرج وجوانبه زجاج شفاف تبين تحرك المياه داخله للي في البيت من كم جهة .. بيكون مفصول عن الزراعة حتى مياهه قد تكون ملونة لإعطاء شكل ومنظر مميز .. مع إضاءة تنعكس على الزجاج أثناء الليل .. وبيكون معزول جيداً من تحت مع بايب خاص أسفله لإعادة الماء لأعلى المجرى
https://i.imgur.com/1ePsAvM.png
البيسمنت بيطلع مليان خدمات خصوصاً لو حطينا توانكي اثنين في كل جهة لجمع مياه التكييف واستخدامها للزراعة بمضخة ري .. كذلك بنحتاج نقاط مياه للري للزراعة القريبة .. تبقى أماكن المكيفات ووسعت شوي في الممر الوسطي حتى يستوعب عدد منها مع باقي الأماكن وطبعاً بتكون معلقة على الحائط بحديد تثبيت وبتاخذ حيز من الممرات حيث لازم تكون بعيدة عن الحائط وعمقها حول 30 سم .. لنفترض خذت متر يبقى متر و 20 سم كافي للمرور وأي تانكي بيكون واطي وممكن يمرر من تحت هذه الوحدات
أكيد البنيان بيحتاج شغل تأسيس جيد ولا بيحتاج دفان ودك والخرسانات للأرضية لازم تكون انشائية ولو فيه حاجة لجدران استنادية أو أجزاء من جدران تدعم الصبيات فوق هذا ممكن وغير مقيد .. والله يوفقني في استشاري مدني جيد وما اتوقع اروح الا للربع القدامى .. اتحاد قطر للتخطيط أولهم ولو انه غالي
أرضية الجلسة الهابطة في الصالة فوق أكيد بتاخذ جزء من الممر الوسطي وما وضحت موقعها بس ما لها تأثير كبير .. بيكون نزولها 80 سم + سمك الأرضية نقول صافي بحدود متر نزول بتاخذ من ارتفاع صافي الممر بيستوي جهتها بحدود 1.25 متر لكن فيه مجال للمرور بيتبقى من الممر فوق متر ونص للمرور وما ننسى هذا البيسمنت محد بينزل فيه الا للصيانة أو التخزين لبعض الأغراض في المخزن القريب من المدخل أو تخزين مفتوح
نظام الإطفاء بيكون حسب مقترحات الدفاع المدني وممكن نستخدم البيسمنت كذلك .. لكن حق بيت انا أأيد الإنذار في كل حيز ومساحة ويكون مرتبط لو اشتغل يشتغل كله ومع بطارية لو انقطع الكهرب .. للمطابخ ناخذ احتياطات أكثر مثل كاشف تسريب الغاز والبلانكت الخاص وطفايات الحريق
وأتمنى الفائدة لكل متابع وبإذن الله بيكون هذا التصميم للنقاش ولتطويره كلما تقدمنا مرحلة ومراحل البناء إن شاء الله ستكون قريبة وسأُتابع معكم بالصور والتقارير الدائمة .. مع استعدادي لوقف هذا التصميم ومناقشة أي تصميم يرغب فيه أي أحد من الأعضاء للفائدة العامة .. شيء خاص ما اقدر اشتغل فيه بتركيز وجهد ووقت مثل عرض عام للجميع يستفيدوا