مراجعة التصاميم المعمارية وابداء الملاحظات عليها (محدث)

تفكر يا اخوي تفكير المهندس المصمم والمهندس المصمم ضعيف للغاية وهذا يخليك ضايع .. اللي ناقشته معاك وقلته كله ينفع وحسابه سهل ولا يؤثر على باقي المكونات .. بهذي الطريقة بيطلع تصميمك فيه ثغرات وايد وبتكتشفها مع بدايات البناء .. المجلس العربي يقدر المهندس الانشائي يضبط أعمدته على الحوائط المعمارية و 6 متر وحتى 8 و 10 بدون عمود شيء عادي بس يحتاج حسابات صحيحة ومهندس انشائي مقتدر

أحسن لك تعتمد خط واحد لواجهة البيت بدال الجزء الممتد .. ولو بتخلي الجزء اليمين شوي بارز ممكن لكن خل الكتلة اليسار غرفة النوم ومجلس البيسمنت والصالة كلها فوق بعض بعرض 6 متر أو 7 أو 5 أو اللي يريحك .. 6 مناسب لكل الفراغات والغرف .. لو بتنزل ل 5.5 بعد مناسب وبتقلل مساحة البناء شوي

الله يعينك اعذرك استشاريك ضعيف ويوجهك في اتجاه واحد وهو اللي وصل له

اقتباس:

---

المشاركة الأصلية كتبت بواسطة sweet qatar

شوف طال عمرك المكان بالوضع الحالي عبارة عن فرااااغ المساحة اكبر من انها تكون ممر .. تخيل انك داخل البيت وكل شي بعيد عنك !

بخصوص كثرة الجلسات طبعاً هي تعتمد على طريقة اهل البيت ومن وجهة نظري هالمكان افضل من غيره لوضع الجلسة لانه مكان حيوي وحرام يضيع اطول حائط زجاجي و واجهة البيت

وعشان تقرب لك الصورة .. تخيل المكان بدون الجلسة الاولى

http://cdn.trendir.com/wp-content/up...auto-18648.jpg


الي اشوفه في المخطط طاولة طعام وبعدها البانتري





بالنسبة لمكان اللفت الي اقترحته فوقه تكرمون حمامات ممكن تسوي لها شفت بدل الدريسنج

وبيكون الدرج مقسم لك المكان بدون ما يسكره في حال بغيت تحط جلسة او كرسيين استقبال

ممكن البوفيه تتخلا عنه وتفكر فيه عقب مع ان ودي انك ما تتخلا عن شي وتنفذ كل الافكار الي تعجبك في بيت العمر

---

نفس الصورة اختي سويت ممكن عملها في الجلسة الموجودة حالياً وهي مقابلة جنوب .. كذلك ممكن ربطها بالتجويف اللي يسارها وينفتح على البيسمنت بواجهة زجاج .. هذا التجويف أو المنور نقدر نزرع جزء منه أو نزرع نباتات متسلقة ونرفع الجدار فيكون عنصر جمالي مهم للجلسة من يسار والانفتاح على الحديقة من الأمام .. كذلك نقدر نسوي شلال بسيط أو شلال وزراعة في هذا التجويف .. يستفيد منه المجلس تحت والصالة فوق

الممر جدام اللفت والدرج هذا ممر وتحريكه ورا مسافة 40 أو 60 سم بنستفيد منه بس لو سكرنا الفتحة في الأول وسوينا صالة عائلية هناك .. مع المحافظة على الشكل العام والغرف مثل ما هي .. ما ننسى واجهة التجويف المقابلة للمصعد شرقية وحلاتها مفتوحة طول الوقت بدون ستائر .. تدخل الشمس لعمق البيت أول الصبح وحتى مكان غرفة الطعام المفتوحة يكون منور وحلو وعملي لحركة البيت وللمعيشة

لو ما حركنا الدرج بعد الممر جدامه واسع وفاصل منطقة الجلوس اللي تعتبر مجلس نساء ومنطقة الطعام والجلسة الخارجية عندنا معزولة بالكامل ولو انا مكان اخوي مستر بافكر في عمل حوض سباحة مغلق يطل على الحديقة وباوصله بالبيت حوله جلسة بسيطة وينفتح على الحديقة .. هو ضد فكرة حوض السباحة وانا ضد فكرة الجلسات الزايدة خصوصاً في دور واحد

هذي اقرب صورة شفتها للفلوربلان

ما اقصد الجلسة نفسها كثر ما اقصد التوزيع

في التصميم الداخلي نهتم بمدخل البيت من ناحية جمالية و وظيفية

ونحاول نحط فلو لحركة البيت و نتبع المنطق من لحظة دخولك للفيلا وعلى هالاساس نوزع

شخصياً ما يعجبني منظر اللفت حتى لو كان بانوراما .. تبقى اسلاكه تشوه المنظر لكن الاخير كل شي بيمشي بذوق المالك

حتى تتضح لنا الصورة نشوف الدور الأرضي وملاحظاتي عليه ذكرتها قبل واعيدها هنا

الدرج للبيسمنت كبير وايد على حساب زراعة وراه وممر خدمات .. لو نقارنه بدرج البيت اللي كل يوم نستعمله بنلاحظ الفرق .. بعدين اللي بيمر بين الأعمدة الضخمين اللي بيشوهون منظر البيت مؤكد بيمر أصلاً بمساحة ضيقة لدرج واسع .. مكان غرفة السايق في الزاوية الثانية أفضل ونصغرها شوي بحيث تكفي لشخصين .. نلاحظ امتداد سقف الأول الخط المنقط مغطي مساحة كبيرة وهذي اشكالية ثانية وسوء تصميم معماري .. الغرفة فوق وايد طويلة ولا نحتاج هالمتر زيادة .. والمترين فوق السيارات .. مثل ما قلت الثلاث غرف فوق بعض حوائطها أفضل وأرتب .. حتى لو نبي نحافظ على المتر زيادة نمد في الأرضي والبيسمنت

https://i.imgur.com/VVx2qx2.png

بالنسبة لمنطقة غرفة الطعام ترتيبها ممكن يكفي فوق 10 أشخاص على طاولتين وكراسي ملاصقين لحائط المطبخ والجلوس غالبيته مقابل الحديقة .. ومكان ما مكتوب تلفزيون نقدر نسوي واجهة داخلية زجاج تنفتح لمناولة الأكل ونقدر نشوف منها الحديقة .. نشوف درج مدخل المطبخ ملموم وحلو .. نقدر نسوي درج مدخل البيت قريب منه عرض 40 سم للعتبات مناسب وارتفاع 12 حلو ومريح وكفاية .. بياخذ حيز أقل وبنقدر نسوي ممر يودي لدرج البيسمنت ولخلف البيت ونسوي زراعة من جنبيه

قسم الدايننغ هذا يكفي حق دايننغ ملاصقة للحايط مال المطبخ ومواجهة الحديقة وبنفس الوقت حيز جلوس مواجه الحديقة والتلفزيون يفترض على عمود في الفاصل الزجاجي

نكمل مع البيسمنت .. يحتاج ترتيب وما دام سوينا فيه حمام انا اشوف نضمن مكان الحمام والبوفيه غرفة الخادمة وملحقاتها ونفتح لها درج خارجي يطلع قريب المطبخ .. نقدر نضيف مع اعادة ترتيب هذي المغاسل والحمام مع مخزن يمتد شوي في القسم المفتوح مع عمل منهول رئيسي جهة اليمين للصرف الصحي في التجويف المفتوح بعد تصغير هذا التجويف .. حتى متر ونص وكفاية للتجويف كعرض ولو متر وعشرين كافية للدرج والانارة والتهوئة وكذلك للمنهول في الأخير .. مستغرب من الكسرة اللي مسويها وبيكون فوقها دفان حتى يوسع الفراغ ل 3 متر

باب البيسمنت المفروض يكون وسطي تحت جسر مدخل المطبخ .. أقلها يكون مظلل ومحمي من المطر والشمس وبنفس الوقت يكون الدخول على فضاء مفتوح ويمشي الواحد سيدة يلف يسار يحصل باب اللفت ويحصل المجلس في وجهه .. والمجلس اقترح يكون له حائط وباب .. أقل شيء لتحضير البوفيه قبل تناول الوجبة .. المجلس العربي ما اشوف فيه داعي يكون بهذي الطريقة .. ممكن يكون من زاوية الستور لتحت وبدون البروز اليسار .. خط الواجهة يكون واحد .. 70 سم شبتسوي لنا؟

قسم الدرج ممكن بدايته تكون ملفوفة 90 درجة ويكون مسكر بحائط وباب من تحت .. الباب بيكون مقابل المغاسل .. حتى يعزل قسم البيسمنت عن الدور الأرضي .. طبعاً بعد ما نسوي غرفة الخدمات بتقل عندنا المساحة لحدود 6 في 12 وهي كافية لطاولات بوفيه دائرية أو كم طاولة طوال تكفي عدد كبير من المدعوين فوق 30 شخص بشكل مؤكد .. حتى مع وجود بعض الأعمدة اللي متأكد بيبالغون فيها عدد وحجم

لو شفنا اننا نحتاج مساحة أكبر نقدر نخلي غرفة الخادمات يمين وبابها على جهة الحوش ورا ونضيف لها هذي ال 77 سم وتستوي عندنا المساحة الفاضية 8 في 12.70 كحيز كامل للبوفيه وللأي فعالية ثانية بعد ترتيب طاولات البوفيه في احدى الزوايا .. المغاسل والحمام نقدر نخليهم مكان الباب الحالي في المخطط وقريب من المجلس العربي .. مقابل لهم طاولة البوفيه على جدار الدرج اللي بيفصله ويخفيه عن الحيز وبنفس الوقت بنقلل المساحة الزجاجية

بدل ما نفصل بين المجلسين بحائط نقدر نسوي بارتشن قزاز وباب بينهم .. وقت العزايم لو العدد كبير ممكن استغلال المجلسين بنفس الوقت وترتيب المجلس العربي سهل ومرن

المنور المكتوب عليه غاردن فوق هذا ممكن مثل ما ذكرت نسوي فيه شلال وحجر ينزل عليه الماي باضاءة مخفية وتجاويف هندسية أو حتى كتابة معينة مع شوية اصيصات زراعة متسلقة .. نقدر نرفعه وأصلاً نحتاج نرفعه من جهة الحوش بحائط حماية لحد يطيح فيه من الصغار بحدود متر ونص .. بيكون عندنا ارتفاع كامل بحدود 5 متر ينفع حق شلال حلو ومنظر مفتوح للمجلس وكذلك للصالة النسائية فوقه .. والمكان خاص ومنعزل ممكن يكون ستائرلس على طول كفوكال بوينت ثانوية ولو فيه مجال نزيد عرضه لمترين بنقدر نسوي حوض مائي صغير واتوقع ممكن في المتر ونص يبي لها دراسة .. حتى فوق في الدور الأرضي بعد الترخيص واتمام البناء يستحسن اغلاق منطقة الحديقة الوسطى والمنور ذيه عن قسم السايق والسيارات

https://i.imgur.com/F8DLw1P.png

اقتباس:

---

المشاركة الأصلية كتبت بواسطة sweet qatar

هذي اقرب صورة شفتها للفلوربلان

ما اقصد الجلسة نفسها كثر ما اقصد التوزيع

في التصميم الداخلي نهتم بمدخل البيت من ناحية جمالية و وظيفية

ونحاول نحط فلو لحركة البيت و نتبع المنطق من لحظة دخولك للفيلا وعلى هالاساس نوزع

شخصياً ما يعجبني منظر اللفت حتى لو كان بانوراما .. تبقى اسلاكه تشوه المنظر لكن الاخير كل شي بيمشي بذوق المالك

---

البانوراما الجزئي أسلاكه في الخلف والواجهات الثلاث قزاز .. يقدر يسوي بانوراما خاص تفصيل .. يقدر يخلي الواجهة بس قزاز والباقي جدران بتصميم حلو وكسرات .. الحلول كثيرة .. كذلك يقدر يسوي البانوراما المكشوف واللي وايراته تبين

يقدر يكسر منظر الحائط المصمت بنافورة صغيرة بعدها تشوفين الجلسة المطلة على الحديقة وراها جلسة الطعام المطلة كذلك

البيت كبير وفيه وايد امكانيات وجماليات وممكن تحسينات كثيرة ونتمنى نتابع قصته للنهاية نستفيد وان شاء الله نفيد .. والمالك فيه الخير والبركة ومن الشباب اللي حط مخططه وكله ثقة بأنه يحصل ردود تفيده وان شاء الله ردودنا تفيد

ان شالله بيستفيد

يا انه بيقتنع بالتغيير او بيتأكد من اختياره

بالنسبة للتوزيع في الدور الارضي

ممكن بدل ما نحرك اللفت نخليه على مستوى واحد مع الغرفة والدرج على اليمين

بمعنى نكبر الغرفة الي على اليمين ونخليها على حد الدرجة الاولى في المخطط الحالي وراها يجي درج بسيط و وراه اللفت وتكمل الطوفة بالخدمات*

من الاشيا الي ندمت عليها في البيت ان الحمامات صغيرة تقريبا نفس حجم الحمامات في المخطط هني

لو يرجع فيني الوقت اخلي الحمام 1.5 * طول الغرفة

أحلى و أرتب وأشرح

اقتباس:

---

المشاركة الأصلية كتبت بواسطة معماري قطري

حتى ما نلخبط خلونا نبدأ بالدور العلوي .. البنتهاوس

غرفة النوم الرئيسية بتكون تحت الارتفاع المزدوج .. اللي المفروض يكون بشوي زيادة لكن مب مزدوج بالكامل بما إن الارتفاعات كلها عالية والتكييف بيكون دكت سبلت الا البيسمنت سبلت .. وانا اقترح سبلت المعلق وسط السقف .. اللي يجي مربع

الغرفة تحت مثل ما تبين معانا طوالية مقسومة لمدخل قربه دورة المياه وغرفة ملابس انا اقترحت تكون بباب وتعتبر بأرفف داخلية بدون أبواب .. نقدر نخلي الارتفاع الزايد مكان السرير .. لنفترض يكون 5 متر وباقي الارتفاع 4 متر ينقصون حسب طبقات الجبس .. نقدر نحدد مكان السرير بحيث يكون مربع بالضبط ونسوي كورنيش يفصل الجزء المرتفع ويكون بلون فاتح كالأبيض والانارة مخفية فوق الكورنيش + إنارة جانبية حتى نفتك من السبوتات العالية ولو احتجناها بنحتاج رافعة لتبديلها وممكن نحتاج نستعملها في أوقات قليلة بتدوم فترة أطول .. الجزء التحتي ممكن نخليه بأي تشطيب ثاني وبلون أغمق .. حتى الجزء الممتد على مدخل السيارات ما نحتاجه لو حافظنا من البيسمنت على عرض 6 متر أو 5.5 أو حتى 5 متر لين فوق كافي للسرير وكافي للمجلس في البيسمنت وكافي لمجلس النساء في الدور الأرضي .. المالك يبغي عرض 6 متر ممكن بسهولة وبدون جزء اللمتد فوق السيارات ال Cantilever

يعني نصفي على ارتفاع عالي بمساحة 6 في 6 لمنطقة السرير .. يكون السرير مثل ما هو موضح في موقعه على الجنبين مترين من كل صوب وجدامه 4 أمتار وبعدين الجزء الفاصل .. وجلسة التلفزيون .. انا لو مكان المالك افصل منطقة السرير بالكامل بحائط لو بارتشن جبس أو خشب وبباب يفصل المنطقتين لهدوء منطقة السرير .. جلسة التلفزيون بتكون ملمومة والتلفزيون لو خذنا 6 متر للسرير بتبقى له من كرسي الجلوس حول 3.5 متر مسافة مناسبة جداً والمساحة تكفي لتسريحة ثانوية + اللي في غرفة الملابس أو ما تسمى كونسول صغير + ممكن مكتب جانبي .. طبعاً هذي المنطقة ارتفاعها أقل شوي ولو حبينا نسوي حركة حلوة نركب سكايلايت صغير فوق جلسة التلفزيون .. 1.5 في 1.5 كفاية

نحتاج باب للسطح اليسار مكان الدريشة ويستحسن الأبواب تكون زجاج لإنارة منطقة اللفت .. الآي تي روم فكرة حلوة وموقعها مسكت ولو قدر يخالف المالك بفتح دريشة تطل على الحديقة بتكون حلوة ولو ما قدر بعد يمشي الحال

الحمام فوق احس ما له داعي وعندنا غرفتين بحمامهم .. دورات المياه تحتاج ترتيب .. الاستشاري يكسر الخاطر ما عنده آيكون للشاور يكبر البديه ويحطه على إنه شاور وهذا دليل ضعف كبير فيه وبعد فترة سنة من التصميم .. ودي اقول من حتى الكل يحذر منه بس بيعتبر تشهير .. طبعاً اليسار بيكون شاور بدال البديه وممكن حتى متر في متر .. وهنا انصح بفصل الحمام عن غرفة الملابس .. نقدر نخلي بابين جنب بعض ونسوي غرفة الملابس مستقلة بالكامل وتنقفل أو بابها ببصمة أو رقم سري للحفاظ على الأغراض الشخصية من سرقات الخدم

اليمين نفس الشيء يحتاج اعادة ترتيب

---

السبلت المعلق المربع وسط السقف.. وين تقترحه؟ وشلون صيانته وخراباته؟ سعره نفس الدكت ولا السبلت العادي؟

انا للتوفير باسوي غرف اليهال والبن سبلت عادي

غرفة ملابس اتكون بأرفف داخلية بدون أبواب.. قلت لمهندس الديكور يسويلي جذي

تحديد مكان السرير مع الجبس والاضاءة.. هاي المفروض مهندس الديكور فاهم في هالشغل لانها نفس الحركه اللي ابيهه

إنارة جانبية حتى نفتك من السبوتات العالية ولو احتجناها بنحتاج رافعة لتبديلها.. عندي الارتفاع 5 متر.. 60 بيروح للدكت غير الجبس فباصفه على 4 وربع.. المفروض ماحتاج لرافعه

خلاص خذت بشورك لمجلس النساء والمجلس في البيزمنت على 5.40 متر.. بس الجزء الممتد هذا ديكور لواجهة البيت

بخصوص فصل منطقة السرير انا مسوي جذي وموجوده في الخريطه.. مخلي للجلسه والسرير نفس القياس 4.7 متر بس ممكن اعدله الى 3.8 للجلسه و 5.6 للسرير.. في المخطط الاولي كنت مركب سكايلايت بس قالوا لي عندك درايش من الجهتين فماله داعي للسكايلايت.. انت شرايك؟

باب زجاجي للسطح اليسار مكان الدريشة.. تمام

حمام السطح مخليه لجلسة ممكن اسويهه للسطح ومكان يركضون فيه اليهال

غرفة الملابس الرئيسية باسويلها كبت ببصمة أو رقم سري فيعتبر تجوري كبير

اقتباس:

---

المشاركة الأصلية كتبت بواسطة معماري قطري

نسيت منطقة المعيشة والصالة .. رايي البانتري كبير وايد .. وحطه الاستشاري في هالمكان لوجود الدكت اتوقع ويمشي وضعه بس نصغره .. يكفي خط واحد على الحائط والجلسة تكون زاوية وقرب الدريشة يكون عندنا التلفزيون

---

صح كلامك البانتري كبير وايد وبعدل مكان التلفزيون

اقتباس:

---

المشاركة الأصلية كتبت بواسطة معماري قطري

الدور الأول يستحسن الدرج بدال ما يكون مفتوح كذا أو ينحط حوله درابزين نسوي هنا حوله حائط بسمك 10 سم وعندنا الثلاث ابواب للغرف في مكان البانتري والدي بي المكتوب الحين نقدر نسوي جدار فاصل وقوس يودي لها ونفصل لنا مخزن صغير أقل شيء لمواد التنظيف .. حتى مدخل الغرفة الرئيسية واللي جنبها ممكن ينعمل بقوس 1 متر أو 1.2 بالكثير يكون أرتب

لو سوينا التقسيمة اللي ذكرتها لغرفة النوم الرئيسية نقدر كذلك نسوي سكايلايت ثاني فوق الحمام لو نحب النور الطبيعي والحمام مساحته كبيرة والمفروض يترتب صح .. الترتيب ذيه كارثي وما يسويه مهندس والبديه ذيه اللي مكبره وحاطه انه حوض فضيحة هندسية .. يبي له شغل

بالنسبة للعتبات عديتهم طلعوا 26 يعطونا ارتفاع 3.9 على ارتفاع 15 سم للعتبة .. أشوفه مناسب نشيل منه 25 سم لصبية السقف والجبس والدكتات نصفي على 3.2 وحولها + عندنا ارتفاع أكبر لمنطقة السرير أشوفه مناسب .. الدور الأرضي ممكن نرفعه أكثر بزيادة العتبات وجايين له إن شاء الله

---

تصميم الدرج بيكون بطريقة Straight cantilever stairs اسلوب حديث ويكون طاير ومفتوح

المخزن الصغير باسويه في البنت هاوس جدام مدخل الجناح.. انا محتاج بانتري صغير حق ثلاجة وجهاز قهوه في الطابق الاول

الحمام الرئيسي مهندس الديكور قال بيرتبه لي.. بس حركة السكايلايت حلوه باسويهه

الدور الارضي رفعته اعتبتين وصار 5.05 اتشيل منه 60 للدكت من غير الجبس يصفالي حول 4.30 .. زين ولا ارفعه زياده؟ ابغي اتكون صيانته سهله بدون سقالات

اقتباس:

---

المشاركة الأصلية كتبت بواسطة sweet qatar

الشكر لك اخوي مستر على سعة صدرك

الفكرة والتصميم والتنفيذ روووووعه ماشالله .. فعلاً الكويتين مبدعين ويستغلون المساحات صح
التصميم واضح والتوزيع مرتب و الارض مدروسة .. وان شالله نشوف مثلهم في قطر
والله هل قطر عندهم ذوق لكن البلا من الدكاكين على قولة بوعبدالله ،

رأيي الأول تشوف مكتب تصميم ثاني لنفس الكونسبت و تحط له لستة طلباتك
لانك وايد عدلت في التصميم واذا كثرت التعديلات معناه التصميم غير مناسب

---

انتم اللي مشكورين انكم اتساعدوني وماخذين من وقتكم

الصراحه تعبت وانا اعدل ورحت لمكتبين عدلوا لي التصميم لين ماوصلت لهلمرحله.. مابي اروح بعد لغيرهم واتاخر لان ابي ابدي البنيان

امس شفت فيلا في اللؤلؤة توهه خالصه ما شاء الله من كثر ماعجبتني بغيت اشقح السور بس الحارس كان موجود.. خذت منه اسم المكتب ويمكن امرهم اليوم

اقتباس:

---

المشاركة الأصلية كتبت بواسطة sweet qatar

شوف طال عمرك المكان بالوضع الحالي عبارة عن فرااااغ المساحة اكبر من انها تكون ممر .. تخيل انك داخل البيت وكل شي بعيد عنك !

بخصوص كثرة الجلسات طبعاً هي تعتمد على طريقة اهل البيت ومن وجهة نظري هالمكان افضل من غيره لوضع الجلسة لانه مكان حيوي وحرام يضيع اطول حائط زجاجي و واجهة البيت

بالنسبة لمكان اللفت الي اقترحته فوقه تكرمون حمامات ممكن تسوي لها شفت بدل الدريسنج

وبيكون الدرج مقسم لك المكان بدون ما يسكره في حال بغيت تحط جلسة او كرسيين استقبال

ممكن البوفيه تتخلا عنه وتفكر فيه عقب مع ان ودي انك ما تتخلا عن شي وتنفذ كل الافكار الي تعجبك في بيت العمر

---

صحيح احلى مكان عبارة عن ممر كبير.. ماشفتيه قبل التعديل الحالي كان عباره عن خرابه

كتبت ملاحظة اللفت.. باشوف موضوعه

اقتباس:

---

المشاركة الأصلية كتبت بواسطة معماري قطري

المجلس العربي يقدر المهندس الانشائي يضبط أعمدته على الحوائط المعمارية و 6 متر وحتى 8 و 10 بدون عمود شيء عادي بس يحتاج حسابات صحيحة ومهندس انشائي مقتدر

أحسن لك تعتمد خط واحد لواجهة البيت بدال الجزء الممتد .. ولو بتخلي الجزء اليمين شوي بارز ممكن لكن خل الكتلة اليسار غرفة النوم ومجلس البيسمنت والصالة كلها فوق بعض بعرض 6 متر أو 7 أو 5 أو اللي يريحك .. 6 مناسب لكل الفراغات والغرف .. لو بتنزل ل 5.5 بعد مناسب وبتقلل مساحة البناء شوي

---

اوكي سجلت ملاحظه المجلس العربي

اقتباس:

---

المشاركة الأصلية كتبت بواسطة معماري قطري

نفس الصورة اختي سويت ممكن عملها في الجلسة الموجودة حالياً وهي مقابلة جنوب .. كذلك ممكن ربطها بالتجويف اللي يسارها وينفتح على البيسمنت بواجهة زجاج .. هذا التجويف أو المنور نقدر نزرع جزء منه أو نزرع نباتات متسلقة ونرفع الجدار فيكون عنصر جمالي مهم للجلسة من يسار والانفتاح على الحديقة من الأمام .. كذلك نقدر نسوي شلال بسيط أو شلال وزراعة في هذا التجويف .. يستفيد منه المجلس تحت والصالة فوق

الممر جدام اللفت والدرج هذا ممر وتحريكه ورا مسافة 40 أو 60 سم بنستفيد منه بس لو سكرنا الفتحة في الأول وسوينا صالة عائلية هناك .. مع المحافظة على الشكل العام والغرف مثل ما هي .. ما ننسى واجهة التجويف المقابلة للمصعد شرقية وحلاتها مفتوحة طول الوقت بدون ستائر .. تدخل الشمس لعمق البيت أول الصبح وحتى مكان غرفة الطعام المفتوحة يكون منور وحلو وعملي لحركة البيت وللمعيشة

لو ما حركنا الدرج بعد الممر جدامه واسع وفاصل منطقة الجلوس اللي تعتبر مجلس نساء ومنطقة الطعام والجلسة الخارجية عندنا معزولة بالكامل ولو انا مكان اخوي مستر بافكر في عمل حوض سباحة مغلق يطل على الحديقة وباوصله بالبيت حوله جلسة بسيطة وينفتح على الحديقة .. هو ضد فكرة حوض السباحة وانا ضد فكرة الجلسات الزايدة خصوصاً في دور واحد

---

حركة الشلال حلوه من الارضي للبيزمنت.. باسويهه

فكرنا مع المره وقلنا مانبي انسوي صالة عائلية ثانية في الطابق الاول.. بنكتفي بالارضي عن تجمعنا كلنا

حوض السباحه مثل ماقلت لك اخاف منه ومابيه.. هو اصلا بنستعمله مرتين في السنه فمايسوه

اقتباس:

---

المشاركة الأصلية كتبت بواسطة sweet qatar

شخصياً ما يعجبني منظر اللفت حتى لو كان بانوراما .. تبقى اسلاكه تشوه المنظر لكن الاخير كل شي بيمشي بذوق المالك

---

بنشوف سالفة مكان اللفت

اقتباس:

---

المشاركة الأصلية كتبت بواسطة معماري قطري

حتى تتضح لنا الصورة نشوف الدور الأرضي وملاحظاتي عليه ذكرتها قبل واعيدها هنا

الدرج للبيسمنت كبير وايد على حساب زراعة وراه وممر خدمات .. لو نقارنه بدرج البيت اللي كل يوم نستعمله بنلاحظ الفرق .. بعدين اللي بيمر بين الأعمدة الضخمين اللي بيشوهون منظر البيت مؤكد بيمر أصلاً بمساحة ضيقة لدرج واسع .. مكان غرفة السايق في الزاوية الثانية أفضل ونصغرها شوي بحيث تكفي لشخصين .. نلاحظ امتداد سقف الأول الخط المنقط مغطي مساحة كبيرة وهذي اشكالية ثانية وسوء تصميم معماري .. الغرفة فوق وايد طويلة ولا نحتاج هالمتر زيادة .. والمترين فوق السيارات .. مثل ما قلت الثلاث غرف فوق بعض حوائطها أفضل وأرتب .. حتى لو نبي نحافظ على المتر زيادة نمد في الأرضي والبيسمنت

https://i.imgur.com/VVx2qx2.png

---

الممر بين الأعمدة الضخمين اصغر من درج السرداب.. نقطه حلوه.. باشوف موضوعها

مكان غرفة السايق في الزاوية الثانية ونصغرها شوي.. سجلت هالملاحظه

اقتباس:

---

المشاركة الأصلية كتبت بواسطة معماري قطري

بالنسبة لمنطقة غرفة الطعام ترتيبها ممكن يكفي فوق 10 أشخاص على طاولتين وكراسي ملاصقين لحائط المطبخ والجلوس غالبيته مقابل الحديقة .. ومكان ما مكتوب تلفزيون نقدر نسوي واجهة داخلية زجاج تنفتح لمناولة الأكل ونقدر نشوف منها الحديقة .. نشوف درج مدخل المطبخ ملموم وحلو .. نقدر نسوي درج مدخل البيت قريب منه عرض 40 سم للعتبات مناسب وارتفاع 12 حلو ومريح وكفاية .. بياخذ حيز أقل وبنقدر نسوي ممر يودي لدرج البيسمنت ولخلف البيت ونسوي زراعة من جنبيه

قسم الدايننغ هذا يكفي حق دايننغ ملاصقة للحايط مال المطبخ ومواجهة الحديقة وبنفس الوقت حيز جلوس مواجه الحديقة والتلفزيون يفترض على عمود في الفاصل الزجاجي

---

ترتيب غرفة الطعام سجلته

باشوف باقي الردود بعدين

لحد الحين جمعت ملاحظات وايد والله يعين.. فيكم الخير والبركه

سؤال.. اذا حصلت موافقة على الخريطة وابي اسوي عليها تعديلات بسيطه.. شلون بتكون سالفتها مع البلدية؟