نصائح عامة في التعاقد الهندسي للبناء والاستشارات

الحل في رايي لو شفت الاستشاري متراخي قول له باشتكي عليك عند لجنة المهندسين واخذ صور للموقع وللي وصل له الشغل وقدم شكوى على الاستشاري إنه مجامل للمقاول وتطالب بحقك منه .. هشكل بينقرص وبيعرف إنك بتطالب بحقك وعارف الطرق القانونية .. بعدين اطلب تعهد من الاستشاري والمقاول إن بامكانه يخلص الشغل في الفترة المحددة وبدرجة مقبولة واقرار بأنه ما فيه مبرر للتأخير اللي حصل ولا فيه داعي لتمديد المدة

حاول تاخذ كل شيء مكتوب من المقاول وموقع بالعلم من الاستشاري وحتى خذ راي الاستشاري مكتوب وتابع بصور وفواتير وملف كامل تجيبه معاك يشوفه الاستشاري والمقاول يعرفون إن شغلك مكاتبات وتوثيق وتوقيع والمفروض التوقيع معاه ختم الشركة والمكتب ومعتمد في ترخيص الشركة والمكتب من جهات الدولة .. هشكل بتربطهم عدل وبيشتغلون صح

بعدين نصيحة أخوية ما فيه مشروع في قطر الا نادر يخلص في الفترة المحددة ولازم نتغاضى عن بعض التأخير ولا نحاسب عليه ونحاول نكسب المقاول والاستشاري .. أكيد بنحتاج أي شغلة اضافية والاثنين لين حسوا بطيب المعاملة يقابلونه بطيب أكبر ويجتهدون بس مهم تخلي كل احتياطاتك مكتوبة وموقعة .. حتى محضر أي اجتماع اطلب ينكتب رسمي بواسطة الاستشاري ولو ينطبع أفضل ويتوقع من كل الأطراف ونسخة لكل طرف وخل كل اجتماعاتك بحضور الاستشاري وممثل المقاول

من خلال نقاشنا في قروب بناء وتصميم وصلتني معلومة غايبة عني أو ما انتبهت لقانونيتها وهي إننا ناخذ شيك ضمان بالدفعة الأولى غير مؤرخ وهذا يعتبر تزوير في حال كتبنا تاريخ وطعن فيه كاتب الشيك .. وبعدين تتحول القضية ضدنا .. لازم نذكر بنود واضحة للضمانات للصيانة والدفعة المقدمة في العقد

مثل نقدر ندمج شيك الضمان ونربطه بضمان الصيانة بعد بدال الدفعة المحتجزة اللي تكلمت عنها خلال الموضوع .. هشكل تكون نهاية ضمان الصيانة اللي نحدده إحنا هو تاريخ الشيك اللي يحدده المقاول ويكتبه .. مثل عقدنا المفروض ينتهي بعد سنتين وغرامات تأخير متفق عليها لكل يوم ولها آلية لتحديدها وكتب من الإستشاري أو إلغائها في حال التأخير صار لظروف بعد محددة .. ليش ما نحط مثلاً فترة الضمان هي سنتين بعد التاريخ المتوقع لنهاية البناء ( نحط فترة إضافية ) وعلى أساسها ينكتب تاريخ الشيك ونكون متأكدين إن المسؤول عن توقيع الشركة في البنك هو المخول بالتوقيع .. أو يكون الشيك مضمون بمعرفة البنك وبالتزام الشركة في حالة بيسحب مستلم الشيك في التاريخ المحدد .. لأن ممكن الشركة تسكر أو يتغير المخول بالتوقيع وندخل في سالفة قانونية ثانية

بس القصد سواء مبلغ مقتطع وممسوك عند المالك لضمان الصيانة أو شيك مسؤولة عنه الشركة وموثق وفي هالحالة بيكون بدون قيمة فعلية ما فيه أموال محتجزة ولا تكاليف مالية على الشركة بعكس مبلغ ضمان يكون موجود في البنك وشيك مسجل يقدر يسحبه المالك في أي وقت ذاك يبقى مبلغ الشيك محجوز طول فترة الشغل وهذا ما يحبونه الشركات ومزعج لهم ومعاهم حق .. بهالطريقة نستوي وسط وممكن أو في الغالب المقاول وراه شيء يلزمه بإتمام العمل بجودة متفق عليها

نصائحي السابقة كلها في حالة التعاقد الكامل مع مقاول يمسك الموقع ويكون مسؤول عنه .. دراستي للسوق حالياً وإدارتي لمشروع بيت ولدي خلتني أنسى كل هالمباديء مع إني مشيت فيها في البداية وسويت حساب كميات ( بالمصري ) حسب الإستشاري أي كلام ولا يسوى وواضح نسخ لا وغالب بنوده ضدي

المهم اللي صار طريقة بناء ثانية إحنا فيها المقاول والمنسق والعقود كلها مبسطة ومحددة لكل شغلة باحاول هنا أركز على مواصفات الشغلة كل شغلة بنفسها والمفاوضات اللي مرينا فيها وسعر كل بند بدون صور وتفاصيل مزعجة لكن التفاصيل موجودة في موضوع مراجعة التصاميم وتتخللها مراجعات ثانية لبعض الأعضاء

بس علشان ما أنسى أحدد هنا البند الأول كان التسوير وبناء غرفة حارس مؤقتة .. التسوير خذنا شينكو مستعمل الحبة بعشر ريالات وتغطي متر طولي والجديد كانت الحبة ب 30 ريال .. إحتجنا حول 204 أمتار طولية لأن التحويط إمتد لأرض الجار بعد الإستئذان منه للتخزين فيها للدفان وغيره كلف حول 3000 ريال خذنا شوية خشب بعد للتثبيت ولو خذنا حديد أفضل لأنه أقوى وأثبت الخشب يفك وقت الهواء القوي

باكمل مع الباقي شوي شوي طبعاً خذنا طابوق وحول 20 متر مربع شينكو زود حق غرفة الحارس .. كلف التسوير حول 5000 ريال وتم بواسطة النجار اللي هو بعد حداد ويتابع الصب واتفاقنا معاه ب 85000 للمشروع كله والمواد علينا هو عليه يجيب العمال ويصب الخرسانة ويشتغل التخشيب ويركب الجيكات وبدفعات حسب تطور الشغل عطناه دفعة مبدئية بسيطة ناسي كم بس تحت ال 10000 وصراحة مؤدي اللي عليه بأفضل ما يكون

بنروح بعدين لمرحلة الحفر

معليش يمكن صغائر الأمور أنساها وللأسف ما عندي خبرة بالجداول أسوي جرد كميات ومواصفات لكن سوينا شغل مساحة لتحديد الزوايا اللي كانت أصلاً كلها محددة الا وحدة محددة برصيف أشغال .. حددنا موقع البناء بالضبط وأعتقد إننا بدينا بالحفر قبل المساح وطبعاً حفرنا زود عن حدود البنيان وكان الحفر متصل بين مباني كثيرة لسهولة التمديدات بعدين

الحفر كلف 19000 وكنا محصلين تسعير ب 38000 ومن واحد علاقتنا معاه زينة ويبني لنا وشغل صيانة دوم نسوي معاه حتى في هذا البنيان نلجأ له كثير في أمور محددة + الدك الدكاكة 8 طن كلفت أجرة يوم مع النقل 800 ريال + فحص قوة التربة وطلعت 3 أضعاف المطلوب في التصميم يعني شوي فوق 300% وهذي من المبالغات الواضحة عند استشاريينا .. الإستشارات للتصميم كلفت 37000 وتم دفع دفعة مقدمة للتكييف 46000 تقريباً للآن دفعنا ما يقارب 103800 ريال وفيه بعد دفعة الفحص أعتقد 1000 ريال فحص ضغط الأرض + قيمة الشينكو والطابوق لعمل غرفة الحارس بشكل تقريبي 6000 ريال بنكون وصلنا 110800 أو 111000

طبعاً فيه شرح ممل بدأً من الصفحة 310 في موضوع مراجعة المخططات وانا اختصر منه بدون الصور والفيديوهات

حديد الأساسات والحديد كله ايبوكسي بيكون إن شاء الله للأساسات كلف حول 40000 شامل التركيب في الموقع من شركة التيسير يستوي السعر عندنا 151000 .. الدنكر للماء نطلبه بالتلفون يكلف 200 ريال حق 3500 قلن هذا كم مرة نطلبه + عندنا دفعة أخشاب كلفت 30000 جديدة وهنا التكلفة وصلت 181000 + صبة النظافة كلفت 12000 والإجمالي لهذي المرحلة 193000 + عزل القواعد من تحت فوق صبة النظافة كلف 3000 ريال وبعدين سويناه بالرش ونوعية افضل شريناها مباشرة من المصنع ولمساحات أكبر كلف أقل عن طريق النجار اللي شغال معانا .. الإجمالي للحين حول 196000

خرسانة الأساسات كلفت 37500 وتطلع الإجمالية 233500 + فيه دفعات طابوق ما احسبها بدقة بعضها 3000 ريال وحولها .. باتابع مع باقي الجرد ولا أظن أوصل لرقم قريب من الحقيقي 100% ممكن 90% بس أتوقع بندخل على خانة ال 400000 ما أكملناها بس تعدينا ال 300000 متأكد وكنت ظالم المقاول في سالفة ال 300000 دفعة مقدمة وهو طالب 350000 بالأصح وبعد الدفان 150000 وإحنا وصلنا لمرحلة الدفان وصب الخرسانة الأرضية مع شغل كثير في السور واحنا تونا 300000 وبجودة بناء مستحيل أقدر أحددها للمقاول بدقة بشكل مسبق ويسويها لي مثل ما ابغي بدون ما يضرب السعر فوق

القصد هنا التوفير حول 200000 لهذي المرحلة ولا ننسى دفعات وايد كنا بندفعها فوق ال 500000 اللي للمقاول مثل دفعة تأسيس الفيتري والبايبات أعتقد 13000 بس لازم أتأكد منها وباضيفها للحسبة ودفعة 46000 مالت التكييف ودفعة الإستشاري المصمم دخلتها كذلك وهذي بعد تنضاف على ال 500000 اللي كان بياخذها المقاول

لله الحمد راضي كل الرضا عن هذا المسار وهذا الإختيار