مراجعة التصاميم المعمارية وابداء الملاحظات عليها (محدث)

الدور الأول صارت فيه تعديلات كثيرة واعتمد عليه دور البنتهاوس

الصالة العلوية لها انفتاح على الصالة اللي تحت والنوافذ بتكون بارتفاع عالي بدون قواطع في الوسط .. الفتحة يمكن ما تبين واضحة بس بتكون بعرض مترين .. مدخل الغرفة الرئيسية اقترحت درج سيدة سهل ومريح وتحته عندنا مكان للتخزين أو لبانتري مع إني اشوف البانتري قريب جداً وضرورة تواجد العائلة مجتمعة أفضل .. حتى الصالة اللي فوق لو كانت مكتب وأصغر معقولة وصلنا لأكثر من 70% لمساحة البنتهاوس .. مجرد رأي ويمكن اكون مخطيء فيه والملاك أكيد أعرف بإحتياجهم

عندنا مشكلة المرور لأي عامل للسطح حيث إنه لازم يدخل غرفة النوم الرئيسية أو أقلها يدخل بدايتها ويركب للمخرج اللي يودي للسطح .. هذي ممكن حلها بفصل غرفة الدرج فصل كامل عن الغرفة الرئيسية بباب .. أو اننا نواصل الدرج الرئيسي لسقف البنتهاوس ومنها ممكن ينزل لبقية السقف .. فيه حل آخر وهو عمل درج حديد أو ألمنيوم يركب وقت الحاجة وفتحة عبارة عن منور زجاجي لمنطقة الدرج تنفتح ويمكن للعامل يركب للسطح وهذي تكون في دور البنتهاوس

حل أخير ممكن نسوي درج حلزوني خارجي ويتغطى باسمنت بورد بيكون موقع الزاوية اليسرى السفلية في الرسم مناسب له على جنب بحيث ما يخرب الواجهة

https://i.imgur.com/pv7upP0.png

دور البنتهاوس سويت له مقترح بصالة كبيرة طلع 74% من مساحة الأول وهذا مقترح يطلع 69% لو ما ضمنا لها مساحة غرفة الخزان وممكن يتغاضون عنها المساحة تطلع 71.7% وممكن تتصغر

https://i.imgur.com/bFadILn.png

استوى عندنا البنتهاوس شقة من ثلاث غرف وصالتين صالة تابعة لغرفة النوم الرئيسية وممكن تكون صالة ومكتب وصالة تابعة للشقة

عرض الدرج الحلزوني 1.5 متر بس متعب لكن ينفع مثل ما قلت في الزاوية وأحسن نسويه مغطى باسمنت بورد .. حق بيتي مسويه مكشوف بس تفاهمت مع جاري واستئذنته قبل

اقتباس:

---

المشاركة الأصلية كتبت بواسطة معماري قطري

دور البنتهاوس سويت له مقترح بصالة كبيرة طلع 74% من مساحة الأول وهذا مقترح يطلع 69% لو ما ضمنا لها مساحة غرفة الخزان وممكن يتغاضون عنها المساحة تطلع 71.7% وممكن تتصغر

https://i.imgur.com/bFadILn.png

---

راحت عني فكرة عمل باب مكان دريشة الصالة اليمنى ويفضل العلوية أو في الزاوية قرب الدريشة الوحيدة لأن ذيك الجهة شمال وهواء الشمال قوي .. هذي بتكون مخرج للسطح ومنه ممكن الركوب لسقف البنتهاوس

شيء أخير ما دام جهزت أساس المخطط بشكل كامل باحط عليه تعديلات خاصة اقتصادية نوعاً ما وباصغر في المساحات فقط للنقاش لا لأي شيء .. أدري الملاك لهم قناعات بالتكبير لكن نعتبره نموذج ممكن نعدل عليه

كذلك في البنتهاوس ما عندنا اتجاه للأعلى للدرج الرئيسي وبينتهي من الجهة اليسار اللي ممكن النزول منها .. يبقى لنا الجزء يمين المصعد ينفع يكون مخزن صغير .. بيكون عندنا صافي ارتفاع تحته للدرج بحدود ال 1.9 متر أو 1.8

بعد الفجر في هدوء اشتغلت على التصميم من ناحية تغيير أكبر وتصغير بس بدون ما أاثر على الشكل العام والغرف .. كسبت 40 سم في العرض يمين واستوى عندي الحوش أوسع 3.1 ونفس الشيء جهة اليسار وغيرت المدخل بدال مقوس لخطوط مستقيمة .. فكرتي اسوي نموذج أكثر حداثة أواللي يسمونه مودرن وبنفس الوقت أرتب وأصغر شوي .. كبرت الحوائط الخارجية ل 40 سم بحيث تكون معزولة ومن غلافين والنوافذ تبين عميقة وبسهولة نسوي عليها شتر يعطينا عزل اضافي ويمنع النور 100% .. بديت احط قناعاتي بتجرد وكأنني المالك .. الكهرب ما ادري شجاه طفا واشتغل مرتين وشكل الكمبيوتر الثاني رجع خبط والله يعين ما يكون ضاع الشغل

صغرت شوي 40 سم من يمين و 40 سم من يسار وتوسع الحوش شوي جهة اليمين متدرج وأقل ارتداد 3.3 متر واستوت سعة للحديقة ولخط الصرف الصحي وللدرج النازل للبيسمنت وقللت عرضه ل 80 سم وهذا المقترح مع حوض السباحة وسويت مقترح ثاني مع حديقة متدرجة وبدون حوض سباحة .. غيرت المدخل لخط مستقيم وبعد مب مقتنع بالممر الواصل له والرامب بارتبه أحسن المرة الجاية

https://i.imgur.com/C1LGIv4.png

المخطط الثاني لو التخطيط اعترضوا على حفر الحوش بالكامل من ورا وطلبوا ارتداد مثل ما قال المهندس اللي تتابع معاه اختي ام صالح مع إني اشك في هذا .. بيكون الحوش النازل في مترين و 20 سم بين الملحق والبيسمنت والباقي مرتفع بتدرج كل درجة 50 سم عن الثانية .. وممكن نسوي شلال ينزل من فوق وجدول يمر بين الشجر وينزل بتدرج لين يوصل أسفل آخر درجة أو عتبة زراعية .. للباربيكيو نسحب عربة الباربيكيو من صوب الدرج تحته أو مقابله فيه فراغ كفاية ونقدر نسوي مخزن صغير لو نبغي ويكون الشواء في الساحة جدام البيسمنت

https://i.imgur.com/0NaoGAL.png

باركز على كل حيز وغرفة بصورة مكبرة

اعتقد لو احافظ على اتجاه 45 درجة لليوان جدام الباب بيطلع وايد أحلى وباوسع شوي بحيث يبدأ ممر الدخول من الحوش يمين شوي يعني بيتحرك الباب الصغير يمين وبتتحرك سيارة يسار

نبدأ بحيز المجلس الخارجي حق بو صالح وربعه

أشوف غرفة السايق ومحتوياتها مترتبة صح .. ممكن نخلي باب دورة المياه ينفتح على اللوبي أنظف للغرفة .. وممكن نسكر فتحة اللوبي المطلة على ليوان المجلس بباب .. يستوون من يشغلون الغرفة يطلعون من باب البانتري للحوش وللسيارات والمجلس يستوي مستقل .. ذكرت قبل إن ممكن كهرماء يطلبون غرفة كهرباء وأفضل مكان لها في ليوان المجلس بتاخذ جزء من الليون أسفل المغاسل .. نقسم عرض الليوان 1.6 على اثنين تستوي الغرفة بحدود 70 سم والممر 80 سم بشرط نحط حائط الغرفة 10 سم حتى نوفر مساحة .. كهرماء طماعين يطلبون غرفة أكبر بس 70 في متر كفاية ولو خليناها بعرض المغاسل 1.6 ولو ركبنا طابوق 10 سم بنحصل صافي مساحة 1.8 في 0.7 متر للغرفة وبابها يكون على الممر وظهرها على سور البيت

المجلس وهو الأهم .. ممكن نسوي جداره الخلفي 40 سم ونسوي فيه رواشن فوق ظهر الكراسي طبعاً نوسع جهة الحوش ومن فوق قرب مستوى الجبس ممكن نسوي صفين قلاس بلوكس أو طوب زجاجي حتى يجينا نور طبيعي من جهة الغرب أو نسوي منور سقفي لو حبينا أو قبة

https://i.imgur.com/QE8oiRG.png