من ورا ومكان الزراعة يحتاج تفاصيل كثيرة حسب قرارنا شنسوي لو شلال وجدول هنا موضح عرض حوض الشلال 1.2 وعرض بداية الجدول المتدرج 0.8 وعرض الجدول اللي المفروض يكون متعرج 0.4 وحولها حسب التعرج أو ينعمل بالحجر والباقي أرضية حجرية وجوانب زجاجية
يحتاج شغل تمديدات من التأسيس وأكيد كهربة ومكان لرجوع الماي وللمضخة وما ننسى الري للزراعة
https://i.imgur.com/B9AXvv3.png
حطيت رواشن إضافية للمجلس وغرفة الطعام على الجدار الخارجي اليسار لكن ما بينت الظاهر اخترت لون رصاصي فاتح .. والمقاس للعرض للغرفتين 5.9 بعد ما صغرنا مكتوب 6.5 فوق والصحيح 5.9
https://i.imgur.com/TZ2d0Sh.png
هنا بينت الكسرات وهي مقابلة كل فتحة باب وفوق السرير .. ممكن نخلي فيها إنارة خفيفة مخفية أو إنارة مزاجية بألوان ( Mood Lighting ) والجلسة تحت مرتفعة 15 سم ونقدر نزيد الارتفاع لو حبينا أو نسوي عتبتين كل عتبة 12 سم يكونون مريحين ونوصل لإرتفاع 24 سم
https://i.imgur.com/CsGRvL9.png
واتمنى لكم صياماً مقبولاً
ملاحظ لو حركنا العمود اللي في الطبيلة خليناه في زاوية الممر لداخل البيت أفضل ويستوون عندنا عمودين وسطيين ممكن نعرضهم لطابوقة 40 في 20 سم ويشكلون قوس مميز للمدخل .. والعمود اليسار ممكن نلغيه ونوسع شوي موقف السيارة اللي بروحها داخل البيت بحيث يكون دخولها سهل والنزول منها سهلاقتباس:
المشاركة الأصلية كتبت بواسطة معماري قطري
ما يحزنني في استشاريينا عدم اهتمامهم بالتصميم والشغل اللي شفتوه من المكتب وممكن اعيده نتيجة متابعة مدتها سنة والمفروض خلال هذي السنة انحطت أفكار كثيرة ووصلنا لقرار بخصوصها وبدينا نحط تفاصيل أكثر وأكثر
قطاع يوضح شكل المجلس من جهة البيت مع الطبيلة وواجهاتها الخرسانية وبعض أحواض الزراعة .. ما وضحت الأحواض جهة المجلس حتى يبين تشكيل الحائط وباب البانتري ودريشة غرفة السايق .. وضحت صفين قلاس بلوكس ( طوب زجاجي ) بمقاس 30 في 30 للوحدة وفي مقاسات مختلفة وألوان كذلك لازم نحدد اختيارنا ونشتري مسبقاً حتى نضمن العدد والمقاس اللي بيركب ونسوي الفتحات على أساسها
https://i.imgur.com/B7lrppM.png
هذي لجهة مواقف السيارات المظللة .. يبين لنا مكان الباب لدخول الزوار ومكان وقوف السيارات ولكل سيارة باب منزلق لأعلى ما وضحتهم بس عرض الباب 2.8 متر محدد حسب المخطط الأرضي .. أقصى اليسار حائط البيت بارتفاع 3 متر وتجي المظلة واجهتها خرسانية ممكن نسوي فيها ديكور .. شوي أنزل من السور وارتفاع الجسر 2 متر يكفي لدخول أي سيارة عادية للموقف المفتوح اللي بيكون جدام اللمبرغيني جهة داخل البيت .. الممر عريض ومرتفع 10 سم عن باقي الحديقة وتصريف السطح ينزل ببايبات مخفية في الغلاف الخارجي من الجدار وينزل مخفي لتحت الارض قليل ويتصل ببايب عرضي ينزل ويمر لطرف الحائط الخارجي يصب تصريف السطح للخارج .. أي أمطار سطحية تنزل على الحوش تتصرف للزراعة اللي نازلة نسبياً
في الممر نقدر نرتب اضاءة حديقة خاصة بالممر وللزراعة نقدر كذلك ونقدر نحط انارة هادئة عامة تنور جوانب الممرات كلها جهة الزراعة وتكون شريطية وشبه مخفية
https://i.imgur.com/BgH0Iww.png
عندنا النخلة أو الواشنطينا لازم تتحرك لقرب حافة الممر لأن تحتها مكان خزان الصرف الصحي واحتمال ما يحتاجون له فتكون المنطقة كلها للزراعة
الجزء اليمين جزء المجلس الممر مثل ما هو موضح في توزيع الحوش يوصل لباب البانتري الواضح ومنه يدخل السائق لغرفته أو ممكن الاتجاه للمجلس كما يمكن المرور لغرفة السايق من أمام المجلس للسيارات مباشرة .. فيه هبوطات للزراعة يمين ويسار وتغطي تانكي الماي لكن تركته واضح لمعرفة محتويات المنطقة هذي .. بايب الحكومة ينعمل له مدخل عبر بايب كبير من العداد خلال الحائط للتانكي وبايب الدنكر ينزل من فوق سطح المجلس للخزان ووقت صب المياه السواقين لازم موجود منهم واحد يساعد ويسهل
https://i.imgur.com/kDM5yEl.png
اللي فوق شغل ساعة تقريباً اليوم الصبح أثناء متابعة السوق التعبان اليوم .. وصج استغرب استشاريينا ياخذون فترات طويلة بانتاج هندسي سيء للغاية
سويت قطاع طولي يقطع الدرج اللي نازل جنب المطبخ الخارجي ويوضح الواجهة الخلفية مع النوافذ للبيسمنت ولباقي البيت مع مستويات الأرض خارج وداخل البيت .. ما حطيت أرقام لكن الارتفاعات موجودة عندي وفي مقياس الرسم الطبيعي .. خط الصفر يبين طالع من الأرض وهذا يعادل أعلى نقطة في الشارع الخارجي صوب مدخل البيت وباقي المستويات وضحتها قبل .. بندفن من ناتج الحفر ولازم نوفر الدفان جانباً وجيد إن الأرض اللي مقابلة صالة البيت ملك لأهل صاحب البيت وهي فاضية
ضفت قلاس بلوكس للحمامات في الزاوية اليمين حتى اوزن الواجهة وحتى اسمح بنور الغروب ينور الحمامات ذي وبتكون بارتفاع 1.7 متر من الأرضية وفوق ارتفاع أي شخص عادي بعدين القلاس بلوك ما يسمح بالرؤية
https://i.imgur.com/deraVUw.png
توضيح من اليسار الدرج اللي يودي للحوش جهة الصالة 19 عتبة كل وحدة بارتفاع 15 سم ويساره تدرج الحديقة في مستوى البيسمنت والحائط الحامي جنب الدرج من أعلى ويسار كلش السور مع أساسه .. خط الارضية واضح والمفروض اواصله واوضح التربة تحت الأرض .. يعني اللي عارف للاظهار الهندسي يعذرني سكتش توضيحي مب رسم هندسي دقيق .. يمين شوي تجينا دريشة المجلس تحت مرتفعة شوي بسبب الكراسي وراها وبعدين الباب قزاز بعد متصل بها .. فيه دريشة صغيرة تحت الدرج للمخزن الصغير وبعدين باب قزاز كبير يبين ورا الدرج النازل من المطبخ هذا الباب للصالة الكبيرة ويطل على الحديقة أو حوض السباحة أو الشلال .. أقصى اليمين ممكن نسوي مخزن مناسب وباب غرفة الخدم مقابل هذا الحائط المصمت ووراه أكيد دفان وزراعة وفوقه ليوان المطبخ وبعدين الزراعة اللي ورا البيت جهة الحوش
أقدر احرك البيت جهة اليمين 40 سم واستفيد مساحة جدام مدخل الصالة .. وباسوي مقترح ثاني لهذا الشيء .. 40 سم بالضبط نص عرض الدرج اليسار
أكيد التخطيط يطلبون لوفر المنيوم عازل لرؤية الدرايش اللي فوق الرؤية تكون موجهة للحوش الخلفي فقط وهو منظر جميل بإذن الله .. ممكن نسوي اللوفر جهتين النص العلوي لأعلى يفتح والنصف السفلي للأسفل .. الارتفاعات لكل دور 4 متر الا البيسمنت 3.3 متر .. وهذا مطابق 100% لشروط التخطيط بارتفاع اجمالي 14.5 متر من مستوى الصفر في الشارع
بالتركيز على هذي المنطقة إحنا بالضبط قدام باب غرفة الخادمة تحت في البيسمنت ونشوف جهة حائط البيسمنت للصالة الكبيرة والدريشة مفتوحة على حوض السباحة أو الحديقة الخارجية مثل ما نحب .. شنسوي لو نبي نعزل غرفة الخادمة 100% عن المحيط السفلي وباقي البيسمنت .. ببساطة نسوي درج حلزوني نازل من المطبخ فوق للغرفة وتستوي الخادمة محصورة حركتها في حيز المطبخ الخارجي وغرفتها تحته .. والدرج الواضح هذا يخدم الغرضين غرض نزول أي حد لحوش البيسمنت من جهة المطبخ الخارجي وغرض نزول الخادمة لغرفتها .. نقدر كذلك لو حبينا نكنسله ونسوي الحلزوني وبيكون ما يعيق الرؤية للحديقة وهذا إعاقته بسيطة وزاوية غرفة الخادمة قبل نهايته وهي أصلاً .. عائقة قليل .. كما نقدر نقلل المساحة الزجاجية تحت ونسحبها يسار لتكون مع نهاية الدرج قبل النهاية بخمس عتبات تقريباً .. وعندنا دريشة خلفية لجلسة البيسمنت فبتكون المساحات الزجاجية كافية
https://i.imgur.com/oVtpBPp.png
مجرد خيارات ثانية لتسهيل الاختيار للمالك