مراجعة التصاميم المعمارية وابداء الملاحظات عليها (محدث)

قبل لنروج حق بقية الأدوار خلوني اركز على الدور الأرضي وعلاقته بالحوش وبابدأ بمقدمة البيت يسار جهة المجلس الداخلي وباب الحوش هنا بعرض 3.8 متر .. أحواض الزراعة 1.4 متر ولازم لهم على الأقل طابوقة حماية صوب السور تستوي صافية 1.2 وهي كفاية لأكبر الأشجار وممكن نصغرها شوي لو حبينا حتى 80 سم كفاية

إستوى عندنا مكان لوقوف سيارتين للزوار أو ممكن نستغله في المستقبل بعمل مظلة لسيارتين لو احتجنا

المجلس على يساره جهة الشرق وضروري تنفتح دريشة في هذي الجهة حرام نخلي بس دريشة للواجهة الشمالية فقط

https://i.imgur.com/xMzOCbL.png

يمكن انا افكر بصوت مكتوب واضيف بعض التحسينات ولا اسميها تعديلات

المدخل وسعته جهة العمودين داخل واستوى من طرف الدرج الخارجي للباب الداخلي 3.5 في 4.1 والصالة المثمنة ممكن نخليها نازلة 10 سم ونشطب ارضيتها غير أما بباركيه أو سجاد فخم ومريح ولو حبينا نسويها حميمية أكثر ممكن نخلي الكراسي مصفوفة بطريقة دائرية وتترتب في أطراف نزول الجلسة

باجربها بالرسم إن شاء الله

نسيت اذكر اضافة باب قزاز شفاف حتى يحمي المدخل من الغبار والصوت والهواء والحرارة .. يو بي في سي واللي يشوف تصميم الاستشاري السابق بيلاحظ الفرق وهذي أشياء لازم ننتبه لها لأثناء التصميم لأن التصميم خطة نمشي عليها وتذكير لنا قبل ليكون وثيقة عقد رسمية للاتفاق

استوى أحلى التصميم بعد عمل الجلسة دائرية وتنزيلها 25 سم بعتبتين كل عتبة بارتفاع 125 مم نفس ارتفاع عتبات المدخل .. في هالحالة نقدر ننزل الدرايش لحد 50 سم من حافة الأرضية المرتفعة وراء الكراسي لأن الكراسي بتكون نازلة شوي .. ونقدر نختار سجادة مصنعة لهذي الدائرة بنقوشات معينة .. وعلى اليمين وسعت الطبيلة مترين حتى توقف السيارة بزاوية بسيطة لسهولة الدخول والخروج ونقدر نسويها بواجهة خرسانية وسقف معدني مخفي

https://i.imgur.com/nmkZaUm.png

قطر الدائرة 5.6 متر لكن بعد عين الجالس عن التلفزيون 4.86 مثل ما هو موضح وهو بعد مثالي حتى للبقية .. نرتفع شوي فوق جهة بيت المصعد والغرفة اليمنى جنبه .. صغرت قوس المدخل للغرفة من غرفة الملابس لمتر وسويت مقابله دريشة بنفس المقاس وممكن نخليها من الأرض وتطل على الحديقة وراء .. توزيعة الحمام اشوفها مثالية للثلاث قطع وهي المطلوبة .. غرفة الملابس كبتها يفترض يكون عمقه 10 سم أقل من الموجود الحين وهو 55 سم حتى يكون برواز الباب مناسب وله مكان .. والا نصغر عرض الباب شوي .. الكبت الجانبي بعمق 75 سم وهو شوي اوفرسايز لكن مناسب مثل ما عرفت من الخزائن الأمريكية ومسوي هذا العمق عندي وطلع مريح .. اللي في المدخل ممكن نخليه 50 سم أو ندمج معاه تسريحة أفضل بما انه طويل في العرض 3.1 متر

https://i.imgur.com/aEMpWLj.png

نافورة بالضبط في منتصف الطريق بين الباب والمصعد أو طاولة دائرية وعليها انارة قوية من السقف وفوقها نبات ظل أو مزهرية .. الأعمدة جدام المصعد صغرتهم وكررت ثالث مثلهم يحمل التقاء جسور غرفة الطعام العائلية

القسم اليسار هنا موضح مع الملحق .. الغرفة بتكون للخادمات ونقدر نفتح لها باب على ممر الملحق مكان الدريشة الطويلة المقابلة قوس المدخل

https://i.imgur.com/nPMRYHy.png

تحسينات كثيرة صارت للدور الأول ومع توزيع الأثاث وتوقع طريقة الاستخدام تبين لنا مساحات قابلة للتعديل والتطوير وعلى أساسها بيكون الديكور وبيكون توزيع الانارة والكهرباء

هنا وضحت ازالة البروزات حول النوافذ وكذلك اضافة طبقة خارجية بسمك 10 سم من ألواح السيبوريكس تعطينا عزل مناسب ولو حبينا عزل ممتاز نضيف تحتها طبقة بوليستيرين 5 سم أو 3 سم .. ما بنحتاج بلاستر وتكلفة السيبوريكس توصل ما يقارب 70 ريال للمتر المربع والبوليسترين ممكن 10 ريال أو أقل شوي .. بنفس الوقت بيعطينا تجويف مناسب للنوافذ بين 30 سم للنظام الأول و 35 سم للنظام الثاني

https://i.imgur.com/8IeDl0p.png

كبرت منطقة غرفة النوم الرئيسية وأظهرتها بالألوان ممكن تبين أوضح ووضحت حواليها حتى نعرف علاقة الفضاءات ببعض

مدخل الغرفة كان من الأساس باب صفاقتين 120 سم .. هذا مزعج وفيه فراغات وصعب ينضبط .. وفوق هذا معرقل التوزيع للصالة لو بنسوي جلسة تلفزيون حولته لباب جانبي والجلسة اقترحت تكون مكتب وممكن نحط تلفزيون مقابله للمباريات وغيرها .. التزمت بخيار الأقواس والأعندة بس صغرتها عن قبل .. خيار ثاني أشوفه بيطلع أفضل لو ركبنا بيبان .. غرفة النوم بتستوي بعيدة عن أي ضوضاء والتسريحة وغرفة الملابس ودورة المياه بيستوون معزولين بباب وبيكون الاستخدام أفضل

https://i.imgur.com/MK9D9Ng.png

الاستشاري حاط مقترح تكييف سبلت واللي جنب الدريشة كلش ما يركب ( مكانه غلط ) وانا اقترح تركيب دكت سبلت المكينة في التسريحة والسقف بيكون نازل وراء جلسة التسريحة قبل باب غرفة الملابس ومستمر لغرفة الملابس الحمام وباقي التسريحة بيكون سقفهم بكامل الارتفاع بدون جبس ونيتي ادخل نور طبيعي لهذي المنطقة من السقف المائل .. بيكون منور طويل من 3 صفوف طوب زجاجي مقابل جنوب يعطينا نور من فجر للمغرب وباوضح تفاصيله لاحقاً

مكان السرير وضحت عليه اسكتش لكيفية السقف بيكون من الأطراف سيدة وبارتفاع 3 متر ومن الوسط مرتفع بالتدريج لغاية 5 متر أو حولها بنشوفه بوضوح في القطاع

استغليت البلكونة اللي ورا المكتب بعمل باب عريض زجاج ينفتح لها لترتيب النباتات المتسلقة واللي بتنزل على المدخل بشكل حلو ان شاء الله .. كذلك نقدر نخلي المثمن اللي فيه السرير نازل شوي ونخلي أرضيته سجاد أو باركيه مع إني افضل السجاد لكامل الغرفة ما عدا الحمام طبعاً .. نقدر نركب مكان السرير لون غامق مغاير لباقي الغرفة