مراجعة التصاميم المعمارية وابداء الملاحظات عليها (محدث)

تركيز على منطقة السقف الحائط اللي ما اكتمل هذا بيكون توسعة صالة البنتهاوس لو احتجناها والمالك متردد ما يبي يزيد بنتهاوس فوق .. نفس غلطتي عيالي كانوا صغار وكبر الكبير وتزوج وتمنيت لو مكبر البنتهاوس لغرفتين وصالة أقل شيء له

https://i.imgur.com/dlcpUGP.png

ممكن نرفع عنق السقف المايل 60 سم وتكون عندنا مسافة لصفين طوب زجاجي أو 3 من حجم 20 ونترك فكرة المناور لأنه بيكون طولي وما بيشوه منظر السقف المايل والقرميد .. حتى التغطية البارزة بتكون نفس القرميد بس سويتها غير حتى تبين .. المنور لسقف الدور الأول يبين شكله حلو ومقترح الجبس والتكييف لازم له قرار حتى يتم التصميم على هذا الأساس .. انا بس تسهيل على المالك حتى يشوف شالأفضل له

مساحة السقف كانت قبل 46 متر لبيت الدرج مع غرفة الخزان زدناها 104 ل 150 متر وسوينا شقة متكاملة لأحد الأبناء من غرفتين وصالة وبانتري وجلسة سطحية لو حابين تفتح شرق أو غرب كل اللي نسويه نغير مكان تانكي الماي .. في الوضع الحالي تنفتح غرب

https://i.imgur.com/Wl0MeWw.png

الغرفة الصغيرة جنب اللفت وفوق الدرج النازل ممكن نستغلها مخزن أو بانتري بس لازم نحدد قبل حتى نجهزها

الزيادة 104 متر في 850 متر أو حول 12% ولا شيء يذكر عند مجهود البناء والتنسيق والمتابعة وعندنا التأسيس موجود وتشطيب البنتهاوس نقدر نخليه اقتصادي بس نستفيد منه لأي شيء مستقبلي والا حاضر .. نقدر نسوي غرفة رياضة مؤقتة لحين استخدامها أي استخدام أو غرفة خدم أو مخزن

الساحة المقابلة للجلسة فوق السطح ممكن عمل باربيكيو فيها وبرغولا خشب ولو نبي ساتر مشربية جي ار سي أو خشب على الجنب نقدر نسوي .. بسهولة نقدر نركب مغسلة خارجية للباربيكيو لقرب الحمام للتمديدات والتصريف

من رايي كثرة القرميد حول سقف البيت ما نحتاجها والمخطط الأخير أزلت الأجزاء اللي فوق سور السقف خليت بس اللي في سقف الواجهة .. وسويت تفاصيل كثيرة بس ان شاء الله بكرة انزلها

عدلت الارتفاع والسقف للبنتهاوس خليته عادي بيطلع أحلى وأوفر حتى ورفعت قاعدة أو رقبة سقف مجوعة دورة المياه والتسريحة وغرفة الملابس الرئيسية حتى اقدر اوفر مناور جانبية طوب زجاجي من صفين 30 في 30 أو ثلاث صفوف 20 في 20 .. صورت اللي في البيت وارسلتها للمالك ومسوي طريقة مشابهة بس من صف واحد وهذي بتطلع أفضل بكثير وبتغنينا عن الفتح في السقف المايل

https://i.imgur.com/LRyvCY8.png

عندنا مساحة معتبرة تحت تاج المدخل أو سقف المدخل المايل بارتفاع متدرج حول مترين ونص كافية لتكون مخزن صغير بس ينعمل لها باب ألمنيوم أو فتحة ونخزن فيها أي شيء زايد ما نحتاجه ونحتاج حمايته كعدة تنظيف السقف أو هوزات لغسيل السقف أو عدة زراعة سقفية وحتى خشب وفحم الباربيكيو الخارجي

على اليمين لو دققنا يبين لنا خيال شخص خليت طوله 181 سم وهو يمر تحت امتداد الغرفة الصغيرة فوق وجنب المصعد المخصصة ل بانتري أو مخزن .. الأقواس في جسم بيت المصعد عبارة عن تجويفات بعمق 10 سم نقدر نركب فيها انارة سواء في القاعدة تحت أو من فوق في القوس ولو حبينا نحط ارفف زجاج حتى لو بارزة 7 سم ممكن تحميها قبضة الدرابزين وتكون كافية لإصيصات وفريمات صور وفي مستوى رؤية الإنسان

ما وضحت درايش الدرج وهي موضحة في الواجهة والمفروض تنوزن هنا وواضح إستوت عندنا منطقة تخزين تحت الدرج في الدور الأرضي ولازم تترتب مع شركة المصعد ممكن يكون لهم احتياج لباب خلفي للصيانة

مناور منطقة دورة المياه ما شاء الله كافية وبتنور المنطقة داخل من أول الصبح للمغرب خصوصاً بيكون عندنا خط طويل في الجهة الجنوبية اللي ما تبين ألحين ومقابلة الصالة

القطاع الطولي الثاني بيمر في وسط الغرفة المثمنة والصالة تحتها المثمنة وبيقطع التسريحة والحمام من النص تقريباً .. قربت اخلص دور السطح مع الأول بس باقي الأرضي وتفاصيل كثيرة بتاخذ مني وقت واعتبر نفسي في تحدي مع الاستشاري ومع نفسي حتى اخلص فكرتي كاملة قبل ليوقع المالك العقد أما يقتنع ويضمنها العقد أو يصدق كلام الاستشاري اللي يقول له مش العقد والتفاصيل بعدين

استمتعت بعمل هذا القطاع الطولي المار في منتصف سقف دورة المياه المائل وسقف المكتب العادي وسقف غرفة النوم المثمن .. خذ مني وقت وكان متعب شوي وللحين ما خلص باقي اكمل تفاصيل الدور تحت

خطوط البنتهاوس المستقيمة تبين وراء والسقف المايل طلع ارتفاعه من الداخل يوصل لما يزيد عن ستة متر لكن خط الجبس المتقطع الرصاصي بيكون على ارتفاع 5.6 وبيكون فيه كورنيش نازل على ارتفاع 2.8 متر وتحت الكورنيش بورسلان قطع كبيرة للحوائط وفوق صبغ مقاوم للرطوبة

https://i.imgur.com/SdnKt2Z.png

ينفع التكييف دكت سبلت أو مركزي صغير لهذي المنطقة لأن عندنا تجويف كافي للدكت الداخل من السقف وفراغ كبير بين السقف الانشائي والجبسي المستعار .. المركزي بيعطينا هواء خارجي نقي بأُكسجين وبيزيل الرطوبة وحسب نوعه دوم مواصفاته أعلى من حيث نقاء الهواء وبرودته وجفافه .. اللي على اليمين باب المكتب اللي يعتبر وسط بين الغرفة ودورة المياه وملحقاتها

تقريباً هذا مسار الدكت من السقف للداخل فوق الجبس موضح باللون الأزرق الغامق ومار للغرفة وبعدين واصل لبقية المكتب والحمام

https://i.imgur.com/y4uyv8p.png

الجزء اللي بيكون بسقف مستعار ودكت فوقه في التسريحة بسيط باوضحه على المخطط الأرضي وين جاي .. يعني باقي السقف بيكون بإرتفاع عالي وأكيد يحتاج انارة جانبية أو معلقة من السقف وفيه نوعيات ال اي دي وايد حلوة تجي معلقة على شكل حلقات