مراجعة التصاميم المعمارية وابداء الملاحظات عليها (محدث)

هذي صورة مقربة حق تفصيل هندسي يفترض يكون كامل بس هنا ناقص لأن اللي يستوي استعراض بدائل وتحسينات ووصف بالكلمات وهذي تكون المواصفات تتماشى مع الرسم .. لازم نذكر طبقات التشطيب هنا ونسوي مفتاح على جانب الخريطة حق الألوان .. أو نكتب على هذا التفصيل المكبر شالمواد خرسانة وطابوق وغيرها من مواد .. طبقات السقف تتكون من قرميد ( نوعيته وسعره ولو ممكن حتى بالإسم والصورة ) وطريقة تركيبه تنذكر في المواصفات أو حتى ممكن في الرسم لو حبينا

الدريشة ممكن تركب على بلاستر موضح هنا بس المفروض ينكتب أو تتركب على حواف رخام أو حجر وممكن نسوي لها تفصيل خاص .. هنا سلوب بسيط يبعد الماي عن حافة الدريشة .. التفاصيل والمواصفات مهمة لضبط الشغل وجودته حتى ما ندخل في مشاكل

فيه شيء مهم أغفلته انا وتذكرته قبل لا اطلع الصورة بس ما ضمنته الصورة وهو لازم نسوي أما شق طولي في طرف حافة تظليل السقف الخارجي حتى الماي الراجع ما يتعلق على السطح الافقي ويمشي للجدار ويلطخه من الخارج من توصل نقطة الماي وتحصل الشق البسيط واللي ممكن يكون بعمق 2 ملم أو 3 تعلق وتتجمع وتنزل بسبب وزنها على الأرض ولا تلطخ الجدار

https://i.imgur.com/vpoBjaz.png

وباتابع لاحقاً مع القطاع كامل لو اكتمل خلال الفترة القادمة

بالنسبة للتكييف هذا توضيح لمسار الدكت وهنا بعرض 40 سم وممكن نوصل ل 80 سم بدون تأثير على ديكور الجبس المقترح .. المنطقة اللي موضحة هي للمكينة الداخلية وبتكون على ارتفاع صافي 3 ونص متر هذا لو سوينا دكت سبلت لو سوينا مركزي المكينة بتكون فوق وهذا مسار الدكت موضح بالأزرق ومدخل الدكت وضحته قبل في المقطع الأخير

طبعاً بتكون فيه تفاصيل تكييف أكثر من مختصين التكييف وممكن نفتح فتحة تكييف بسيطة على دورة المياه والتسريحة وغرفة الملابس وممكن نكتفي بس بالتسريحة وتهوئة للحمام يدخل الهواء من خلال فتحة سقفية في غرفة الملابس ومنه للحمام ومنه للخارج

https://i.imgur.com/v0EXPEg.png

لتوضيح فكرة المناور السقفية في دورة المياه وغرفة المكياج كذلك هذي الصورة عندي في الصالة على ارتفاع 3 متر وشوي يمكن 20 .. للبيت هذا ارتفاع حافة الطوب الزجاجي السفلية 4.4 متر والعلوية 5.1 وسطوع الشمس على الطوب الزجاجي في غالب الوقت غير مباشر .. وهذا شيء متخوف ما يكون حلو ويعكس جمالية الزجاج وينشر النور داخل الحمام .. ممكن نصغر الامتداد الخرساني عليه لحدود 10 سم .. ألحين هو 50 سم وفي جهة من السطح ما تبين يعني خسارة على لا شيء

اللي في الصورة الوقت كان 8 ونص اليوم الصباح وجهة الجنوب نفس وضعية هذا البيت بس انا عندي صف واحد بارتفاع 30 سم أو يمكن شوي أقل بين 30 و 25 واللي بياخذ فيه أنواع والوان كذلك أشوف أحلاها اللي تجي فيها فقاعات هذي تتوهج نور مع سطوع الشمس عليها وتنشر النور داخل

https://i.imgur.com/0VEa9jG.jpg

خلصت الرسمة وأكيد فيها نواقص بسيطة قبل فاتني اوضح إن أرضية دورة المياه نازلة للتمديدات وبعض التفاصيل مهما سويت لا بد انسى شيء والا اخطي في التنسيق بين باقي المخططات يعني اسوي تعديل على مخطط وانسى الباقي

مثل ارتفاع الأعمدة احتديت اعدله كم مرة حتى اوفر ارتفاع مناسب للجبس ويكفي للتكييف بدكتات أو جبس كم طبقة لو حبينا .. باقي تفصيل الانارة وأماكن الكهرباء والمفاتيح الكهربية .. وهذي نستخدم فيها توزيع الأثاث كأساس ونسوي واجهات خاصة لكل غرفة وممكن تتوضح على المخطط الأرضي مثل ما يسوون المكاتب في العادة بس مع الواجهات أفضل بكثير

ابدأ بتذكير بالمخطط الأرضي وخط القطع اللي مار فيه حتى نعرف شيوضح لنا .. خط القطع هو الأسود المار بالضبط وسط الصالة ومار بعد الباب حتى يوضح منطقة المصعد والدرج اللي للحين ما ضفتهم

https://i.imgur.com/7N4lnsJ.png

نفس خط القطع مار لنا في الدور الأول

https://i.imgur.com/E8vttQp.png

وهذا الرسم المقطعي كامل .. باركز عليه منطقة منطقة ان شاء الله للوضوح

https://i.imgur.com/iaGVXyL.png

هذي كلها امور ضروري نركز عليها في التصميم بشكل مبدئي ونقرر شنبغي ما يلعب علينا استشاري يمشي شغله بكلمة كل شيء يتعدل بعدين .. مثلاً السقف لو غطى النوافذ الجانبية في الجهة الغربية واللي هي داخل السطح ما تبين ما بنستفيد وكذلك الحال للجهة الجنوبية المقابلة للبنتهاوس

البنتهاوس موضح بخطوط فقط لأن الدرايش على جنب ووراء هذي جهة شمالية وتطل على سطح في الغالب كله خدمات فوق الا جهة الصالة المفتوحة بدريشة غربية هذي منور وجدامها جلسة باربيكيو وقد يكون فوقها عريش أو برغولا

الصالة نازلة عن باقي الأرضية عتبتين 25 سم يعني كل عتبة 12.5 سم مريحة .. درايشها سويتها من الأرضية النازلة بارتفاع 60 سم لأن الكراسي وراها حافة مرتفعة تحدد موقعها وممكن اللي يلتفت يشوف لين قاعدة الدريشة .. ومثل ما هو موضح في تجويف الدريشة اليمين هذي فريمها 7 سم يفترض تكون يو بي في سي نقدر نسوي ستاير خشبية في التجويف للدريشة .. هذ مقوسة من الخارج لكن التجويف الداخلي مستطيل وكان واجب أوضحه في دريشة الواجهة المائلة جنبها .. حتى توضيحي لها هنا غير دقيق ما يبين الميلان

https://i.imgur.com/9BdHuBX.png

حتى بقية الكراسي ما وضحتها بسبب الميلان شغلة وتحتاج 3 دي أفضل .. البركة في الموجود والعتبات تبين وبتكون على شكل قوس ربع دائرة والأرضية النازلة دائرة كاملة وسط المثمن

الكرسي اليمين ممكن يجي وراه سويج كهربة والجدار الطولي جنب الكرسي اللي قرب التلفزيون بعد يناسب حق مفتاح انارة وأكيد للتلفزيون لو سوينا طاولة رخام ثابتة وخلالها سوينا توصيل الكهربة والكيبل أو الدش بيكون هذا مكانه ومكانه مناسب لأنه يلف لجهة طاولة الطعام اللي المفروض بعد اوضح حتى لو خيالها وراء وهي بتكون تقريباً لمنتصف التلفزيون

هذا تكبير وتوضيح للزاوية لو حطينا انارة خارجية عملنا لها حفر في السيبوريكس هنا موضح بعمق 4 سم وارتفاع 15 سم وفي أعلاه زاوية ألمنيوم أو بلاستيك وداخلها شريط ال اي دي يكون ما نشوفه بس نشوف النور نور مخفي بدون رؤية المصدر وينور بس الحفر .. ممكن نسويه حول البيت يعطي نور هادي ومنظر حلو مبتكر

وضحت حدود الستارة الخشبية وسويج الكهرباء .. نقدر نحط في الزوايا للجدران المثمنة داخل فيه مسافة حول 50 سم كافية لإصيصات زراعة وراء الكراسي حتى ممكن تكون متسلقة

https://i.imgur.com/qgTjJPg.png

هذي صورة شوي أوسع للصالة والمدخل جنبها ووضحت الدرج والمصعد زوايا جدرانه جات وراء الأعمدة مباشرة

https://i.imgur.com/rDCdE4g.png

النافورة أكيد تصميمها بيكون غير وممكن نستعيض عنها بطاولة عليها حوض سمك وممكن طاولة دائرية وورد فوقها

عكست القطاع بدال ما تشوف جهة داخل البيت ألحين تشوف جهة الحائط الخارجي وهذي النتيجة

https://i.imgur.com/Ju7Lp7F.png

في الصورة السابقة اضطريت اخلي بروز السقف للغرفة المثمنة كما هو لأن طلع عندي بروز الواجهة ما يغطيه مثل ما هو واضح .. لكنه يغطي الجزء صوب دورة المياه وهذي صورة مكبرة لدورة المياه جهة الشاور والكرسي والمغسلة .. وحطيت خيال رجال واقف بالأزرق وواحد قاعد بالأصفر بس ما يبين واضح دقيق الملاحظة بيشوفه

مقترح كورنيش الجبس بس 10 سم فوق فتحة الباب 2.5 متر من الأرضية وبيكون فاصل بين نص الجدار العلوي اللي بيكون صبغ مقاوم للرطوبة وما تحت الكورنيش بتكون سلابات بورسلان كبيرة موجودة 2.5 في 3.5 متر وممكن تجي بالطول بدون قص مع إن قصها بسيط .. الشاور المطري واضح وضروري جهة الكرسي يسار نركب شاور يدوي ( تلفون ) وهذا ما وضحته .. يسار مبين الباب اللي يدخل على غرفة الملابس الطوالية من خلف جلسة التسريحة وسقف هذا الجزء نازل حتى يغطي الدكت أو وحدة التكييف الداخلية لو ركبنا دكت سبلت

https://i.imgur.com/v0ZaXMh.png

غيرت صبغة الجالس حتى يبين بس فرطت رجله ما انصبغت .. كاسر خاطري كأنه شاري أسهم بلدنا ومتورط

موضح مكان التجويفات بعمق 10 سم للصابون والشامبو والاكسسوارات أكيد يبي لها تخطيط واضافة صوب المغاسل نقدر نركب مثل ما هو موضح بوكس جانبي بعمق 15 سم وبباب وبارتفاع 120 سم وعرض حسب المتوفر والا لازم نوضح تجويفه في المخطط الأرضي .. المراية ببرواز خشب وممكن نخليها بارزة شوي ونحط اضاءة تحتها مخفية وحلاتها اضاءة بلون مزاجي Mood Ambient Lighting وجنب المراية عندنا مكان لإضاءة مركزة جانبية تنور الوجه .. السبوتات من فوق حلاتها معلقة بسلك مشدود من حايط لحايط وبارتفاع معقول فوق الجبس حتى تكون قريبة للتغيير 3.4 متر مناسب وتكون نقطية فوق الشاور وفوق كرسي الشاور جدامه بشوي وفوق المغاسل تنور وسط كل مغسلة .. تستوي عندنا 4 أنواع من الإضاءة بأربع مفاتيح .. ولو نبي نضيف مود لايتنغ حق التجويفات تجي مع مراية المغسلة ممكن وللمود لايتنغ حلاتها لونين أقل شيء أو ال اي دي متلون بعدة الألوان

https://i.imgur.com/lJlv4Jp.png